প্ৰধানমন্ত্ৰী শ্ৰী নৰেন্দ্ৰ মোদীয়ে আজি ৱাৰাণসীত ৩৩৫০ কোটি মূল্যৰ উন্নয়নমূলক প্ৰকল্প মুকলি কৰে৷ এই প্ৰকল্পসমূহ স্বাস্থ্য, শৌচালয়, স্মাৰ্ট চিটী, যোগাযোগ ব্যৱস্থা, বিদ্যুৎ, আৱাসগৃহ আৰু আন খণ্ডৰ সৈতে জড়িত৷ উত্তৰ-প্ৰদেশৰ ৰাজ্যপাল শ্ৰী ৰাম নাইক, মুখ্যমন্ত্ৰী শ্ৰী যোগী আদিত্যনাথ আৰু আন কেইবাগৰাকীও গণ্যমান্য ব্যক্তি অনুষ্ঠানত উপস্থিত থাকে৷
আৰম্ভণিতে প্ৰধানমন্ত্ৰীয়ে পুলৱামাৰ সন্ত্ৰাসবাদী আক্ৰমণত প্ৰাণ হেৰুওৱা ৱাৰাণসীৰ বীৰ শ্বহীদ স্বৰ্গীয় ৰমেশ যাদৱৰ প্ৰতি শ্ৰদ্ধাঞ্জলি অৰ্পন কৰে৷
ৰাজহুৱা সভাত প্ৰধানমন্ত্ৰীয়ে কয় যে তেওঁৰ চৰকাৰে উন্নয়নক গতি প্ৰদান কৰিবলৈ দুই দিশত কাম কৰি আছে৷ প্ৰথমটো হ’ল ৰাষ্ট্ৰীয় ঘাইপথ, ৰেলৱে’ আদিৰ দৰে আন্তঃগাথনি নিৰ্মাণৰ সৈতে জড়িত আৰু আনটো হ’ল উন্নয়নমূলক আঁচনিৰ উপযোগিতা জনসাধাৰণৰ বাবে নিশ্চিত কৰা৷
আজি মুকলি কৰা প্ৰকল্পসমূহৰ বিষয়ে প্ৰধানমন্ত্ৰীয়ে কয় যে ৱাৰাণসীক নিউ ইণ্ডিয়াৰ এক গুৰুত্বপূৰ্ণ কেন্দ্ৰস্থল হিচাপে গঢ়ি তোলাৰ এয়া এক প্ৰয়াস৷ মেক ইন ইণ্ডিয়াৰ অধীনত ৱাৰাণসীত আজি মুকলি কৰা ল’কোম’টিভ ট্ৰেইনে ভাৰতীয় ৰেলৱে’ৰ সক্ষমতা আৰু গতি বৃদ্ধি কৰিব৷ তেওঁ পুনৰ কয় যে যোৱা চাৰে চাৰি বছৰত ৰেলৱে’ খণ্ডৰ পৰিৱৰ্তনৰ বাবে চৰকাৰে বিভিন্ন পদক্ষেপ হাতত লৈছে৷ ভাৰতৰ প্ৰথম ছেমি হাই-স্পীড ৰেলগাড়ী বন্দে ভাৰত এক্সপ্ৰেছ ইয়াৰে এক অন্যতম উদাহৰণ৷
প্ৰধানমন্ত্ৰীয়ে বিভিন্ন আঁচনিৰ উপভোক্তাৰ মাজত প্ৰমাণ পত্ৰও বিতৰণ কৰে৷ আইআইটি বেনাৰছৰ ১০০বছৰ সম্পূৰ্ণ হোৱা উপলক্ষে তেওঁ এক স্মাৰক ডাক টিকট উন্মোচন কৰে৷
প্ৰধানমন্ত্ৰীয়ে কয় যে, বেনাৰছ কৰ্কট কেন্দ্ৰ আৰু লাহাৰতাৰাৰ ভাবা কৰ্কট হস্পিতালে বিহাৰ, ঝাৰখণ্ড, চত্তীশগড় আৰু ইয়াৰ নিকটৱৰ্তী ৰাজ্যসমূহৰ ৰোগীক উন্নত চিকিৎসা সেৱা আগবঢ়াব৷
আয়ুষ্মান ভাৰত সন্দৰ্ভত প্ৰধানমন্ত্ৰীয়ে কয় যে উত্তৰ-প্ৰদেশত প্ৰায় ৩৮ হাজাৰ লোকে এইপৰ্যন্ত এই আঁচনিৰদ্বাৰা উপকৃত হৈছে আৰু ৰাজ্যখনৰ অতি কমেও ১ কোটি ২০ লাখ পৰিয়ালক আয়ুষ্মান ভাৰত আঁচনিয়ে সাঙুৰি ল’ব৷
তেওঁ কয় যে প্ৰধানমন্ত্ৰী কিষাণ সন্মান নিধি যোজনাই উত্তৰ-প্ৰদেশত প্ৰায় ২.২৫ কোটি দৰিদ্ৰ কৃষকক উপকৃত কৰিছে৷
গোধনৰ সংৰক্ষণ আৰু উন্নয়নৰ বাবে কাম কৰা ৰাষ্ট্ৰীয় কামধেনু আয়োগৰ কথাও প্ৰধানমন্ত্ৰীয়ে উল্লেখ কৰে৷
তেওঁ আশা প্ৰকাশ কৰে যে ৱাৰাণসীত আজি আধাৰশিলা স্থাপন হোৱা প্ৰকল্পসমূহ সময়মতে সম্পূৰ্ণ হৈ উঠিব৷
শেষত প্ৰধানমন্ত্ৰী শ্ৰী মোদীয়ে দিব্যাংগসকললৈ সাহায্য বিতৰণ অনুষ্ঠানত উপস্থিত থাকে৷ অনুষ্ঠানত তেওঁ জনসাধাৰণক চত্ৰপতি শিৱাজী মহাৰাজ জয়ন্তীৰ শুভেচ্ছাও জ্ঞাপন কৰে৷
