প্ৰধানমন্ত্ৰী শ্ৰী নৰেন্দ্ৰ মোদীয়ে আজি ইউনাইটেড কিংডমৰ প্ৰধানমন্ত্ৰী মাননীয় শ্ৰী ঋষি ছুনাকৰ সৈতে টেলিফোনত কথা পাতে।
দুয়োজন নেতাই ভাৰত-ইউকে ৰোডমেপ ২০৩০ৰ অংশ হিচাপে কেইবাটাও দ্বিপাক্ষিক বিষয়ৰ ওপৰত হোৱা অগ্ৰগতিৰ সমীক্ষা কৰে। তেওঁ শেহতীয়া উচ্চ স্তৰীয় আদান-প্ৰদান আৰু বিশেষকৈ বাণিজ্য তথা অৰ্থনৈতিক ক্ষেত্ৰত বৰ্ধিত সহযোগিতাৰ ওপৰত সন্তুষ্টি প্ৰকাশ কৰে। দুয়োজন নেতাই দুয়োখন দেশৰ মাজত পাৰস্পৰিক লাভজনক মুক্ত বাণিজ্য বুজাবুজি শীঘ্ৰে সম্পন্ন কৰাৰ প্ৰয়োজনীয়তাৰ ওপৰত সন্মতি প্ৰকাশ কৰে।
প্ৰধানমন্ত্ৰী শ্ৰী মোদীয়ে ইউনাইটেড কিংডমত ভাৰতীয় কূটনৈতিক প্ৰতিষ্ঠানসমূহৰ সুৰক্ষাৰ বিষয় উত্থাপন কৰে আৰু ইউনাইটেড কিংডম চৰকাৰৰ দ্বাৰা ভাৰত বিৰোধী শক্তিৰ বিৰুদ্ধে কঠোৰ পদক্ষেপৰ আহ্বান জনায়। প্ৰধানমন্ত্ৰী শ্ৰী ঋষি ছুনাকে অৱগত কৰে যে ইউনাইটেড কিংডমে ভাৰতীয় উচ্চায়োগৰ ওপৰত হোৱা আক্ৰমণক সম্পূৰ্ণৰূপে অস্বীকাৰ্য বুলি গণ্য কৰে। তেওঁ ভাৰতীয় মিছন আৰু তাৰ কৰ্মীসকলৰ সম্পূৰ্ণ সুৰক্ষাৰ আশ্বাস দিয়ে।
প্ৰধানমন্ত্ৰী শ্ৰী মোদীয়ে ইউনাইটেড কিংডমত আশ্ৰয় লোৱা অৰ্থনৈতিক অপৰাধীৰ বিষয়ো উত্থাপন কৰে। তেওঁ এই পলাতকসকলৰ প্ৰত্যাৱৰ্তনৰ সৈতে জড়িত বিষয়ত অগ্ৰগতিৰ তথ্য বিচাৰে যাতে তেওঁলোক ভাৰতীয় ন্যায় ব্যৱস্থাৰ সন্মুখত উপস্থিত হ'ব পাৰে।
প্ৰধানমন্ত্ৰী শ্ৰী নৰেন্দ্ৰ মোদীয়ে ছেপ্টেম্বৰ ২০২৩ত হোৱা জি20ৰ শিখৰ সন্মিলনত অন্তৰ্ভুক্ত হ'বলৈ প্ৰধানমন্ত্ৰী শ্ৰী ছুনাকক আমন্ত্ৰণ জনায়। প্ৰধানমন্ত্ৰী শ্ৰী ছুনাকে জি20ৰ ভাৰতৰ অধ্যক্ষতাৰ সময়ত হোৱা অগ্ৰগতিৰ প্ৰশংসা কৰে আৰু ভাৰতৰ বিভিন্ন পদক্ষেপ আৰু তাৰ সফলতাৰ বাবে ইউনাইটেড কিংডমৰ পূৰ্ণ সমৰ্থনৰ কথা দোহাৰে।
প্ৰধানমন্ত্ৰীয়ে বৈশাখীৰ পূৰ্ব সন্ধিয়া প্ৰধানমন্ত্ৰী শ্ৰী ছুনাক আৰু ইউনাইটেড কিংডমত থকা ভাৰতীয় সমুদায়ৰ লোকসকলক শুভকামনা জনায়।
দুয়োজন নেতাই পৰস্পৰে পৰস্পৰৰ সৈতে সম্পৰ্ক যুক্ত হৈ থকাৰ ওপৰত সন্মত হয়।
