ଜିଏସଟି ଆଇନ ସଂକ୍ରାନ୍ତ ସମ୍ବିଧାନର 279A ଧାରା ଲାଗୁ କରିବାକୁ ବିଜ୍ଞପ୍ତି ଜାରି
ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ କେନ୍ଦ୍ର କ୍ୟାବିନେଟ୍ ଆଜି (12.09.2016) ବସ୍ତୁ ଓ ସେବା କର ପରିଷଦ ଗଠନ ଓ ଜିଏସଟି ସଚିବାଳୟ ସ୍ଥାପନ ପ୍ରସ୍ତାବକୁ ଅନୁମୋଦନ କରିଛନ୍ତି ।
ସମ୍ବିଧାନ ସଂଶୋଧନର ଧାରା 279A ଆଧାରରେ ବସ୍ତୁ ଓ ସେବା କର (ଜିଏସଟି) ପରିଷଦ ଗଠନ ହେବ ।
ଜିଏସଟି ପରିଷଦର ସଚିବାଳୟ ଓ ତା’ର କାର୍ଯ୍ୟାଳୟ ନୂଆଦିଲ୍ଲୀରେ ରହିବ ।
ଜିଏସଟି କାଉନସିଲର ଏକ୍ସ-ଅଫିସିଓ ସଚିବ ଭାବେ ରାଜସ୍ୱ ସଚିବଙ୍କୁ ନିଯୁକ୍ତି ଦିଆଯିବ ।
ଜିଏସଟି ପରିଷଦର ସମସ୍ତ ପ୍ରକ୍ରିୟାରେ ସେଂଟ୍ରାଲ ବୋର୍ଡ ଅଫ୍ ଏକ୍ସାଇଜ୍ ଓ କଷ୍ଟମ(ସିବିଇସି) ଅଧ୍ୟକ୍ଷ ସ୍ଥାୟୀ ନିମନ୍ତ୍ରିତ ସଦସ୍ୟ(ଭୋଟଦାନ କ୍ଷମତା ନଥିବା) ଭାବେ ସାମିଲ ହେବେ ।
ଜିଏସଟି କାଉନସିଲ ସଚିବାଳୟରେ ଜଣେ ଅତିରିକ୍ତ ସଚିବ ପଦବୀ ସୃଷ୍ଟି ହେବ । ସିଏ କେନ୍ଦ୍ର ସରକାରଙ୍କ ଅତିରିକ୍ତ ସଚିବ ପାହ୍ୟାର ହେବେ । ଜିଏସଟି କାଉନସିଲରେ ଯୁଗ୍ମ ସଚିବ ପାହ୍ୟାର 4ଟି କମିଶନର ପଦବୀ ରହିବ ।
ଏହା ବ୍ୟତୀତ ଜିଏସଟି କାଉନସିଲ ସଚିବାଳୟର ସମସ୍ତ ଖର୍ଚ୍ଚ କେନ୍ଦ୍ର ସରକାର ବହନ କରିବେ । ଜିଏସଟି କାଉନସିଲ ସଚିବାଳୟର ବୈଠକ ଓ ଆନୁସଙ୍ଗିକ ଖର୍ଚ୍ଚ ପାଇଁ ଯଥେଷ୍ଟ ପରିମାଣର ପାଣ୍ଠି ଉପଲବ୍ଧ କରାଇବାକୁ କ୍ୟାବିନେଟ୍ ନିଷ୍ପତ୍ତି ନେଇଛନ୍ତି । ଉଭୟ କେନ୍ଦ୍ର ଓ ରାଜ୍ୟ ସରକାରରୁ ଡେପୁଟେସନରେ ଅଫିସରଙ୍କୁ ଅଣାଯାଇ ଜିଏସଟି କାଉନସିଲ ସଚିବାଳୟର ପରିଚାଳନା କରାଯିବ । ଜିଏସଟି ଲାଗୁ କରିବା ଦିଗରେ ଆବଶ୍ୟକ ପଦକ୍ଷେପ ଏପର୍ଯ୍ୟନ୍ତ ନିର୍ଦ୍ଧାରିତ କାର୍ଯ୍ୟସୂଚୀରେ ହେଉଛି ।
ନୂଆଦିଲ୍ଲୀରେ ଜିଏସଟି ପରିଷଦର ପ୍ରଥମ ବୈଠକ ସେପ୍ଟେମ୍ବର 22 ଓ 23 ତାରିଖରେ କରିବା ପାଇଁ ଅର୍ଥ ମନ୍ତ୍ରୀ ନିଷ୍ପତ୍ତି ନେଇଛନ୍ତି ।
ଦେଶରେ ବସ୍ତୁ ଓ ସେବା ଟିକସ(ଜିଏସଟି) କାର୍ଯ୍ୟକାରୀ କରିବା ପାଇଁ ସମ୍ବିଧାନ (122 ତମ ସଂଶୋଧନ) ବିଲ୍-2016କୁ ରାଷ୍ଟ୍ରପତି ସେପ୍ଟେମ୍ବର 8, 2016ରେ ସମ୍ମତି ଦେଇଛନ୍ତି ଓ ଏହି ସମ୍ବିଧାନ ସଂଶୋଧନ ଆଇନ-2016ର ମଧ୍ୟ ବିଜ୍ଞପ୍ତି ଜାରି ହୋଇସାରିଛି । ସମ୍ବିଧାନ ସଂଶୋଧନ 279(A)(1) ଅନୁସାରେ ରାଷ୍ଟ୍ରପତିଙ୍କ ଅନୁମତି ମିଳିବାର 60 ଦିନ ଭିତରେ ଜିଏସଟି କାଉନସିଲ ଗଠନ ହେବା ଜରୁରୀ । ସମ୍ବିଧାନ ସଂଶୋଧନ ବିଜ୍ଞପ୍ତି 2016 ସେପ୍ଟେମ୍ବର 10 ତାରିଖରେ ଜାରି ହୋଇଥିଲା ଓ 2016 ସେପ୍ଟେମ୍ବର 12ତାରିଖରୁ ଲାଗୁ ହୋଇଛି ।
ସମ୍ବିଧାନ ସଂଶୋଧନ ଧାରା 279A ଅନୁସାରେ ଜିଏସଟି କାଉନସିଲ କେନ୍ଦ୍ର ଓ ରାଜ୍ୟର ମିଳିତ ମଞ୍ଚ । ଜିଏସଟି କାଉନସିଲରେ….
ଅଧ୍ୟକ୍ଷ ଭାବେ କେନ୍ଦ୍ର ଅର୍ଥମନ୍ତ୍ରୀ, ସଦସ୍ୟ ଭାବେ ରାଜସ୍ୱ ଓ ଫାଇନାନ୍ସ ଦାୟିତ୍ୱରେ ଥିବା ରାଷ୍ଟ୍ରମନ୍ତ୍ରୀ ଓ ପ୍ରତ୍ୟେକ ରାଜ୍ୟର ଅର୍ଥ ମନ୍ତ୍ରୀ କିମ୍ବା ରାଜ୍ୟ ସରକାରଙ୍କ ଦ୍ୱାରା ମନୋନୀତ ବ୍ୟକ୍ତିଙ୍କୁ ସଦସ୍ୟ ରଖାଯିବ ।
ଧାରା 279A(4)ଅନୁସାରେ ଜିଏସଟି ସଂକ୍ରାନ୍ତ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ କେନ୍ଦ୍ର ଓ ରାଜ୍ୟ ସରକାରଙ୍କୁ କାଉନସିଲ ସୁପାରିସ୍ କରିବ । ଜିଏସଟି ପରିସରରେ ସାମିଲ ହେବାକୁ ଥିବା ଅବା ବାଦ୍ ପଡ଼ିବାକୁ ଥିବା ବସ୍ତୁ ଓ ସେବାକୁ କାଉନସିଲ ନିର୍ଦ୍ଧାରଣ କରିବ । କାଉନସିଲ ଟିକସ ଆଦାୟର ସୀମା ମଧ୍ୟ ନିର୍ଦ୍ଧାରଣ କରିବ । ଜିଏସଟି ଦର ସମେତ ବ୍ରାଣ୍ଡ ସହ ମୂଳ ଦର, ପ୍ରାକୃତିକ ବିପର୍ଯ୍ୟୟ ସମୟରେ ଅତିରିକ୍ତ ସମ୍ବଳ ସଂଗ୍ରହ ପାଇଁ ସ୍ୱତନ୍ତ୍ର ଦର, କେତେକ ରାଜ୍ୟ ପାଇଁ ସ୍ୱତନ୍ତ୍ର ପ୍ରାବଧାନ ଆଦି ଜିଏସଟି କାଉନସିଲ ସ୍ଥିର କରିବ ।
