রাস্ত্রপতি ফ্রান্স ইমানুয়েল মেক্রোন্না চেবাউ পীরকপদগী, ভারত-ফ্রান্স মরুপ-মপাং ওইবা মরী চহি ২৫ শুবা কুমওন থৌরমদা ফ্রেঞ্চগী নেসনেল দে থৌরমদা গেস্ত ওফ ওনর ওইনা শরুক য়াদুনা পুৱারি ওইরবা প্রধান মন্ত্রী শ্রী নরেন্দ্র মোদীগী খোঙচৎ লোইশিনখ্রে। জনুৱারি ১৯৯৮তা, তম্বা ঙমদবা মালেম অমদা- ভারতনা লৈবাক অমগা অচেৎপা মরী লৈনবা অহানবা ওইনা প্রধান মন্ত্রী অতল বিহারি বাজপায়ী অমসুং রাস্ত্রপতি জেকস চিরাক্না লৈবাক অনিগী মরী স্ত্রাতেজিক পার্তনর্সিপকী থাক্তা পুখৎখি।
ভারতনা ১৯৪৭দা নিংতম্বা ফংবদগী লৈরকখিবা চহি ৫০ হেল্লবা অকনবা অমসুং অচেৎপা মরুপ-মপাং ওইবগী থবকশিং অদুদা অমনা অমবু থাজনবগী মমি তাখি।
ঙসি লুচিংবা অনি উনবা মতমদা, ঐখোয়গী লৈনরিবা মরী অসি অৱাবা কয়া খাংদুনা লাক্লবা অমসুং খুদোংচাবা কয়াদা থাজবা থমদুনা লাক্লবা মরী অমনি হায়না মখোয়না য়ানখি। মরী অসি লৈবাক অমগী মনিংতম্বা, ওতোনোমিদা থাজবা , মালেমগী লো অমসুং য়ু.এন চার্তর চিংনবা লৈতনা ঙাকপা, মালেমগী লৈবাকশিংগী অপুনবা থবকশিংদা থাজবা অমসুং তুংদু লৈতাবা মালেমগী ঈখৌ লাংবা লৈবদা য়ুম্ফম ওইরি।
হৌখিবা চহি ২৫দা লৈবাক অনিগী মরীদা হোংলক্লিবা অমসুং পাকথোক-চাউথোকহনবা, লৈবাক অনি মতেং পীনবগী হিরমশিং অমসুং লমদম অসিগী অমসুং মালেমগী মরুওইবা থৌদোকশিংগী মতাংদা প্রধান মন্ত্রী মোদী অমসুং রাস্ত্রপতি মেক্রোন্না খন্নখি।
ঐখোয়গী রাজনিতি অমসুং দিপ্লোমেতকী থবকশিং অসি খ্বাইদগী নকশিন্নবা অমসুং থাজবগী মরক্তা য়াওরি। ঐখোয়গী ঙাক-শেনগী মরী অসি মপাঙ্গল কল্লি অমসুং সমুদ্র খোঙনুংদগী হৌরগা সুন্দ্রং ফাওবা শন্দোক্লি। ঐখোয়গী শেন-থুমগী মরীশিংনা ঐখোয়গী নুঙাই-য়াইফবা হেনগৎহল্লে অমসুং সপ্লাই চেনশিং খুমাঙচাউশিলহল্লে। মৈখু চেন্দবা অমসুং কার্বোন য়াম্না থাদোক্তবা ইনর্জি শীজিন্নবা হেনগৎহনবা, বাইওদাইভর্সিতি ঙাকপা, সমুদ্র কনবা অমসুং পোল্লুসন থেংনবা অসি মতেং পীনবগী মরুওইবা য়ুম্বী অমনি হায়বা লুচিংবশিংনা য়ানখি অমসুং দিজিতেল, ইন্নোবেসন অমসুং স্তার্দঅপশিং অসি লৈবাক অনিগী মরক্তা মতেং পীন্নবগী অনৌবা হিরমশিংনি।
লাইরিক-লাইশু, সাইন্স অমসুং তেক্নোলোজি, কলচর অমসুং নহারোলশিং একচেঞ্জ তৌনবদা ঐখোয়গী মরীশিং ফগৎলে অমসুং ফ্রান্সতা লৈরিবা ভারতমচাশিংনা মীগা মীগা লৈনবা মরীশিং হেন্না চেৎশিনহল্লে অমসুং তুংগী মরুপ-মপাং ওইবা অমসুং থাজনবগী মরু হুল্লে।
ঐখোয়গী হৌজিক্কী অৱাবা মতম অসিদা- মসিগী মরুপ-মপাং ওইবা মরী অসি হান্নদগী হেন্না ফগৎলে, মালেমগী আইনশিং ঙাক্লে, মচোই তারবা মালেম অসিদা অমতা ওইরে; মালেমগী লৈবাকশিংগী থবকশিং অওনবা পুরক্লে; অশোই-অঙাম থোক্তবা অমসুং শান্তি লৈবা ইন্দো-পেসিফিক লমদম অমা শেমগৎলে; অইং-অশাগী খল হোংলকপদগী মালেম্না মায়োক্নরিবা খুদোংথিবশিং থেংনরে, মৈখু থাংদবা ইনর্জি, হকশেল, চীঞ্জাক ৱাৎহন্দবা, লায়রবা অমসুং চাউখৎ-থৌরাংগী লমদা থবক তৌমিন্নরে।
ঙসি, ঐখোয়না মথং চহি ২৫গী ঐখোয়গী অপুনবা খোঙচৎ অসি ২০৪৭ অমসুং মসিগী ৱাংমদা য়েংলি অমসুং অচৌবা পান্দমশিংগা লোয়ননা ঐখোয়না ভারতনা নিংতম্বা চহি ১০০ শুবা, ঐখোয়না দিপ্লোমেতকী মরী লৈনরকপা চহি ১০০ শুবা অমসুং ঐখোয়গী অচেৎপা মরুপ-মপাং ওইবা মরী অসি চহি ৫০ শুরকপা ঐখোয় হরাও-তয়াম্বা ফোঙদোক্কনি।
মথং চহি ২৫ অসি লৈবাক অনিমক্কী ওইনা য়াম্না মরুওইবা তাঞ্জা অমনি অমসুং ঐখোয়গী মীয়ামগীদমক অমসুং গ্রহ অসিদা ঐখোয়গা হিংমিন্নরিবা মীওইশিংগীদমক ঐখোয়গী মরী অসি হেন্না ফগৎহনগনি। “ইন্দো-ফ্রেঞ্চ স্ত্রাতেজিক পার্তনর্সিপ চহি ২৫ শুরকপদা হোরাইজন রোদমেপ ২০৪৭: ফ্রেঞ্চ-ইন্দিয়াগী মরী চহিচা অমদা চঙশিল্লকপা” অসি থবক ওইনা পাংথোকপা হায়না লুচিংবা অনিনা য়ানখি। ভারত-ফ্রান্সকী মরীগী মথংগী তাঙ্কক্তা হিরম কয়া কোনশিনগনি। হোরাইজন রোদমেপ অমসুং পাংথোকপা য়াবা থবকশিংগী পরেং ফংলগনি।
