ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୧୯ ଡିସେମ୍ବର ୨୦୨୫ ଅପରାହ୍ଣ ପ୍ରାୟ ୪ଟା ୩୦ରେ ନୂଆଦିଲ୍ଲୀର ଭାରତ ମଣ୍ଡପମରେ ପାରମ୍ପରିକ ଚିକିତ୍ସା ଉପରେ ବିଶ୍ୱ ସ୍ୱାସ୍ଥ୍ୟ ସଙ୍ଗଠନର ଦ୍ୱିତୀୟ ବୈଶ୍ୱିକ ଶିଖର ସମ୍ମିଳନୀରେ ଅଂଶ ଗ୍ରହଣ କରିବେ । ପ୍ରଧାନମନ୍ତ୍ରୀ ଉଦଯାପନୀ ସମାବେଶରେ ଉପସ୍ଥିତ ସମାବେଶକୁ ମଧ୍ୟ ସମ୍ବୋଧିତ କରିବେ । ଏହି କାର୍ଯ୍ୟକ୍ରମ ବୈଶ୍ୱିକ, ବିଜ୍ଞାନ ଆଧାରିତ ଏବଂ ଜନକୈନ୍ଦ୍ରିକ ପାରମ୍ପରିକ ଚିକିତ୍ସା କାର୍ଯ୍ୟସୂଚୀକୁ ରୂପରେଖ ଦେବା ଦିଗରେ ଭାରତର ବର୍ଦ୍ଧିତ ନେତୃତ୍ୱ ଏବଂ ଅଭ୍ରଣୀ ଭୂମିକାକୁ ଦର୍ଶାଉଛି ।
ପ୍ରଧାନମନ୍ତ୍ରୀ ଅନୁସନ୍ଧାନ, ମାନକୀକରଣ ଏବଂ ବୈଶ୍ୱିକ ସହଯୋଗ ମାଧ୍ୟମରେ ପାରମ୍ପରକି ଚିକିତ୍ସା ଏବଂ ଭାରତୀୟ ଜ୍ଞାନ ପ୍ରଣାଳୀକୁ ମୁଖ୍ୟଧାରାକୁ ଆଣିବାକୁ କ୍ରମାଗତ ଜୋର୍ ଦେଇଛନ୍ତି । ଏହି ଦୃଷ୍ଟିକୋଣ ଅନୁସାରେ, ପ୍ରଧାନମନ୍ତ୍ରୀ କାର୍ଯ୍ୟକ୍ରମ ଅବସରରେ ଆୟୁଷ କ୍ଷେତ୍ର ପାଇଁ ଏକ ମାଷ୍ଟର ଡିଜିଟାଲ ପୋର୍ଟାଲ, ମାଇଁ ଆୟୁଷ ଇଣ୍ଟିଗ୍ରେଟେଡ ସର୍ଭିସେଜ୍ ପୋର୍ଟାଲ (ଏମଏଆଇଏସପି) ସମେତ ଅନେକ ଆୟୁଷ ପଦକ୍ଷେପର ଶୁଭାରମ୍ଭ କରିବେ । ସେ ଆୟୁଷ ମାର୍କର ମଧ୍ୟ ଶୁଭାରମ୍ଭ କରିବେ, ଯାହାର ପରିକଳ୍ପନା ଆୟୁଷ ଉତ୍ପାଦ ଓ ସେବାର ଗୁଣବତ୍ତା ପାଇଁ ଏକ ବୈଶ୍ୱିକ ମାନାଙ୍କ ରୂପରେ କରାଯାଇଛି ।
ଏହି ଅବସରରେ ପ୍ରଧାନମନ୍ତ୍ରୀ ଯୋଗ ପ୍ରଶିକ୍ଷଣ ଉପରେ ଡବ୍ଲୁଏଚଓର ବୈଷୟିକ ରିପୋର୍ଟ ଏବଂ ପୁସ୍ତକ ‘ଫ୍ରମ ରୁଟସ ଟୁ ଗ୍ଲୋବାଲ ରିଚ୍: ୧୧ ଇୟର୍ସ ଅଫ ଟ୍ରାନ୍ସଫର୍ମେସନ ଇନ୍ ଆୟୁଷ’ର ଉନ୍ମୋଚନ କରିବେ । ସେ ଅଶ୍ୱଗନ୍ଧା ଉପରେ ଏକ ସ୍ମାରକ ଡାକଟିକଟ ମଧ୍ୟ ଉନ୍ମୋଚନ କରିବେ, ଯାହାକି ଭାରତର ପାରମ୍ପରିକ ଔଷଧୀୟ ଐତିହ୍ୟର ବୈଶ୍ୱିକ ପ୍ରତିଧ୍ୱନିର ପ୍ରତୀକ ।
ପ୍ରଧାନମନ୍ତ୍ରୀ ମଧ୍ୟ ଦିଲ୍ଲୀରେ ଡବ୍ଲୁ୍ୟଏଚଓ ଦକ୍ଷିଣ-ପୂର୍ବ ଏସୀୟ କ୍ଷେତ୍ରୀୟ କାର୍ଯ୍ୟାଳୟ ପରିସର ଉଦଘାଟନ କରିବେ, ଯାହାକି ଡବ୍ଲୁଏଚଓ ଭାରତ କଣ୍ଟି୍ର ଶାଖା ହେବ । ଏହା ବିଶ୍ୱ ସ୍ୱାସ୍ଥ୍ୟ ସଙ୍ଗଠନ ସହ ଭାରତର ସହଭାଗିତା ପାଇଁ ଏକ ମାଇଲଖୁଣ୍ଟ ।
ପ୍ରଧାନମନ୍ତ୍ରୀ ଯୋଗ ପ୍ରତି ତାଙ୍କର ନିରନ୍ତର ସମର୍ପଣ ଏବଂ ଏହାର ବୈଶ୍ୱିକ ପ୍ରଚାରକୁ ମାନ୍ୟତା ସ୍ୱରୂପ, ଯୋଗର ପ୍ରଚାର ଏବଂ ବିକାଶରେ ଉକ୍ରୃଷ୍ଟ ଯୋଗଦାନ ପାଇଁ ୨୦୨୧-୨୫ ବର୍ଷ ସକାଶେ ପ୍ରଧାନମନ୍ତ୍ରୀ ପୁରସ୍କାରପ୍ରାପ୍ତଙ୍କୁ ସମ୍ମାନିତ କରିବେ । ଏହି ପୁରସ୍କାର ଯୋଗର ସନ୍ତୁଳନ, କଲ୍ୟାଣ ଏବଂ ସଦଭାବ ପାଇଁ ଏକ କାଳାତୀତ ଅଭ୍ୟାସ ଭାବେ ନିଶ୍ଚିତ କରୁଛି, ଯାହାକି ଏକ ମଜବୁତ ଏବଂ ସୁସ୍ଥ ଭାରତ ପାଇଁ ଯୋଗଦାନ ।
ପ୍ର୍ରଧାନମନ୍ତ୍ରୀ ମଧ୍ୟ ପାରମ୍ପରିକ ମେଡିସିନ ଡିସକଭରୀ ସ୍ପେସ ପରିଦର୍ଶନ କରିବେ । ଏହା ଭାରତ ଏବଂ ବିଶ୍ୱବ୍ୟାପୀ ପାରମ୍ପରିକ ଚିକିତ୍ସା ଜ୍ଞାନପ୍ରଣାଳୀର ବିବିଧତା, ଗଭୀରତା ଏବଂ ସମକାଳୀନ ପ୍ରାସଙ୍ଗିକତାକୁ ଦର୍ଶାଉଥିବା ଏକ ପ୍ରଦର୍ଶନୀ ।
ବିଶ୍ୱ ସ୍ୱାସ୍ଥ୍ୟ ସଙ୍ଗଠନ (ଡବ୍ଲୁଏଚଓ) ଏବଂ ଭାରତ ସରକାରଙ୍କ ଆୟୁଷ ମନ୍ତ୍ରାଳୟ ଦ୍ୱାରା ମିଳିତ ଭାବେ ଆୟୋଜିତ ଏହି ଶିଖର ସମ୍ମିଳନୀ ୧୭ରୁ ୧୯ ଡିସେମ୍ବର, ୨୦୨୫ ପର୍ଯ୍ୟନ୍ତ ନୂଆଦିଲ୍ଲୀର ଭାରତ ମଣ୍ଡପମରେ ହୋଇଛି । ଏହାର ବିଷୟବସ୍ତୁ ରହିଛି ‘ସନ୍ତୁଳନର ପୁନଃସ୍ଥାପନା: ସ୍ୱାସ୍ଥ୍ୟ ଏବଂ କଲ୍ୟାଣର ବିଜ୍ଞାନ ଏବଂ ଅଭ୍ୟାସ’ । ଶିଖର ସମ୍ମିଳନୀରେ ବୈଶ୍ୱିକ ନେତାଗଣ, ନୀତି ନିର୍ମାତା, ବୈଜ୍ଞାନିକ, ଚିକିତ୍ସକ, ସ୍ୱଦେଶୀ ଜ୍ଞାନଧାରକ ଏବଂ ନାଗରିକ ସମାଜ ପ୍ରତିନିଧିଗଣଙ୍କ ମଧ୍ୟରେ ନ୍ୟାୟସଙ୍ଗତ, ସ୍ଥିର ଏବଂ ସାକ୍ଷ୍ୟ ସଂଚାଳିତ ସ୍ୱାସ୍ଥ୍ୟ ପ୍ରଣାଳୀକୁ ଆଗେଇ ନେବା ଲାଗି ବ୍ୟାପକ ବିଚାରବିମର୍ଷ ହୋଇଛି ।
