ଦେଶକୁ ବିକାଶର ନୂତନ ଶିଖରକୁ ନେଇ ଯାଉଥିବା ଏହି ମହତ୍ୱପୂର୍ଣ୍ଣ ବଜେଟ ପାଇଁ ମୁଁ ସମସ୍ତ ଦେଶବାସୀଙ୍କୁ ଅଭିନନ୍ଦନ ଜଣାଉଛି । ଅର୍ଥମନ୍ତ୍ରୀ ନିର୍ମଳା ସୀତାରମଣ ଏବଂ ତାଙ୍କ ପୂରା ଟିମ୍ ଅନେକ ଅନେକ ଅଭିନନ୍ଦନର ପାତ୍ର ଅଟନ୍ତି ।
ସାଥୀମାନେ
ଏହି ବଜେଟ୍ ସମାଜର ପ୍ରତ୍ୟେକ ବର୍ଗକୁ ଶକ୍ତି ପ୍ରଦାନ କରିବା ଭଳି ବଜେଟ ହୋଇଛି । ଦେଶର ଗାଁ-ଗରିବ ଏବଂ କୃଷକମାନଙ୍କୁ ସମୃଦ୍ଧି ପଥରେ ନେଇଯିବା ଭଳି ବଜେଟ୍ । ଗତ ୧୦ ବର୍ଷ ରେ ୨୫ କୋଟି ଲୋକ ଦାରିଦ୍ର୍ୟରୁ ମୁକୁଳିଛନ୍ତି । ଏହି ବଜେଟ୍ ନବ ମଧ୍ୟବିତ୍ତଙ୍କ ପାଇଁ ସଶକ୍ତୀକରଣର ନିରନ୍ତରତା ବଜେଟ୍ । ଏହି ବଜେଟ୍ ଯୁବପିଢ଼ିଙ୍କୁ ଅଗଣିତ ନୂଆ ସୁଯୋଗ ଦେବ । ଏହି ବଜେଟ୍ ଶିକ୍ଷା ଓ ଦକ୍ଷତାକୁ ଏକ ନୂଆ ମାପକାଠି ଦେବ । ଏହା ଏକ ବଜେଟ୍ ଯାହା ମଧ୍ୟବିତ୍ତଙ୍କୁ ନୂଆ ଶକ୍ତି ପ୍ରଦାନ କରିବ । ଆଦିବାସୀ ସମାଜ, ଦଳିତ ଓ ପଛୁଆବର୍ଗଙ୍କୁ ସଶକ୍ତ କରିବା ପାଇଁ ଦୃଢ଼ ଯୋଜନା ପ୍ରସ୍ତୁତ କରିଛି । ଏହି ବଜେଟ୍ ମହିଳାଙ୍କ ଅର୍ଥନୈତିକ ଭାଗିଦାରୀ ସୁନିଶ୍ଚିତ କରିବାରେ ସହାୟକ ହେବ । ଏହି ବଜେଟ୍ କ୍ଷୁଦ୍ର ବ୍ୟବସାୟୀ ଓ ଏମ୍ଏସ୍ଏମ୍ଇ ଅର୍ଥାତ୍ କ୍ଷୁଦ୍ର ଉଦ୍ୟୋଗଗୁଡ଼ିକର ପ୍ରଗତି ପାଇଁ ଏକ ନୂଆ ପଥ ପ୍ରଦାନ କରିବ । ବଜେଟରେ ଉତ୍ପାଦନ ଉପରେ ମଧ୍ୟ ଗୁରୁତ୍ୱ ଦିଆଯାଇଛି, ଭିତ୍ତିଭୂମି ଉପରେ ମଧ୍ୟ ଗୁରୁତ୍ୱ ଦିଆଯାଇଛି । ଏହା ଅର୍ଥନୈତିକ ବିକାଶକୁ ନୂତନ ପ୍ରୋତ୍ସାହନ ଦେବ ଏବଂ ଗତିକୁ ମଧ୍ୟ ନିରନ୍ତରତା ପ୍ରଦାନ କରିବ ।
ସାଥୀମାନେ
ଅଭୂତପୂର୍ବ ନିଯୁକ୍ତି ଏବଂ ସ୍ୱରୋଜଗାର କ୍ଷେତ୍ରରେ ଅଭୂତପୂର୍ବ ସୁଯୋଗ ସୃଷ୍ଟି କରିବା, ଏହା ଆମ ସରକାରଙ୍କ ପରିଚୟ । ଆଜିର ବଜେଟ୍ ଏହାକୁ ଆହୁରି ସୁଦୃଢ଼ କରିଛି । ପିଏଲଆଇ ଯୋଜନାର ସଫଳତା ଦେଶ ଓ ବିଶ୍ୱ ଦେଖିଛି । ଏବେ ଏହି ବଜେଟରେ ସରକାର ରୋଜଗାର ସଂଯୁକ୍ତ ପ୍ରୋତ୍ସାହନ ଯୋଜନାର ଘୋଷଣା କରିଛନ୍ତି । ଏହା ଦ୍ୱାରା ଦେଶରେ କୋଟି କୋଟି ନୂଆ ନିଯୁକ୍ତି ସୁଯୋଗ ସୃଷ୍ଟି ହେବ । ଏହି ଯୋଜନାରେ ଆମ ସରକାର ଜୀବନରେ ପ୍ରଥମ ଚାକିରି ପାଇଥିବା ଯୁବକମାନଙ୍କୁ ପ୍ରଥମ ଦରମା ଦେବେ । ଦକ୍ଷତା ବିକାଶ ଓ ଉଚ୍ଚଶିକ୍ଷା ପାଇଁ ସହାୟତା ହେଉ କିମ୍ବା ୧ କୋଟି ଯୁବକଯୁବତୀଙ୍କୁ ଇଣ୍ଟର୍ନସିପ୍ ଯୋଜନା ହେଉ, ଗାଁର ମୋର ଯୁବ ବନ୍ଧୁ, ଗରିବ, ମୋ ପୁଅ-ଝିଅମାନେ ଦେଶର ଶୀର୍ଷ କମ୍ପାନୀରେ କାମ କରିବେ ଏବଂ ସେମାନଙ୍କ ସମ୍ମୁଖରେ ସମ୍ଭାବନାର ନୂତନ ଦ୍ୱାର ଖୋଲିବ । ଆମକୁ ପ୍ରତ୍ୟେକ ସହର, ପ୍ରତ୍ୟେକ ଗାଁ, ପ୍ରତ୍ୟେକ ଘରେ ଉଦ୍ୟୋଗୀ କରିବାକୁ ପଡିବ । ଏଥିପାଇଁ ବିନା ଗ୍ୟାରେଣ୍ଟିରେ ମୁଦ୍ରା ଋଣର ସୀମା ୧୦ ଲକ୍ଷରୁ ୨୦ ଲକ୍ଷ ଟଙ୍କାକୁ ବୃଦ୍ଧି କରାଯାଇଛି । ଏହାଦ୍ୱାରା କ୍ଷୁଦ୍ର ବ୍ୟବସାୟୀ, ବିଶେଷ କରି ମହିଳା, ଦଳିତ, ପଛୁଆ ଓ ଆଦିବାସୀ ପରିବାର ମଧ୍ୟରେ ଆତ୍ମନିଯୁକ୍ତି ବୃଦ୍ଧି ପାଇବ ।
ସାଥୀମାନେ,
ଆମେ ସମସ୍ତେ ମିଳିମିଶି ଭାରତକୁ ଏକ ବିଶ୍ୱ ସ୍ତରୀୟ ଉତ୍ପାଦନ କେନ୍ଦ୍ରରେ ପରିଣତ କରିବା । ଦେଶର ଏମ୍ ଏସ୍ ଏମ୍ ଇ କ୍ଷେତ୍ର, ମଧ୍ୟବିତ୍ତ ଙ୍କ ସହ ଜଡ଼ିତ, ଏକ ପ୍ରକାରରେ ଏମ୍ ଏସ୍ ଏମ୍ ଇ କ୍ଷେତ୍ରର ମାଲିକାନା ମଧ୍ୟମବିତ୍ତ ଅଟେ । ଆଉ ଏହି କ୍ଷେତ୍ରରୁ ଗରିବ ଲୋକମାନେ ମଧ୍ୟ ସର୍ବାଧିକ ରୋଜଗାର ପାଇଥାନ୍ତି । ଛୋଟ ଉଦ୍ୟୋଗଗୁଡିକୁ ବଡ ଶକ୍ତି ଏ ଦିଗରେ ଆମର ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ରହିଛି । ଚଳିତ ବଜେଟରେ ଏମଏସଏମଇ ପାଇଁ ସହଜ ଋଣ ବୃଦ୍ଧି ପାଇଁ ଏକ ନୂଆ ଯୋଜନା ଘୋଷଣା କରାଯାଇଛି । ଉତ୍ପାଦନ ଏବଂ ରପ୍ତାନି ଇକୋସିଷ୍ଟମକୁ ପ୍ରତ୍ୟେକ ଜିଲ୍ଲାରେ ପହଞ୍ଚାଇବା ପାଇଁ ବଜେଟରେ ଗୁରୁତ୍ୱପୂର୍ଣ୍ଣ ଘୋଷଣା କରାଯାଇଛି । ଇ-କମର୍ସ ରପ୍ତାନି ହବ୍ ଏବଂ ଖାଦ୍ୟଗୁଣବତ୍ତା ପରୀକ୍ଷା ପାଇଁ ୧୦୦ ୟୁନିଟ୍, ଏଭଳି ପଦକ୍ଷେପ ଦ୍ୱାରା ଗୋଟିଏ ଜିଲ୍ଲା ଗୋଟିଏ ଉତ୍ପାଦ ଅଭିଯାନକୁ ପ୍ରୋତ୍ସାହନ ମିଳିବ ।
ସାଥୀମାନେ
ଏହି ବଜେଟ୍ ଆମର ଷ୍ଟାର୍ଟଅପ୍ ପାଇଁ ଇନୋଭେସନ ଇକୋସିଷ୍ଟମ୍ ପାଇଁ ଅନେକ ନୂଆ ସୁଯୋଗ ଆଣିଛି । ମହାକାଶ ଅର୍ଥନୀତିକୁ ପ୍ରୋତ୍ସାହନ ଦେବା ପାଇଁ ଏକ ହଜାର କୋଟି ଟଙ୍କାର ପାଣ୍ଠି ହେଉ, ଆଞ୍ଜେଲ ଟ୍ୟାକ୍ସ ଉଚ୍ଛେଦ ନିଷ୍ପତ୍ତି ହେଉ, ଏହି ବଜେଟରେ ଏଭଳି ଅନେକ ପଦକ୍ଷେପ ନିଆଯାଇଛି ।
ସାଥୀମାନେ
ରେକର୍ଡ ହାଇ କ୍ୟାପେକ୍ସ ଅର୍ଥନୀତିର ଏକ ଡ୍ରାଇଭିଂ ଫୋର୍ସରେ ପରିଣତ ହେବ । ୧୨ଟି ନୂତନ ଶିଳ୍ପ କେନ୍ଦ୍ର, ଦେଶରେ ନୂତନ ଉପଗ୍ରହ ସହରର ବିକାଶ ଏବଂ ୧୪ଟି ପ୍ରମୁଖ ସହର ପାଇଁ ପରିବହନ ଯୋଜନା... ଏହା ଦ୍ୱାରା ଦେଶରେ ନୂଆ ଅର୍ଥନୈତିକ ହବ୍ ର ବିକାଶ ହେବା ସହ ବହୁ ସଂଖ୍ୟକ ନୂଆ ନିଯୁକ୍ତି ସୁଯୋଗ ସୃଷ୍ଟି ହେବ ।
ସାଥୀମାନେ
ଆଜି ପ୍ରତିରକ୍ଷା ରପ୍ତାନି ରେକର୍ଡ ସ୍ତରରେ ରହିଛି । ଚଳିତ ବଜେଟରେ ପ୍ରତିରକ୍ଷା କ୍ଷେତ୍ରକୁ ଆତ୍ମନିର୍ଭରଶୀଳ କରିବା ପାଇଁ ଅନେକ ବ୍ୟବସ୍ଥା କରାଯାଇଛି । ଆଜି ସମଗ୍ର ବିଶ୍ୱରେ ଭାରତ ପ୍ରତି ଆକର୍ଷଣ ବଢିଯାଇଛି । ଏବଂ ଭାରତରେ ପର୍ଯ୍ୟଟନ କ୍ଷେତ୍ରରେ ନୂତନ ସମ୍ଭାବନା ସୃଷ୍ଟି ହୋଇଛି । ପର୍ଯ୍ୟଟନ କ୍ଷେତ୍ର ଗରିବ ଓ ମଧ୍ୟବିତ୍ତଙ୍କ ପାଇଁ ଅନେକ ସୁଯୋଗ ଆଣିଥାଏ । ଚଳିତ ବଜେଟରେ ପର୍ଯ୍ୟଟନ କ୍ଷେତ୍ର ଉପରେ ମଧ୍ୟ ବିଶେଷ ଗୁରୁତ୍ୱ ଦିଆଯାଇଛି ।
ସାଥୀମାନେ
ଏନଡିଏ ସରକାର ଗତ ୧୦ ବର୍ଷ ମଧ୍ୟରେ ସୁନିଶ୍ଚିତ କରିଛନ୍ତି ଯେ ଗରିବ ଏବଂ ମଧ୍ୟବିତ୍ତଙ୍କ ଲଗାତାର ଟିକସ ରିହାତି ମିଳିବା ଜାରି ରହିବ । ଚଳିତ ବଜେଟରେ ଆୟକର ହ୍ରାସ କରିବା ସହ ଷ୍ଟାଣ୍ଡାର୍ଡ ଡିଡକ୍ସନ ବୃଦ୍ଧି କରିବାକୁ ନିଷ୍ପତ୍ତି ନିଆଯାଇଛି । ଟିଡିଏସ୍ର ନିୟମକୁ ମଧ୍ୟ ସରଳ କରାଯାଇଛି । ଏହି ପଦକ୍ଷେପପ୍ରତ୍ୟେକ ଟିକସଦାତାଙ୍କ ପାଇଁ ଅତିରିକ୍ତ ସଞ୍ଚୟ ହୋଇପାରିବ ।
ସାଥୀମାନେ
ଦେଶର ବିକାଶ ପାଇଁ ଭାରତର ପୂର୍ବାଞ୍ଚଳର ସାମଗ୍ରିକ ବିକାଶ... ପୂର୍ବୋଦୟ ପରିକଳ୍ପନା ମାଧ୍ୟମରେ ଆମ ଅଭିଯାନକୁ ନୂତନ ଗତି ଏବଂ ନୂତନ ଶକ୍ତି ମିଳିବ । ରାଜପଥ, ଜଳ ପ୍ରକଳ୍ପ ଏବଂ ବିଦ୍ୟୁତ ପ୍ରକଳ୍ପ ଭଳି ଅନେକ ଗୁରୁତ୍ୱପୂର୍ଣ୍ଣ ଭିତ୍ତିଭୂମି ନିର୍ମାଣ କରି ଆମେ ପୂର୍ବ ଭାରତର ବିକାଶକୁ ଏକ ନୂତନ ପ୍ରୋତ୍ସାହନ ଦେବୁ।
ସାଥୀମାନେ
ଏହି ବଜେଟରେ ଦେଶର କୃଷକମାନଙ୍କ ଉପରେ ଅଧିକ ଗୁରୁତ୍ୱ ଦିଆଯାଇଛି । ଖାଦ୍ୟ ସଂରକ୍ଷଣ ପାଇଁ ବିଶ୍ୱର ସର୍ବବୃହତ ଯୋଜନା ପରେ ଏବେ ଆମେ ପନିପରିବା ଉତ୍ପାଦନ କ୍ଲଷ୍ଟର ସୃଷ୍ଟି କରିବାକୁ ଯାଉଛୁ । ଗୋଟିଏ ପଟେ କ୍ଷୁଦ୍ର ଚାଷୀଙ୍କୁ ଫଳ, ପନିପରିବା, ଅନ୍ୟାନ୍ୟ ଉତ୍ପାଦପାଇଁ ନୂଆ ବଜାର ମିଳିବ, ଭଲ ମୂଲ୍ୟ ମିଳିବ । ଅପରପକ୍ଷରେ ଆମ ମଧ୍ୟବିତ୍ତଙ୍କ ପାଇଁ ଫଳ ଓ ପନିପରିବା ଉପଲବ୍ଧତା ବୃଦ୍ଧି ପାଇବା ସହ ପରିବାରର ପୋଷଣ ମଧ୍ୟ ସୁନିଶ୍ଚିତ ହେବ । କୃଷି କ୍ଷେତ୍ରରେ ଆତ୍ମନିର୍ଭରଶୀଳ ହେଉଛି ସମୟର ଆବଶ୍ୟକତା । ତେଣୁ ଡାଲି, ତୈଳବୀଜର ଅମଳ ବୃଦ୍ଧି ପାଇଁ ଚାଷୀଙ୍କୁ ସହାୟତା ଘୋଷଣା କରାଯାଇଛି ।
ସାଥୀମାନେ
ଦେଶର ଦାରିଦ୍ର୍ୟ ଦୂରୀକରଣ ହେଉ ଓ ଗରିବଙ୍କୁ ସଶକ୍ତି କରଣ ହେଉ ଏହି ଦିଗରେ ମଧ୍ୟ ବଡ଼ ଘୋଷଣା କରାଯାଇଛି । ଗରିବଙ୍କ ପାଇଁ ୩ କୋଟି ନୂଆ ଘର ନିର୍ମାଣ କରିବାକୁ ନିଷ୍ପତ୍ତି ନିଆଯାଇଛି । ଆଦିବାସୀ ଉନ୍ନତ ଗ୍ରାମ ଅଭିଯାନ ୫ କୋଟି ଆଦିବାସୀ ପରିବାରକୁ ମୌଳିକ ସୁବିଧା ସହ ସଂଯୋଗ ଏହାର ଲାଭ, ଏହାବ୍ୟତୀତ ଗ୍ରାମ ସଡ଼କ ଯୋଜନା୨୫ ହଜାର ନୂଆ ଗ୍ରାମାଞ୍ଚଳକୁ ସର୍ବକାଳୀନ ସଡ଼କ ସହ ସଂଯୋଗ କରିବ । ଏହା ଦ୍ୱାରା ଦେଶର ସମସ୍ତ ରାଜ୍ୟର ଦୁର୍ଗମ ଗାଁ ଗୁଡ଼ିକୁ ମିଳିବ ।
ସାଥୀମାନେ
ଆଜିର ବଜେଟ୍ ନୂତନ ସୁଯୋଗ, ନୂଆ ଶକ୍ତି ଆଣିଛି । ଏହା ଦ୍ୱାରା ଅନେକ ନୂଆ ରୋଜଗାର, ସ୍ୱରୋଜଗାର ସୁଯୋଗ ଆସିଛି । ଏହା ଉନ୍ନତ ଅଭିବୃଦ୍ଧି ଏବଂ ଉଜ୍ଜ୍ୱଳ ଭବିଷ୍ୟତ ଆଣିଛି । ଆଜିର ବଜେଟ୍ ଭାରତକୁ ବିଶ୍ୱର ତୃତୀୟ ବୃହତ୍ତମ ଅର୍ଥନୈତିକ ଶକ୍ତି ରେ ପରିଣତ କରିବା ର ସମଗ୍ର ପ୍ରକ୍ରିୟାରେ ଉତ୍ପ୍ରେରକ ଭାବରେ କାର୍ଯ୍ୟ କରିବ ଏବଂ ଏକ ବିକଶିତ ଭାରତର ଏକ ଦୃଢ଼ ଭିତ୍ତିଭୂମି ସ୍ଥାପନ କରିବ ।
ସମସ୍ତ ଦେଶବାସୀଙ୍କୁ ଅନେକ-ଅନେକ ଅଭିନନ୍ଦନ ।
