ନିକଟରେ ଭାରତ ସରକାରଙ୍କ ଅଧୀନରେ ସହକାରୀ ସଚିବ ଭାବେ ଯୋଗ ଦେଇଥିବା ଭାରତୀୟ ପ୍ରଶାସନିକ ସେବା 2017 ବ୍ୟାଚର 160 ଜଣ ଯୁବ ଅଧିକାରୀମାନଙ୍କ ସହିତ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ବାର୍ତ୍ତାଳାପ କରିଛନ୍ତି ।
ମସୁରୀଠାରେ ସେମାନଙ୍କ ତାଲିମ ଅବସରରେ ଏହି ଅଧିକାରୀମାନଙ୍କ ସହିତ ତାଙ୍କର ବୈଠକ ବିଷୟରେ ପ୍ରଧାନମନ୍ତ୍ରୀ ସ୍ମରଣ କରିଥିଲେ ।
ଏହି ଆଲୋଚନା କାଳରେ, ଯୁବ ଅଧିକାରୀମାନେ କ୍ଷେତ୍ରୀୟ ତାଲିମ ସମୟରେ ସେମାନଙ୍କର ଅଭିଜ୍ଞତା ବିଷୟରେ କହିଥିଲେ । ମସୁରୀଠାରେ ଶ୍ରେଣୀଗୃହ ତାଲିମ ସହିତ ସେମାନଙ୍କ କ୍ଷେତ୍ରୀୟ ଅଭିଜ୍ଞତା ମଧ୍ୟରେ ରହିଥିବା ତାଳମେଳ ସମ୍ପର୍କରେ ଅଧିକାରୀମାନେ ଉଲ୍ଲେଖ କରିଥିଲେ । ଆକାଂକ୍ଷିତ ଜିଲ୍ଲାଗୁଡ଼ିକରେ କାର୍ଯ୍ୟ କରୁଥିବା ଅଧିକାରୀମାନେ ଏସବୁ ଜିଲ୍ଲାରେ ନିକଟରେ ସରକାରଙ୍କ ଦ୍ୱାରା ପ୍ରଣିତ ବିଭିନ୍ନ ଯୋଜନା କିପରି ତୃଣମୂଳ ସ୍ତରରେ କାର୍ଯ୍ୟକାରୀ ହେଉଛି ସେ ସମ୍ପର୍କରେ ସୂଚନା ଦେଇଥିଲେ ।
ପ୍ରଧାନମନ୍ତ୍ରୀ କହିଥିଲେ ଯେ ଭାରତ ସରକାରଙ୍କ ସହିତ ଆଗାମୀ ତିନି ମାସ ଧରି କାର୍ଯ୍ୟ କରିବା ଅଧିକାରୀମାନଙ୍କ ପାଇଁ ବିଶେଷ ଗୁରୁତ୍ୱପୂର୍ଣ୍ଣ ଏବଂ ଏହା ସୁଚିନ୍ତିତ ପ୍ରକ୍ରିୟାର ଅଂଶବିଶେଷ । ଏହି ସମୟ ମଧ୍ୟରେ ପ୍ରତ୍ୟେକ ଅଧିକାରୀମାନଙ୍କ ନିକଟରେ ନୀତି ପ୍ରଣୟନରେ ହସ୍ତକ୍ଷେପ କରିବାର ସୁଯୋଗ ରହିବ ।
ସମସ୍ୟାଗୁଡ଼ିକ ସମାଧାନ କ୍ଷେତ୍ରରେ ନୂତନ ଦୂରଦୃଷ୍ଟି, ଉପାୟ ଏବଂ ଆଭିମୁଖ୍ୟ ନେଇ ଆସିବା ଲାଗି ଯୁବ ଅଧିକାରୀମାନଙ୍କୁ ଶ୍ରୀ ନରେନ୍ଦ୍ର ମୋଦୀ ଉତ୍ସାହିତ କରିଥିଲେ ।
ସେ କହିଥିଲେ ଏହି କାର୍ଯ୍ୟକ୍ରମର ଉଦ୍ଦେଶ୍ୟ ହେଉଛି ସରକାରଙ୍କ କାର୍ଯ୍ୟଧାରାରେ ନୂତନତ୍ୱ ଆଣିବା । ଅଭିଜ୍ଞତା ଏବଂ ନୂତନ ଉତ୍ସାହ ମଧ୍ୟରେ ତାଳମେଳ ରହିବା ବ୍ୟବସ୍ଥା ପାଇଁ ଲାଭଜନକ ବୋଲି ସେ ଉଲ୍ଲେଖ କରିଥିଲେ ।
ନୂତନ ଉତ୍ସାହ ଏବଂ ଜନକୈନ୍ଦ୍ରିକ ଦୃଷ୍ଟିକୋଣ ନେଇ ସେମାନଙ୍କୁ ଦିଆଯାଇଥିବା ଦାୟିତ୍ୱ ତୁଲାଇବା ଲାଗି ସେ କହିଥିଲେ ।
ପ୍ରଧାନମନ୍ତ୍ରୀ ଏଥିପ୍ରତି ମଧ୍ୟ ଗୁରୁତ୍ୱାରୋପ କରିଥିଲେ ଯେ ଅଧିକାରୀମାନେ ସେମାନଙ୍କ ସମ୍ମୁଖରେ ଥିବା ସମସ୍ୟା ସମାଧାନ କରିବା ସମୟରେ ସାମୂହିକ ଆଭିମୁଖ୍ୟ ପୋଷଣ କରିବା ଆବଶ୍ୟକ ।
କ୍ଷେତ୍ର ସ୍ତରରୁ ହାସଲ କରିଥିବା ଅଭିଜ୍ଞତା ନେଇ ଦିଲ୍ଲୀରେ କାର୍ଯ୍ୟ କରିବା ଲାଗି ପ୍ରଧାନମନ୍ତ୍ରୀ ସେମାନଙ୍କୁ ଆହ୍ୱାନ କରିଥିଲେ । ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ରାଷ୍ଟ୍ରମନ୍ତ୍ରୀ ଡ. ଜିତେନ୍ଦ୍ର ସିଂଙ୍କ ସମେତ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ଏବଂ କାର୍ମିକ ଓ ତାଲିମ ବିଭାଗର ବରିଷ୍ଠ ଅଧିକାରୀମାନେ ଏହି ଅବସରରେ ଉପସ୍ଥିତ ଥିଲେ ।
ଏହି ଅବସରରେ ଭାରତରେ ପ୍ରଶାସନିକ ସେବାର ମୁଖ୍ୟ ସ୍ଥପତି ଭାବେ ବିବେଚିତ ହେଉଥିବା ସର୍ଦ୍ଦାର ବଲ୍ଲଭ ଭାଇ ପଟେଲଙ୍କ ଜୀବନୀ ଏବଂ ଉପଲବ୍ଧୀ ଉପରେ ଆଧାରିତ ଏକ ଚଳଚ୍ଚିତ୍ର ପ୍ରଦର୍ଶନ କରାଯାଇଥିଲା ।
