প্ৰধানমন্ত্ৰী শ্ৰী নৰেন্দ্ৰ মোদীয়ে আজি বিহাৰৰ জমুইত জনজাতীয় গৌৰৱ দিৱস উপলক্ষে ভগৱান বিৰছা মুণ্ডাৰ ১৫০ সংখ্যক জন্ম বাৰ্ষিকী বৰ্ষ উদযাপন কাৰ্য্যসূচীৰ শুভাৰম্ভ কৰি প্ৰায় ৬,৬৪০ কোটি টকা মূল্যৰ ভিন্ন উন্নয়নমূলক প্ৰকল্পৰ আধাৰশিলা স্থাপন আৰু উদ্বোধন কৰে।
প্ৰধানমন্ত্ৰীগৰাকীয়ে ভাৰতৰ ভিন্ন জিলাত জনজাতীয় দিৱসৰ অনুষ্ঠানত অংশগ্ৰহণ কৰা ভিন্ন ৰাজ্যৰ ৰাজ্যপাল, মুখ্যমন্ত্ৰী, কেন্দ্ৰীয় মন্ত্ৰীসকলক আদৰণি জনায়। লগতে সমগ্ৰ ভাৰতৰ ভিন্ন প্ৰান্তৰপৰা ভাৰ্চুৱেল মাধ্যমেৰে এই কাৰ্য্যসূচীত যোগদান কৰা অগণন জনজাতীয় ভ্ৰাতৃ-ভগ্নীসকলক আদৰণি জনায়। আজিৰ দিনটোক অতিশয় পবিত্ৰ দিন বুলি অভিহিতকৰণেৰে শ্ৰী মোদীয়ে কয় যে আজি হৈছে কাতিৰ পূৰ্ণিমা, দেৱ দীপাৱলী তথা আজিৰ দিনটোতে শ্ৰী গুৰু নানক দেৱ জীৰ ৫৫০ সংখ্যক জন্ম বাৰ্ষিকী পালন কৰা হৈছে আৰু তেখেতে ইয়াৰ বাবে ভাৰতৰ সকলো নাগৰিককে শুভেচ্ছা জনায়। প্ৰধানমন্ত্ৰীগৰাকীয়ে কয় যে আজিৰ দিনটো ভগৱান বিৰছা মুণ্ডাৰ জন্ম বাৰ্ষিকী হোৱাৰ বাবে ইয়াক জনজাতীয় গৌৰৱ দিৱস হিচাপে উদযাপনৰ পৰিপ্ৰেক্ষিতত এয়া নাগৰিকসকলৰ বাবে এক ঐতিহাসিক দিন। তেখেতে ভাৰতৰ নাগৰিক বিশেষকৈ জনজাতীয় ভ্ৰাতৃ-ভগ্নীসকলক সম্ভাষণ জনায়। প্ৰধানমন্ত্ৰীগৰাকীয়ে উল্লেখ কৰে যে আজিৰ জনজাতীয় গৌৰৱ দিৱসৰ প্ৰাকক্ষণত বিগত ৩ দিনত জমুইত স্বচ্ছতা অভিযান হাতত লোৱা হৈছিল। তেখেতে এই স্বচ্ছতা অভিযানৰ বাবে প্ৰশাসন, জমুইৰ নাগৰিক আৰু বিশেষকৈ মহিলাসকলক অভিনন্দন জনায়।
যোৱা বৰ্ষৰ জনজাতীয় গৌৰৱ দিৱসত ধৰতী আবা বিৰছা মুণ্ডাৰ জন্ম গাঁও উলিহাতুলৈ যোৱাৰ কথা স্মৰণেৰে শ্ৰী মোদীয়ে এইবাৰ শ্বহীদ তিলকা মাঞ্জীৰ বীৰত্বৰ সাক্ষী হোৱা স্থানত আছে বুলি উল্লেখেৰে কয় যে এই অনুষ্ঠানটো অতিশয় বিশেষ কিয়নো দেশে ভগৱান বিৰছা মুণ্ডাৰ ১৫০ সংখ্যক জন্ম বাৰ্ষিকী বৰ্ষ উদযাপনৰ আৰম্ভণি কৰিছে। তেখেতে লগতে কয় যে অহা এবছৰ ধৰি এই উদযাপন অব্যাহত থাকিব। প্ৰধানমন্ত্ৰীগৰাকীয়ে বিহাৰৰ জমুইত অনুষ্ঠিত আজিৰ অনুষ্ঠানত ভাৰ্চুৱেল মাধ্যমেৰে যোগদান কৰা ভিন্ন গাঁৱৰ এক কোটি লোকক অভিনন্দন জ্ঞাপন কৰে। শ্ৰী মোদীয়ে আজি বিৰছা মুণ্ডাৰ বংশধৰ শ্ৰী বুধৰাম মুণ্ডা আৰু সিদ্ধু কানহুৰ বংশধৰ শ্ৰী মণ্ডল মূৰ্মুক আদৰণি জনাই সন্তোষ লাভ কৰিছে বুলি কয়।
প্ৰধানমন্ত্ৰীগৰাকীয়ে কয় যে আজি ৬৬৪০ কোটিৰো অধিক টকা মূল্যৰ একাধিক উন্নয়নমূলক প্ৰকল্প উদ্বোধন আৰু আধাৰশিলা স্থাপন কৰা হৈছে। তেখেতে লগতে কয় যে এই প্ৰকল্পসমূহত জনজাতীয় লোকসকলৰ বাবে পকী ঘৰৰ অৰ্থে প্ৰায় ১.৫ লাখ অনুমোদন পত্ৰ, জনজাতীয় শিশুৰ এটি উন্নত ভৱিষ্যতৰ বাবে বিদ্যালয় আৰু হোষ্টেল, জনজাতীয় মহিলাসকলৰ বাবে স্বাস্থ্য সুবিধা, জনজাতীয় অঞ্চলসমূহক সংযোগ কৰা পথ প্ৰকল্প, জনজাতীয় সংগ্ৰহালয় আৰু জনজাতীয় সংস্কৃতি সংৰক্ষণৰ অৰ্থে গৱেষণা কেন্দ্ৰ অন্তৰ্ভুক্ত হৈছে। শ্ৰী মোদীয়ে কয় যে দেৱ দীপাৱলীৰ শুভ উপলক্ষত জনজাতীয় লোকসকলৰ বাবে নিৰ্মাণ কৰা ১১,০০০ আৱাসৰ গৃহপ্ৰৱেশ সম্পন্ন হৈছে। এই উপলক্ষে তেখেতে সকলো জনজাতীয় লোকলৈ অভিনন্দন জ্ঞাপন কৰে।
আজি জনজাতীয় গৌৰৱ দিৱস উদযাপন আৰু জনজাতীয় গৌৰৱ বৰ্ষৰ আৰম্ভণি সন্দৰ্ভত আলোকপাতেৰে শ্ৰী মোদীয়ে কয় যে এই উদযাপনসমূহে এক বৃহৎ ঐতিহাসিক অন্যায় শুধৰণিৰ এক সৎ প্ৰচেষ্টাক প্ৰতিফলিত কৰিছে। তেখেতে লগতে কয় যে স্বাধীনোত্তৰ কালত জনজাতীয় লোকসকলে সমাজত উপযুক্ত স্বীকৃতি লাভ কৰা নাছিল। জনজাতীয় সমাজৰ অৱদানৰ ওপৰত আলোকপাতেৰে প্ৰধানমন্ত্ৰীগৰাকীয়ে কয় যে জনজাতীয় সমাজেই ৰাজকুমাৰ ৰামক ভগৱান ৰামলৈ ৰূপান্তৰিতকৰণৰ লগতে ভাৰতৰ সংস্কৃতি আৰু স্বাধীনতা ৰক্ষাৰ বাবে যুগ-যুগ ধৰি যুঁজৰ নেতৃত্ব প্ৰদান কৰিছিল। কিন্তু, তেখেতে লগতে কয় যে স্বাৰ্থপৰ ৰাজনীতিৰ বাবে স্বাধীনতাৰ পিছৰ দশক কেইটাত জনজাতীয় সমাজৰ এনে গুৰুত্বপূৰ্ণ অৱদানসমূহ মচি পেলোৱাৰ অপচেষ্টা কৰা হৈছিল। ভাৰতৰ স্বাধীনতাৰ বাবে জনজাতীয় লোকসকলৰ ভিন্ন অৱদান যেনেঃ উলগুলান আন্দোলন, কল বিদ্ৰোহ, চাঁওতাল বিদ্ৰোহ, ভীল আন্দোলন আদিৰ কথা উল্লেখেৰে শ্ৰী মোদীয়ে কয় যে এই ক্ষেত্ৰত জনজাতীয় লোকসকলৰ অৱদান অপৰিসীম। তেখেতে লগতে কয় যে সমগ্ৰ ভাৰতৰ একাধিক জনজাতীয় নেতা যেনেঃ অল্লুৰী সীতাৰাম ৰাজু, তিলকা মাঞ্জী, সিদ্ধু কানহু, বুধু ভগত, তেলেং খাৰিয়া, গোবিন্দ গুৰু, তেলেংগানাৰ ৰামজী গণ্ড, মধ্যপ্ৰদেশৰ বাদল ভয়, ৰাজা শংকৰ শ্বাহ, কুৱৰ ৰঘুনাথ শ্বাহ, তন্ত্য ভীল, যাত্ৰা ভগত, লক্ষ্মণ নাইক, মিজোৰামৰ ৰ’পুইলিয়ানী, ৰাজ মোহিনী দেৱী, ৰাণী গাইডিনলিউ, কালিবাঈ, গণ্ডৱানাৰ ৰাণী ৰাণী দুৰ্গাৱতী দেৱী আদিক কেতিয়াও পাহৰিব নোৱাৰি। শ্ৰী মোদীয়ে লগতে কয় যে ব্ৰিটিছে হাজাৰ-হাজাৰ জনজাতীয় লোকক হত্যা কৰা মংগড় নৰমেধৰ কথা কেতিয়াও পাহৰিব নোৱাৰি।
সংস্কৃতিৰ ক্ষেত্ৰতেই হওঁক বা সামাজিক ন্যায়ৰ ক্ষেত্ৰতেই হওঁক, তেখেতৰ চৰকাৰৰ মানসিকতা পৃথক বুলি উল্লেখেৰে শ্ৰী মোদীয়ে কয় যে শ্ৰীমতী দ্ৰৌপদী মূৰ্মুক ভাৰতৰ ৰাষ্ট্ৰপতি হিচাপে নিৰ্বাচিত কৰা কাৰ্য্য তেওঁলোকৰেই সৌভাগ্য। তেখেতে লগতে কয় যে তেওঁ ভাৰতৰ প্ৰথমগৰাকী আদিবাসী ৰাষ্ট্ৰপতি আৰু পিএম-জনমান (PM-JANMAN) যোজনাৰ অধীনত হাতত লোৱা সকলো কামৰ কৃতিত্ব ৰাষ্ট্ৰপতিৰ। বিশেষভাৱে দুৰ্বল জনজাতি গোট (PVTG) সমূহৰ সবলীকৰণৰ বাবে ২৪,০০০ কোটি টকাৰ পিএম জনমান যোজনাৰ শুভাৰম্ভ কৰা হৈছে বুলি উল্লেখেৰে শ্ৰী মোদীয়ে কয় যে এই আঁচনিৰ অধীনত দেশৰ অতিশয় পিছপৰা জনজাতিসমূহৰ বসতিস্থলৰ উন্নয়ন নিশ্চিত কৰা হৈছে। তেখেতে উল্লেখ কৰে যে আজি এই আঁচনিখন এবছৰ সম্পূৰ্ণ হৈছে আৰু আঁচনিখনৰ অধীনত পিভিটিজিসমূহক হাজাৰ-হাজাৰ পকী ঘৰ প্ৰদান কৰা হৈছে। প্ৰধানমন্ত্ৰীগৰাকীয়ে লগতে উল্লেখ কৰে যে পিভিটিজিসমূহৰ বসতিস্থলৰ মাজত সংযোগ সুনিশ্চিতকৰণৰ বাবে পথ উন্নয়ন প্ৰকল্পসমূহ আগবাঢ়িছে আৰু পিভিটিজিৰ বহু ঘৰত হৰ ঘৰ জল আঁচনিৰ অধীনত খোৱাপানীৰ যোগান নিশ্চিত কৰা হৈছে।
শ্ৰী মোদীয়ে পূৰ্বে যিসকলক সম্পূৰ্ণৰূপে আওকাণ কৰা হৈছিল, তেওঁলোকক তেখেতে পূজা কৰা বুলি উল্লেখেৰে কয় যে পূৰ্বৰ চৰকাৰসমূহৰ মনোভাৱৰ বাবে জনজাতীয় সমাজসমূহত দশক-দশক ধৰি মৌলিক আন্তঃগাঁথনিৰ অভাৱ আছিল। তেখেতে লগতে কয় যে দেশৰ কেইবা ডজনো জনজাতি অধ্যুষিত জিলা উন্নয়নৰ ক্ষেত্ৰত পিছ পৰি ৰৈছিল। শ্ৰী মোদীয়ে কয় যে তেখেতৰ চৰকাৰে চিন্তা-চৰ্চাৰে সেই জিলাসমূহক ‘আকাংক্ষী জিলা’ হিচাপে ঘোষণা কৰিছে আৰু এইসমূহৰ উন্নয়নৰ বাবে দক্ষ বিষয়াক নিযুক্তি প্ৰদান কৰিছে। তেখেতে সন্তোষ প্ৰকাশেৰে কয় যে আজি এনে বহু আকাংক্ষী জিলাই ভিন্ন উন্নয়নমূলক পৰিমাপত বহু উন্নত জিলাতকৈ ভাল ফলাফল দেখুৱাইছে। তেখেতে লগতে কয় যে ইয়াৰ সুবিধা জনজাতীয় লোকসকলে লাভ কৰিছে।
“আমাৰ চৰকাৰে জনজাতীয় কল্যাণত সদায়েই অগ্ৰাধিকাৰ প্ৰদান কৰি আহিছে”, প্ৰধানমন্ত্ৰীগৰাকীয়ে কয়। তেখেতে লগতে কয় যে অটল জীৰ চৰকাৰেই জনজাতীয় পৰিক্ৰমাৰ বাবে এটা সুকীয়া মন্ত্ৰালয় গঠন কৰিছিল। শ্ৰী মোদীয়ে উল্লেখ কৰে যে যোৱা ১০ বছৰত বাজেট আবন্টন ২৫,০০০ কোটি টকাৰপৰা ১.২৫ লাখ কোটি টকালৈ ৫ গুণ বৃদ্ধি কৰা হৈছে। শ্ৰী মোদীয়ে কয় যে শেহতীয়াকৈ ধৰতী আবা জনজাতীয় গ্ৰাম উৎকৰ্ষ অভিযান (DAJGUA) নামৰ এক বিশেষ আঁচনি আৰম্ভ কৰা হৈছে, যিয়ে ৬০,০০০ ৰো অধিক জনজাতীয় গাঁৱক উপকৃত কৰিছে। তেখেতে লগতে কয় যে জনজাতীয় যুৱক-যুৱতীসকললৈ নিয়োগৰ সুযোগ সৃষ্টি আৰু প্ৰশিক্ষণ প্ৰদানৰ লগতে জনজাতীয় গাঁওসমূহত মৌলিক সা-সুবিধাৰ উপলব্ধতা নিশ্চিতকৰণৰ লক্ষ্যৰে এই আঁচনিৰ জৰিয়তে ৮০,০০০ কোটি টকা বিনিয়োগ কৰা হৈছে। তেখেতে লগতে কয় যে এই আঁচনিৰ অংশ হিচাপে হোমষ্টে স্থাপনৰ বাবে প্ৰশিক্ষণ আৰু সহায়ৰ লগতে ট্ৰাইবেল মাৰ্কেটিং চেন্টাৰ স্থাপন কৰা হ’ব। ইয়াৰ ফলত জনজাতীয় অধ্যুষিত অঞ্চলসমূহত পৰ্যটনৰ বৰ্ধনৰ লগতে ইক’-টুৰিজিমক সম্ভাৱনা হিচাপে গঢ়ি তোলা হ’ব, যিয়ে জনজাতীয় লোকসকলৰ প্ৰব্ৰজন ৰোধ কৰিব বুলিও তেখেতে কয়।
চৰকাৰে জনজাতীয় ঐতিহ্য সংৰক্ষণৰ বাবে গ্ৰহণ কৰা প্ৰচেষ্টাৰাজিৰ ওপৰত আলোকপাতেৰে শ্ৰী মোদীয়ে কয় যে বহু জনজাতীয় শিল্পীক পদ্ম বঁটা প্ৰদান কৰা হৈছে। তেখেতে লগতে কয় যে ৰাঁচীত ভগৱান বিৰছা মুণ্ডাৰ নামেৰে এটা জনজাতীয় সংগ্ৰহালয় আৰম্ভ কৰা হৈছে আৰু তেখেতে সকলো বিদ্যালয়ৰ ছাত্ৰ-ছাত্ৰীকে সংগ্ৰহালয়টো দৰ্শন কৰিবলৈ আহ্বান জনায়। তদুপৰি আজি মধ্যপ্ৰদেশৰ চিন্দোৱাৰাত বাদল ভইৰ নামেৰে এটি জনজাতীয় সংগ্ৰহালয় আৰু মধ্যপ্ৰদেশৰ জবলপুৰত ৰাজা শংকৰ শ্বাহ আৰু কুৱৰ ৰঘুনাথ শ্বাহৰ নামেৰে জনজাতীয় সংগ্ৰহালয় উদ্বোধন হোৱাত তেখেতে সন্তোষ প্ৰকাশ কৰে। তেখেতে লগতে উল্লেখ কৰে যে আজি ভগৱান বিৰছা মুণ্ডালৈ সন্মানাৰ্থে এটি স্মাৰক মুদ্ৰা আৰু ডাক টিকট উন্মোচনৰ লগতে শ্ৰীনগৰ আৰু ছিকিমত দুটা জনজাতি গৱেষণা কেন্দ্ৰ উদ্বোধন কৰা হয়। শ্ৰী মোদীয়ে কয় যে এই সকলো প্ৰচেষ্টাই ভাৰতবাসীক জনজাতিসকলৰ বীৰত্ব আৰু তেওঁলোকক সন্মান কৰিবলৈ নিৰন্তৰভাৱে সোঁৱৰাই থাকিব।
ভাৰতৰ প্ৰাচীন চিকিৎসা ব্যৱস্থাত জনজাতীয় সমাজৰ মহান অৱদানৰ ওপৰত আলোকপাতেৰে শ্ৰী মোদীয়ে কয় যে ভৱিষ্যৎ প্ৰজন্মৰ বাবে নতুন মাত্ৰাৰ সংযোজনৰ লগতে এই ঐতিহ্যক সুৰক্ষিতও কৰা হৈছে। তেখেতে লগতে কয় যে চৰকাৰে লেহত নেচনেল ইনষ্টিটিউট অৱ সোৱা-ৰিগপা স্থাপন কৰিছে, অৰুণাচল প্ৰদেশৰ উত্তৰ-পূব আয়ুৰ্বেদ আৰু লোক চিকিৎসা গৱেষণা প্ৰতিষ্ঠানখনি উন্নীত কৰিছে। শ্ৰী মোদীয়ে কয় যে চৰকাৰে বিশ্ব স্বাস্থ্য সংস্থাৰ (WHO) তত্বাৱধানত পৰম্পৰাগত চিকিৎসাৰ বাবে আগন্তুক গ্ল’বেল চেন্টাৰো স্থাপন কৰিছে, যিয়ে সমগ্ৰ বিশ্বতে জনজাতিসকলৰ পৰম্পৰাগত চিকিৎসা ব্যৱস্থাৰ অধিক প্ৰচাৰত সহায় কৰিব।
“আমাৰ চৰকাৰে জনজাতীয় সমাজৰ শিক্ষা, আয় আৰু চিকিৎসাৰ ওপৰত গুৰুত্ব আৰোপ কৰিছে”, শ্ৰী মোদীয়ে কয়। তেখেতে সন্তোষ প্ৰকাশেৰে কয় যে জনজাতীয় ছাত্ৰ-ছাত্ৰীসকলে চিকিৎসা, অভিযান্ত্ৰিক, সশস্ত্ৰ বাহিনী বা বিমান পৰিবহণ আদি ভিন্ন ক্ষেত্ৰত আগবাঢ়ি আহিছে। এয়া জনজাতীয় অঞ্চলসমূহত যোৱা দশকত বিদ্যালয়ৰপৰা উচ্চ শিক্ষানুষ্ঠানলৈকে উন্নত সম্ভাৱনা সৃষ্টিৰ ফলশ্ৰুতি বুলি তেখেতে কয়। প্ৰধানমন্ত্ৰীগৰাকীয়ে কয় যে তেখেতৰ চৰকাৰে স্বাধীনতাৰ পিছৰ ছয় দশকত কেন্দ্ৰীয় জনজাতীয় বিশ্ববিদ্যালয়খনৰ বিপৰীতে যোৱা দশকত দুখন নতুন জনজাতীয় বিশ্ববিদ্যালয় সংযোজন কৰিছে। তেখেতে লগতে কয় যে যোৱা দশকত জনজাতি প্ৰধান অঞ্চলত ঔদ্যোগিক প্ৰশিক্ষণ প্ৰতিষ্ঠান (IIT)ৰ লগতে একাধিক ডিগ্ৰী আৰু অভিযান্ত্ৰিক মহাবিদ্যালয় আৰম্ভ হৈছে। শ্ৰী মোদীয়ে লগতে উল্লেখ কৰে যে বিগত দশকত বিহাৰৰ জমুইত এখনকে প্ৰমুখ্য কৰি বহু নতুন চিকিৎসা মহাবিদ্যালয়ৰ কাম অব্যাহত থকাৰ লগতে জনজাতীয় অঞ্চলত ৩০ খন নতুন মেডিকেল কলেজ আৰম্ভ কৰা হৈছে। তেখেতে লগতে কয় যে সমগ্ৰ দেশতে ৭০০০ একলব্য বিদ্যালয়ৰ এক শক্তিশালী নেটৱৰ্কো গঢ়ি তোলা হৈছে।
চিকিৎসা, অভিযান্ত্ৰিক আৰু কাৰিকৰী শিক্ষাত জনজাতীয় ছাত্ৰ-ছাত্ৰীসকলৰ বাবে ভাষাই বাধাৰ সৃষ্টি নকৰে বুলি উল্লেখেৰে শ্ৰী মোদীয়ে কয় যে চৰকাৰে মাতৃভাষাত পৰীক্ষা লোৱাৰ বিকল্প প্ৰদান কৰিছে। তেখেতে লগতে কয় যে এই সিদ্ধান্তসমূহে জনজাতীয় ছাত্ৰ-ছাত্ৰীসকলৰ মাজত এক নতুন আশাৰ সঞ্চাৰ কৰিছে।
বিগত দশকত আন্তঃৰাষ্ট্ৰীয় ক্ৰীড়া প্ৰতিযোগিতাত জনজাতীয় যুৱক-যুৱতীসকলৰ পদক লাভৰ কৃতিত্বৰ ওপৰত আলোকপাতেৰে শ্ৰী মোদীয়ে কয় যে জনজাতীয় অঞ্চলসমূহৰ ক্ৰীড়া আন্তঃগাঁথনিৰ অগ্ৰগতি সাধনৰ বাবে চৰকাৰে প্ৰচেষ্টা হাতত লৈছে। তেখেতে লগতে কয় যে জনজাতীয় প্ৰধান অঞ্চলত খেলো ইণ্ডিয়া অভিযানৰ অংশ হিচাপে আধুনিক খেলপথাৰ, ক্ৰীড়া প্ৰকল্প গঢ়ি তোলা হৈছে। তেখেতে লগতে উল্লেখ কৰে যে ভাৰতৰ প্ৰথমখন ৰাষ্ট্ৰীয় ক্ৰীড়া বিশ্ববিদ্যালয় মণিপুৰত স্থাপন কৰা হৈছে।
প্ৰধানমন্ত্ৰীগৰাকীয়ে কয় যে স্বাধীনতাৰ ৭০ বছৰৰ পাছতো বাঁহৰ সৈতে জড়িত আইনসমূহ অতি কঠোৰ আছিল, যাৰ বাবে জনজাতীয় সমাজখনৰ বিৰাট অসুবিধাৰ সৃষ্টি হৈছিল। তেখেতে লগতে কয় যে তেখেতৰ চৰকাৰে বাঁহ খেতিৰে জড়িত আইনসমূহ সহজ কৰি তুলিছে। শ্ৰী মোদীয়ে উল্লেখ কৰে যে পূৰ্বে ৮-১০ বনজ সামগ্ৰীৰ বিপৰীতে এতিয়া প্ৰায় ৯০ টা বনজ সামগ্ৰীক ন্যূনতম সমৰ্থন মূল্য (MSP)ৰ অধীনলৈ অনা হৈছে। তেখেতে লগতে কয় যে ভাৰতত আজি ৪,০০০ ৰো অধিক বন ধন কেন্দ্ৰ কাৰ্য্যক্ষম হৈ আছে, যিয়ে প্ৰায় ১২ লাখ জনজাতীয় কৃষকক সহায় কৰিছে।
“আঁচনিৰ আৰম্ভণিৰেপৰাই প্ৰায় ২০ লাখ জনজাতীয় মহিলা লাখপতি দিদি হৈ পৰিছে”, শ্ৰী মোদীয়ে কয়। তেখেতে লগতে কয় যে জনজাতীয় সামগ্ৰী যেনেঃ বাস্কেট, খেলনা আৰু আন-আন হস্তশিল্পৰ বাবে প্ৰধান চহৰসমূহত ট্ৰাইবেল হাট স্থাপন কৰা হৈছে। শ্ৰী মোদীয়ে কয় যে জনজাতীয় হস্তশিল্প সামগ্ৰীৰ বাবে ইন্টাৰনেটত গ্ল’বেল মাৰ্কেটপ্লেচ সৃষ্টি কৰা হৈছে। তেখেতে লগতে কয় যে তেওঁ আন্তঃৰাষ্ট্ৰীয় নেতা আৰু গণ্যমান্য ব্যক্তিক লগ পালে সোহৰাই পেইন্টিং, ৱাৰলী পেইন্টিং, গণ্ড পেইন্টিং আদিৰ দৰে জনজাতীয় সামগ্ৰী আৰু শিল্পকৰ্ম প্ৰদান কৰাটোও নিশ্চিত কৰিছে।
জনজাতীয় সমাজসমূহৰ বাবে ছিকল চেল এনিমিয়া এক বৃহৎ প্ৰত্যাহ্বান হিচাপে পৰিগণিত হোৱা বুলি উল্লেখেৰে শ্ৰী মোদীয়ে কয় যে চৰকাৰে ৰাষ্ট্ৰীয় ছিকল চেল এনিমিয়া অভিযান আৰম্ভ কৰিছে। তেখেতে লগতে কয় যে এই অভিযানৰ এবছৰতে ৪.৫ কোটি জনজাতীয় লোকৰ পৰীক্ষা কৰা হৈছে। প্ৰধানমন্ত্ৰীগৰাকীয়ে কয় যে আয়ুষ্মান আৰোগ্য মন্দিৰসমূহ এনেদৰে স্থাপন কৰা হৈছে যাতে জনজাতীয় লোকসকলে স্ক্ৰিনিং কৰিবলৈ বেছি দূৰলৈ যাব নালাগে। তেখেতে লগতে কয় যে দুৰ্গম জনজাতীয় অঞ্চলসমূহত ম’বাইল মেডিকেল ইউনিটৰ ব্যৱস্থা কৰা হৈছে।
জলবায়ু পৰিৱৰ্তনৰ বিৰুদ্ধে যুঁজত বিশ্বত ভাৰতে মুখ্য ভূমিকা পালনৰ ওপৰত আলোকপাতেৰে শ্ৰী মোদীয়ে কয় যে ইয়াৰ কাৰণ হৈছে জনজাতীয় সমাজসমূহে শিকোৱা প্ৰমূল্যবোধ, যিসমূহ আমাৰ চিন্তাৰ আধাৰ। জনজাতীয় সমাজে প্ৰকৃতিক পূজা কৰা বুলি উল্লেখেৰে শ্ৰী মোদীয়ে ভগৱান বিৰছা মুণ্ডাৰ ১৫০ সংখ্যক জয়ন্তী আৰম্ভ হোৱাৰ উপলক্ষে জনজাতীয় প্ৰধান অঞ্চলসমূহত বিৰছা মুণ্ডা জনজাতীয় উপবন স্থাপনৰ কথা ঘোষণা কৰে। তেখেতে লগতে কয় যে এনে উপবনসমূহত ৫ লাখ গছপুলি ৰোপণ কৰা হ’ব।
ভাষণৰ সামৰণিত শ্ৰী মোদীয়ে কয় যে ভগৱান বিৰছা মুণ্ডাৰ জয়ন্তীয়ে আমাক গুৰুত্বপূৰ্ণ সংকল্প গ্ৰহণ কৰিবলৈ অনুপ্ৰাণিত কৰে। তেখেতে জনসাধাৰণক এখনি শক্তিশালী আৰু সমৃদ্ধিশালী ভাৰত গঢ়া সুনিশ্চিতকৰণৰ অৰ্থে জনজাতীয় ধাৰণাক এখনি নব্য ভাৰত গঢ়াৰ আধাৰ কৰিবলৈ, জনজাতীয় ঐতিহ্য সংৰক্ষণ কৰিবলৈ, জনজাতীয় সমাজে যুগ-যুগ ধৰি কি সংৰক্ষণ কৰি ৰাখিছে, সেই বিষয়ে জানিবলৈ আহ্বান জনায়।
এই কাৰ্য্যসূচীত বিহাৰৰ ৰাজ্যপাল শ্ৰী ৰাজেন্দ্ৰ আৰ্লেকাৰ, বিহাৰৰ মুখ্যমন্ত্ৰী শ্ৰী নীতিশ কুমাৰ, কেন্দ্ৰীয় জনজাতি পৰিক্ৰমা দপ্তৰৰ মন্ত্ৰী শ্ৰী জুৱেল ওৰাম, কেন্দ্ৰীয় এমএছএমই দপ্তৰৰ মন্ত্ৰী শ্ৰী জিতন ৰাম মাঞ্জী, কেন্দ্ৰীয় বস্ত্ৰ মন্ত্ৰী শ্ৰী গিৰিৰাজ সিং, কেন্দ্ৰীয় খাদ্য সংসাধন উদ্যোগ মন্ত্ৰী শ্ৰী চিৰাগ পাছৱান, কেন্দ্ৰীয় জনজাতি পৰিক্ৰমা দপ্তৰৰ ৰাজ্যিক মন্ত্ৰী শ্ৰী দুৰ্গা দাস উইকেকে প্ৰমুখ্য কৰি বিশিষ্ট লোকসকলে অংশগ্ৰহণ কৰে।
পটভূমি
প্ৰধানমন্ত্ৰী শ্ৰী নৰেন্দ্ৰ মোদীয়ে জনজাতীয় গৌৰৱ দিৱসৰ দিনা ধৰতী আবা ভগৱান বিৰছা মুণ্ডাৰ ১৫০ সংখ্যক জন্ম বাৰ্ষিকী উদযাপনৰ আৰম্ভণি উপলক্ষে বিহাৰৰ জমুই ভ্ৰমণ কৰে। তেখেতে ভগৱান বিৰছা মুণ্ডালৈ সন্মানাৰ্থে এটি স্মাৰক মুদ্ৰা আৰু ডাকটিকটো উন্মোচন কৰে। প্ৰধানমন্ত্ৰীগৰাকীয় লগতে অঞ্চলটোৰ গ্ৰাম্য আৰু দুৰ্গম অঞ্চলৰ জনজাতীয় সমাজসমূহক উন্নীতকৰণ আৰু অঞ্চলসমূহৰ আন্তঃগাঁথনিৰ অগ্ৰগতি সাধনৰ লক্ষ্যৰে ৬,৬৪০ কোটিৰো অধিক টকা মূল্যৰ একাধিক উন্নয়নমূলক প্ৰকল্প উদ্বোধন আৰু আধাৰশিলা স্থাপন কৰে।
প্ৰধানমন্ত্ৰীগৰাকীয়ে জনজাতি আদিবাসী ন্যায় মহা অভিযান (PM-JANMAN)ৰ অধীনত নিৰ্মিত ১১,০০০ আৱাসৰ গৃহপ্ৰৱেশৰ কাৰ্য্যসূচীত অংশগ্ৰহণ কৰে। তেখেতে লগতে জনজাতীয় অঞ্চলসমূহত স্বাস্থ্যসেৱাৰ সুবিধাৰ বৰ্ধনৰ বাবে পিএম-জনমানৰ অধীনত আৰম্ভ কৰা ২৩ টা ম’বাইল মেডিকেল ইউনিট (MMU) আৰু ধৰতী আবা জনজাতীয় গ্ৰাম উৎকৰ্ষ অভিযানৰ (DAJGUA) অধীনত অতিৰিক্ত ৩০ টা এমএমইউ উদ্বোধন কৰে।
প্ৰধানমন্ত্ৰীগৰাকীয়ে জনজাতীয় উদ্যমিতাক প্ৰোৎসাহনৰ বাবে ৩০০ টা বন ধন বিকাশ কেন্দ্ৰ (VDVK) আৰু জনজাতীয় ছাত্ৰ-ছাত্ৰীসকলৰ বাবে উৎসৰ্গিত প্ৰায় ৪৫০ কোটি টকা ব্যয় সাপেক্ষে স্থাপিত ১০ খন একলব্য আদৰ্শ আৱাসিক বিদ্যালয় উদ্বোধন কৰে।
প্ৰধানমন্ত্ৰীগৰাকীয়ে জনজাতীয় অঞ্চলসমূহৰ যোগাযোগ ব্যৱস্থাৰ অগ্ৰগতি সাধনৰ বাবে ৫০০ কিলোমিটাৰ দৈৰ্ঘ্যৰ নতুন পথৰ আধাৰশিলা স্থাপন কৰে আৰু পিএম জনমানৰ অধীনত কমিউনিটি হাব হিচাপে কাম কৰিবলৈ ১০০ টা বহুমুখী কেন্দ্ৰ (MPC)ৰ আধাৰশিলা স্থাপন কৰে। লগতে জনজাতীয় শিশুসকলৰ বাবে গুণগত শিক্ষাৰ অংগীকাৰক অধিক আগুৱাই নি ১,১১০ কোটি টকাৰো অধিক ব্যয় সাপেক্ষে ২৫ খন অতিৰিক্ত একলব্য আদৰ্শ আৱাসিক বিদ্যালয়ৰ আধাৰশিলা স্থাপন কৰে।
প্ৰধানমন্ত্ৰীগৰাকীয়ে ভিন্ন উন্নয়নমূলক প্ৰকল্পত অনুমোদনো জনায়। ইয়াৰ ভিতৰত আছে পিএম জনমানৰ অধীনত প্ৰায় ৫০০ কোটি টকা মূল্যৰ ২৫,০০০ নতুন আৱাস আৰু ধৰতী আবা জনজাতীয় গ্ৰাম উৎকৰ্ষ অভিযান (DAJGUA)ৰ অধীনত ১৯৬০ কোটিৰো অধিক টকা মূল্যৰ ১.১৬ লাখ আৱাস; পিএম জনমানৰ অধীনত ৬৬ টা হোষ্টেল আৰু ডিএজেজিইউএ ৰ অধীনত ৩০৪ টা হোষ্টেল; পিএম জনমানৰ অধীনত ৫০ টা নতুন বহু-মুখী কেন্দ্ৰ, ৫৫ টা ভ্ৰাম্যমাণ চিকিৎসা ইউনিট আৰু ৬৫ টা অংগনৱাড়ী কেন্দ্ৰ; ৬ টা চেন্টাৰ অৱ কম্পিটেন্সি ফৰ ছিকল চেল এনিমিয়া এলিমিনেচনৰ লগতে ডিএজেজিইউএ ৰ অধীনত আশ্ৰম বিদ্যালয়, হোষ্টেল, চৰকাৰী আৱাসিক বিদ্যালয় আদিৰ উন্নীতকৰণৰ বাবে ৩৩০ টা প্ৰকল্প, যাৰ মূল্য প্ৰায় ৫০০ কোটি টকা।
Click here to read full text speech
आदिवासी समाज वो है, जिसने राजकुमार राम को भगवान राम बनाया।
— PMO India (@PMOIndia) November 15, 2024
आदिवासी समाज वो है, जिसने भारत की संस्कृति और आज़ादी की रक्षा के लिए सैकड़ों वर्षों की लड़ाई को नेतृत्व दिया: PM @narendramodi pic.twitter.com/UNHnVHfqb3
पीएम जनमन योजना से, देश की सबसे पिछड़ी जनजातियों की बस्तियों का विकास सुनिश्चित हो रहा है: PM @narendramodi pic.twitter.com/Bbs9PV1P1S
— PMO India (@PMOIndia) November 15, 2024
आदिवासी समाज का भारत की पुरातन चिकित्सा पद्धति में भी बहुत बड़ा योगदान है। pic.twitter.com/Cij2iwIVRl
— PMO India (@PMOIndia) November 15, 2024
जनजातीय समाज की पढ़ाई, कमाई और दवाई, इस पर हमारी सरकार का बहुत जोर है: PM @narendramodi pic.twitter.com/hmI6yMzwnN
— PMO India (@PMOIndia) November 15, 2024
भगवान बिरसा मुंडा की 150वीं जन्म जयंती के उपलक्ष्य में, देश के आदिवासी बाहुल्य जिलों में बिरसा मुंडा जनजातीय गौरव उपवन बनाए जाएंगे: PM @narendramodi pic.twitter.com/0jEqZIpoU2
— PMO India (@PMOIndia) November 15, 2024
