Text of Prime Minister Shri Narendra Modi’s remarks after inaugurating the TCS Japan Technology and Culture Academy

মোৰ বন্ধু ৰাষ্ট্ৰপতি মেক্ৰন,বিশিষ্ট অতিথি বৃন্দ,অংশগ্ৰহণকাৰীসকল, নমস্কাৰ!

প্ৰথমখন আন্তৰ্জাতিক মহাকাশ সন্মিলনৰ অংশ হ’বলৈ পাই মই সুখী অনুভৱ কৰিছোঁ। ৰাষ্ট্ৰপতি মেক্ৰনক তেওঁৰ আন্তৰিক নিমন্ত্ৰণ আৰু এই সময়োপযোগী পদক্ষেপ গ্ৰহণ কৰাৰ বাবে ধন্যবাদ জনাইছোঁ। শ শ বছৰ ধৰি মহাকাশে আমাৰ কল্পনাক অনুপ্ৰাণিত কৰি আহিছে। আজি, ই জলবায়ু আৰু শস্যৰ পৰা আৰম্ভ কৰি মহাসাগৰ আৰু সমুদায়সমূহলৈকে পৃথিৱীৰ জীৱনযাত্ৰাক ৰূপ প্ৰদান কৰিছে। মহাকাশৰ প্ৰতিশ্ৰুতি অসীম। আমাৰ দায়িত্ব সামূহিক। যিদৰে কক্ষপথসমূহত অধিক ভিৰ হৈছে, প্ৰযুক্তিসমূহ অধিক শক্তিশালী হৈছে আৰু অংশগ্ৰহণকাৰীসকল অধিক হৈ পৰিছে, আমাৰ পচন্দ স্পষ্ট হ’ব লাগিব: সংঘাতৰ পৰিৱৰ্তে সহযোগিতা; হ্ৰস্বম্যাদী লাভৰ পৰিৱৰ্তে স্থায়িত্ব; আৰু বৰ্জনৰ পৰিৱৰ্তে অন্তৰ্ভুক্তি।

বন্ধুসকল,

ভাৰতৰ দৃষ্টিভংগী 'বসুধৈৱ কুটুম্বকম' অৰ্থাৎ এক পৃথিৱী, এক পৰিয়াল, এক ভৱিষ্যতৰ ওপৰত প্ৰতিষ্ঠিত। এই ভাৱনা এতিয়া পৃথিৱীৰ বাহিৰলৈও যাব লাগিব। আমি আন্তৰ্জাতিক আইন, সংলাপ আলোচনা আৰু বহুপাক্ষিক সহযোগিতাৰ ওপৰত প্ৰতিষ্ঠিত এক সুৰক্ষিত, নিৰাপদ, শান্তিপূৰ্ণ আৰু স্থায়ী মহাকাশ ক্ষেত্ৰক সমৰ্থন কৰোঁ। বৈজ্ঞানিক তথ্যই উদাৰতা আৰু সততাৰে জনকল্যাণৰ সেৱা কৰিব লাগিব।

ভাৰতৰ মহাকাশ যাত্ৰাই এই দৰ্শন প্ৰতিফলিত কৰে। ইছৰো, যি এই যাত্ৰাৰ হৃদয়ত অৱস্থিত, ইয়াৰ উৎকৃষ্টতা আৰু কম খৰচী অভিযানৰ বাবে গোলকীয় প্ৰশংসা অৰ্জন কৰিছে। ইয়াৰ ক্ষমতাই কৃষক আৰু মাছমৰীয়াসকলক, বতৰৰ পূৰ্বানুমান, দুৰ্যোগ ব্যৱস্থাপনা আৰু নেভিগেচনত সেৱা আগবঢ়ায়। ৩৪ খন দেশৰ ৪৩০টাৰো অধিক উপগ্ৰহে ভাৰতীয় ৰকেটত উঠি মহাকাশলৈ যাত্ৰা কৰিছে। ইছৰোৰ প্ৰযুক্তি আৰু অংশগ্ৰহণকাৰিতাই কেৱল ভাৰতকে নহয়, সমগ্ৰ বিশ্বকে সেৱা আগবঢ়ায়।

এই গোলকীয় বিশ্বাসৰ পিছতে আছে ভাৰতীয় বিজ্ঞানী, অভিযন্তা আৰু প্ৰযুক্তিবিদসকলৰ প্ৰজন্মৰ পিছত প্ৰজন্মৰ নিষ্ঠা আৰু পৰিশ্ৰম। দিন-ৰাতি কাম কৰি, তেওঁলোকে প্ৰতিটো অভিযান, প্ৰতিটো সফলতাৰ জৰিয়তে ইছৰোৰ গোলকীয় সুনাম গঢ়ি তুলিছে আৰু মহাকাশ সম্পৰ্কে চৰ্চাকাৰী ৰাষ্ট্ৰসমূহৰ মাজত ভাৰতক এক গৌৰৱৰ স্থান দিছে।

চন্দ্ৰযান-৩ অভিযানে ভাৰতক চন্দ্ৰৰ দক্ষিণ মেৰুত অৱতৰণ কৰা প্ৰথমখন ৰাষ্ট্ৰ হিচাপে পৰিগণিত কৰিলে। আদিত্য-এল১-এ সূৰ্য্যৰ ৰহস্য উদঘাটন কৰি আছে। যোৱা বছৰ, এজন ভাৰতীয়ই আন্তৰ্জাতিক মহাকাশ কেন্দ্ৰ ভ্ৰমণ কৰিছিল। আগলৈ আমি ২০৩৫ চনৰ ভিতৰত এটা ভাৰতীয় মহাকাশ কেন্দ্ৰ স্থাপন কৰা আৰু ২০৪০ চনৰ ভিতৰত এজন ভাৰতীয়ক চন্দ্ৰলৈ প্ৰেৰণ কৰাৰ লক্ষ্য ৰাখিছোঁ। এই সকলো প্ৰচেষ্টাত, আমাৰ মাৰ্গদৰ্শক নীতি স্পষ্ট হৈ আছে: ইয়াৰ সুফল সমগ্ৰ মানৱজাতিয়ে পাব লাগিব।

ইছৰোৰ কাষতে ভাৰতৰ ব্যক্তিগত মহাকাশ খণ্ডও ডাঙৰকৈ বৃদ্ধি পাইছে। উদ্যোগৰ শক্তি ইছৰোৰ উৎকৃষ্টতাৰ সৈতে যুক্ত হৈছে। ১৯৬০ চনত থুম্বাত ভাৰতীয় মহাকাশ কাৰ্যসূচী আৰম্ভ হোৱাৰ পৰাই ফ্ৰান্স এক বিশ্বাসযোগ্য অংশগ্ৰহণকাৰী হৈ আহিছে। আজি, আমাৰ সহযোগিতাই পৃথিৱী পৰ্যবেক্ষণ আৰু উন্নত প্ৰযুক্তি সামৰি লৈছে, যিয়ে বৈজ্ঞানিক উৎকৃষ্টতাক মানৱীয় উদ্দেশ্যৰ সৈতে একত্ৰিত কৰিছে। আমি ফ্ৰান্স আৰু বিশ্বক ভাৰতৰ পৰৱৰ্তী মহাকাশ সীমান্তৰ সহযাত্ৰী হ’বলৈ আমন্ত্ৰণ জনাইছোঁ।

বন্ধুসকল,

পেৰিছৰ এই মহাকাশ সন্মিলনে এটা স্পষ্ট বাৰ্তা প্ৰেৰণ কৰক: আমি একেলগে অন্বেষণ কৰিম, একেলগে উদ্ভাৱন কৰিম আৰু একেলগে সমগ্ৰ মানৱজাতিৰ বাবে, আৰু অনাগত প্ৰজন্মৰ বাবে মহাকাশক সুৰক্ষিত কৰিম। মই সকলো অংশগ্ৰহণকাৰীলৈ মোৰ আন্তৰিক শুভেচ্ছা জ্ঞাপন কৰিলোঁ।

ধন্যবাদ।