ଆମ୍ବେଦକରଙ୍କ ଜୟନ୍ତୀ ଅବସରରେ ଆସନ୍ତାକାଲି ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଛତିଶଗଡ଼ରେ ଅଭିଳଷିତ (ପଛୁଆ) ଜିଲ୍ଲା ବିଜାପୁର ଗସ୍ତ କରିବେ ।
ସେ କେନ୍ଦ୍ର ସରକାରଙ୍କ ମହତ୍ୱାକାଂକ୍ଷୀ ସ୍ୱାସ୍ଥ୍ୟ ସୁରକ୍ଷା କାର୍ଯ୍ୟକ୍ରମ – ଆୟୁଷ୍ମାନ ଭାରତର ଶୁଭାରମ୍ଭ ପରିପ୍ରେକ୍ଷୀରେ ଏକ ସ୍ୱାସ୍ଥ୍ୟ ଓ କଲ୍ୟାଣ କେନ୍ଦ୍ରର ଉଦ୍ଘାଟନ କରିବେ ।
ପ୍ରଧାନମନ୍ତ୍ରୀ ବିଜାପୁର ଜିଲ୍ଲାର ଜାଙ୍ଗଲା ବିକାଶ କେନ୍ଦ୍ରକୁ ଯିବେ । ସେଠାରେ ସେ ପାଖାପାଖି ଏକ ଘଣ୍ଟା ବିତାଇବେ । ଏହି ଅବଧି ସମୟରେ ସେ ଅନେକ ଲୋକମାନଙ୍କ ସହିତ ଆଲୋଚନା କରିବେ । ଏହି ଅଞ୍ଚଳର ବିକାଶ ପ୍ରସଙ୍ଗରେ ପ୍ରଧାନମନ୍ତ୍ରୀଙ୍କୁ ଅବଗତ ମଧ୍ୟ କରାଯିବ ।
ସ୍ୱାସ୍ଥ୍ୟ ଏବଂ କଲ୍ୟାଣ କେନ୍ଦ୍ରର ଉଦ୍ଘାଟନ ଅବସରରେ ସେ ‘ଆଶା’ କର୍ମୀମାନଙ୍କ ସହିତ ଆଲୋଚନା କରିବେ । ସେ ଏକ ଆଦର୍ଶ ଅଙ୍ଗନୱାଡ଼ି କେନ୍ଦ୍ର ମଧ୍ୟ ପରିଦର୍ଶନ କରିବେ ଏବଂ ସେଠାରେ ଅଙ୍ଗନୱାଡ଼ି କର୍ମୀଙ୍କ ସହିତ ପୁଷ୍ଟିସାଧନ ଅଭିଯାନ ଦ୍ୱାରା ଲାଭାନ୍ୱିତ ହେଉଥିବା ପିଲାଙ୍କ ସହିତ ମତବିନିମୟ କରିବେ । ସେ ହାଟ ବଜାର ସ୍ୱାସ୍ଥ୍ୟ କିଓସ୍କ ମଧ୍ୟ ଗସ୍ତ କରିବେ । ଏହାଛଡ଼ା ଚୟନ କରାଯାଇଥିବା ହିତାଧିକାରୀମାନଙ୍କୁ ମୁଦ୍ରା ଯୋଜନା ଅନ୍ତର୍ଗତ ଋଣ ମଞ୍ଜୁରି ପତ୍ର ବିତରଣ କରିବେ । ସେ ଗ୍ରାମୀଣ ବିପିଓ କର୍ମଚାରୀମାନଙ୍କ ସହିତ ମଧ୍ୟ ଆଲୋଚନା କରିବେ ।
ଏହାପରେ ପ୍ରଧାନମନ୍ତ୍ରୀ ଜନସଭା ସ୍ଥଳରେ ପହଁଚିବେ । ସେ ବନ-ଧନ ଯୋଜନାର ଶୁଭାରମ୍ଭ କରିବେ, ଯାହାର ଉଦ୍ଦେଶ୍ୟ ଜନଜାତି ସମ୍ପ୍ରଦାୟମାନଙ୍କୁ ସେମାନଙ୍କ ଅଧିକାର ପ୍ରଦାନ କରିବା । ଏହି ଯୋଜନା ଅଧିନରେ ସର୍ବନିମ୍ନ ସହାୟକ ମୂଲ୍ୟ ଜରିଆରେ ଲଘୁ ବନଜାତ ଦ୍ରବ୍ୟର ବିପଣନର ଲକ୍ଷ୍ୟ ଧାର୍ଯ୍ୟ କରାଯାଇଛି । ଏହାବ୍ୟତୀତ ଏମଏଫପି ଲାଗି ମୂଲ୍ୟ ଶୃଙ୍ଖଳା ବିକାଶର ମଧ୍ୟ ଲକ୍ଷ୍ୟ ରହିଛି ।
ଏହି ଗସ୍ତ କାଳରେ ଭିଡିଓ କନଫେରେନ୍ସ ଜରିଆରେ ପ୍ରଧାନମନ୍ତ୍ରୀ ଭାନୁପ୍ରତାପପୁର-ଗୁଡ୍ଡୁମ ରେଳ ଲାଇନର ଲୋକାର୍ପଣ କରିବେ । ସେ ଦିଲ୍ଲୀ-ରାଜହରା ଏବଂ ଭରତପୁର ମଧ୍ୟରେ ଟ୍ରେନ ଚଳାଚଳକୁ ସବୁଜ ପତାକା ଦେଖାଇ ଶୁଭାରମ୍ଭ କରିବେ । ସେ ବୀଜାପୁର ଡାକ୍ତରଖାନାରେ ଡାଏଲିସିସ କେନ୍ଦ୍ରର ମଧ୍ୟ ଉଦଘାଟନ କରିବେ ।
ପ୍ରଧାନମନ୍ତ୍ରୀ ବାମପନ୍ଥୀ ଉଗ୍ରବାଦ ପ୍ରଭାବିତ କ୍ଷେତ୍ରରେ ପ୍ରଧାନମନ୍ତ୍ରୀ ଗ୍ରାମୀଣ ସଡ଼କ ଯୋଜନା ଅନ୍ତର୍ଗତ 1988 କିଲୋମିଟର ଲମ୍ବର ସଡ଼କ ନିର୍ମାଣ ପାଇଁ ଭିତ୍ତିପ୍ରସ୍ତର ସ୍ଥାପନ କରିବେ । ଏହାବ୍ୟତୀତ ବାମପନ୍ଥୀ ଉଗ୍ରବାଦ ପ୍ରଭାବିତ ଅଂଚଳରେ ଅନ୍ୟ ସଡ଼କ ଯୋଗାଯୋଗ ପ୍ରକଳ୍ପ, ବୀଜାପୁରରେ ଜଳଯୋଗାଣ ଯୋଜନା ଏବଂ ଦୁଇଟି ସେତୁ ନିର୍ମାଣ ଲାଗି ମଧ୍ୟ ଆଧାରଶିଳା ସ୍ଥାପନ କରିବେ । ସେ ଏକ ସାଧାରଣ ସଭାରେ ମଧ୍ୟ ଉଦ୍ବୋଧନ ଦେବେ ।
