ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆସନ୍ତାକାଲି ମୁମ୍ବାଇ ଗସ୍ତରେ ଯିବେ । ସେ ସେଠାରେ ଏସିଆନ ଇନଫ୍ରାଷ୍ଟ୍ରାକଚର ବ୍ୟାଙ୍କ (ଏଆଇଆଇବି)ର ତୃତୀୟ ବାର୍ଷିକ ବୈଠକକୁ ଉଦଘାଟନ କରିବେ । ଏହି ବହୁପକ୍ଷୀୟ ବିକାଶ ବ୍ୟାଙ୍କ ଏସିଆ ଏବଂ ବାହାରେ ସାମାଜିକ ଏବଂ ଅର୍ଥନୈତିକ ସ୍ଥିତି ସୁଧାର ଦିଗରେ ମିଶନ ମୋଡରେ କାର୍ଯ୍ୟ କରୁଛି ।
ଚଳିତ ବର୍ଷର ବୈଠକରେ ବିଷୟବସ୍ତୁ ରହିଛି : “ଭିତ୍ତିଭୂମି ପାଇଁ ଅର୍ଥ ଯୋଗାଡ଼ : ନବୋନ୍ମେଷ ଏବଂ ଭାଗିଦାରୀ ।” ଉତ୍ତମ ଭିତ୍ତିଭୂମି ନିବେଶ ଜରିଆରେ ନିରନ୍ତର ଭବିଷ୍ୟତ ନିର୍ମାଣ ଲାଗି ବିଭିନ୍ନ ସଂଗଠନ ଏବଂ ସରକାରଙ୍କ ବିଭିନ୍ନ ସ୍ଥରର ନେତୃମଣ୍ଡଳୀ ଏହି କାର୍ଯ୍ୟକ୍ରମରେ ସେମାନଙ୍କ ବିଚାର ଏବଂ ମତ ଉପସ୍ଥାପନ କରିବେ ।
ଚଳିତ ବର୍ଷ ଏହି ବୈଠକରେ ଏସିଆନ ଇନଫ୍ରାଷ୍ଟ୍ରାକଚର ଫୋରମର ଶୁଭାରମ୍ଭ କରାଯିବ ଯାହା ଭିତ୍ତିଭୂମି ନିର୍ମାଣକାରୀମାନଙ୍କୁ ବାସ୍ତବ ଏବଂ ପ୍ରକଳ୍ପ ଆଧାରିତ ଆଲୋଚନା ପାଇଁ ଏକତ୍ରୀତ କରିବ । ଜଟିଳ ଭିତ୍ତିଭୂମି ଆବଶ୍ୟକତା ପାଇଁ ଅଭିନବ ଅର୍ଥ ଯୋଗାଣ ପ୍ରତି ଏଥିରେ ଗୁରୁତ୍ୱାରୋପ କରାଯିବ ।
ପରେ ପ୍ରଧାନମନ୍ତ୍ରୀ ବ୍ୟବସାୟୀ ଗୋଷ୍ଠୀ ଏବଂ ଶିଳ୍ପ ଉଦ୍ୟୋଗର ନେତୃମଣ୍ଡଳୀଙ୍କୁ ଭେଟିବେ । ଏଥିରେ ଆର୍ଥିକ ବିକାଶ, ଭିତ୍ତିଭୂମି ବିକାଶ, ନୀତି ଯୋଜନା, ନିବେଶ, ନବୋନ୍ମେଷ ଏବଂ ନିଯୁକ୍ତି ସୃଷ୍ଟି ଭଳି ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଆଲୋଚନା କରାଯିବ ।
