ପ୍ରଧାନମନ୍ତ୍ରୀ ମୋଦୀଙ୍କୁ ସାକ୍ଷାତ କଲେ ଭୁଟାନ ପ୍ରଧାନମନ୍ତ୍ରୀ

30 ମେ, 2019ରେ ଅନୁଷ୍ଠିତ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଶପଥ ଗ୍ରହଣ ସମାରୋହରେ ଭୁଟାନ ପ୍ରଧାନମନ୍ତ୍ରୀ ଡା. ଲୋତେ ସେରିଙ୍ଗ ଅତିଥି ଭାବେ ଯୋଗ ଦେଇଥିଲେ ।

ଆଜି ଅନୁଷ୍ଠିତ ଦ୍ୱିପାକ୍ଷିକ ବୈଠକରେ, ଡା. ସେରିଙ୍ଗ ଭାରତରେ ନିକଟରେ ଅନୁଷ୍ଠିତ ସାଧାରଣ ନିର୍ବାଚନରେ ବିପୁଳବିଜୟ ପରେ ପୁନର୍ବାର ଦାୟିତ୍ୱ ଗ୍ରହଣ କରିଥିବାରୁ ପ୍ରଧାନମନ୍ତ୍ରୀ ମୋଦୀଙ୍କୁ ଶୁଭକାମନା ଜଣାଇଥିଲେ । ସେ ମଧ୍ୟ ପ୍ରଧାନମନ୍ତ୍ରୀ ଏବଂ ଭାରତର ଲୋକମାନଙ୍କୁ ଭୁଟାନର ମହାମହିମ ରାଜା ଏବଂ ଭୁଟାନର ଜନସାଧାରଣଙ୍କ ଶୁଭେଚ୍ଛା ଓ ଶୁଭକାମନା ଜଣାଇଥିଲେ । ପ୍ରଧାନମନ୍ତ୍ରୀ ଡା. ସେରିଙ୍ଗ କହିଥିଲେ ଯେ ସେ ପ୍ରଧାନମନ୍ତ୍ରୀ ମୋଦୀ ଏବଂ ଭାରତ ସରକାରଙ୍କ ସହିତ ନିବିଡ଼ ଭାବେ କାର୍ଯ୍ୟ କରିବା ପ୍ରତି ଅତ୍ୟନ୍ତ ଆଗ୍ରହୀ । ଏହି ପରିପ୍ରେକ୍ଷୀରେ, ସେ ଯଥାଶୀଘ୍ର ଭୂଟାନ ଗସ୍ତ କରିବା ଲାଗି ପ୍ରଧାନମନ୍ତ୍ରୀ ମୋଦୀଙ୍କୁ ନିମନ୍ତ୍ରଣ ଜଣାଇଥିଲେ ।

ଶପଥ ଗ୍ରହଣ ସମାରୋହରେ ସଦୟ ଉପସ୍ଥିତି ଏବଂ ଅଭିନନ୍ଦନ ପାଇଁ ପ୍ରଧାନମନ୍ତ୍ରୀ ମୋଦୀ ଉଦାରତା ପୂର୍ବକ ଭୂଟାନ ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଜ୍ଞାପନ କରିଥିଲେ । ଜଳବିଦ୍ୟୁତ କ୍ଷେତ୍ର ସମେତ ଭୂଟାନ ସହିତ ବିକାଶ ସହଭାଗିତାକୁ ଭାରତ ବିଶେଷ ମୂଲ୍ୟ ଦେଇ ଆସିଥିବା ସେ ଉଲ୍ଲେଖ କରିଥିଲେ । ବ୍ୟାପକ ସମୃଦ୍ଧି ଏବଂ କଲ୍ୟାଣ ପାଇଁ ଭୂଟାନର ଦ୍ରୁତପ୍ରଗତିରେ ସହଭାଗୀ ହେବା ଲାଗି ସେ ଭାରତ ସରକାରଙ୍କ ପ୍ରତିବଦ୍ଧତାକୁ ଦୋହରାଇଥିଲେ । ଆପୋସ ସହମତି ଆଧାରରେ ଧାର୍ଯ୍ୟ ତାରିଖରେ ଭୁଟାନ ଗସ୍ତ କରିବା ଲାଗି ପ୍ରଧାନମନ୍ତ୍ରୀ ମୋଦୀ ନିମନ୍ତ୍ରଣକୁ ସ୍ୱୀକାର କରିଥିଲେ ।

ଏହି ବୈଠକ ସୌହାର୍ଦ୍ଦ୍ୟପୂର୍ଣ୍ଣ ଏବଂ ବନ୍ଧୁତ୍ୱର ପରିବେଶ ମଧ୍ୟରେ ସମ୍ପନ୍ନ ହୋଇଥିଲା । ଏହା ଦୁଇ ଦେଶ ମଧ୍ୟରେ ନିବିଡ଼ ଏବଂ ବନ୍ଧୁତ୍ୱପୂର୍ଣ୍ଣ ସମ୍ପର୍କର ବିଶେଷତ୍ୱ କୁହାଯାଉଥିବା ବିଶ୍ୱାସ, ସହଯୋଗ ଏବଂ ବୁଝାମଣାକୁ ପ୍ରତିଫଳିତ କରିଥିଲା ।

Boosting relations with Bhutan.

Prime Ministers @narendramodi and Lotay Tshering held fruitful deliberations in New Delhi. Sectors such as energy, hydropower and cultural cooperation were discussed during the meeting. @PMBhutan pic.twitter.com/jbmSKt37hY

— PMO India (@PMOIndia) May 31, 2019