ପ୍ରଧାନମନ୍ତ୍ରୀ, ଶ୍ରୀ ନରେନ୍ଦ୍ର ମୋଦୀ ଆଜି କହିଥିଲେ, ଜଣେ ପୂର୍ବତନ ମୁଖ୍ୟମନ୍ତ୍ରୀ ହିସାବରେ ସେ ଜାଣନ୍ତି ଯେ ସମସ୍ତ ରାଜ୍ୟ ସରକାର ଏବଂ ମୁଖ୍ୟମନ୍ତ୍ରୀମାନଙ୍କ ମିଳିତ ଉଦ୍ୟମ ଏବଂ ସହଯୋଗ ଫଳରେ ହିଁ ‘ନବ ଭାରତ’ ଗଠନ ସ୍ୱପ୍ନକୁ ସାକାର କରିହେବ । ନୀତି ଆୟୋଗ ପରିଚାଳନା ପରିଷଦର ତୃତୀୟ ବୈଠକ ଅବସରରେ ଉଦ୍ବୋଧନ ଦେଇ ପ୍ରଧାନମନ୍ତ୍ରୀ କହିଥିଲେ ଯେ ପରିବର୍ତ୍ତନଶୀଳ ଜାଗତିକ ସ୍ଥିତି ମଧ୍ୟରେ ଭାରତ ଗଠନ ଲାଗି “ଟିମ୍ ଇଣ୍ଡିଆ” ପୁଣିଥରେ ଆଜି ମିଳିତ ହୋଇଛି । ଏହି ବୈଠକରେ ସେ କହିଥିଲେ ଯେ ଆଜି ନୀତି ପ୍ରଣୟନ ଏବଂ କାର୍ଯ୍ୟକାରୀ କରିବା ପ୍ରସଙ୍ଗରେ ଆଲୋଚନା ପାଇଁ ଆମ ପାଖରେ ଏକ ସୁଯୋଗ ରହିଛି ।
୨୦୨୨-ସ୍ୱାଧୀନତାର ୭୫ତମ ବର୍ଷପୂତ୍ତି- ସୁଦ୍ଧା ଏକ ସମୃଦ୍ଧ ଭାରତ ଗଠନ ଦିଗରେ ଦୂରଦୃଷ୍ଟି ପୋଷଣ କରିବା ସମସ୍ତଙ୍କ ମିଳିତ ଉତ୍ତରଦାୟିତ୍ୱ ଏବଂ ଏ ଦିଗରେ ଲକ୍ଷ୍ୟ ହାସଲ ପାଇଁ ମଧ୍ୟ ପ୍ରୟାସ କରାଯିବା ଆବଶ୍ୟକ ।
ଚମ୍ପାରନ ସତ୍ୟାଗ୍ରହର ଶତବାର୍ଷିକୀ ପୂର୍ତ୍ତି ଅବସରରେ ରାଷ୍ଟ୍ରପିତା ମହାତ୍ମାଗାନ୍ଧୀଙ୍କ ସ୍ମୃତିଚାରଣ କରି ପ୍ରଧାନମନ୍ତ୍ରୀ କହିଥିଲେ ଯେ ନୀତି ଆୟୋଗ ନୂଆ ଉତ୍ସାହ ନେଇ ଭାରତରେ ପରିବର୍ତ୍ତନ ଆଣିବା ଦିଗରେ କାର୍ଯ୍ୟ କରୁଛି । ସେ କହିଥିଲେ ସରକାର, ଘରୋଇ କ୍ଷେତ୍ର ଏବଂ ସାଧାରଣ ନାଗରିକ ସମ୍ମିଳିତ ଭାବେ କାର୍ଯ୍ୟ କରିବା ଆବଶ୍ୟକ । ସେ ଉଲ୍ଲେଖ କରିଥିଲେ ଯେ ନୀତି ଆୟୋଗ ପ୍ରଶାସନିକ ଏବଂ ଆର୍ଥିକ ନିୟନ୍ତ୍ରଣ ପ୍ରତିଷ୍ଠା କରିବା ପରିବର୍ତ୍ତେ ଏକ ସହଯୋଗୀ ସଂଘୀୟ ସଂସ୍ଥା ହୋଇପାରିଛି, ଯାହାର ଦୃଢ଼ତା ଏହାର ବିଚାର ମଧ୍ୟରେ ରହିଛି । ସେ ଉଲ୍ଲେଖ କରିଥିଲେ ଯେ ବଜେଟ୍ ଏବଂ ଯୋଜନା ଅନୁମତି ଲାଗି ମୁଖ୍ୟମନ୍ତ୍ରୀମାନଙ୍କୁ ନୀତି ଆୟୋଗ ନିକଟକୁ ଆସିବାକୁ ପଡ଼ୁନାହିଁ । ସରକାରଙ୍କ ଉପରେ ନିର୍ଭର କରିବା ଠାରୁ ନୀତି ଆୟୋଗ ଊର୍ଦ୍ଧ୍ଵକୁ ଯାଇସାରିଛି । ଏଥିରେ ସଂଖ୍ୟାଧିକ ବିଶେଷଜ୍ଞ, ବିଷୟ ବିଶେଷଜ୍ଞ, ଯୁବ ପେସାଦାର ରହିଛନ୍ତି ଏବଂ ରାଜ୍ୟଗୁଡ଼ିକ ନୀତି ପ୍ରଣୟନ ଲାଗି ଯୋଗଦାନ ଦେଇପାରିବେ । ଇ-ନାମ୍ ର ଉଦାହରଣ ଦେଇ ସେ କହିଥିଲେ ଯେ ଚୂଡ଼ାନ୍ତ ନୀତି ପ୍ରଣୟନ କରିବାରେ ଏଠାରେ ରାଜ୍ୟଗୁଡ଼ିକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାନ୍ତି । ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ ରାଜ୍ୟ ମୁଖ୍ୟମନ୍ତ୍ରୀମାନଙ୍କର ଉପଗୋଷ୍ଠୀ କେନ୍ଦ ପ୍ରବର୍ତ୍ତିତ ଯୋଜନା, ସ୍ୱଚ୍ଛ ଭାରତ ଓ ଦକ୍ଷତା ବିକାଶ ଏବଂ ଡିଜିଟାଲ୍ ପେମେଣ୍ଟ ଭଳି ପ୍ରସଙ୍ଗରେ ଗୁରୁତ୍ୱପୂର୍ଣ୍ଣ ପରାମର୍ଶ ଦେଇଛନ୍ତି । ମୁଖ୍ୟମନ୍ତ୍ରୀମାନଙ୍କ ପରାମର୍ଶ ଉପରେ ଗୁରୁତ୍ୱାରୋପ କରି ସେ କହିଥିଲେ ଯେ ପ୍ରଥମଥର ଲାଗି ପାଣ୍ଠି ଯୋଗାଣ ବାଧା ସତ୍ତ୍ୱେ ମୁଖ୍ୟମନ୍ତ୍ରୀମାନଙ୍କୁ କେନ୍ଦ୍ରୀୟ ପ୍ରବର୍ତ୍ତିତ ଯୋଜନା ଏବଂ ଭାଗିଦାରୀତା ସମ୍ପର୍କରେ ସୁପାରିସ କରିବା ଲାଗି କୁହାଯାଇଛି, ସେମାନଙ୍କ ସୁପାରିସ ତୁରନ୍ତ ଗ୍ରହଣ କରାଯିବ ।
ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ ୨୦୧୪-୧୫ ଏବଂ ୨୦୧୬-୧୭ ଆର୍ଥିକ ବର୍ଷ ମଧ୍ୟରେ ରାଜ୍ୟଗୁଡ଼ିକୁ ମୋଟ୍ ପାଣ୍ଠି ଯୋଗାଣ ୪୦ ପ୍ରତିଶତ ବୃଦ୍ଧି ପାଇଛି ।
ପୁଞ୍ଜି ବିନିଯୋଗ ଏବଂ ଭିତ୍ତିଭୂମି ସୃଷ୍ଟି ଉପରେ ରାଜ୍ୟଗୁଡ଼ିକ ଅଧିକ ଗୁରୁତ୍ୱ ଦେବା ଆବଶ୍ୟକ ବୋଲି ପ୍ରଧାନମନ୍ତ୍ରୀ କହିଥିଲେ ।
ବଜେଟ୍ ଉପସ୍ଥାପନ ତାରିଖରେ ଐତିହାସିକ ପରିବର୍ତ୍ତନ ସମ୍ପର୍କରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ଏହାଦ୍ୱାରା ଆର୍ଥିକ ବର୍ଷ ଆରମ୍ଭରୁ ଉଚିତ୍ ସମୟରେ ପାଣ୍ଠି ଯୋଗାଣ କରାଯାଇପାରିବ ।
ପୂର୍ବରୁ ବଜେଟ୍ ଯୋଜନା ପାଣ୍ଠି ସାଧାରଣତଃ ସଂସଦରେ ମେ ପର୍ଯ୍ୟନ୍ତ ଅନୁମୋଦନ ଲାଭ କରିପାରୁନଥିଲା । ଏହାପରେ ପାଣ୍ଠି ରାଜ୍ୟ ଏବଂ ମନ୍ତ୍ରଣାଳୟଗୁଡ଼ିକୁ ଯୋଗାଣ କରାଯାଉଥିଲା । ଏହି ସମୟ ସୁଦ୍ଧା ଦେଶରେ ମୌସୁମୀ ଆସି ଯାଉଥିଲା । ତେଣୁ ଯୋଜନା କାର୍ଯ୍ୟକାରୀ କରିବା ଲାଗି ଶ୍ରେଷ୍ଠ ସମୟ ସରିଯାଉଥିଲା । ସେ ମଧ୍ୟ ଉଲ୍ଲେଖ କରିଥିଲେ ଯେ ୨୦୧୧ରେ ରଙ୍ଗରାଜନ କମିଟି ଯୋଜନା ଏବଂ ଅଣ ଯୋଜନା ବ୍ୟୟରେ ରହିଥିବା ଭେଦଭାବ ପ୍ରତିକୂଳ ବୋଲି ଉଲ୍ଲେଖ କରି ଏହାକୁ ଦୂର କରିବା ଲାଗି ସୁପାରିସ କରିଥିଲା, ଯାହାକୁ କାର୍ଯ୍ୟକାରୀ କରାଯାଇଛି ।
ପୂର୍ବରୁ କେତେକ ଗୁରୁତ୍ୱପୂର୍ଣ୍ଣ ବ୍ୟୟକୁ ଅଣଯୋଜନା ଭାବେ ଉଲ୍ଲେଖ କରାଯାଇଥିଲା ଏବଂ ତାହାକୁ ଅବହେଳିତ କରାଯାଇଥିଲା । ଯାହାଫଳରେ ଗୋଟିଏ ପଟେ ବିକାଶ ଓ କଲ୍ୟାଣ ବ୍ୟୟ ଏବଂ ଅନ୍ୟ ପଟେ ପ୍ରଶାସନିକ ବୋଝ ପଡ଼ୁଥିଲା ।
ପ୍ରଧାନମନ୍ତ୍ରୀ କହିଥିଲେ ଯେ ବସ୍ତୁ ଏବଂ ସେବା କର ଦୃଢ଼ତା ପ୍ରଦର୍ଶନ କରୁଛି ଏବଂ ଏହା ସଂଘୀୟ ଢାଞ୍ଚାର ସଂକଳ୍ପ ନିର୍ଦ୍ଧାରଣ କରୁଛି । ରାଜନୈତିକ ଏବଂ ବୈଚାରିକ ମତଭେଦକୁ ଦୁରେଇ ଦେଇ ଗୋଟିଏ ଢାଞ୍ଚା ମଧ୍ୟକୁ ଆସିଥିବାରୁ ସେ ସମସ୍ତ ମୁଖ୍ୟମନ୍ତ୍ରୀମାନଙ୍କୁ ଏହାର ଶ୍ରେୟ ଦେଇଥିଲେ । ମୁଖ୍ୟମନ୍ତ୍ରୀମାନଙ୍କୁ ଧନ୍ୟବାଦ ଦେଇ ସେ କହିଥିଲେ ଯେ ଜିଏସଟି ପ୍ରସଙ୍ଗରେ ସହମତି ସହଯୋଗୀ ସଂଘବାଦର ଶ୍ରେଷ୍ଠ ଉଦାହରଣ ହୋଇ ରହିବ । ସେ କହିଥିଲେ ଯେ “ଏକ ରାଷ୍ଟ୍ର, ଏକ ଆକାଂକ୍ଷା, ଏକ ଦୃଢ଼ ସଂକଳ୍ପ” କୁ ଜିଏସଟି ପ୍ରତିଫଳିତ କରୁଛି ।
ଏକ ସମୟରେ ନିର୍ବାଚନ ଲାଗି ଚର୍ଚ୍ଚା ଏବଂ ଆଲୋଚନାକୁ ଆଗେଇ ନେବା ଲାଗି ପ୍ରଧାନମନ୍ତ୍ରୀ ଆହ୍ୱାନ ଜଣାଇଥିଲେ ।
ସେ କହିଥିଲେ ଯେ ନୀତି ଆୟୋଗ ୧୫ ବର୍ଷର ଦୂରଦୃଷ୍ଟି, ୭ ବର୍ଷର ମଧ୍ୟବର୍ତ୍ତୀକାଳୀନ ଯୋଜନା ଏବଂ ୩ ବର୍ଷର କାର୍ଯ୍ୟ ଯୋଜନା ନିର୍ଦ୍ଧାରଣ କରି କାର୍ଯ୍ୟ କରୁଛି । ସେ କହିଥିଲେ ଯେ ଏହି ଉଦ୍ୟମ ପ୍ରତି ରାଜ୍ୟଗୁଡ଼ିକର ସହଯୋଗ ଆବଶ୍ୟକତା ରହିଛି ଏବଂ ସମୟକ୍ରମେ ରାଜ୍ୟଗୁଡ଼ିକ ହିଁ ଏହାଦ୍ୱାରା ଉପକୃତ ହେବେ ।
PM @narendramodi is chairing the 3rd Governing Council Meet of the @NITIAayog in New Delhi. pic.twitter.com/ynYWTiIwzc
— PMO India (@PMOIndia) April 23, 2017
Cabinet Ministers, State CMs, officials, members of @NITIAayog & special invitees are attending the @NITIAayog Governing Council meeting. pic.twitter.com/tMw2lxhiRC
— PMO India (@PMOIndia) April 23, 2017
Click here to read Presentations on NITI Aayog’s work
ନୀତି ଆୟୋଗ ପରିଚାଳନା ପରିଷଦର ତୃତୀୟ ବୈଠକରେ ପ୍ରଧାନମନ୍ତ୍ରୀଙ୍କ ଉଦଯାପନୀ ଅଭିଭାଷଣର ମୁଳପାଠ ପାଇଁ କ୍ଲିକ୍ କରନ୍ତୁ
