ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଗୋଆଠାରେ ଚଳିତ ଅକ୍ଟୋବର 15ରୁ ଆରମ୍ଭ ହେଉଥିବା ଦୁଇ ଦିନିଆ ଅଷ୍ଟମ ବ୍ରିକ୍ସ ଶିଖର ସମ୍ମିଳନୀ ଏବଂ ପ୍ରଥମ ବ୍ରିକ୍ସ-ବିମଷ୍ଟେକ ସଂଯୁକ୍ତ ଶିଖର ସମ୍ମିଳନୀରେ ଯୋଗ ଦେବାର କାର୍ଯ୍ୟକ୍ରମ ରହିଛି । ଶିଖର ସମ୍ମିଳନୀର ଅବ୍ୟବହିତ ପୂର୍ବରୁ ପ୍ରଧାନମନ୍ତ୍ରୀ ବ୍ରିକ୍ସ ଏବଂ ବିମଷ୍ଟେକ ପରିବାରର ସମସ୍ତ ସଦସ୍ୟଙ୍କୁ ସ୍ଵାଗତ ଜଣାଇଛନ୍ତି ।
ପ୍ରଧାନମନ୍ତ୍ରୀ ତାଙ୍କ ଫେସବୁକ ପୃଷ୍ଠାରେ କହିଛନ୍ତି ଯେ,
ଗୋଆଠାରେ ଅଷ୍ଟମ ବ୍ରିକ୍ସ ସମ୍ମିଳନୀ ପରେ ପରେ ପ୍ରଥମ ଥର ପାଇଁ ବ୍ରିକ୍ସ-ବିମଷ୍ଟେକ ସଂଯୁକ୍ତ ଶିଖର ସମ୍ମିଳନୀର ଆୟୋଜକ ହିସାବରେ ଭାରତ ଅତ୍ୟନ୍ତ ଉଲ୍ଲସିତ । ବ୍ରିକ୍ସ ଏବଂ ବିମଷ୍ଟେକର 10 ଜଣ ନେତୃବୃନ୍ଦଙ୍କୁ ହାର୍ଦ୍ଦିକ ସ୍ଵାଗତ ଜଣାଇବାର ମୁହୂର୍ତ୍ତକୁ ମୁଁ ଅତ୍ୟନ୍ତ ଉତ୍ସାହର ସହ ଅପେକ୍ଷା କରିଛି । ଏଥିସହିତ ଗୋଆଠାରେ ରୁଷର ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ମଧ୍ୟ ଭାରତ-ଋଷ ବାର୍ଷିକ ଶିଖର ସମ୍ମିଳନୀ ଏବଂ ବ୍ରାଜିଲର ରାଷ୍ଟ୍ରପତି ମାଇକେଲ ଟେମେରଙ୍କୁ ଏକ ଦ୍ଵିପାକ୍ଷିକ ଗସ୍ତ ପାଇଁ ସ୍ଵାଗତ କରିବାର ସୌଭାଗ୍ୟ ମୋତେ ମିଳିଛି ।
ରାଷ୍ଟ୍ରପତି ପୁଟିନଙ୍କ ଗସ୍ତ ଭାରତ ଏବଂ ଋଷ ମଧ୍ୟରେ ସମୟ ଅନ୍ତରାଳେ ବନ୍ଧୁତ୍ଵର ଆଶ୍ଵାସନାକୁ ଆହୁର ସୁଦୃଢ କରିବା ସହ ପରସ୍ପର ଅଂଶୀଦାର ହେବାର ସୁଯୋଗ ପ୍ରଦାନ କରିଛି । ରାଷ୍ଟ୍ରପତି ଟେମରଙ୍କ ଗସ୍ତ ଭାରତ ସହିତ ବ୍ରାଜିଲର ବିଭିନ୍ନ କ୍ଷେତ୍ରରେ ସହଯୋଗ ନେଇ ରଣନୀତିକ ଅଂଶୀଦାର ହେବାର ରାସ୍ତା ସୁଗମ କରିବ ।
ଏହି ଅବସରରେ ମୋର ପ୍ରତିପକ୍ଷ ଚୀନ, ଦକ୍ଷିଣ ଆଫ୍ରିକା, ବ୍ରାଜିଲ ଏବଂ ଋଷର ନେତୃବୃନ୍ଦଙ୍କ ସହିତ ଅନ୍ତର୍ଜାତୀୟ ଏବଂ ଆଂଚଳିକ ସ୍ତରରେ ଆମ ଲକ୍ଷ୍ୟ ହାସଲ କ୍ଷେତ୍ରରେ ଥିବା ବିଭିନ୍ନ ଆହ୍ଵାନ ବିଷୟରେ ଗୁରୁତ୍ଵପୂର୍ଣ୍ଣ ଆଲୋଚନା କରାଯିବ ।
ଚଳିତ ବର୍ଷ ବ୍ରିକ୍ସ ଶିଖର ସମ୍ମିଳନୀରେ ଭାରତ ଅଧ୍ୟକ୍ଷତା କରୁଥିବାରୁ ବାଣିଜ୍ୟ, କ୍ରୀଡା, ଶିକ୍ଷା, ଚଳଚିତ୍ର, ସ୍କଲାରସିପ ଏବଂ ପର୍ଯ୍ୟଟନ କ୍ଷେତ୍ରରେ ଜନ-ଜନଙ୍କ (people to people) ମଧ୍ୟରେ ସଂପର୍କ ପାଇଁ ପ୍ରୋତ୍ସାହନ ଉପରେ ଅଧିକ ଗୁରୁତ୍ଵ ପ୍ରଦାନ କରାଯିବ ।
ବିଭିନ୍ନ କ୍ଷେତ୍ରରେ ସଫଳତା ପାଇଁ ଲୋକମାନେ ହେଉଛନ୍ତି ପ୍ରମୁଖ ଅଂଶୀଦାର ଏବଂ ସମସ୍ୟାର ସମାଧାନ କ୍ଷେତ୍ରରେ ମଧ୍ୟ ସେମାନଙ୍କର ଭୂମିକା ଗୁରୁତ୍ଵପୂର୍ଣ୍ଣ । ଗୋଆଠାରେ ନୂତନ ପଦକ୍ଷେପଗୁଡିକର ଘୋଷଣା କରାଯିବା ସହ ବ୍ରିକ୍ସ ନୂତନ ବିକାଶ ବ୍ୟାଙ୍କ ଏବଂ ଆପାତକାଳୀନ ଗୋଷ୍ଠୀଗତ ସଂରକ୍ଷଣ ବ୍ୟବସ୍ଥାର ସଫଳ ରୂପାୟନ ଉପରେ ଗୁରୁତ୍ଵ ପ୍ରଦାନ କରାଯିବ ।
ମୁଁ ଆଶାବାଦୀ ଯେ ବ୍ରିକ୍ସ ଶିଖର ସମ୍ମିଳନୀ ଆନ୍ତଃ-ବ୍ରିକ୍ସ ସହଯୋଗରେ ଉନ୍ନତି, ଶାନ୍ତି, ସ୍ଥିରତା ଏବଂ ସଂସ୍କାର ପାଇଁ ଆମ ସମସ୍ତଙ୍କର ଲକ୍ଷ୍ୟ ପୂରଣ କରିବ ।
ଭାରତ, ବାଂଲାଦେଶ, ଭୂଟାନ, ମିଆଁମାର, ନେପାଳ, ଶ୍ରୀଲଙ୍କା ଏବଂ ଥାଇଲାଣ୍ଡ ବିମଷ୍ଟେକ ନେତୃବୃନ୍ଦଙ୍କର ଏକ ସଂଯୁକ୍ତ ଶିଖର ସମ୍ମିଳନୀର ଆୟୋଜନ କରିଥିବାରୁ ମୁଁ ଅତ୍ୟନ୍ତ ଆନନ୍ଦିତ ।
ଗୋଟିଏ ସ୍ଥାନରେ ଦୁଇ ତୃତୀୟାଂଶ ଜନତାଙ୍କୁ ପ୍ରତିନିଧିତ୍ଵ କରୁଥିବା ନେତୃବୃନ୍ଦ ଏକତ୍ରିତ ହେବା ଫଳରେ ବନ୍ଧୁତ୍ଵ ଏବଂ ସହଯୋଗର ସୁଫଳ ଆଗାମୀ ଦିନରେ ପ୍ରତୀତ ହେବ ।
ଭାରତ ସର୍ବଦା ନୂତନ ବନ୍ଧୁତ୍ଵକୁ ସ୍ଵାଗତ କରିଥାଏ ଏବଂ ସଂପର୍କର ସେତୁ ସୁଦୃଢ କରିବା ସହିତ ସଂପ୍ରତି ସମସ୍ୟାର ସାମୂହିକ ସମାଧାନର ସୂତ୍ର ବାହାର କରିବା ଦିଗରେ ସହଯୋଗ କରିଥାଏ ।
