ଦେଶରେ ପ୍ରଥମ କରି ଏକ ରାଷ୍ଟ୍ରୀୟ ଶିକ୍ଷଣ ନ୍ୟାସ ଗଠନ ଓ କାର୍ଯ୍ୟକ୍ଷମ କରାଯିବ । କେନ୍ଦ୍ର ସରକାର ଡିଜିଟାଲ ଇଣ୍ଡିଆ ଅଭିଯାନ ଅଧିନରେ ଏହି କାର୍ଯ୍ୟକ୍ରମ ହାତକୁ ନେବେ । ଆଜି (୨୭.୧୦.୨୦୧୬) ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କେବିନେଟର ବୈଠକରେ ଏହି ନିଷ୍ପତ୍ତି ନିଆଯାଇଛି । ଆଗାମୀ ତିନିମାସ ମଧ୍ୟରେ ଏହି ନ୍ୟାସ ଗଠନ କରାଯିବ ଏବଂ ୨୦୧୭-୧୮ ଶିକ୍ଷା ବର୍ଷ ସୁଦ୍ଧା ସମଗ୍ର ଦେଶରେ ଏହାକୁ କାର୍ଯ୍ୟକ୍ଷମ କରାଯିବ । ଗତ ୨୦୧୬-୧୭ ଆର୍ଥିକ ବର୍ଷର ବଜେଟ ଅଭିଭାଷଣରେ ଅର୍ଥ ମନ୍ତ୍ରୀ ଏହି ଜାତୀୟ ଡିଜିଟାଲ ଶିକ୍ଷଣ ନ୍ୟାସ ଗଠନ ବିଷୟରେ ସମ୍ୟକ ସୂଚନା ଦେଇଥିଲେ । ସ୍କୁଲ, କଲେଜ ଏବଂ ବିଭିନ୍ନ ଉଚ୍ଚ ଶିକ୍ଷା ସଂସ୍ଥାନର ସାର୍ଟିଫିକେଟ, ଡିଗ୍ରୀ ସାର୍ଟିଫିକେଟ, ଏକାଡେମିକ ପୁରସ୍କାର, ବିଭିନ୍ନ ଶିକ୍ଷଣ ଉପାଧି ଏହି ଡିଜିଟାଲ ଶିକ୍ଷଣ ନ୍ୟାସ ଜରିଆରେ ଉପଲବ୍ଧ ହେବ । ସିକ୍ୟୁରିଟି ନ୍ୟାସ ଢ଼ାଂଚାରେ ଏହି ନୂତନ ରାଷ୍ଟ୍ରୀୟ ଶିକ୍ଷଣ ନ୍ୟାସ କାର୍ଯ୍ୟ କରିବ ।
ସେବି ଆଇନ ୧୯୯୨ ଅଧିନରେ ପରିଚାଳିତ ଏନଏସଡିଏଲ ଡାଟା ବେସ ମେନେଜମେଂଟ ଲିମିଟେଡ ଏବଂ ସିଡିଏସଏଲ ଭେଂଚର୍ସ ଲିମିଟେଡ ରାଷ୍ଟ୍ରୀୟ ଶିକ୍ଷଣ ନ୍ୟାସକୁ କାର୍ଯ୍ୟକ୍ଷମ କରିବା ଦାୟୀତ୍ଵ ନେବ । ତେବେ ଏହି ବ୍ୟବସ୍ଥା ଭିତରେ ସାମିଲ ହେବାକୁ ଥିବା ଶିକ୍ଷଣ ସଂସ୍ଥାନମାନେ ଡିଜିଟାଲ ଡାଟା ଅପଲୋଡ ସତ୍ୟନିଷ୍ଠତାର ଉତରଦାୟୀତ୍ଵ ନେବେ । ରାଷ୍ଟ୍ରୀୟ ଶିକ୍ଷଣ ନ୍ୟାସରେ ସାମିଲ ହେବା ପାଇଁ ସମସ୍ତ ଯୋଗ୍ୟ ବିବେଚିତ ଶିକ୍ଷା ସଂସ୍ଥାନ, ବୋର୍ଡ, ଆନୁସଂଗିକ ସଂସ୍ଥା, ଛାତ୍ର-ଛାତ୍ରୀ, ବ୍ୟବହାରକାରୀ, ସରକାରୀ ସଂସ୍ଥାନ ଆଦି ବିଧିବଦ୍ଧ ଭାବେ ପଞ୍ଜିକୃତ ହେବାକୁ ପଡିବ । ପଞ୍ଜିକୃତ ବ୍ୟବହାରକାରୀ ଦରଖାସ୍ତ କରିବା ଦିନହିଁ ତାଙ୍କ ଅନୁରୋଧକୁ ତର୍ଜମା/ଯାଂଚ କରି ରାଷ୍ଟ୍ରୀୟ ଶିକ୍ଷଣ ନ୍ୟାସ ଆବଶ୍ୟକ ସାର୍ଟିଫିକେଟ ବା ଦସ୍ତାବିଜ ଅନଲାଇନରେ ପ୍ରଦାନ କରିବେ ।
