ମହାନୁଭବ ପ୍ରଧାନମନ୍ତ୍ରୀ ଆଣ୍ଟୋନିଓ କୋଷ୍ଟା, ବିଶିଷ୍ଟ ପ୍ରତିନିଧିଗଣ ଏବଂ ଗଣମାଧ୍ୟମର ସଦସ୍ୟବୃନ୍ଦ, ପ୍ରଥମେ, ଗତ ସପ୍ତାହରେ ପର୍ତ୍ତୁଗାଲରେ ସଂଘଟିତ ଭୟାବହ ବନାଗ୍ନିରେ ପ୍ରାଣ ହରାଇଥିବା ଲୋକମାନଙ୍କ ପ୍ରତି ମୁଁ ଗଭୀର ଶୋକ ଓ ସମବେଦନା ଜଣାଉଛି । ଏହି ଦୁଃଖଦ ଘଟଣାରେ ପ୍ରାଣ ହରାଇଥିବା ଲୋକ ଏବଂ ସେମାନଙ୍କ ପରିବାରବର୍ଗଙ୍କ ସହ ଆମେ ସମଦୁଃଖୀ । ବନ୍ଧୁଗଣ, ଆମ ଦୁଇ ଦେଶ ମଧ୍ୟରେ ଗଭୀର ଐତିହାସିକ ସମ୍ପର୍କ ଏବଂ ସୁଦୃଢ଼ ଆର୍ଥିକ ତଥା ଜନ ସମ୍ପର୍କ ରହିଛି । ତେଣୁ ମୋତେ ଏକଥା ଭାବି ଆଶ୍ଚର୍ଯ୍ୟ ଲାଗୁଛି ଯେ କୌଣସି ଭାରତୀୟ ପ୍ରଧାନମନ୍ତ୍ରୀଙ୍କ ଦ୍ୱାରା ଏ ପର୍ଯ୍ୟନ୍ତ ଦ୍ୱିପାକ୍ଷିକ ଗସ୍ତ କାହିଁକି ଘଟିନଥିଲା । ତେବେ, ମୁଁ ସନ୍ତୋଷ ବ୍ୟକ୍ତ କରୁଛି ଯେ ମାତ୍ର ଛଅ ମାସର ଅବଧି ମଧ୍ୟରେ ଭାରତ ଓ ପର୍ତ୍ତୁଗାଲ ମଧ୍ୟରେ ଏହା ଦ୍ୱିତୀୟ ଶିଖର ବୈଠକ ।
ଏଭଳି ଉଷ୍ମତା ଓ ସ୍ନେହର ସହ ଏବଂ ଏତେ ସ୍ୱଳ୍ପ ସମୟସୀମା ମଧ୍ୟରେ ପ୍ରଧାନମନ୍ତ୍ରୀ କୋଷ୍ଟା ମୋତେ ସାଦର ଅଭ୍ୟର୍ଥନା ଜଣାଇଥିବା ହେତୁ ମୁଁ ବାସ୍ତବିକ କୃତଜ୍ଞ । ଗତ ଜାନୁଆରୀ ମାସରେ ପ୍ରଧାନମନ୍ତ୍ରୀ ଶ୍ରୀ କୋଷ୍ଟାଙ୍କୁ ସ୍ୱାଗତ କରିବାର ଅବସର ଆମକୁ ମିଳିଥିଲା । ତାହା କେବଳ ଦ୍ୱିପାକ୍ଷିକ ଗସ୍ତ ପାଇଁ ନୁହେଁ ବରଂ ପ୍ରବାସୀ ଭାରତୀୟ ଦିବସ ଉତ୍ସବ ଅବସରରେ ସେ ମୁଖ୍ୟ ଅତିଥି ରୂପେ ଯୋଗ ଦେଇଥିଲେ । ସମଗ୍ର ବିଶ୍ୱରେ ବସବାସ କରୁଥିବା ଭାରତୀୟ ବଂଶୋଦ୍ଭବଙ୍କ ମଧ୍ୟରେ ପ୍ରଧାନମନ୍ତ୍ରୀ କୋଷ୍ଟା ହେଉଛନ୍ତି ଶ୍ରେଷ୍ଠ ପ୍ରତିନିଧି । ବନ୍ଧୁଗଣ, ପ୍ରଧାନମନ୍ତ୍ରୀ କୋଷ୍ଟା ଓ ମୁଁ ଆଜି ଅନେକ ପ୍ରସଙ୍ଗ ଉପରେ ବିସ୍ତୃତ ଆଲୋଚନା କରିଛୁ ଏବଂ ତାଙ୍କ ଐତିହାସିକ ଭାରତ ଗସ୍ତ ପରଠାରୁ ହୋଇଥିବା ପ୍ରଗତି ସମ୍ପର୍କରେ ସମୀକ୍ଷା କରିଛୁ । ଆମର ଆର୍ଥିକ ସମ୍ପର୍କ କ୍ରମାଗତ ଭାବେ ଊର୍ଦ୍ଧ୍ଵମୁଖୀ ହୋଇଚାଲିଛି । ଗତ ବର୍ଷ ଦ୍ୱିପାକ୍ଷିକ ବାଣିଜ୍ୟ କାରବାରରେ 17 ପ୍ରତିଶତ ଅଭିବୃଦ୍ଧି ଘଟିଛି ଏବଂ ପର୍ତ୍ତୁଗାଲରୁ ଭାରତରେ ପ୍ରତ୍ୟକ୍ଷ ବୈଦେଶିକ ପୁଞ୍ଜି ନିବେଶ ଯଦିଚ ସ୍ୱଳ୍ପ, ତଥାପି 2016-17 ରେ ତାହା ଦ୍ୱିଗୁଣିତ ହୋଇଛି । ତେବେ ଆମ ଦୁଇ ଦେଶ ମଧ୍ୟରେ ବସ୍ତୁ, ସେବା, ପୁଞ୍ଜି ଓ ମାନବସମ୍ବଳର ପ୍ରବାହକୁ ବୃଦ୍ଧି ତ୍ୱରାନ୍ୱିତ କରିବା କ୍ଷେତ୍ରରେ ଯଥେଷ୍ଟ ସୁଯୋଗ ରହିଛି । ଏହି ପରିପ୍ରେକ୍ଷୀରେ ପର୍ତ୍ତୁଗାଲର ଆର୍ଥିକ ପୁନରୁତ୍ଥାନ ଏବଂ ଭାରତର ସୁଦୃଢ଼ ବିକାଶ ଆମ ଉଭୟଙ୍କୁ ମିଳିତ ଭାବେ ଅଭିବୃଦ୍ଧି ନିମନ୍ତେ ପର୍ଯ୍ୟାପ୍ତ ଅବସର ପ୍ରଦାନ କରେ । ବନ୍ଧୁଗଣ, ୟୁରୋପୀୟ ଉଦ୍ୟୋଗ ବାତାବରଣ ପର୍ତ୍ତୁଗାଲ ଏକ ସକ୍ରିୟ ରାଷ୍ଟ୍ର ଭାବେ ମୁଣ୍ଡ ଟେକିଛି ।
ଭାରତ ମଧ୍ୟ ଷ୍ଟାର୍ଟ-ଅପର ଏକ ବିଶାଳ ଓ ଚଳଚଞ୍ଚଳ କ୍ଷେତ୍ରରେ ପରିଣତ ହୋଇଛି । ଏହି ଷ୍ଟାର୍ଟ-ଅପ କ୍ଷେତ୍ର ଯୁବଗୋଷ୍ଠୀ, ଚିନ୍ତନ, ପ୍ରଯୁକ୍ତି, ଅଭିନବତ୍ୱ ଏବଂ ସୃଜନଶୀଳତାର ମିଶ୍ରଣ ଘଟାଇ ଆମ ସମାଜ ପାଇଁ ପର୍ଯ୍ୟାପ୍ତ ମୂଲ୍ୟ ଏବଂ ସମ୍ପଦ ସୃଷ୍ଟିର ପ୍ରଶସ୍ତ ଭୂଇଁ ସୃଷ୍ଟିକରେ । ତାଙ୍କ ଭାରତ ଗସ୍ତ ଅବସରରେ ପ୍ରଧାନମନ୍ତ୍ରୀ କୋଷ୍ଟା ଓ ମୁଁ ଭାରତ-ପର୍ତ୍ତୁଗାଲ ଆନ୍ତର୍ଜାତିକ ଷ୍ଟାର୍ଟ-ଅପ ହବ ସ୍ଥାପନ ସମ୍ପର୍କରେ ଆଲୋଚନା କରିଥିଲୁ । ଏତେ କମ ସମୟ ମଧ୍ୟରେ ତାହା ସାକାର ହେବାକୁ ଯାଉଥିବା ଜାଣି ମୁଁ ଅତ୍ୟନ୍ତ ପ୍ରସନ୍ନ । ପ୍ରଧାନମନ୍ତ୍ରୀ କୋଷ୍ଟାଙ୍କ ସହ ମିଳିତ ଭାବେ ଏହାର ମିଳିତ ଶୁଭାରମ୍ଭକୁ ମୁଁ ଅପେକ୍ଷାରତ । ସେହିଭଳି ଟିକସ, ପ୍ରଶାସନିକ ସଂସ୍କାର, ବିଜ୍ଞାନ, ମହାକାଶ, ଯୁବ ବ୍ୟାପାର ଓ କ୍ରୀଡା ଆଦି କ୍ଷେତ୍ରରେ ସ୍ୱାକ୍ଷରିତ ନୂତନ ରାଜିନାମା ଆମ ସହଭାଗୀତାର କ୍ଷେତ୍ରକୁ ସଂପ୍ରସାରିତ କରିଛି । ବିଜ୍ଞାନ ଓ ପ୍ରଯୁକ୍ତି କ୍ଷେତ୍ରରେ ଆମ ସହଯୋଗ ଦ୍ରୁତତର ହେବାରେ ଲାଗିଛି । ଅତ୍ୟାଧୁନିକ ପ୍ରଯୁକ୍ତି କ୍ଷେତ୍ରରେ ଆମ ସହଯୋଗକୁ ସମର୍ଥନ ଜଣାଇବା ସକାଶେ, ଆମ 4 ନିୟୁତ ୟୁରୋପ ମୂଲ୍ୟର ଏକ ମିଳିତ ବିଜ୍ଞାନ ଓ ପ୍ରଯୁକ୍ତି ପାଣ୍ଠି ଗଠନ ପାଇଁ ସହମତି ହୋଇଛୁ । ନାନୋଟେକ୍ନୋଲୋଜି, ସାମୁଦ୍ରିକ ବିଜ୍ଞାନ ଏବଂ ସାମୁଦ୍ରିକ ଗବେଷଣା କ୍ଷେତ୍ରରେ ପର୍ତ୍ତୁଗାଲର ଅଭିଜ୍ଞତାରୁ ମଧ୍ୟ ଆମେ ଅଧ୍ୟୟନ ପାଇଁ ଆଗ୍ରହୀ । ଦ୍ୱିପାକ୍ଷିକ ସହଯୋଗ ଓ ସମ୍ପର୍କ ବୃଦ୍ଧିର ଆଉ ଏକ କ୍ଷେତ୍ର ହେଉଛି ମହାକାଶ ବିଜ୍ଞାନ । ଚଳିତ ବର୍ଷ ପ୍ରାରମ୍ଭରେ ପ୍ରଧାନମନ୍ତ୍ରୀ କୋଷ୍ଟା ଯେତେବେଳେ ଭାରତ ଗସ୍ତରେ ଆସିଥିଲେ । ଏହି ନୂତନ ଚିନ୍ତନଟି ସୃଷ୍ଟି ହୋଇଥିଲା । ତେଣୁ ଆମେ ପର୍ତ୍ତୁଗାଲ ସହ ଆଟଲାଣ୍ଟିକ ଅନ୍ତରାଷ୍ଟ୍ରୀୟ ଗବେଷଣା କେନ୍ଦ୍ରରେ ଉଭୟ ମହାକାଶ ଓ ସାମୁଦ୍ରିକ ବିଜ୍ଞାନ କ୍ଷେତ୍ରରେ ସହଯୋଗ ଭିତ୍ତିରେ କାର୍ଯ୍ୟ କରିବାକୁ ଆଗ୍ରହୀ । ବନ୍ଧୁଗଣ, ଆମ ଉଭୟ ରାଷ୍ଟ୍ର ମଧ୍ୟରେ ସକ୍ରିୟ ଓ ବର୍ଦ୍ଧିଷ୍ଣୁ ଜନସମ୍ପର୍କ ରହିଆସିଛି । ପର୍ତ୍ତୁଗାଲରେ ବସବାସ କରୁଥିବା ଭାରତୀୟ ବଂଶୋଦ୍ଭବ ଏ ଦିଗରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରୁଛନ୍ତି । ପର୍ତ୍ତୁଗାଲରେ ଫୁଟବଲ ପାଇଁ ଏବଂ ବିଶେଷ ଶ୍ରଦ୍ଧା ରହିଛି । ପ୍ରଧାନମନ୍ତ୍ରୀ କୋଷ୍ଟା ସ୍ୱୟଂ ଜଣେ ଜଣାଶୁଣା ଫୁଟବଲପ୍ରେମୀ । ଆମ ଉଭୟ ରାଷ୍ଟ୍ରର ସମାଜକୁ ନିବିଡ କରିବାରେ ଏହା ଆଉ ଏକ କ୍ଷେତ୍ର ହୋଇପାରେ । ଆମ ସାଂସ୍କୃତିକ ସହଯୋଗର କ୍ଷେତ୍ର ପ୍ରସାରିତ ହେବାରେ ଲାଗିଛି । ଲିସବନ ବିଶ୍ୱବିଦ୍ୟାଳୟରେ ଆମେ ଭାରତୀୟ ଅଧ୍ୟୟନର ଏକ ଚେୟାର ସ୍ଥାପନ କରିଛୁ । ଭାରତୀୟ ଚଳଚ୍ଚିତ୍ରଗୁଡିକର ସବଟାଇଟଲ ପର୍ତ୍ତୁଗୀଜ ଭାଷାରେ କରାଯାଉଛି ଏବଂ ଆମ ଦୁଇ ପକ୍ଷର ଲାଭ ନିମନ୍ତେ ଗୋଟିଏ ହିନ୍ଦୀ- ପର୍ତ୍ତୁଗୀଜ ଶଦ୍ଦକୋଷର ବିକାଶ ଘଟାଯାଉଛି । ସେହିଭଳି 12000 ନଥିର ଡିଜିଟାଲ ସଂକଳନ ଆମ ସହ ବଣ୍ଟନ କରିଥିବାରୁ ମୁଁ ପର୍ତ୍ତୁଗାଲ କର୍ତୃପକ୍ଷଙ୍କୁ ଧନ୍ୟବାଦ ଜଣାଉଛି । ବନ୍ଧୁଗଣ, ଭାରତ ଓ ପର୍ତ୍ତୁଗାଲ ଆନ୍ତରାଷ୍ଟ୍ରୀୟ କ୍ଷେତ୍ରରେ ଦୁଇ ସୁଦୃଢ଼ ସହଯୋଗୀ ରାଷ୍ଟ୍ର । ଆପଣମାନେ ନିରବଚ୍ଛିନ୍ନ ଭାବେ ଜାତିସଂଘ ନିରାପତ୍ତା ପିରଷଦରେ ଭାରତର ସ୍ଥାୟୀ ସଦସ୍ୟତାକୁ ସମର୍ଥନ ଜଣାଇ ଆସିଥିବାରୁ ମୁଁ ପର୍ତ୍ତୁଗାଲକୁ ଧନ୍ୟବାଦ ଜଣାଉଛି । ସେହିଭଳି ବହୁପାକ୍ଷିକ ରପ୍ତାନି ନିୟନ୍ତ୍ରଣ ବ୍ୟବସ୍ଥା କ୍ଷେତ୍ରରେ ସହଯୋଗ ପାଇଁ ସାଧୁବାଦ ଜ୍ଞାପନ କରୁଛି । ସେହିପରି ପର୍ଯ୍ୟଟନ ଏବଂ ହିଂସାତ୍ମକ ମୌଳବାଦ ବିରୋଧରେ ଆମର ସହଯୋଗକୁ ନିବିଡ କରିବା ସକାଶେ ଆମେ ସଂକଳ୍ପବଦ୍ଧ । ଆପଣଙ୍କର ଭବ୍ୟ ସ୍ୱାଗତ ଏବଂ ମହାନ ଆତିଥ୍ୟ ତଥା ଆପଣଙ୍କ କର୍ମବ୍ୟସ୍ତତା ସତ୍ତ୍ୱେ ଆମ ଲାଗି ଅବସର ଦେଇଥିବା ହେତୁ ମୁଁ ପୁଣିଥରେ ଆପଣଙ୍କୁ ଧନ୍ୟବାଦ ଜଣାଉଛି ।
ମୁଇଟୋ ଓବ୍ରିଗାଡୋ । ଆପଣମାନଙ୍କୁ ଅଶେଷ ଧନ୍ୟବାଦ ।
PM @antoniocostapm & I held wide ranging talks. We reviewed the progress since his visit to India. Our bilateral trade and FDI has grown: PM pic.twitter.com/iFrQkPG3b2
— PMO India (@PMOIndia) June 24, 2017
Start-up sphere is an interesting space for cooperation. It is a great means to generate value and wealth for society: PM @narendramodi pic.twitter.com/FqH6QhsFAt
— PMO India (@PMOIndia) June 24, 2017
New agreements in taxation, science, youth affairs and sports outline the expanding scope of our partnership: PM @narendramodi pic.twitter.com/nnYAZprtjV
— PMO India (@PMOIndia) June 24, 2017
