ପରିବର୍ତ୍ତନରେ ବାଧକ ସାଜୁଥିବା ଚିନ୍ତାଧାରାଠାରୁ ଦୂରେଇ ରହିବା ଲାଗି ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଯୁବ ଆଇଏଏସ୍ ଅଧିକାରୀମାନଙ୍କୁ ପରାମର୍ଶ ଦେଇଛନ୍ତି ଏବଂ ଭାରତର ପ୍ରଶାସନିକ ବ୍ୟବସ୍ଥାକୁ ନୂତନ ଭାରତର ଉତ୍ସାହ ନେଇ କାମ କରିବା ଲାଗି ଆହ୍ୱାନ ଜଣାଇଛନ୍ତି ।
ଅତିରିକ୍ତ ସଚିବମାନଙ୍କ ଉଦଘାଟନୀ ଅଧିବେଶନ ଅବସରରେ 2015 ବ୍ୟାଚର ଆଇଏଏସ୍ ଅଧିକାରୀମାନଙ୍କୁ ଉଦବୋଧନ ଦେଇ ପ୍ରଧାନମନ୍ତ୍ରୀ କହିଥିଲେ ଯେ ଭାରତ ଯେତିକି ଆଗେଇବା କଥା ସେତିକି ଆଗେଇ ପାରିନାହିଁ । ସେ କହିଥିଲେ ଯେ ଭାରତ ପରେ ସ୍ୱାଧୀନତା ପାଇଥିବା ଏବଂ ଭାରତଠାରୁ ଅଧିକ ସମ୍ବଳର ଅଭାବ ଅନୁଭବ କରିଥିବା ରାଷ୍ଟ୍ରଗୁଡ଼ିକ ବିକାଶର ନୂତନ ଉଚ୍ଚତାକୁ ଛୁଇଁପାରିଛନ୍ତି । ପରିବର୍ତ୍ତନ ଆଣିବାକୁ ହେଲେ ସାହସର ଆବଶ୍ୟକତା ରହିଛି । ସେ ଆହୁରି କହିଥିଲେ ଯେ ବିଖଣ୍ଡିତ ପ୍ରଶାସନିକ ବ୍ୟବସ୍ଥା ଅଧିକାରୀମାନଙ୍କ ସାମଗ୍ରୀକ ଦକ୍ଷତା ଅନୁଯାୟୀ ନିଜ କାର୍ଯ୍ୟକୁ ଏକ ଉଚ୍ଚତମ ସ୍ତରକୁ ନେଇଯିବାରେ ବାଧକ ସାଜିଥାଏ । ସେ କହିଥିଲେ ଯେ ବ୍ୟବସ୍ଥାରେ ରୂପାନ୍ତରଣ ଆଣିବା ଲାଗି ଏକ ଶକ୍ତିଶାଳୀ ପରିବର୍ତ୍ତନ ଆଣିବା ଆବଶ୍ୟକ ।
ସେ କହିଥିଲେ ଯେ ଅତିରିକ୍ତ ସଚିବଙ୍କ ଏହି ତିନି ମାସିଆ କାର୍ଯ୍ୟକ୍ରମ ଏବେ ତୃତୀୟ ବର୍ଷରେ ପଦାର୍ପଣ କରିଛି ଏବଂ ଏହା ଗଭୀର ପ୍ରଭାବ ପକାଇବ । ଆସନ୍ତା ତିନି ମାସ ମଧ୍ୟରେ ଭାରତ ସରକାରଙ୍କ ବରିଷ୍ଠତମ ଅଧିକାରୀଙ୍କ ସହ ଖୋଲା ଆଲୋଚନା କରିବା ଲାଗି ସେ ଯୁବ ଆଇଏଏସଙ୍କୁ ଆହ୍ୱାନ ଜଣାଇଥିଲେ । ଯାହାଦ୍ୱାରା ସଚିବସ୍ତରୀୟ ଅଧିକାରୀଙ୍କ ଅଭିଜ୍ଞତା ଏବଂ ଯୁବ ଅଧିକାରୀମାନଙ୍କ ଉତ୍ସାହ ଏବଂ ନୂତନ ଚିନ୍ତାଧାରା ଦ୍ୱାରା ପ୍ରଶାସନ ଉପକୃତ ହୋଇପାରିବ ।
ପ୍ରଧାନମନ୍ତ୍ରୀ ଯୁବ ଅଧିକାରୀମାନଙ୍କୁ ୟୁପିଏସସି ପରୀକ୍ଷା ଫଳ ପ୍ରକାଶ ପାଇବା ପର ଠାରୁ ସେମାନେ ସମ୍ମୁଖୀନ ହୋଇଥିବା ଆହ୍ୱାନକୁ ସ୍ମରଣ କରିବା ଲାଗି କହିଥିଲେ । ସେମାନେ ଏବେ ଯେଉଁ ସୁଯୋଗ ପାଇଛନ୍ତି ତା’ର ସଦୁପଯୋଗ କରି ବ୍ୟବସ୍ଥାରେ ସକାରାତ୍ମକ ପରିବର୍ତନ ଆଣିବା ଏବଂ ସାଧାରଣ ଲୋକଙ୍କ ଜୀବନ ଧାରଣର ମାନ ବଦଳାଇବା ଲାଗି ସେ ଆହ୍ୱାନ ଜଣାଇଥିଲେ ।
କେନ୍ଦ୍ର କାର୍ମିକ ବ୍ୟାପାର, ସାଧାରଣ ଅଭିଯୋଗ ଏବଂ ପେନସନ୍ ପ୍ରଶାସନ ରାଷ୍ଟ୍ରମନ୍ତ୍ରୀ ଡ. ଜିତେନ୍ଦ୍ର ସିଂ ଏବଂ ବରିଷ୍ଠ ସରକାରୀ ଅଧିକାରୀମାନେ ଏହି ଅବସରରେ ଉପସ୍ଥିତ ଥିଲେ ।
