ଜମିଅତ୍ ଉଲେମା-ଇ-ହିନ୍ଦ ର ପୃଷ୍ଠପୋଷକତାରେ ମୁସଲିମ୍ ସମୁଦାୟର 25 ଜଣ ନେତା ଆଜି ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କୁ ସାକ୍ଷାତ କରିଛନ୍ତି ।
ଏହି ପ୍ରତିନିଧି ଦଳଙ୍କୁ ସ୍ୱାଗତ କରି ଜାତୀୟ ସୁରକ୍ଷା ପରାମର୍ଶଦାତା ଶ୍ରୀ ଅଜିତ ଡୋଭୋଲ କହିଛନ୍ତି ଯେ, ସାରା ବିଶ୍ୱ ଆଜି ଭାରତ ଉପରେ ଦୃଷ୍ଟି ରଖିଛି, ଏବଂ ଦେଶକୁ ଆଗେଇ ନେବା ସମାଜର ସମସ୍ତ ବର୍ଗର ଦାୟିତ୍ୱ ।
ଏହି ପ୍ରତିନିଧି ଦଳର ନେତାମାନେ ଶ୍ରୀ ଡୋଭାଲଙ୍କ ସହିତ ସହମତି ପ୍ରକାଶ କରିଛନ୍ତି । ସେମାନେ କହିଛନ୍ତି ଯେ, ପ୍ରଧାନମନ୍ତ୍ରୀଙ୍କ ଆହ୍ୱାନ ସମସ୍ତଙ୍କ ସହିତ, ସମସ୍ତଙ୍କ ବିକାଶକୁ ଅନୁସରଣ କରି ମିଳିମିଶି ଦେଶକୁ ଆଗେଇ ନେବା ଉଦ୍ଦେଶ୍ୟ ହେବା ଉଚିତ ।
ପ୍ରଧାନମନ୍ତ୍ରୀଙ୍କ ଦୂରଦୃଷ୍ଟିକୁ ପ୍ରଶଂସା କରି ଏହି ପ୍ରତିନିଧି ଦଳର ସଦସ୍ୟମାନେ ଆଶା ବ୍ୟକ୍ତ କରିଛନ୍ତି ଯେ ସାରା ଦେଶର ବିଶ୍ୱାସ ଅଛି ଯେ ସେ ଲୋକମାନଙ୍କ ସହିତ ଅଛନ୍ତି, ଯାହା ସମାଜର ସମସ୍ତ କ୍ଷେତ୍ରରେ ସମୃଦ୍ଧି ଏବଂ କଲ୍ୟାଣକୁ ସୁନିଶ୍ଚିତ କରିବ । ନିଉ ଇଣ୍ଡିଆ ଗଠନରେ ମୁସଲିମ୍ ସମୁଦାୟ ସମାନ ଭାଗିଦାର ହେବାକୁ ଆଗ୍ରହୀ ବୋଲି ସେମାନେ କହିଛନ୍ତି ।
ଆତଙ୍କବାଦକୁ ଏକ ବଡ଼ ଆହ୍ୱାନ ଭାବେ ଦର୍ଶାଇ, ସେମାନେ ନିଜର ସମସ୍ତ ଶକ୍ତି ଦେଇ ଏହାର ମୁକାବିଲା କରିବା ପାଇଁ ସଂକଳ୍ପ ବ୍ୟକ୍ତ କରିଛନ୍ତି । ଏହା ମୁସଲିମ୍ ସମୁଦାୟର ଦାୟିତ୍ୱ ଯେ, କୌଣସି ବି ପରିସ୍ଥିରେ ମଧ୍ୟ କାହାକୁ ଦେଶର ସୁରକ୍ଷା କିମ୍ବା କଲ୍ୟାଣ ସହିତ ସାଲିସ କରିବାକୁ ଦିଆଯିବ ନାହିଁ ବୋଲି ସେମାନେ କହିଛନ୍ତି ।
ଭାରତ ବିରୁଦ୍ଧରେ କୌଣସି ଷଡଯନ୍ତ୍ରକୁ ସଫଳ ହେବାକୁ ମୁସଲିମ୍ ସମୁଦାୟ ଅନୁମତି ଦେବ ନାହିଁ ବୋଲି ସେମାନେ କହିଛନ୍ତି ।
କାଶ୍ମୀର ଉପତ୍ୟକାର ପରିସ୍ଥିତି ଉପରେ ଉଦବେଗ ପ୍ରକାଶ କରି ପ୍ରତିନିଧି ଦଳ କହିଛନ୍ତି ଯେ କେବଳ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ହିଁ ଏହି ପ୍ରସଙ୍ଗର ସମାଧାନ କରିପାରିବେ ।
ତିନଥର ତଲାକ୍ ପ୍ରସଙ୍ଗରେ ପ୍ରଧାନମନ୍ତ୍ରୀଙ୍କ ଆଭିମୁଖ୍ୟକୁ ସେମାନେ ପ୍ରସଂଶା କରିଛନ୍ତି ।
ପ୍ରତିନିଧି ଦଳର ସଦସ୍ୟ ଯେଉଁମାନେ ଶୈକ୍ଷିକ ସଂସ୍ଥାନ ସହ ଜଡିତ, ସରକାରଙ୍କ ଦ୍ୱାରା ଶୁଭାରମ୍ଭ ହୋଇଥିବା ପଦକ୍ଷେପ ଯେପରି କି ନୀତି ଆୟୋଗ ଦ୍ୱାରା ଆୟୋଜିତ ହାକାଥନ, ନଗଦ ବିହୀନ କାରବାର ଏବଂ ଷ୍ଟାର୍ଟ-ଅପ୍ ଦ୍ୱାରା ସେମାନଙ୍କ ସଂସ୍ଥାନର ପ୍ରଗତି ବିଷୟରେ ଉଲ୍ଲେଖ କରିଥିଲେ ।
କେନ୍ଦ୍ର ସରକାରଙ୍କ ଦ୍ୱାରା ସଂଖ୍ୟାଲଘୁଙ୍କ ପାଇଁ କଲ୍ୟାଣକାରୀ ଯୋଜନାର କାର୍ଯ୍ୟନ୍ୱୟନକୁ ମଧ୍ୟ ପ୍ରତିନିଧି ଦଳ ପ୍ରସଂଶା କରିଛନ୍ତି ।
ଏହି ପ୍ରତିନିଧି ଦଳଙ୍କୁ ସ୍ୱାଗତ କରି, ପ୍ରଧାନମନ୍ତ୍ରୀ କହିଛନ୍ତି ଯେ ଗଣତନ୍ତ୍ରର ସବୁଠାରୁ ବଡ଼ ଶକ୍ତି ହେଉଛି ସଦ୍ଭାବ ଏବଂ ସୌହାର୍ଦ୍ଦ୍ୟ । ସେ ଗୁରୁତ୍ୱ ଦେଇ କହିଛନ୍ତି, ଯେ ନାଗରିକମାନଙ୍କ ମଧ୍ୟରେ ଭେଦଭାବ ସୃଷ୍ଟି କରିବା ନେଇ ସରକାରଙ୍କର କୌଣସି ଅଧିକାର ନାହିଁ । ବିବିଧତା ମଧ୍ୟରେ ଏକତା ଭାରତର ବୈଶିଷ୍ଟ୍ୟ ବୋଲି ପ୍ରଧାନମନ୍ତ୍ରୀ କହିଛନ୍ତି । ଭାରତର ନୂତନ ପିଢୀ ବିଶ୍ୱରେ ବୃଦ୍ଧି ପାଉଥିବା ଆତଙ୍କବାଦର ଶିକାର ହେବାକୁ ଅନୁମତି ଦିଆଯିବା ଉଚିତ ନୁହେଁ ବୋଲି ପ୍ରଧାନମନ୍ତ୍ରୀ କହିଛନ୍ତି ।
ମୁସଲିମ୍ ସମୁଦାୟ ତିନଥର ତଲାକ୍ ପ୍ରସଙ୍ଗକୁ ରାଜନୀତିକରଣ କରିବାକୁ ଅନୁମତି ନ ଦେବା ଉଚିତ ବୋଲି ପ୍ରଧାନମନ୍ତ୍ରୀ ଦୋହରାଇଛନ୍ତି, ଏହି ସମ୍ବନ୍ଧରେ ସଂସ୍କାର ଆଣିବା ପାଇଁ ଶୁଭାରମ୍ଭ କରିବା ନିମନ୍ତେ ଦାୟିତ୍ୱ ନେବାକୁ ସେ ଏକତ୍ରିତ ହୋଇଥିବା ପ୍ରତିନିଧିମାନଙ୍କୁ ଅନୁରୋଧ କରିଛନ୍ତି ।
ଜମିଅତ୍ ଉଲେମା-ଇ-ହିନ୍ଦ୍ ର ସଭାପତି ମୌଲାନା କାରୀ ସୟଦ ମହମ୍ମଦ ଉସମାନ୍ ମନସୁରପୁରୀ, ଜମିଅତ୍ ଉଲେମା-ଇ-ହିନ୍ଦ୍ ର ସାଧାରଣ ସଂପାଦକ ମୌଲାନା ମହମ୍ମଦ ଏ ମଦାନୀ, ମୁମ୍ବାଇର ଅଂଜୁମନ-ଇ-ଇସଲାମ୍ ର ସଭାପତି ଡ଼କ୍ଟର ଜାହିର ଇ କାଜି, ପ୍ରଫେସର ଅଖତରୁଲ ୱାସେ ଏବଂ ମୌଲାନା ବଦାରୁଦ୍ଦିନ ଆଜ୍ମଲ୍ ପ୍ରମୁଖ ଏହି ପ୍ରତିନିଧି ଦଳରେ ଅନ୍ତର୍ଭୁକ୍ତ ଥିଲେ ।
