ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଡିସେମ୍ବର ୧୨, ୨୦୨୧ ମଧ୍ୟାହ୍ନ ୧୨ଟା ବେଳେ ବିଜ୍ଞାନ ଭବନ ଠାରେ “ଡିପୋଜିଟର୍ସ ଫାଷ୍ଟ: ଗ୍ୟାରେଣ୍ଟେଡ ଟାଇମ-ବାଉଣ୍ଡ ଡିପୋଜିଟ ଇନସ୍ୟୁରାନ୍ସ ପେମେଣ୍ଟ ଅପ ଟୁ ଫାଇଭ ଲାଖ ରୁପିଜ (ପ୍ରଥମେ ଜମାକାରୀ: ୫ ଲକ୍ଷ ଟଙ୍କା ପର୍ଯ୍ୟନ୍ତ ସମୟବଦ୍ଧ ଜମାରାଶି ବୀମା ନିଶ୍ଚୟତା)” କାର୍ଯ୍ୟକ୍ରମରେ ଉଦବୋଧନ ଦେବେ ।
ଜମାରାଶି ବୀମା ପରିସରରେ ଭାରତରେ କାର୍ଯ୍ୟରତ ସମସ୍ତ ବାଣିଜ୍ୟିକ ବ୍ୟାଙ୍କର ସମସ୍ତ ପ୍ରକାର ଜମା- ଯେପରିକି ସଞ୍ଚୟ, ଫିକ୍ସଡ, ଚାଲୁ, ପୁନଃ ଜମା ଆଦି ଅନ୍ତର୍ଭୁକ୍ତ । ରାଜ୍ୟ/କେନ୍ଦ୍ର ଶାସିତ ଅଞ୍ଚଳରେ କାର୍ଯ୍ୟରତ ରାଜ୍ୟ, କେନ୍ଦ୍ର ଓ ପ୍ରାଥମିକ ସମବାୟ ବ୍ୟାଙ୍କଗୁଡିକର ଜମାରାଶିକୁ ମଧ୍ୟ ଏହାର ପରିସର ମଧ୍ୟରେ ରଖାଯାଇଛି । ଏକ ଯୁଗାନ୍ତକାରୀ ସଂସ୍କାରମୂଳକ ପଦକ୍ଷେପ ସ୍ୱରୂପ ବ୍ୟାଙ୍କ ଜମାରାଶି ବୀମା କଭରକୁ ୧ ଲକ୍ଷରୁ ୫ ଲକ୍ଷ ଟଙ୍କା ପର୍ଯ୍ୟନ୍ତ ବୃଦ୍ଧି କରାଯାଇଛି ।
ପ୍ରତି ବ୍ୟାଙ୍କ ପିଛା ୫ ଲକ୍ଷ ଟଙ୍କା ଜମାରାଶି ବୀମା କଭରେଜକୁ ଭିତ୍ତି କରି ଗତ ଆର୍ଥିକ ବର୍ଷ ଶେଷ ପର୍ଯ୍ୟନ୍ତ ସମ୍ପୂର୍ଣ୍ଣ ସୁରକ୍ଷିତ ଜମା ଖାତା ସଂଖ୍ୟା ସମୁଦାୟ ଜମା ଖାତା ସଂଖ୍ୟାର ୯୮.୧ ପ୍ରତିଶତ ଥିଲା । ସେହି ସମୟରେ ଆନ୍ତର୍ଜାତିକ ମାନକ ୮୦ ପ୍ରତିଶତ ଥିଲା ।
ନିକଟରେ ଡିପୋଜିଟ ଇନସ୍ୟୁରାନ୍ସ ଆଣ୍ଡ କ୍ରେଡିଟ ଗ୍ୟାରେଣ୍ଟି କର୍ପୋରେସନ ମଧ୍ୟବର୍ତ୍ତୀ ଦେୟର ପ୍ରଥମ ଭାଗ ଜାରି କରିଛନ୍ତି । ଭାରତୀୟ ରିଜର୍ଭ ବ୍ୟାଙ୍କ ଦ୍ୱାରା ନିଷିଦ୍ଧ ହୋଇଥିବା ୧୬ଟି ସହରାଞ୍ଚଳ ସମବାୟ ବ୍ୟାଙ୍କର ଜମାକାରୀଙ୍କ ଦାବି ଆଧାରରେ ଏହି ଦେୟ ପ୍ରଦାନ କରାଯାଇଛି । ୧ ଲକ୍ଷରୁ ଅଧିକ ଜମାକାରୀଙ୍କ ଦାବି ଆଧାରରେ ୧୩ ଶହ କୋଟିରୁ ଅଧିକ ଟଙ୍କା ସେମାନଙ୍କ ବିକଳ୍ପ ବ୍ୟାଙ୍କ ଖାତାରେ ପ୍ରଦାନ କରାଯାଇଛି ।
ଅର୍ଥ ମନ୍ତ୍ରୀ, ଅର୍ଥ ରାଷ୍ଟ୍ରମନ୍ତ୍ରୀ ଓ ଭାରତୀୟ ରିଜର୍ଭ ବ୍ୟାଙ୍କର ଗଭର୍ଣ୍ଣର ମଧ୍ୟ ଏହି ଅବସରରେ ଉପସ୍ଥିତ ରହିବେ ।
