ବ୍ରିଟେନର ବୈଦେଶିକ ତଥା ରାଜ୍ୟଗୋଷ୍ଠୀ ବ୍ୟାପାର ସଚିବ ବୋରିସ୍ ଜନସନ୍ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କୁ ଆଜି ଭେଟି ଆଲୋଚନା କରିଛନ୍ତି । ପୂର୍ବରୁ 2015 ନଭେମ୍ବରରେ ଲଣ୍ଡନ ଗସ୍ତ ସମୟରେ ବୋରିସ୍ ଜନସନଙ୍କୁ ଭେଟିଥିଲେ ପ୍ରଧାନମନ୍ତ୍ରୀ ଶ୍ରୀ ମୋଦୀ । ଜନସନ୍ ସେତେବେଳେ ଲଣ୍ଡନର ମେୟର ଥିଲେ ।
ବର୍ତ୍ତମାନ ସେ ବ୍ରିଟେନର ବୈଦେଶିକ ସଚିବ ଭାବେ ଦାୟିତ୍ୱ ଗ୍ରହଣ କରିଥିବାରୁ ପ୍ରଧାନମନ୍ତ୍ରୀ ତାଙ୍କୁ ଶୁଭେଚ୍ଛା ଜଣାଇଥିଲେ । ଏହି ଅବସରରେ ପ୍ରଧାନମନ୍ତ୍ରୀ ଶ୍ରୀ ମୋଦୀ କହିଥିଲେ ଯେ ଆଗାମୀ ଦିନରେ ଭାରତ-ବ୍ରିଟେନ ସମ୍ପର୍କକୁ ଆହୁରି ସୁଦୃଢ଼ କରାଯିବ । ଏଥିପାଇଁ ଗତ ନଭେମ୍ବର 2016ରେ ବ୍ରିଟିଶ ପ୍ରଧାନମନ୍ତ୍ରୀ ଥେରେସା ମେ’ଙ୍କ ଭାରତ ଗସ୍ତ ସମୟରେ ପାରସ୍ପରିକ ସହଯୋଗ ପାଇଁ ନିଆଯାଇଥିବା ନିଷ୍ପତ୍ତିକୁ କାର୍ଯ୍ୟକାରୀ କରାଯିବ ଯାହାକି ଦ୍ଵିପାକ୍ଷିକ ସମ୍ପର୍କ ବୃଦ୍ଧି ଦିଗରେ ପଥପ୍ରଦର୍ଶକ ହେବ ।
ପ୍ରତିରକ୍ଷା ଏବଂ ସୁରକ୍ଷା, ଅର୍ଥ, ବିଜ୍ଞାନ ଏବଂ କାରିଗରୀ କୌଶଳ ଆଦି କ୍ଷେତ୍ରରେ ଉଭୟ ରାଷ୍ଟ୍ରର ଦ୍ୱିପାକ୍ଷିକ ସମ୍ପର୍କ ସୁଦୃଢ଼ କରିବା ଲାଗି ବିଗତ ଦିନଗୁଡ଼ିକରେ ନିଆଯାଇଥିବା ପଦକ୍ଷେପକୁ ପ୍ରଧାନମନ୍ତ୍ରୀ ଶ୍ରୀ ମୋଦୀ ପ୍ରଶଂସା କରିଥିଲେ ।
ପ୍ରଧାନମନ୍ତ୍ରୀ ଏହି ଅବସରରେ କହିଥିଲେ ଯେ ବ୍ରିଟେନରେ ରହୁଥିବା ପ୍ରବାସୀ ଭାରତୀୟମାନେ ଦୁଇ ଦେଶ ମଧ୍ୟରେ ସମ୍ପର୍କର ସେତୁ ରୂପେ କାର୍ଯ୍ୟ କରୁଛନ୍ତି ତଥା ପାରସ୍ପରିକ ଲୋକସମ୍ପର୍କକୁ ଆଗେଇ ନେଉଛନ୍ତି । ଭବିଷ୍ୟତରେ ଉଭୟ ରାଷ୍ଟ୍ର ମଧ୍ୟରେ ଦ୍ୱିପାକ୍ଷିକ ସମ୍ପର୍କ ଆହୁରି ସୁଦୃଢ଼ ହେବ ବୋଲି ପ୍ରଧାନମନ୍ତ୍ରୀ ଏହି ଅବସରରେ ଆଶାବ୍ୟକ୍ତ କରିଥିଲେ ।
Mr. @BorisJohnson, UK's Secretary of State for Foreign & Commonwealth Affairs met the Prime Minister. @foreignoffice pic.twitter.com/RcxSqA8PPw
— PMO India (@PMOIndia) January 18, 2017
