ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଥାଇଲାଣ୍ଡର ବ୍ୟାଙ୍କକଠାରେ ଆୟୋଜିତ 16ତମ ଭାରତ-ଆସିଆନ ଶିଖର ସମ୍ମିଳନୀରେ ଭାଗ ନେଇଛନ୍ତି ।
16ତମ ଭାରତ-ଆସିଆନ ସମ୍ମିଳନୀରେ ଯୋଗଦେଇଥିବାରୁ ପ୍ରଧାନମନ୍ତ୍ରୀ ଖୁସି ବ୍ୟକ୍ତ କରିଥିଲେ । ତାଙ୍କର ଭବ୍ୟ ସ୍ୱାଗତ କରିଥିବାରୁ ଥାଇଲାଣ୍ଡକୁ ଧନ୍ୟବାଦ ପ୍ରଦାନ କରିଥିଲେ ଏବଂ ଆଗାମୀ ବର୍ଷ ସମ୍ମିଳନୀର ଅଧ୍ୟକ୍ଷ ଭାବେ ଦାୟିତ୍ୱ ଗ୍ରହଣ କରିବା ପାଇଁ ଭିଏତନାମକୁ ଶୁଭକାମନା ଜଣାଇଥିଲେ ।
ପ୍ରଧାନମନ୍ତ୍ରୀ କହିଲେ ଯେ ଭାରତର ଆକ୍ଟ ଇଷ୍ଟ ନୀତି ଭାରତ-ପ୍ରଶାନ୍ତ ମହାସାଗରୀୟ ରଣନୀତିର ଏକ ମହତ୍ୱପୂର୍ଣ୍ଣ ଦିଗ । ସେ କହିଲେ ଯେ ଆସିଆନ ହେଉଛି ଆକ୍ଟ ଇଷ୍ଟ ନୀତିର କେନ୍ଦ୍ର । ଏକ ସଶକ୍ତ ଅଭିଯାନ ଦ୍ୱାରା ଭାରତକୁ ଅନେକ ଲାଭ ମିଳିବ । ଶ୍ରୀ ମୋଦୀ ଭୂତଳ, ସମୁଦ୍ର, ବାୟୁ ଓ ଡିଜିଟାଲ ସମ୍ପର୍କରେ ସୁଧାର ଆଣିବା ପାଇଁ ଗ୍ରହଣ କରାଯାଇଥିବା ପଦକ୍ଷେପ ସମ୍ବନ୍ଧରେ ଚର୍ଚ୍ଚା କରିଥିଲେ । ସେ କହିଲେ ଯେ ଭୌତିକ ଓ ଡିଜିଟାଲ ସଂଯୋଗ ଦୃଷ୍ଟିରେ ଏକ ବିଲିଅନ ଡଲାରର ଭାରତୀୟ ଋଣ ଲାଭପ୍ରଦ ସାବ୍ୟସ୍ତ ହେବ ।
ପ୍ରଧାନମନ୍ତ୍ରୀ କହିଲେ ଯେ ଗତ ବର୍ଷର ସ୍ମରଣୀୟ ଶିଖର ସମ୍ମିଳନୀ ଏବଂ ସିଙ୍ଗାପୁର ଅନୌପଚାରିକ ଶିଖର ସମ୍ମିଳନୀର ନିଷ୍ପତ୍ତି ଲାଗୁ ହେବା ଦ୍ୱାରା ଭାରତ ଓ ଆସିଆନ ପରସ୍ପରର ନିକଟତର ହୋଇଛନ୍ତି । ଭାରତ ଓ ଆସିଆନ ପାଇଁ ପାରସ୍ପରିକ ଲାଭଦାୟକ କ୍ଷେତ୍ରରେ ସହଯୋଗ ଏବଂ ଭାଗିଦାରିତା ବୃଦ୍ଧି କରିବା ପାଇଁ ଭାରତ ଆଗ୍ରହୀ । ସେ କୃଷି, ଅନୁସନ୍ଧାନ, ଇଞ୍ଜିନିୟରିଂ, ବିଜ୍ଞାନ ଓ ସୂଚନା ଏବଂ ସଂଚାର ପ୍ରାଦ୍ୟୋଗିକୀ କ୍ଷେତ୍ରରେ ଭାଗିଦାରିତା ବୃଦ୍ଧି କରିବା ଏବଂ କ୍ଷମତା ନିର୍ମାଣ ପାଇଁ ଆଗ୍ରହ ପ୍ରକାଶ କରିଥିଲେ ।
ପ୍ରଧାନମନ୍ତ୍ରୀ କହିଲେ ଯେ ଭାରତ ସମୁଦ୍ର ସୁରକ୍ଷା ଓ ନୀଳ ଅର୍ଥବ୍ୟବସ୍ଥା କ୍ଷେତ୍ରରେ ସହଯୋଗ ବୃଦ୍ଧି କରିବାକୁ ଚାହୁଁଛି । ସେ ଭାରତ-ଆସିଆନ ଏଫ.ଟି.ଏର ସମୀକ୍ଷା ସମ୍ବନ୍ଧରେ ଏଇ ନିକଟରେ ଗ୍ରହଣ କରାଯାଇଥିବା ନିଷ୍ପତ୍ତିର ସ୍ୱାଗତ କରି କହିଥିଲେ ଯେ ଏହା ଫଳରେ ଦୁଇ ଦେଶ ମଧ୍ୟରେ ଆର୍ଥିକ ଭାଗିଦାରିତାରେ ସୁଧାର ଆସିବ ।
