ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆସାମରେ ଆଜି ବ୍ରହ୍ମପୁତ୍ର ନଦୀ ଉପରେ ନିର୍ମିତ 9.15 କିଲୋମିଟର ଦୀର୍ଘର ଢୋଲା-ସାଦିଆ ସେତୁକୁ ଉଦ୍ଘାଟନ କରିଛନ୍ତି ।
ପ୍ରଧାନମନ୍ତ୍ରୀ ଭାବେ ଶପଥ ଓ ଦାୟିତ୍ଵ ଗ୍ରହଣ କରିବାର 3 ବର୍ଷ ପୂର୍ତ୍ତି ପାଳନ ଅବସରରେ ଏହା ଥିଲା ଶ୍ରୀ ମୋଦୀଙ୍କର ପ୍ରଥମ ଆନୁଷ୍ଠାନିକ କାର୍ଯ୍ୟକ୍ରମ ।
ନବନିର୍ମିତ ଢୋଲା-ସାଦିଆ ସେତୁ ଆସାମ ଓ ଅରୁଣାଚଳ ପ୍ରଦେଶ ମଧ୍ୟରେ ଯାତାୟାତ ସମୟକୁ ଅନେକାଂଶରେ ହ୍ରାସ କରିବ ଏବଂ ସଡକ ଯୋଗାଯୋଗ ବ୍ୟବସ୍ଥାରେ ଉନ୍ନତି ଆଣିବ ।
ଦୀର୍ଘତମ ସେତୁକୁ ରାଷ୍ଟ୍ର ଉଦ୍ଦେଶ୍ୟରେ ସମର୍ପିତ କରିବା ପରେ ପ୍ରଧାନମନ୍ତ୍ରୀ ତା ଉପରେ କିଛି ସମୟ ଧରି ଚାଲି ଚାଲି ଯାଇଥିଲେ ।
ଏହି ଅବସରରେ ଢୋଲାଠାରେ ଏକ ଜନ ସମାବେଶରେ ଉଦ୍ବୋଧନ ଦେଇ ପ୍ରଧାନମନ୍ତ୍ରୀ କହିଥିଲେ ଯେ, ଏହି ସେତୁ ଉଦ୍ଘାଟନ ଦ୍ଵାରା ସ୍ଥାନୀୟ ଅଞ୍ଚଳର ଲୋକମାନଙ୍କର ବହୁ ଦିନର ପ୍ରତୀକ୍ଷାର ଅନ୍ତ ଘଟିଛି ।
ସେ କହିଥିଲେ ଯେ, ବିକାଶ ପାଇଁ ଭିତ୍ତିଭୂମି ନିର୍ମାଣ ନିହାତି ଆବଶ୍ୟକ । ଏ କ୍ଷେତ୍ରରେ ଜନସାଧାରଣଙ୍କ ଆଶା ଓ ସ୍ଵପ୍ନ ପୂରଣ କରିବା ଦିଗରେ କେନ୍ଦ୍ର ସରକାର ପ୍ରୟାସ ଜାରି ରଖିଛନ୍ତି । ଆସାମ-ଅରୁଣାଚଳ ପ୍ରଦେଶ ମଧ୍ୟରେ ଏହି ସେତୁ କେବଳ ସଡକ ସଂଯୋଗକୁ ଦୃଢୀଭୂତ କରିବ ନାହିଁ ବରଂ ଦୁଇ ରାଜ୍ୟରେ ଆର୍ଥିକ ବିକାଶକୁ ବଡ ବଳ ପ୍ରଦାନ କରିବ ।
ପ୍ରଧାନମନ୍ତ୍ରୀ କହିଥିଲେ ପୂର୍ବ ଏବଂ ଉତ୍ତର-ପୂର୍ବାଞ୍ଚଳର ଆର୍ଥିକ ବିକାଶ ଲାଗି ବ୍ୟାପକ ସୁଯୋଗ ରହିଛି । ସେଥିମଧ୍ୟରେ ଏହି ସେତୁ ନିର୍ମାଣ କେନ୍ଦ୍ର ସରକାରଙ୍କ ଏକ ଭବିଷ୍ୟ ଦୃଷ୍ଟିର ଜ୍ଵଳନ୍ତ ଉଦାହରଣ ।
ସେ କହିଥିଲେ ନବନିର୍ମିତ ଢୋଲା-ସାଦିଆ ସେତୁ ଏହି ଅଞ୍ଚଳର ଲୋକଙ୍କ ଜୀବନରେ ସକାରାତ୍ମକ ପରିବର୍ତ୍ତନ ଆଣିବ । କେନ୍ଦ୍ର ସରକାର ବର୍ତ୍ତମାନ ଆସାମ ସମେତ ଦେଶର ବିଭିନ୍ନ ଅଞ୍ଚଳରେ ଜଳପଥର ବିକାଶ ଉପରେ ସର୍ବାଧିକ ଗୁରୁତ୍ଵ ଦେଉଛନ୍ତି ।
ପ୍ରଧାନମନ୍ତ୍ରୀ କହିଥିଲେ ଉତ୍ତର-ପୂର୍ବାଞ୍ଚଳ ସହିତ ଦେଶର ଅନ୍ୟାନ୍ୟ ଭାଗକୁ ଯୋଗାଯୋଗ ବ୍ୟବସ୍ଥାରେ ଉନ୍ନତି ଆଣିବା ଉପରେ କେନ୍ଦ୍ର ସରକାର ପ୍ରାଧାନ୍ୟ ଦେଉଛନ୍ତି । କେବଳ ସେତିକି ନୁହେଁ ଏ ଦିଗରେ ଆବଶ୍ୟକ ଭିତ୍ତିଭୂମି ନିର୍ମାଣ କାର୍ଯ୍ୟକୁ ତ୍ୱରାନ୍ୱିତ କରାଯାଉଛି । ସେହିପରି ଉତ୍ତର-ପୂର୍ବାଞ୍ଚଳରେ ସଡକ ଯୋଗାଯୋଗ ବ୍ୟବସ୍ଥାର ଉନ୍ନତି ଘଟିଲେ ଏହି ଅଞ୍ଚଳ ସହିତ ଦକ୍ଷିଣ-ପୂର୍ବ ଏସିଆର ଆର୍ଥିକ କାରବାର ବୃଦ୍ଧି ପାଇବ ।
ଉତ୍ତର-ପୂର୍ବାଞ୍ଚଳରେ ପର୍ଯ୍ୟଟନ ସମ୍ପଦ ଓ କ୍ଷେତ୍ରର ବିକାଶ ଲାଗି ଅନେକ ସୁଯୋଗ ରହିଛି ବୋଲି ପ୍ରଧାନମନ୍ତ୍ରୀ କହିଥିଲେ । ଆସାମର ଢୋଲା-ସାଦିଆ ସେତୁକୁ ସୁବିଖ୍ୟାତ କବି, ସଙ୍ଗୀତଜ୍ଞ ଓ ଗୀତିକାର ଭୁପେନ ହଜାରିକାଙ୍କ ନାମରେ ନାମିତ କରାଯିବ ବୋଲି ପ୍ରଧାନମନ୍ତ୍ରୀ ଏହି ଅବସରରେ ଘୋଷଣା କରିଥିଲେ ।
