প্ৰধানমন্ত্ৰী শ্ৰী নৰেন্দ্ৰ মোদীয়ে আজি কলকাতাৰ ৰেড ৰোডৰ পৰা দ্বাদশ আন্তঃৰাষ্ট্ৰীয় যোগ দিৱসৰ ৰাষ্ট্ৰীয় কাৰ্যসূচীৰ নেতৃত্ব দিয়ে। শ্ৰী মোদীয়ে সহস্ৰাধিক যোগ সাধকৰ সৈতে ‘কমন যোগ প্ৰট’কল’ অধিবেশনত অংশগ্ৰহণ কৰে। আন্তঃৰাষ্ট্ৰীয় যোগ দিৱস উপলক্ষে বিশ্বৰ জনগণক অভিনন্দন জনাই শ্ৰী মোদীয়ে কয় যে ২১ জুন তাৰিখটো বিশ্বৰ বহু ঠাইত বছৰৰ আটাইতকৈ দীঘলীয়া দিন আৰু ই যোগৰ জৰিয়তে মানৱতাৰ অন্যতম বৃহৎ সামূহিক উদযাপন হিচাপেও আত্মপ্ৰকাশ কৰিছে।
কলকাতাত ৰাইজক সম্বোধন কৰি প্ৰধানমন্ত্ৰীগৰাকীয়ে উল্লেখ কৰে যে বিশ্বৰ বিভিন্ন প্ৰান্তৰ পৰা যোগৰ প্ৰেৰণাদায়ক ছবি আহিয়ে আছে। শ্ৰী মোদীয়ে কয়, "হিমালয়ৰ পৰা ভাৰত মহাসাগৰলৈকে, আৰু বংগ তথা উত্তৰ-পূবৰ পৰা সৌৰাষ্ট্ৰৰ পশ্চিম অঞ্চললৈকে সমগ্ৰ দেশখনে যোগৰ মনোভাবেৰে শক্তিশালী হৈ উঠা দেখা গৈছে। স্বাস্থ্য আৰু সমন্বয়ৰ প্ৰতি এক ভাগ-বতৰা কৰা দায়বদ্ধতাৰ জৰিয়তে দেশ আৰু বিশ্ব সংযুক্ত যেন দেখা গ'ল, যি যোগৰ একত্ৰিকৰণ শক্তিক প্ৰতিফলিত কৰে।"
প্ৰধানমন্ত্ৰীগৰাকীয়ে "স্বচ্ছতা সে স্বাগত" পদক্ষেপৰ অধীনত কলকাতাৰ জনসাধাৰণৰ প্ৰচেষ্টাকো প্ৰশংসা কৰে। তেওঁ কয় যে স্বচ্ছতা বৰ্তাই ৰখাৰ ক্ষেত্ৰত নাগৰিকে দেখুওৱা নিষ্ঠা, কঠোৰ পৰিশ্ৰম আৰু নাগৰিকৰ দায়বদ্ধতাই সমগ্ৰ দেশৰ মানুহৰ বাবে প্ৰেৰণাদায়ক হৈ পৰিছে।
শ্ৰী মোদীয়ে কয় যে পশ্চিমবংগত যোগ দিৱস উদযাপনৰ বিশেষ তাৎপৰ্য আছে। কাৰণ ৰাজ্যখনৰ আধ্যাত্মিক আৰু সাংস্কৃতিক ঐতিহ্য অতি চহকী। তেওঁ স্মৰণ কৰি কয় যে ভগৱান ৰামকৃষ্ণ পৰমহংসই বাস কৰা আৰু শিক্ষা দিয়া, স্বামী বিবেকানন্দই বিশ্ববাসীক ভাৰতৰ আধ্যাত্মিক প্ৰজ্ঞা আৰু যোগ পৰম্পৰাৰ সৈতে পৰিচয় কৰাই দিয়া আৰু মহৰ্ষি অৰৱিন্দ আৰু লাহিড়ী মহাশয়ে যোগৰ ধাৰণা আৰু অনুশীলনক আগুৱাই নিয়াৰ ক্ষেত্ৰত অপৰিসীম অৱদান আগবঢ়াইছিল। গুৰুদেৱ ৰবীন্দ্ৰনাথ ঠাকুৰৰ শিক্ষাৰ উদ্ধৃতি দি প্ৰধানমন্ত্ৰীয়ে কয় যে এজন ব্যক্তিৰ প্ৰকৃত পৰিচয় তেওঁৰ চৌপাশৰ জগতখনৰ সৈতে অৰ্থপূৰ্ণ সম্পৰ্কৰ জৰিয়তে গঢ় লৈ উঠে আৰু এই নীতিটোৱেই হৈছে যোগৰ মৌলিক ভেটি। তেওঁ মহৰ্ষি অৰৱিন্দৰ এই মন্তব্য উদ্ধৃতিও দিছিল যে জীৱনৰ সকলো যোগাসন; তেওঁ কয় যে যেতিয়া যোগ মানুহৰ স্বভাৱৰ অংশ হৈ পৰে তেতিয়া ই মানুহৰ ঐক্যৰ ভেটি শক্তিশালী কৰে। শ্ৰী মোদীয়ে গুৰুত্ব সহকাৰে কয় যে "যোগ কেৱল শাৰীৰিক ব্যায়ামৰ প্ৰকাৰ নহয় আৰু ইয়াক বিশেষ বয়সৰ লোকৰ মাজতে সীমাবদ্ধ থাকিব নোৱাৰি। ই হৈছে চেতনা, জীৱনী শক্তি আৰু আভ্যন্তৰীণ পোহৰৰ উৎস, যি মানৱ জীৱনৰ প্ৰতিটো পৰ্যায়ক সমৃদ্ধ কৰে।" এইবাৰৰ আন্তঃৰাষ্ট্ৰীয় যোগ দিৱসৰ মূল বিষয়বস্তু "সুস্থ বাৰ্ধক্যৰ বাবে যোগ"ৰ কথা উল্লেখ কৰি তেওঁ কয় যে যোগে বৃদ্ধ বয়সতো সুস্থ, সক্ৰিয় আৰু শক্তিশালী হৈ থকাৰ পথ দেখুৱায়।
প্ৰধানমন্ত্ৰীগৰাকীয়ে কয় যে সুস্থ বাৰ্ধক্যৰ অৰ্থ হ’ল বয়সৰ লগে লগে এজন ব্যক্তিৰ সামৰ্থ্য যাতে কমি নাযায় তাৰ প্ৰতি লক্ষ্য ৰখা। তেওঁ কয় যে যোগে গোটেই জীৱন নিৰন্তৰ বিকাশ আৰু আত্ম-উত্তৰণৰ বাবে অনুপ্ৰাণিত কৰে। তেওঁ আশা প্ৰকাশ কৰে যে মানুহে ২০ বছৰতকৈ ৪০ বছৰ বয়সত অধিক নমনীয়, ৩০ বছৰতকৈ ৫০ বছৰ বয়সত অধিক শক্তিশালী হ’বলৈ চেষ্টা কৰিব লাগে আৰু ৫০ বছৰতকৈ ৭০ বছৰ বয়সত জীৱনশৈলী সম্পৰ্কীয় ৰোগৰ বিৰুদ্ধে যুঁজত শক্তিশালী হ’ব লাগে। শ্ৰী মোদীয়ে কয় যে, "নিয়মীয়া যোগাসনৰ অভ্যাসে মানুহক গোটেই জীৱন নিজৰ শৰীৰ আৰু মনটোৰ বিষয়ে বুজিবলৈ আৰু শিকিবলৈ সহায় কৰে। অধিক আত্মসচেতনতাই উন্নত আত্ম-ব্যৱস্থাপনা আৰু সুস্থ জীৱনশৈলীৰ সূচনা কৰে।"
প্ৰধানমন্ত্ৰীগৰাকীয়ে উল্লেখ কৰে যে "সুস্থ বাৰ্ধক্যৰ বাবে যোগাসন"ৰ বিষয়বস্তু কেৱল বৃদ্ধসকলৰ মাজতে সীমাবদ্ধ নহয়, বৰঞ্চ সকলো বয়সৰ লোকৰ বাবে ই প্ৰাসংগিক, যাৰ ফলত যোগাসন স্বাস্থ্য, সুস্থতা, ব্যক্তিগত উত্তৰণৰ পথত আজীৱন সংগী হিচাপে দেখা যায়।"
ভাগৱত গীতাৰ শিক্ষাৰ কথা উল্লেখ কৰি শ্ৰী মোদীয়ে কয়, "সুষম খাদ্য, সন্তুলিত বিনোদন, ভাৰসাম্যযুক্ত কৰ্ম আৰু গভীৰ টোপনি তথা জাগৰণে যোগক দুখৰ পৰা মুক্তিৰ মাধ্যম কৰি তোলে।" তেওঁ কয় যে ভাৰসাম্য যোগৰ ভেটি আৰু সন্তুষ্টিদায়ক জীৱনৰ বাবেও ই সমানেই গুৰুত্বপূৰ্ণ। যোগে মসৃণভাৱে জীয়াই থকাৰ কলা শিকায়। ই মানুহক কি কৰিব লাগে আৰু কি এৰাই চলিব লাগে সেই বিষয়ে পথ প্ৰদৰ্শন কৰে, যিয়ে তেওঁলোকক সুস্থ জীৱনশৈলী গ্ৰহণ কৰাত সহায় কৰে।
প্ৰধানমন্ত্ৰীগৰাকীয়ে কয় যে যোগ কেৱল শাৰীৰিক স্বাস্থ্যৰ মাজতে সীমাবদ্ধ নহয়। বৰং ই মানসিক স্বাস্থ্যৰ পৰা শাৰীৰিক স্বাস্থ্যৰ পথ দেখুৱায়। "যুক্ত চেষ্টাস্য কৰ্মসু"ৰ উদ্ধৃতি দি তেওঁ কয় যে যোগে মানুহক উচিত আৰু অনুচিতৰ পাৰ্থক্যৰ বিষয়ে বুজাত সহায় কৰে। শ্ৰী মোদীয়ে কয়, "এনে সজাগতাই আভ্যন্তৰীণ শান্তিৰ উৎস হৈ পৰে আৰু লগতে বিশ্ব সমন্বয়ৰ পথো মুকলি কৰে। যোগ এতিয়া ব্যক্তিগত জীৱনশৈলীৰ অনুশীলনত সীমাবদ্ধ হৈ থকা নাই; ই বিশ্বৰ বাবে এক উন্নত ভৱিষ্যত গঢ়ি তোলাৰ বাবে প্ৰয়োজনীয়ও হৈ পৰিছে।"
শ্ৰী মোদীয়ে কয় যে আন্তঃৰাষ্ট্ৰীয় যোগ দিৱসত প্ৰতিবছৰে কোটি কোটি লোকে যোগ কাৰ্যসূচীত অংশগ্ৰহণ কৰাৰ বিপৰীতে এই দিনটোৱে যোগক দৈনন্দিন জীৱনৰ অবিচ্ছেদ্য অংগ হিচাপে গঢ়ি তোলাৰ সামূহিক সংকল্পক পুনৰ দৃঢ় কৰাৰ সুযোগ প্ৰদান কৰে। যোগাসন যাতে কেৱল এটা দিন বা এটা অনুষ্ঠানতে সীমাবদ্ধ নাথাকে, বৰঞ্চ তেওঁলোকৰ জীৱনৰ, তেওঁলোকৰ পৰিয়াল আৰু পৰৱৰ্তী প্ৰজন্মৰ জীৱনৰ এক স্থায়ী অংশ হৈ পৰে, তাৰ বাবে তেওঁ জনসাধাৰণক আহ্বান জনায়।
প্ৰধানমন্ত্ৰীগৰাকীয়ে "যোগ ৩৬৫" পদক্ষেপৰ অধীনত চলিত বৰ্ষত হোৱা অগ্ৰগতিৰ কথাও উল্লেখ কৰে। শ্ৰী মোদীয়ে কয়, "এই পদক্ষেপৰ অধীনত ১০০দিনীয়া অনলাইন যোগ কাৰ্যসূচীৰ আয়োজন কৰা হৈছিল, য'ত অভূতপূৰ্ব অংশগ্ৰহণ দেখা গৈছিল। ১৩০খন দেশৰ ৩০ লাখতকৈ অধিক লোকে এই কাৰ্যসূচীত অংশগ্ৰহণ কৰিছিল, যিয়ে যোগৰ ক্ৰমবৰ্ধমান বিশ্বজোৰা গ্ৰহণযোগ্যতা আৰু জনপ্ৰিয়তাক প্ৰতিফলিত কৰিছিল।"
ভাষণৰ সামৰণিত শ্ৰী মোদীয়ে কয় যে এখন সুস্থ সমাজে এখন শক্তিশালী, সমৃদ্ধিশালী আৰু আত্মবিশ্বাসী ৰাষ্ট্ৰৰ ভেটি স্থাপন কৰে। সকলোৰে মংগল কামনা কৰি তেওঁ পুৰণি প্ৰাৰ্থনা "সৰ্বে ভৱন্তু সুখিনহ, সৰ্বে সন্তু নিৰাময়ঃ" (সকলোৱে সুখী হওক, সকলোৱে ৰোগমুক্ত হওক)ৰ উদ্ধৃতি দিয়ে।
Yoga connects us all and brings us together. pic.twitter.com/ghpAAVOmxE
— PMO India (@PMOIndia) June 21, 2026
When yoga becomes a way of life, it becomes the foundation of human unity. pic.twitter.com/FLxB961hWN
— PMO India (@PMOIndia) June 21, 2026
Yoga helps us tune our bodies to be flexible.
— PMO India (@PMOIndia) June 21, 2026
It keeps our energy levels high. pic.twitter.com/zQxvJeJwv8
Yoga teaches us the art of living a balanced life. pic.twitter.com/gcfmQX9dmM
— PMO India (@PMOIndia) June 21, 2026
Yoga shows the path from mental well-being to physical well-being. pic.twitter.com/O81tKmKfHi
— PMO India (@PMOIndia) June 21, 2026
