ঝাৰখণ্ডৰ ৰাজ্যপালন শ্ৰী চি. পি ৰাধাকৃষ্ণণ জী, মুখ্যমন্ত্ৰী শ্ৰী চম্পাই চোৰেন জী, মোৰ কেবিনেট সতীৰ্থ অৰ্জুন মুণ্ডা জী, বিধানসভাৰ বিৰোধী দলপতি, অন্যান্যা বিশিষ্ট ব্যক্তিসকল আৰু ঝাৰখণ্ডৰ মোৰ ভাই-ভনীসকল, সকলোকে নমস্কাৰ।
ঝাৰখণ্ড আজি ৩৫,০০০ কোটি টকাৰো অধিক মূল্যৰ আঁচনিৰে ধন্য। এই পদক্ষেপসমূহৰ বাবে মোৰ কৃষক ভাই, জনজাতীয় সমাজৰ সদস্য, আৰু ঝাৰখণ্ডৰ ৰাইজক অভিনন্দন জনাইছো।
বন্ধুসকল,
আজি আমি সিন্দ্ৰি সাৰ কাৰখানা উদ্বোধন কৰিলোঁ। সিন্দ্ৰিত এই সাৰ উদ্যোগটো আৰম্ভ কৰাটো মোৰ প্ৰতিশ্ৰুতি আছিল আৰু মই গৌৰৱেৰে ক’ব পাৰো যে মোদীৰ গেৰাণ্টি আজি পূৰণ হ’ল। মই ২০১৮ চনত এই উদ্যোগটোৰ আধাৰশিলা স্থাপন কৰিছিলো আৰু এতিয়া, কেৱল সিন্দ্ৰি কাৰখানাটোৱে কাম আৰম্ভ কৰাই নহয়, ভাৰত আৰু ঝাৰখণ্ডৰ যুৱক-যুৱতীসকলৰ বাবেও হাজাৰ হাজাৰ নতুন চাকৰিৰ সুযোগ মুকলি কৰিছে। এই সাৰ কাৰখানা মুকলি কৰাৰ লগে লগে ভাৰতে আত্মনিৰ্ভৰশীলতাৰ দিশত এক উল্লেখযোগ্য অগ্ৰগতি লাভ কৰিছে। বছৰি ভাৰতত প্ৰায় ৩৬০ লাখ মেট্ৰিক টন ইউৰিয়াৰ প্ৰয়োজন হয়। ২০১৪ চনত যেতিয়া আমাৰ চৰকাৰে কাৰ্যভাৰ গ্ৰহণ কৰিছিল, তেতিয়া দেশৰ ইউৰিয়া উৎপাদন আছিল মাত্ৰ ২২৫ লাখ মেট্ৰিক টন। এই অভাৱ দূৰ কৰিবলৈ যথেষ্ট পৰিমাণৰ ইউৰিয়া আমদানি কৰিবলগীয়া হৈছিল। সেয়েহে আমি ভাৰতক ইউৰিয়া উৎপাদনত স্বাৱলম্বী কৰি তোলাৰ প্ৰতিশ্ৰুতি দিছিলোঁ। আমাৰ চৰকাৰৰ প্ৰচেষ্টাৰ ফলত বিগত দশকত ইউৰিয়াৰ উৎপাদন ৩১০ লাখ মেট্ৰিক টনলৈ বৃদ্ধি পাইছে।
যোৱা ১০ বছৰত আমি ৰামগুণ্ডাম, গোৰখপুৰ আৰু বাৰাউনীৰ সাৰ কাৰখানা পুনৰুজ্জীৱিত কৰিছো। আজি সিন্দ্ৰীও এই তালিকা অন্তৰ্ভূক্ত হ’ল। অহা ডেৰ বছৰত তালচাৰ সাৰ উদ্যোগটোও কামক্ষম হোৱাৰ আশা আছে আৰু মই নিশ্চিত যে মই ইয়াকো উদ্বোধন কৰাৰ সুযোগ পাম। সামূহিকভাৱে এই পাঁচটা উদ্যোগে ভাৰতক ৬০ লাখ মেট্ৰিক টনতকৈ অধিক ইউৰিয়া উৎপাদন কৰিবলৈ সক্ষম কৰিব, যাৰ ফলত দেশখনক এই গুৰুত্বপূৰ্ণ ক্ষেত্ৰত আত্মনিৰ্ভৰশীলতাৰ দিশত দ্ৰুতগতিত আগুৱাই নিব। এই কৃতিত্বই কেৱল বৈদেশিক মুদ্ৰা ৰাহি কৰাই নহয়, কৃষকৰ সুবিধাৰ দিশত পুঁজিও টনকীয়াল কৰিব।
বন্ধুসকল,
আজিৰে পৰা ঝাৰখণ্ডৰ ৰে’ল খণ্ডত এক নতুন যুগৰ আৰম্ভণি। নতুন ৰে’লপথ উদ্বোধন আৰু বৰ্তমানৰ ৰে’লপথ দ্বৈত পথলৈ উন্নীতকৰণ কৰাকে ধৰি অসংখ্য প্ৰকল্প আজি আৰম্ভ কৰা হৈছে। ধনবাদ-চন্দ্ৰপুৰা ৰে’লপথৰ আধাৰশিলা স্থাপনৰ জৰিয়তে এই অঞ্চলসমূহত ভূগৰ্ভস্থ জুঁইৰ পৰা সুৰক্ষিত এক নতুন পথ লাভ কৰিব। তদুপৰি দেওঘৰ-ডিব্ৰুগড় ৰে’লৰ প্ৰৱৰ্তনে বাবা বৈদ্যনাথ মন্দিৰৰ পূজনীয় স্থান আৰু মা কামাখ্যাৰ শক্তিপীঠৰ মাজত এক গুৰুত্বপূৰ্ণ সংযোগ স্থাপন কৰিব। শেহতীয়াকৈ মই বাৰাণসীত বাৰাণসী-কলকাতা ৰাঁচী এক্সপ্ৰেছৱে উদ্বোধন কৰিলোঁ, যাৰ জৰিয়তে চত্ৰ, হাজাৰিবাগ, ৰামগড় আৰু বোকাৰোকে ধৰি সমগ্ৰ ঝাৰখণ্ডৰ যাতায়তৰ গতি বহু পৰিমাণে বৃদ্ধি কৰিব। তদুপৰি, সেয়া কৃষিজাত সামগ্ৰীৰ সৈতে জড়িতই হওক, আমাৰ শস্যৰ মজুতৰ বাবে কয়লাই হওক বা পূব ভাৰতৰ পৰা দেশৰ চুক-কোণলৈ চিমেণ্টৰ দৰে সামগ্ৰী পৰিবহণৰ সৈতে জড়িতই হওক, ই আমাৰ কৃষক সমাজখনক উল্লেখযোগ্য সুবিধা প্ৰদান কৰা হ’ব। এই আন্তঃগাঁথনি উন্নয়ন প্ৰকল্পসমূহে কেৱল আঞ্চলিক সংযোগ বৃদ্ধি কৰাই নহয়, ঝাৰখণ্ডৰ অৰ্থনৈতিক বিকাশকো উদ্বুদ্ধ কৰিব।
বন্ধুসকল,
যোৱা দশকত আমি ঝাৰখণ্ডৰ জনজাতীয় জনগোষ্ঠী, দৰিদ্ৰ, যুৱক-যুৱতী, আৰু মহিলাসকলৰ উত্থানক অগ্ৰাধিকাৰ দিছো।
বন্ধুসকল,
আমি ২০৪৭ চনৰ আগতে আমাৰ দেশক বিকশিত কৰাৰ আকাংক্ষা কৰিছো। বৰ্তমান ভাৰতে বিশ্বৰ অন্যতম দ্ৰুতগতিত বৃদ্ধি পোৱা অৰ্থনীতিৰ গৌৰৱ কৰিছে, যিটো কালি প্ৰকাশ পোৱা শেহতীয়া উৎসাহজনক অৰ্থনৈতিক পৰিসংখ্যাৰ পৰা স্পষ্ট হৈ পৰিছে। সকলো আশাক অতিক্ৰম কৰি অক্টোবৰৰ পৰা ডিচেম্বৰ ত্ৰৈমাসিকত ভাৰতে ৮.৪ শতাংশ বৃদ্ধিৰ হাৰ লাভ কৰি নিজৰ দ্ৰুত অগ্ৰগতি প্ৰদৰ্শন কৰে। উন্নত দেশৰ মৰ্যাদা লাভ কৰিবলৈ হ’লে ঝাৰখণ্ডৰ উন্নয়নক সমান্তৰালভাৱে আগুৱাই নিয়াটো অতি প্ৰয়োজনীয়। কেন্দ্ৰীয় চৰকাৰে ঝাৰখণ্ডৰ প্ৰগতিৰ প্ৰতি সমৰ্থনত অটল। মই দৃঢ় বিশ্বাস কৰোঁ যে ভগৱান বিৰছা মুণ্ডাৰ ভূমি এখন উন্নত ভাৰতৰ আকাংক্ষাক পৰিচালিত কৰা শক্তিকেন্দ্ৰ হিচাপে আত্মপ্ৰকাশ কৰিব।
বন্ধুসকল,
কৃতজ্ঞতা প্ৰকাশ কৰাৰ আগতে মোৰ চিন্তাবোৰ চমুকৈ প্ৰকাশ কৰিব বিচাৰিছো। মই এতিয়া ধনবাদলৈ যাম, য’ত উষ্ণতা, দৃঢ়তা, আকাংক্ষা আৰু শক্তিশালী সংকল্পৰে ভৰা পৰিৱেশ আলোচনাৰ বাবে অধিক অনুকূল হ’ব। আগন্তুক আধা ঘণ্টাৰ ভিতৰত মই ধনবাদত উপস্থিত হ’ম। তাত উপস্থিত হৈ মই ঝাৰখণ্ড আৰু দেশৰ সৈতে জড়িত অধিক অন্তৰ্দৃষ্টি শ্বেয়াৰ কৰিম। সকলো প্ৰকল্প আৰু পদক্ষেপৰ বাবে সকলোকে মোৰ আন্তৰিক শুভেচ্ছা জনালোঁ। আপোনালোক সকলোকে অশেষ ধন্যবাদ।
নমস্কাৰ।
