: ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଅର୍ଥନୈତିକ ବ୍ୟାପାର ସଂକ୍ରାନ୍ତ କ୍ୟାବିନେଟ୍ କମିଟି ତ୍ରିପୁରା ରାଜ୍ୟରେ ମୋଟ ୧୩୪.୯୧୩ କିଲୋମିଟର ଦୈର୍ଘ୍ୟ ବିଶିଷ୍ଟ ଜାତୀୟ ରାଜପଥ-୨୦୮ର କିଲୋମିଟର ୧୦୧.୩୦୦ (ଖୋୱାଇ) ରୁ କିଲୋମିଟର ୨୩୬.୨୧୩ (ହରିନା) ପର୍ଯ୍ୟନ୍ତ ରାସ୍ତାର ଉନ୍ନତି ଏବଂ ପ୍ରଶସ୍ତୀକରଣ ପାଇଁ ଅନୁମୋଦନ ଦେଇଛି ।
ଏହି ପ୍ରକଳ୍ପରେ ୨,୪୮୬.୭୮ କୋଟି ଟଙ୍କାର ପୁଞ୍ଜିନିବେଶ ଅନ୍ତର୍ଭୁକ୍ତ, ଯେଉଁଥିରେ ୧,୫୧୧.୭୦ କୋଟି ଟଙ୍କା (ଜେପିୱାଇ ୨୩,୧୨୯ ନିୟୁତ ଟଙ୍କା) ଋଣ ଉପାଦାନ ଅନ୍ତର୍ଭୁକ୍ତ । ଅଫିସିଆଲ୍ ଡେଭଲପମେଣ୍ଟ ଆସିଷ୍ଟାନ୍ସ (ଓଡିଏ) ଯୋଜନା ଅଧୀନରେ ଜାପାନ ଇଣ୍ଟରନ୍ୟାସନାଲ କୋଅପରେସନ ଏଜେନ୍ସି (ଜାଇକା)ରୁ ଏହି ଋଣ ସହାୟକ ମିଳିବ। ତ୍ରିପୁରାର ବିଭିନ୍ନ ଅଞ୍ଚଳ ମଧ୍ୟରେ ଉନ୍ନତ ସଡ଼କ ଯୋଗାଯୋଗ କୁ ସୁଗମ କରିବା ଏବଂ ବର୍ତ୍ତମାନର ଜାତୀୟ ରାଜପଥ -୮ ବ୍ୟତୀତ ତ୍ରିପୁରାରୁ ଆସାମ ଏବଂ ମେଘାଳୟକୁ ବିକଳ୍ପ ପ୍ରବେଶ ସୁବିଧା ପ୍ରଦାନ କରିବା ପାଇଁ ଏହି ପ୍ରକଳ୍ପର ପରିକଳ୍ପନା କରାଯାଇଛି ।
ସୁବିଧା :
ଏହି ଅଞ୍ଚଳର ସାମାଜିକ ଅର୍ଥନୈତିକ ଆବଶ୍ୟକତାକୁ ଦୃଷ୍ଟିରେ ରଖି ସୁରୁଖୁରୁରେ ଓ ଯାତାୟତ ଯୋଗ୍ୟ ରାସ୍ତା ଯୋଗାଇଦେବାର ଆବଶ୍ୟକତାକୁ ଆଧାର କରି ଏହି ପ୍ରକଳ୍ପ ଚୟନ କରାଯାଇଛି। ଜାତୀୟ ରାଜପଥ-୨୦୮ର ପ୍ରକଳ୍ପ ଅଂଶର ବିକାଶ କେବଳ ଜାତୀୟ ରାଜପଥ-୨୦୮ଏ ମାଧ୍ୟମରେ ଆସାମ ଏବଂ ତ୍ରିପୁରା ମଧ୍ୟରେ ଆନ୍ତଃରାଜ୍ୟ ଯୋଗାଯୋଗରେ ଉନ୍ନତି ଆଣିବ ନାହିଁ ବରଂ ପରିବହନ ସମୟକୁ ମଧ୍ୟ ହ୍ରାସ କରିବ ଏବଂ ଯାତ୍ରୀମାନଙ୍କ ପାଇଁ ସୁରକ୍ଷିତ ଯୋଗାଯୋଗ ପ୍ରଦାନ କରିବ । ଏହି ପ୍ରକଳ୍ପ ବାଂଲାଦେଶ ସୀମାର ଅତି ନିକଟଦେଇ ଗତି କରୁଛି ଏବଂ ଏହା କୈଳାସହାର, କମଲପୁର ଏବଂ ଖୋୱାଇ ବର୍ଡର ଚେକ୍ ପୋଷ୍ଟ ଦେଇ ବାଂଲାଦେଶକୁ ଯୋଗାଯୋଗରେ ଉନ୍ନତି ଆଣିବ । ପ୍ରକଳ୍ପ ସଡ଼କର ବିକାଶ ମାଧ୍ୟମରେ ଏହି ଅଞ୍ଚଳରେ ରୋଡ୍ ନେଟୱାର୍କର ଉନ୍ନତି ସହିତ ସ୍ଥଳ ସୀମା ବାଣିଜ୍ୟ ମଧ୍ୟ ବୃଦ୍ଧି ପାଇବାର ସମ୍ଭାବନା ରହିଛି ।
ରାଜ୍ୟର କୃଷି କ୍ଷେତ୍ର, ପର୍ଯ୍ୟଟନସ୍ଥଳୀ, ଧାର୍ମିକ ସ୍ଥଳ ଏବଂ ଆଦିବାସୀ ଜିଲ୍ଲାଗୁଡ଼ିକୁ ଉନ୍ନତ ଯୋଗାଯୋଗ ଯୋଗାଇ ଦିଆଯାଉଛି, ଯାହା ଅଭିବୃଦ୍ଧି ଓ ଆୟ ଦୃଷ୍ଟିରୁ ପଛୁଆ। ପ୍ରକଳ୍ପ ସମ୍ପୂର୍ଣ୍ଣ ହେବା ପରେ ଯୋଗାଯୋଗରେ ଉନ୍ନତି ଆସିବ ଯାହା ରାଜ୍ୟକୁ ଅଧିକ ରାଜସ୍ୱ ଏବଂ ସ୍ଥାନୀୟ ଜନସାଧାରଣଙ୍କ ପାଇଁ ଆୟ ସୃଷ୍ଟି କରିବାରେ ସହାୟକ ହେବ ।
ପ୍ରକଳ୍ପ ର ନିର୍ମାଣ ଅବଧି ୨ ବର୍ଷ ହେବ ଯେଉଁଥିରେ ନିର୍ମାଣ ଶେଷ ହେବା ପରେ ୫ ବର୍ଷ (ନମନୀୟ ଫୁଟପାଥ୍ କ୍ଷେତ୍ରରେ) / ୧୦ ବର୍ଷ (କଠୋର ଫୁଟପାଥ କ୍ଷେତ୍ରରେ) ଏହି ଜାତୀୟ ରାଜପଥଗୁଡ଼ିକର ରକ୍ଷଣାବେକ୍ଷଣ ଅନ୍ତର୍ଭୁକ୍ତ ।
