মঞ্চত বিৰাজমান ৰাজ্যপাল দ্ৰোপদী মহোদয়, মুখ্যমন্ত্ৰী ডাঙৰীয়া, কেন্দ্ৰ চৰকাৰ আৰু ৰাজ্য চৰকাৰৰ মন্ত্ৰী তথা ঝাৰখণ্ডৰ মোৰ মৰমৰ ভাতৃ-ভগ্নীসকল৷
আপোনালোক সকলোকে, সমগ্ৰ দেশ আৰু বিশ্বক আন্তৰ্জাতিক যোগ দিৱসৰ অলেখ শুভকামনা যাচিছো৷
আজি এই প্ৰভাত তাৰা ময়দানৰ পৰা সমূহ দেশবাসীলৈ সুপ্ৰভাতম জনাইছো৷ আৰু আজি এই প্ৰভাত তাৰা ময়দান বিশ্বৰ মানচিত্ৰত নিশ্চয়কৈ উজ্বলি উঠিছে৷ এই গৌৰৱ আজি ঝাৰখণ্ডই লাভ কৰিছে৷ আজি দেশ আৰু বিশ্বৰ অনেক স্থানত লক্ষাধিক লোক যোগ দিৱস পালন কৰাৰ বাবে বিভিন্ন স্থানত সমবেত হৈছে, মই সকলোকে ধন্যবাদ জ্ঞাপন কৰিছো৷
বিশ্বৰ যোগৰ প্ৰসাৰণৰ বাবে সংবাদ মাধ্যমৰ আমাৰ সহযোগী, ছ’চিয়েল মিডিয়াৰ সৈতে জড়িত লোকসমূহে যি উল্লেখযোগ্য ভূমিকা পালন কৰিছে, সেয়াও অধিক গুৰুত্বপূৰ্ণ, মই তেওঁলোকৰ ওচৰতো কৃতজ্ঞ৷
বন্ধুসকল, ঝাৰখণ্ডত যোগ দিৱসলৈ অহাটো মোৰ বাবে এক সুখদ অনুভূতি৷ আপোনালোকৰ বহুতেই ৰাতিপুৱাতেই ঘৰৰ পৰা ওলাই ইয়ালৈ আহিছে, মই আপোনালোক সকলোৰে ওচৰত কৃতজ্ঞ৷ বহুতৰ মনত এই প্ৰশ্নৰ উদয় হৈছে যে পঞ্চম যোগ দিৱস পালন কৰিবলৈ, আপোনালোকৰ সৈতে যোগ দিৱস পালন কৰিবলৈ মই ৰাঁচীলৈ কিয় আহিছো৷
ভাতৃ আৰু ভগ্নীসকল, ৰাঁচীৰ সৈতে মোৰ আপোনত্ব আছেই, কিন্তু আজি মই ৰাঁচীলৈ অহাৰ তিনিটা ডাঙৰ কাৰণ আছে৷ প্ৰথমটো হ’ল- ঝাৰখণ্ড অৰ্থাৎ ই হ’ল বন প্ৰদেশ৷ প্ৰকৃতিৰ অতি নিকটতম আৰু যোগ তথা প্ৰকৃতিৰ সামঞ্জস্যতাই মানুহক এক অনন্য অনুভৱ প্ৰদান কৰে৷ দ্বিতীয়টো ডাঙৰ কাৰণ হ’ল ৰাঁচী আৰু স্বাস্থ্যৰ সম্বন্ধ এতিয়া ইতিহাসত খোদিত হৈছে৷ যোৱা বছৰৰ ২৩ ছেপ্টেম্বৰ তাৰিখে পণ্ডিত দীনদয়াল উপাধ্যায়ৰ জন্ম-জয়ন্তীত ইয়াত ৰাঁচীৰ পৰা আমি আয়ুষ্মান ভাৰত যোজনাৰ শুভাৰম্ভ কৰিছিলো৷ আজি বিশ্বৰ সবাতোকৈ বৃহৎ স্বাস্থ্য সুৰক্ষা আঁচনি, প্ৰধানমন্ত্ৰী জন-আৰোগ্য যোজনা অতি কম সময়তে দুখীয়াৰ বাবে বৃহৎ সম্বল হিচাপে পৰিচিত হৈছে৷ ভাৰতীয়সকলৰ আয়ুষ্মান হিচাপে গঢ়ি তোলাত যোগৰ যি মহত্ব, তাৰ সৈতে আমি ভালদৰেই পৰিচিত, সেয়ে আজি মই ৰাঁচীলৈ বিশেষভাৱে আহিছো৷
ভাতৃ আৰু ভগ্নীসকল, এতিয়া যোগ অভিযানক মই আৰু আমি সকলোৱে মিলি এক অন্য পৰ্যায়লৈ লৈ যাব লাগিব আৰু ৰাঁচীলৈ অহাৰ মোৰ তৃতীয়টো ডাঙৰ কাৰণ এয়াই৷
বন্ধুসকল, যোগ আমাৰ দেশত প্ৰাচীন কালৰে পৰাই আছে, ই আমাৰ সংস্কৃতিৰ অভিন্ন অংগ৷ ইয়াত ঝাৰখণ্ডত যি ‘ছও নৃত্য’ হয়, তাতো আসন আৰু মুদ্ৰা প্ৰদৰ্শিত কৰা হয়৷ কিন্তু এয়াও সত্য যে আধুনিক যোগৰ যি যাত্ৰা, সেয়া দেশৰ গ্ৰামাঞ্চল আৰু আদিবাসী অঞ্চলতো সেইদৰে প্ৰৱেশ কৰা নাই, যিদৰে প্ৰৱেশ কৰিব লাগিছিল৷ এতিয়া মই আৰু আমি সকলোৱে মিলি আধুনিক যোগৰ যাত্ৰাক চহৰৰ পৰা গাঁৱলৈ, জংগললৈ, দূৰ-সুদূৰৰ অন্তিমজন মানুহলৈ লৈ যাব লাগিব৷ দুখীয়া আৰু আদিবাসীৰ ঘৰলৈ যোগাভ্যাস নিব লাগিব৷ মই যোগক দুখীয়া আৰু আদিবাসীৰ জীৱনৰ অভিন্ন অংগ কৰি তুলিব লাগিব যি ৰোগত অধিক কষ্ট পায়৷ এই ৰোগেই দুখীয়াক আৰু অধিক দুখীয়া কৰি তোলে৷ সেইবাবে এনে সময়ত যেতিয়া দেশত দুখীয়া কম হোৱাৰ গতি বৃদ্ধি পাইছে, তেওঁলোকৰ বাবেও যোগ অতিশয় গুৰুত্বপূৰ্ণ যি দুখীয়া অৱস্থাৰ পৰা বাহিৰলৈ ওলাইছে৷ তেওঁলোকৰ জীৱনত যোগাভ্যাসক অন্তৰ্ভুক্ত কৰি তেওঁলোকক ৰোগ আৰু দৰিদ্ৰতাৰ চক্ৰান্তৰ পৰা উদ্ধাৰ কৰিব লাগিব৷
বন্ধুসকল, কেৱল সুবিধাসমূহৰ দ্বাৰা জীৱন সহজ কৰি তোলা যথেষ্ট নহয়৷ দৰৱ আৰু অস্ত্ৰোপচাৰৰ সমাধানেই পৰ্যাপ্ত নহয়৷ আজি পৰিৱৰ্তিত সময়ত ৰোগৰ পৰা ৰক্ষা কৰাৰ উপৰিও কল্যাণৰ প্ৰতিও অধিক গুৰুত্ব প্ৰদান কৰা আৱশ্যক৷ এই শক্তি আমি যোগৰ পৰা লাভ কৰো৷ এই ভাৱনা যোগৰ, প্ৰাচীন ভাৰতীয় দৰ্শনৰো৷ যোগ কেৱল এয়াই নহয় যে কেৱল আধা ঘণ্টা ভূমিত অথবা মেজত অভ্যাস কৰিলো; যোগ হ’ল অনুশাসন, সমৰ্পণ, আৰু ইয়াৰ পালন সমগ্ৰ জীৱনজুৰি কৰিব লাগিব৷ যোগ-আয়ু, বৰ্ণ, জাতি, সম্প্ৰদায়, মত, পন্থ, ধনী, দুখীয়া, প্ৰান্ত, সীমাৰো ঊৰ্ধত৷ যোগ সকলোৰে হয় আৰু সকলো যোগৰ৷
বন্ধুসকল, বিগত পাঁচ বছৰত যোগক স্বাস্থ্য আৰু কল্যাণৰ সৈতে জড়িত কৰি আমাৰ চৰকাৰে ইয়াক প্ৰতিৰোধাত্মক স্বাস্থ্য সেৱাৰ স্তম্ভ শক্তিশালী কৰাৰ প্ৰয়াস কৰা হৈছে৷ আজি আমি এয়া ক’ব পাৰো যে ভাৰতত যোগৰ প্ৰতি সজাগতা প্ৰতিটো কোণলৈ, প্ৰতিটো বৰ্গলৈ প্ৰদান কৰিব লাগিব- ড্ৰয়িংৰূমৰ পৰা বেডৰূমলৈ, চহৰৰ পাৰ্কৰ পৰা আৰম্ভ কৰি ক্ৰীড়া প্ৰাংগনলৈ, চুবুৰীৰ পৰা কল্যাণ কেন্দ্ৰলৈ আজি চাৰিওফালে যোগৰ অনুভৱ কৰিব পৰা হৈছে৷
ভাতৃ আৰু ভগ্নীসকল, যেতিয়া মই দেখা পাঁও যে যুৱ প্ৰজন্মই আমাৰ এই প্ৰাচীন পদ্ধতিক আধুনিকতাৰ সৈতে জড়িত কৰি প্ৰচাৰিত আৰু প্ৰসাৰিত কৰে তেতিয়া অধিক সন্তোষ পাঁও৷ যুৱ প্ৰজন্মৰ উদ্ভাৱনী আৰু সৃজনীমূলক শক্তিৰ দ্বাৰা যোগ পূৰ্বতকৈও অধিক লোকপ্ৰিয় হৈছে, জীৱন্ত হৈছে৷
বন্ধুসকল, আজি এই উপলক্ষে যোগৰ উত্তৰণ আৰু বিকাশৰ বাবে প্ৰধানমন্ত্ৰীৰ বঁটাৰ ঘোষণা কৰা হৈছে৷ এদল জুৰীয়ে ইয়াৰ নিৰ্ণয় কৰিছে আৰু সমগ্ৰ বিশ্ব অন্বেষণ কৰি এওঁলোকে ইয়াক সন্ধান কৰিছে৷
যিসকল বন্ধুৱে এই পুৰষ্কাৰ পাইছে, মই তেওঁলোকৰ তপস্যা আৰু যোগৰ প্ৰতি তেওঁলোকৰ সমৰ্পণক প্ৰশংসা কৰিছো৷
বন্ধুসকল, এই বৰ্ষৰ আন্তৰ্জাতিক যোগ দিৱসৰ বিষয় হ’ল ‘হৃদয়ৰ বাবে যোগাভ্যাস’৷ হৃদয়ৰ শুশ্ৰূষা আজি সমগ্ৰ বিশ্বৰ বাবে এক প্ৰত্যাহ্বান হৈ উঠিছে৷ ভাৰতত বিগত দুই-আঢ়ৈ দশকত হৃদয়ৰ সৈতে জড়িত ৰোগ বহুগুণে বৃদ্ধি হৈছে৷ দুখৰ কথা এয়েই যে অতি কম বয়সতে যুৱ প্ৰজন্মৰ মাজতো হৃদৰোগে দেখা দিছে৷ এনে অৱস্থাত হৃদয়ৰ শুশ্ৰূষা সজাগতাৰ সৈতে যোগকো প্ৰতিৰোধী অথবা চিকিৎসাৰ অংশ হিচাপে গঢ়ি তোলাটো প্ৰয়োজনীয় হৈ পৰিছে৷
মই ইয়াৰে স্থানীয় যোগ আশ্ৰমসকলক যোগ প্ৰসাৰ কৰাৰ বাবে আহ্বান জনাইছো৷ সেয়া লাগিলে দেওঘৰৰ সিখ্যা পীঠযোগৰ আশ্ৰমেই হওক, ৰাঁচীৰ যোগদা সৎসংগ সখা মঠেই হওক অথবা অন্য সংস্থাই হওক; তেওঁলোকে এই বৰ্ষত হৃদৰোগ শুশ্ৰূষা সজাগতাক বিষয় হিচাপে লৈ অনুষ্ঠানৰ আয়োজন কৰক৷
আৰু বন্ধুসকল, যেতিয়াই স্বাস্থ্য উত্তম হয় তেতিয়া জীৱনত এক নতুন উচ্চতা প্ৰাপ্তিৰ আকাংক্ষা হয়৷ অৱসাদত ভাগৰি পৰা শৰীৰৰ দ্বাৰা, ভংগুৰ মনৰ দ্বাৰা সপোনো সজাব নোৱাৰি, আকাংক্ষাকো বাস্তৱায়িত কৰিব নোৱাৰি৷ যেতিয়াই আমি উত্তম স্বাস্থ্যৰ কথা কও, কিছু কথা পানী, পোষণ, পৰিবেশ, পৰিশ্ৰম-এই চাৰিটা বিষয়- খোৱাৰ বাবে বিশুদ্ধ পানী, আৱশ্যকতা অনুসৰি পোষণ প্ৰাপ্তি, পৰিবেশৰ প্ৰতি স্বচ্ছতা-বায়ু পৰিবেশেই হওক, যিকোনো কথাই হওক, আৰু পৰিশ্ৰম জীৱনৰ এক অংশ৷ সেয়ে উত্তম স্বাস্থ্যৰ বাবে এই চাৰিটা ‘প’ই পৰিণাম প্ৰদান কৰে৷
বন্ধুসকল, আজি সমগ্ৰ বিশ্বৰ যোগ দিৱস উদযাপন কৰিবলৈ সমবেত হোৱা লোকসকলক ধন্যবাদ জ্ঞাপন কৰিছো৷ সূৰ্যৰ প্ৰথম পোহৰক যোগাভ্যাসেৰে আদৰণি জনোৱাটো এক সুন্দৰ দৃশ্য৷ মই আপোনালোক সকলোকে যোগাভ্যাসক আপোনালোকৰ দৈনিক কাৰ্যসূচীৰ অংশ হিচাপে গ্ৰহণ কৰিবলৈ আহ্বান জনাইছো৷ যোগ প্ৰাচীনো হয় আৰু আধুনিকো৷ ই ধ্ৰুৱক আৰু পৰিৱৰ্তনশীলো৷ শতিকাজুৰি যোগৰ মূল ভাৱাৰ্থ একেই আছে- স্বাস্থ্যৱান শৰীৰ, স্থিৰ মন, অখণ্ডতা৷ যোগে জ্ঞান, কৰ্ম অথবা ভক্তি প্ৰদান কৰে৷ যোগে ব্যক্তিবিশেষক উন্নত চিন্তাধাৰা প্ৰদান কৰে৷
বন্ধুসকল, যোগাভ্যাসৰ গুৰুত্ব পূৰ্বতকৈও বেছি হৈছে৷ আমি এনেকুৱা সময়ত জীৱন-যাপন কৰিছো য’ত জীৱনশৈলীত ৰোগ বৃদ্ধি হৈছে আৰু উদ্বিগ্নতাও বৃদ্ধি হৈছে৷ তাৰোপৰি ইয়াৰ লগতে দৈনন্দিন ব্যস্তসূচীয়েও ইয়াত অৰিহণা যোগাইছে৷ কম বয়সীয়া পুৰুষ তথা মহিলাসকলে সামগ্ৰী অপব্যৱহাৰ, মাদক দ্ৰব্যৰ প্ৰতি আসক্তি, ডায়েবেটিছ আদিৰ প্ৰতি আসক্ত হোৱা ঘটনাই মোক দুখ দিয়ে৷
যোগে এই সমস্যাসমূহৰ সমাধান প্ৰদান কৰে৷ যোগে সমাজত মানুহৰ মাজত একতাৰ ভাৱ বৃদ্ধি কৰে আৰু ই আমাৰ সমাজৰ বিভিন্ন প্ৰত্যাহ্বান ৰোধ কৰিব পাৰে৷
বন্ধুসকল, যোগৰ সৈতে শান্তি, সদভাৱ আদিও সংবদ্ধ হৈ আছে৷ ৫ম আন্তৰ্জাতিক যোগ দিৱস উপলক্ষে আমাৰ যোগৰ বিষয়বস্তু হওক শান্তি, সদভাৱ আৰু সমৃদ্ধি৷
ভাতৃ আৰু ভগ্নীসকল, আন্তৰ্জাতিক যোগ দিৱসৰ আৰম্ভণীৰ পিছতে আমি অনেক পদক্ষেপ গ্ৰহণ কৰিলো যাৰ লাভ আজি আমি দেখিবলৈ পাইছো৷ ভৱিষ্যতক প্ৰত্যক্ষ কৰি আমি যোগক প্ৰত্যেক ব্যক্তিৰ জীৱনৰ অংশ হিচাপে গঢ়ি তুলিবলৈ সদভাৱৰ বাবে নিৰন্তৰে কাম কৰিব লাগিব৷ ইয়াৰ বাবে যোগৰ সৈতে জড়িত সাধক, শিক্ষক আৰু সংগঠনসমূহৰ ভূমিকা বৃদ্ধি হ’ব৷ যোগক কোটি কোটি লোকৰ জীৱনৰ অংশ হিচাপে গঢ়ি তুলিবলৈ মানৱ সম্পদ প্ৰস্তুত কৰা, মানৱ সম্পদৰ বিকাশ কৰাটোও অতিশয় প্ৰয়োজনীয়৷ এয়া তেতিয়াহে সম্ভৱ যেতিয়া আমি যোগৰ সৈতে জড়িত গুণগতমান আৰু সংস্থাসমূহক বিকশিত কৰিম৷ আৰু সেইবাবে আমাৰ চৰকাৰে এই চিন্তাৰ সৈতে অগ্ৰসৰ হৈছে৷
বন্ধুসকল, আজি আমাৰ যোগক সমগ্ৰ বিশ্বই আকোৱালি লৈছে আৰু আমি যোগৰ সৈতে জড়িত গৱেষণাতো গুৰুত্ব প্ৰদান কৰিব লাগিব৷ যিদৰে আমাৰ ফোনৰ ছফ্টৱেৰ নিৰন্তৰে আপডেট হয় ঠিক সেইদৰে আমিও যোগৰ বিষয়ে বিশ্ববাসীক জনাব লাগিব৷ ইয়াৰ বাবে প্ৰয়োজনীয় হ’ল যে যোগক যাতে কোনো সীমাৱদ্ধতাৰ মাজত বান্ধি ৰখা নহয়৷ যোগৰ চিকিৎসা, ফিজিঅ’থেৰাপী, কৃত্ৰিম বুদ্ধিমতা আদিৰ সৈতে জড়িত কৰিব লাগিব৷ এয়াই নহয়, আমি যোগৰ সৈতে জড়িত ব্যক্তিগত সংস্থাসমূহকো উৎসাহিত কৰিব লাগিব, তেতিয়াহে আমি যোগৰ প্ৰচাৰ কৰিব পাৰিম৷
আমাৰ চৰকাৰে এই আৱশ্যকতাসমূহ অনুধাৱন কৰি এনেকুৱা অনেক ক্ষেত্ৰত কাম কৰি আছে৷
মই আপোনালোকৰ সুস্বাস্থ্য কামনা কৰাৰ লগতে পুনৰবাৰ আম্তৰ্জাতিক যোগদিৱসৰ অনেক শুভকামনা প্ৰদান কৰিছো৷ আৰু মই আশা কৰিছো যে আপোনালোক সকলোৱে, ইয়াত আজি যিসকলে যোগচৰ্চা কৰিব, তেওঁলোকে অধিক কৰিব নালাগে, ইমানেই কৰক, কিন্তু ক্ৰমান্বয়ে ইয়াৰ পৰিসৰ বৃদ্ধি কৰক৷ আপোনাৰ জীৱনত চমকপ্ৰদ লাভ দেখিবলৈ পাব৷
মই পুনৰবাৰ আপোনালোকৰ উত্তম স্বাস্থ্যৰ বাবে শান্তি, সদভাৱ আৰু সমন্বয়যুক্ত জীৱনৰ বাবে অশেষ শুভকামনা জনাইছো৷
আহক, এতিয়া আমি যোগাভ্যাস আৰম্ভ কৰো৷
মই ঝাৰখণ্ডৰ চৰকাৰকো ধন্যবাদ জনাব খুজিছো কিয়নো তেওঁলোকে ইমান কম সময়ত এক বৃহৎ আয়োজন কৰিছে৷ প্ৰথমে এওঁলোকেও গম পোৱা নাছিল, দুসপ্তাহ পূৰ্বেই নতুন চৰকাৰ গঠন হোৱাৰ পিছত ৰাঁচীত এনে কাৰ্যসূচীৰ আয়োজন কৰাৰ বিচাৰ মনলৈ আহিল৷ কিন্তু ইমান কম সময়ত ঝাৰখণ্ডবাসীয়ে যি অদ্ভুত কাম কৰি দেখুৱালে, তাৰবাবে মই আপোনালোকক, চৰকাৰকো অশেষ শুভেচ্ছা জনাইছো৷
ধন্যবাদ৷
