ମହାମହିମ ରାଷ୍ଟ୍ରପତି ଆଲେକଜାଣ୍ଡର ଲୁକାଶେଙ୍କୋ
ବନ୍ଧୁଗଣ,
ଗଣମାଧ୍ୟମର ପ୍ରତିନିଧିମାନେ
ଭାରତରେ ରାଷ୍ଟ୍ରପତି ଲୁକାଶେଙ୍କୋଙ୍କୁ ସ୍ୱାଗତ କରି ମୁଁ ଆନନ୍ଦିତ । ଉଭୟ ରାଷ୍ଟ୍ର ଆମ କୂଟନୈତିକ ସମ୍ପର୍କର 25 ବର୍ଷ ପୂରଣ କରିବା ଅବସରରେ ସେ ଭାରତ ଆସିଛନ୍ତି ।
ଆମେ ପୂର୍ବରୁ 1997 ଏବଂ 2007ରେ ରାଷ୍ଟ୍ରପତି ଲୁକାଶେଙ୍କୋଙ୍କୁ ଭାରତରେ ସ୍ୱାଗତ କରିବାର ସୌଭାଗ୍ୟ ପାଇଥିଲୁ । ଏହି ଗସ୍ତ ଅବସରରେ, ମୁଁ ଆଶା କରୁଛି ଯେ ମହାମହିମ ଭାରତରେ ହେଉଥିବା ରୂପାନ୍ତରଣକୁ ଦେଖିପାରିବେ ଏବଂ ଅନୁଭବ କରିବାର ସୁଯୋଗ ପାଇପାରିବେ ।
ଆଜି ଆମ ଭିତରେ ବିସ୍ତୃତ ପ୍ରସଙ୍ଗ ଏବଂ ଅଗ୍ରଗାମୀ ଆଭିମୁଖ୍ୟ ନେଇ ଆଲୋଚନା ହୋଇଥିଲା । ସେସବୁ ଆମ ଭିତରେ ଅଢ଼େଇ ଦଶନ୍ଧି ଧରି ରହିଥିବା ନିବିଡ଼ ସମ୍ପର୍କକୁ ପ୍ରତିଫଳିତ କରିଥିଲା । ଦ୍ୱିପାକ୍ଷିକ ପ୍ରସଙ୍ଗ ଏବଂ କ୍ଷେତ୍ରୀୟ ତଥା ବିଶ୍ୱସ୍ତରୀୟ ଗତିବିଧି ସମ୍ପର୍କରେ ଆମେ ମତ ବିନିମୟ କରିଥିଲୁ । ଆମେ ଆମ ଭାଗିଦାରୀର ଆଧାର ସମୀକ୍ଷା କରିଥିଲୁ । ଆମେ ଏହାକୁ ଆହୁରି ବ୍ୟାପକ କରିବା ଲାଗି ଉପାୟ ଏବଂ ଉପକ୍ରମଗୁଡ଼ିକ ବିଷୟରେ ଆଲୋଚନା କରିଥିଲୁ । ସହଯୋଗର ସମସ୍ତ କ୍ଷେତ୍ରରେ ବ୍ୟାପକ ଆଲୋଚନା କରିବା ଲାଗି ଆମ ନିଷ୍ପତ୍ତି ନେଇଥିଲୁ ।
ଆମ ଲୋକମାନଙ୍କ ମଙ୍ଗଳ ପାଇଁ ଆମର ଭାଗିଦାରୀକୁ ଉଚ୍ଚତର ସୋପାନକୁ ନେଇଯିବା ଲାଗି ରାଷ୍ଟ୍ରପତି ଲୁକାଶେଙ୍କୋଙ୍କଠାରେ ରହିଥିବା ଆଗ୍ରହ ଏବଂ ଉତ୍ସାହ ମୁଁ ଦେଖିପାରିଲି ।
ଅନ୍ତତଃ, ଆମ ଅର୍ଥନୈତିକ ସମ୍ପର୍କକୁ ଆହୁରି ବିବିଧରୂପ ଦେବା ଲାଗି ଆମ କାର୍ଯ୍ୟ କରିବୁ । ଆମ ଭିତରେ ପ୍ରାକୃତିକ ପରିପୂରକ ସମ୍ପର୍କ ସ୍ଥାପନ କରିବା ପ୍ରତି ଧ୍ୟାନ ଦିଆଯିବ ।
ଆମର କମ୍ପାନୀଗୁଡ଼ିକୁ କ୍ରେତା-ବିକ୍ରେତା ସମ୍ପର୍କର ଊଦ୍ଧ୍ୱର୍କୁ ଯାଇ ଆହୁରି ନିବିଡ଼ ସମ୍ପର୍କ ପାଇଁ ଆଗେଇ ଆସିବା ଦରକାର । ଔଷଧ ପ୍ରସ୍ତୁତି, ତୈଳ ଏବଂ ଗ୍ୟାସ, ଭାରୀ ଯନ୍ତ୍ରାଂଶ ଏବଂ ସରଞ୍ଜାମ ଆଦି କ୍ଷେତ୍ରରେ ପ୍ରଚୁର ବ୍ୟବସାୟିକ ଏବଂ ନିବେଶ ସୁଯୋଗ ରହିଛି । ଗତବର୍ଷ, ଔଷଧ ପ୍ରସ୍ତୁତି କ୍ଷେତ୍ରରେ ଭାରତୀୟ କମ୍ପାନୀ 3ଟି ଯୌଥ ଭାଗିଦାରୀ ପ୍ରକଳ୍ପ ପ୍ରତିଷ୍ଠା କରିବା ଭଳି ସକାରାତ୍ମକ ପଦକ୍ଷେପ ନେଇଥିଲେ । ଟାୟାର, କୃଷି-ଶିଳ୍ପ ଯନ୍ତ୍ରାଂଶ ଏବଂ ଖଣିଜ ସରଞ୍ଜାମ ନିର୍ମାଣ କ୍ଷେତ୍ରରେ ଭାଗିଦାରୀର ସମ୍ଭାବନା ମଧ୍ୟ ରହିଛି । ସେହିପରି ଭାରୀ ନିର୍ମାଣ ଯନ୍ତ୍ରାଂଶ ନିର୍ମାଣ କ୍ଷେତ୍ରରେ ଭାରତରେ ବର୍ଦ୍ଧିତ ଚାହିଦା ରହିଛି ଏବଂ ବେଲାରୁଷ ନିକଟରେ ଔଦ୍ୟୋଗିକ ସାମର୍ଥ୍ୟ ରହିଛି ।
ମେକ୍ ଇନ ଇଣ୍ଡିଆ ଅଭିଯାନ ଅଧୀନରେ ପ୍ରତିରକ୍ଷା କ୍ଷେତ୍ରରେ ବିନିର୍ମାଣ ଏବଂ ମିଳିତ ବିକାଶକୁ ମଧ୍ୟ ଆମେ ପ୍ରୋତ୍ସାହନ ଯୋଗାଇଦେବୁ । ବେଲାରୁଷ କେତେକ ନିର୍ଦ୍ଦିଷ୍ଟ ପ୍ରକଳ୍ପ ପାଇଁ 2015ରେ ଭାରତ ଦେଇଥିବା 100 ନିୟୁତ ଆମେରିକୀୟ ଡଲାର ଋଣର ବିନିଯୋଗ ପାଇଁ ଆମେ ଆଲୋଚନା କରିଥିଲୁ ।
ୟୁରେସିଆନ୍ ଇକୋନୋମିକ୍ ୟୁନିଅନ୍(ଇଇୟୁ) ଏବଂ ଅନ୍ତର୍ଜାତୀୟ ଉତ୍ତର ଦକ୍ଷିଣ ପରିବହନ କରିଡର ଭଳି ବହୁପକ୍ଷୀୟ ଅର୍ଥନୈତିକ ଉପକ୍ରମ ଅନ୍ତର୍ଗତ ଭାରତ ଏବଂ ବେଲାରୁଷ ମଧ୍ୟରେ ସମ୍ପର୍କ ରହିଛି ।
ବନ୍ଧୁଗଣ,
ସହଯୋଗର ଆଉ ଏକ ସୁଦୃଢ଼ କ୍ଷେତ୍ର ହେଉଛି ବିଜ୍ଞାନ ଏବଂ ପ୍ରଯୁକ୍ତି । ବେଲାରୁଷ ଏହି କ୍ଷେତ୍ରରେ ଦୀର୍ଘ-ସମୟର ସହଭାଗୀ ।
ଧାତୁବିଜ୍ଞାନ ଏବଂ ଧାତୁ, ନାନୋ ମେଟେରିଆଲ୍, ଜୀବ ବିଜ୍ଞାନ ଏବଂ ସ୍ୱାସ୍ଥ୍ୟ ବିଜ୍ଞାନ, ଏବଂ ରସାୟନ ଏବଂ ଯାନ୍ତ୍ରିକ ବିଜ୍ଞାନ କ୍ଷେତ୍ରରେ ନବସୃଜନ ଏବଂ ବ୍ୟବସାୟୀକରଣକୁ ଗୁରୁତ୍ୱ ଦିଆଯିବ । ଆମେ ଏହି ପ୍ରକ୍ରିୟାରେ ଆମ ଯୁବପିଢ଼ିଙ୍କ ସମ୍ପୃକ୍ତି ଚାହୁଁଛୁ ।
ବେଲାରୁଷ ପ୍ରଯୁକ୍ତିର ପ୍ରଦର୍ଶନ ପାଇଁ ଭାରତରେ ଏକ ପ୍ରଯୁକ୍ତି ପ୍ରଦର୍ଶନ କେନ୍ଦ୍ର ସ୍ଥାପନ ସମ୍ଭାବନା ଦିଗରେ ଆମେ ପ୍ରୟାସ କରୁଛୁ ।
ବିକାଶ ସହଯୋଗ କ୍ଷେତ୍ରରେ ଭାରତ ଏବଂ ବେଲାରୁଷ ସମ୍ପର୍କର ଆଉ ଏକ ଦିଗ ନିର୍ଭରଶୀଳ । ଭାରତୀୟ ବୈଷୟିକ ଏବଂ ଅର୍ଥନୈତିକ ସହଯୋଗ କାର୍ଯ୍ୟକ୍ରମରେ ବେଲାରୁଷ ଏକ ସକ୍ରିୟ ସହଭାଗୀ ।
ଆପୋଷ ସ୍ୱାର୍ଥ ପ୍ରସଙ୍ଗରେ ଅର୍ନ୍ତଜାତୀୟ ମଂଚରେ ଆମର ଦୁଇ ରାଷ୍ଟ୍ର ମଧ୍ୟରେ ସମାନ ଆଭିମୁଖ୍ୟ ଏବଂ ନିବିଡ଼ ସହଯୋଗ ରହିଛି ।
ବହୁପକ୍ଷୀୟ ମଂଚରେ ଭାରତ ଏବଂ ବେଲାରୁଷ ପାରସ୍ପରିକ ସହଯୋଗ ବୃଦ୍ଧି ଜାରି ରଖିବେ ।
ବନ୍ଧୁଗଣ, ରାଷ୍ଟ୍ରପତି ଲୁକାଶେଙ୍କୋ ଏବଂ ମୁଁ ଆମ ଲୋକମାନଙ୍କ ମଧ୍ୟରେ ଥିବା ସାଂସ୍କୃତିକ ସମ୍ପର୍କ, ଯାହା ସଦ୍ଭାବନା ବୃଦ୍ଧି କରିଛି, ସେହି ପ୍ରସଙ୍ଗରେ ଆଲୋଚନା କରିଥିଲୁ । ମୁଁ ଏହା ଜାଣି ଖୁସି ହେଲି ଯେ ଅଧିକାଂଶ ବେଲାରୁଷବାସୀ ଭାରତୀୟ ସଂସ୍କୃତି, ଖାଦ୍ୟପେୟ, ଚଳଚ୍ଚିତ୍ର, ସଂଗୀତ, ନୃତ୍ୟ, ଯୋଗ ଏବଂ ଆୟୁର୍ବେଦ ବିଷୟରେ ଜାଣିବା ଲାଗି ସକ୍ରିୟ ଭାବେ ଆଗ୍ରହ ପ୍ରକାଶ କରୁଛନ୍ତି ।
ଆମ ସମ୍ପର୍କର ଆଧାରକୁ ଆହୁରି ସୁଦୃଢ଼ କରିବା ଲାଗି ଆମେ ପର୍ଯ୍ୟଟନ ଏବଂ ନାଗରିକ-ନାଗରିକ ସମ୍ପର୍କରେ ଆହୁରି ବୃଦ୍ଧି କରିବାର ସମ୍ଭାବନା ମୁଁ ଦେଖିପାରୁଛି ।
ଶେଷରେ, ଆମର ସମ୍ମାନନୀୟ ଅତିଥି ହୋଇଥିବାରୁ ମୁଁ ରାଷ୍ଟ୍ରପତି ଲୁକାଶେଙ୍କୋଙ୍କୁ ଧନ୍ୟବାଦ ଦେବାକୁ ଚାହୁଁଛି । ଆଜିର ସହମତି ଏବଂ ଫଳାଫଳକୁ କାର୍ଯ୍ୟକାରୀ କରିବା ଲାଗି ଆଗାମୀ ଦିନ ଏବଂ ମାସଗୁଡ଼ିକରେ ବେଲାରୁଷ ସହିତ ଭାରତ ନିବିଡ଼ ସହଯୋଗୀ ଭାବେ କାର୍ଯ୍ୟ କରିବ । ମୁଁ ରାଷ୍ଟ୍ରପତି ଲୁକାଶେଙ୍କୋଙ୍କ ଭାରତରେ ଏକ ସ୍ମରଣୀୟ ରହଣି କାମନା କରୁଛି ।
ମୁଁ ଆପଣମାନଙ୍କୁ ଧନ୍ୟବାଦ ଜଣାଉଛି ।
