ইকায়খুম্নরবশিং,
খুরুমজরি!
ঐখোয়গা য়ুম্লোন্নরিবা লৈবাকশিংগী হকশেলগী ওফিসিএলশিং অমসুং অখঙ-অহৈশিংগা ঙসি উনবা অসিদা ঐ য়াম্না হরাওই। ঙসি য়াম্না কান্নবা খন্ন-নৈনবা পাংথোক্নবগীদমক ময়াম পুম্নমক ঐগী য়াইফ-পাউজেল পীদুনা ঐনা মীফম হৌদোক্লে। লাইচৎ মনুং অসিদা ঐখোয়গী অনা-লায়য়েংগী থবকশিংনা মতেং পাংবগীদমক ঐনা অদোম থাগৎপা ফোঙদোক্লি। মমাঙ চহিদা মালেম অসিদা কোবিদ-১৯ শন্দোরকপা মতমদা, অখঙ-অহৈ কয়ানা মী কুংনা তাবা ঐখোয়গী লমদম অসিগীদমক অখন্নবা নুঙনাংবা ৱাফম ফোঙদোকখি। অদুবু, মকোক্তগী হৌনা মসিগী অৱাবা অসি ঐখোয়না অপুনবা থবক পায়খৎতুনা মায়োক্নখি। মমাঙ চহিগী মার্চতা, অকিবা অসি মশক খঙদোক্নবা অমসুং মসি পুন্না থেংন্নবা অহানবা ওইনা ঐখোয়না পুন্না চৎমিন্নখি। অতোপ্পা লমদম কয়া অমসুং কাংলুপ কয়া ঐখোয়গী মতৌ তমখি।
লাইচৎ থেংন্নবা খুদক্কী দরকার ওইবা শেনফমশিং কোন্ননবা ঐখোয়না কোবিদ-১৯ ইমর্জেন্সি রেসপোন্স ফন্দ শেমখি। ঐখোয়না ঐখোয়গী লৈজবা হিদাক-লাংথকশিং, পি.পি.ই অমসুং তেস্ত তৌনবা খুৎলায়শিং অতোপ্পশিংদা পীখি। পুম্নমক অসিগী মথক্তা, ঐখোয়গী হকশেলগী মীওইশিংগা পুন্না ত্রেনিং পাংথোক্তুনা খ্বাইদগী মমল য়াম্লবা পোৎশক ‘লৌশিং’ ঐখোয়না অতোপ্পদা পীখি। ৱেবিনারশিং, ওনলাইন কোর্সশিং অমসুং আই.তি পোর্তেলশিংগী খুৎথাংদা ঐখোয়না খঙজবশিং শরুক য়ামিন্নখি অমসুং তেস্তিং, লায়না লৌনবা লাকশিন্নবা অমসুং মেদিকেলগী অমোৎ-অকায়শিং লোইশিনবগী মতাংদা খ্বাইদগী ফবা থবকশিং অমনা অমদগী তম্নখি। ঐখোয়গীদমক পাংথোক্লিবা খ্বাইদগী ফবা থবকশিংদা য়ুম্ফম ওইবা ঐখোয় ইশাগী ওইবা খ্বাইদগী ফবা থবকশিং ঐখোয়না শেমগৎলে। লৌশিং অমসুং থবক ওইনা পাংথোকপদগী খঙলকপশিং অমতা ওইনা পুনশিন্নবা ঐখোয় অমমম্না মতেং পাংলে।
মরুপশিং,
মতেং পাংনবগী থৌনা অসি লাইচৎ অসিদগী ফংবা খ্বাইদগী মরুওইবা অমনি। ঐখোয়গী খঙবা কনবা অসিদগী মালেমদা শিবগী চাং খ্বাইদগী য়াম্না নেম্বা লৈবাকশিংগী মনুংদা ঐখোয়না লৈবাক অমা ওইবা ঙম্লে। ঙসিদি ঐখোয়গী লমদম অসিগী অমসুং মালেমগী থাজবশিং য়াংনা তিকা থাবদা মিৎয়েং থম্লে। তিকা থাবগী থবক অসিদশু, ঐখোয়না চপ মান্ননা মতেং পাংগনি অমসুং মতেং পাংনবগী থৌনা লৈগনি।
মরুপশিং,
হৌখিবা চহিদা ঐখোয়না হকশেলগী থবকশিংদা মতেং পাংনবা মাইপাকপা ঙমখ্রে। ঐখোয়গী পান্দমশিং মখা তানা হেনগৎহন্নবা হৌজিক ঐখোয় ৱাখল খনবা য়াগদরা? ঙসি অদোমগী খন্ন-নৈনবা অসিগীদমক ঐ পাউতাক খরা থমজগে:
হকশেলগী অথু-অকায় লাকপদা, লৈবাক অমনা হায়জরকপা মতমদা ঐখোয়গী লমদম মনুংদা ঐখোয়গী দোক্তরশিং অমসুং নর্সশিং য়াংনা চৎথোক-চৎশিন তৌবা য়ানবা অখন্নবা ভিসা স্কিম অমা শেম্নবা ঐখোয় খন্নবা য়াগদরা?
মেদিকেলগী অথু-অকায়গীদমক রিজনেল এয়র এম্বুলেন্স এগ্রিমেন্ত অমা লৈহন্নবা ঐখোয়গী সিবিল এভিএসন মিনিস্ত্রিশিং পুন্না থবক তৌমিন্নবা য়াগদরা?
ঐখোয়গী মীয়াম মরক্তা কোবিদ-১৯ তিকা কান্নবা ফংবগী মতাংদা দেতা খোমজিনবা, শেম-শাবা অমসুং দেতা নৈন্নবগী রিজনেল প্লেতফোর্ম অমা ঐখোয়না শেম্বা য়াগদরা?
তুংদা লাক্কদবা লাইচৎশিং মাঙজৌন্না ঙাকথোক্নবা তেক্নোলোজিনা মতেং পাংবা ইপিদিমিওলোজিগীদমক ঐখোয়না রিজনেল নেতৱার্ক অমা শেম্বা য়াগদরা?
কোবিদ-১৯ লোইখ্রবশু, ঐখোয়গী মাইপাক্লবা মীয়ামগী হকশেলগী থৌশিলশিং অমসুং স্কিমশিং ঐখোয় শরুক য়ামিন্নবা য়াগদরা? ভারতকী মাইকৈদগী, ঐখোয়গী অয়ুস্মান ভারত অমসুং জন অরোগ্যা স্কিমশিং অসি লমদম অসিগী ঐখোয়গী মরুপশিংগী কান্নরবা কেস-স্তদিজ ওইবা য়াগনি। অসিগুম্বা মতেং পাংনবা অসিনা লমদম অসিদা অতোপ্পা হিরমশিংদা মতেং পাংনবগী লম্বী অমা শেমগনি। পুম্নমক অসিগী মথক্তা, অইং-অশাগী খল হোঙলকপা, মহৌশাগী ওইবা অমাঙ-অতাশিং, লায়রবা, লাইরিক ময়েক চত্তবা অমসুং খুন্নাই অমসুং নুপা-নুপী থোঙমানদবগী অমতা ওইবা খুদোং চাদবা কয়া ঐখোয়না থেংনরি। করিগুম্বা ঐখোয়না অমতা ওইনা পু্ন্দুনা মিৎয়েং চঙলবদি, ঐখোয়গী লমদম অসিনা হৌজিক থেংনরিবা লাইচৎ অসি লাকশিনবা খক নত্তনা, অতোপ্পা ঐখোয়গী অৱাবশিংশু কোকহনবা ঙমগনি।
মরুপশিং,
করিগুম্বা ২১শুবা চহিচা অসি এসিয়াগী চহিচা ওইবা তারবদি, খা এসিয়াগী লৈবাকশিং অমসুং ভারত মহাসাগরগী ইথৎ লৈবাকশিংগী মরক্তা পুনশিন্দ্রবদি মসি ওইথোক্লোই। লাইচৎ মনুংদা ঐখোয়না উৎখিবা লমদম অসি অমতা ওইবগী থৌনা অদুনা অসিগুম্বা অপুনবা অসি পাংথোকপা ঙমগনি। ঙসি কানরবা খন্ন-নৈনবা কয়া পাংথোকপগীদমক ঐনা অমুক হন্না ময়াম পুম্নমক ঐগী য়াইফ-পাউজেল পীজরি।
অদোম থাগৎচরি!
অদোম য়াম্না থাগৎচরি!
