PM Modi lays foundation stone and inaugurates multiple development projects in Jammu
Government is working to ensure development of regions which remained isolated for long time: PM ModiOur approach is “Isolation to Integration”: PM ModiGovernment’s focus is on Highway, Railways, Waterways, i-Ways and Roadways: PM Modiମୋର ପ୍ରିୟ ଭାଇ ଓ ଭଉଣୀମାନେ,
ଆମ ଚମନଲାଲଙ୍କ ଭଳି ବେଶ ପୁରୁଣା ପରିଚିତ ଚେହେରା ମୁଁ ଦେଖିପାରୁଛି । ଜାମ୍ମୁ କାଶ୍ମୀର ପାଇଁ ଆଜିର ଏହି ଦିନ ବେଶ ଗୁରୁତ୍ୱପୂର୍ଣ୍ଣ । ରାଜ୍ୟରେ ଏହା ମୋର ଆଜି ଚତୁର୍ଥ କାର୍ଯ୍ୟକ୍ରମ । ଆଜି ସକାଳେ ହିଁ ଲେହ-ଲଦାଖର ଉଚ୍ଚ ପାହାଡ଼ରୁ କାଶ୍ମୀର ଘାଟି ଦେଇ ଏବେ ଜାମ୍ମୁ ତରାଇ ପର୍ଯ୍ୟନ୍ତ, ବିକାଶର ପ୍ରବାହିତ ଧାରାକୁ ମୁଁ ଦେଖିପାରୁଛି ଏବଂ ଏହି କାର୍ଯ୍ୟକ୍ରମ ପାଇଁ ବିଳମ୍ବରେ ମଧ୍ୟ ପହଞ୍ଚିଲି । ଠିକ ସମୟରେ ପହଁଚିପାରିନଥିବାରୁ ଆପଣମାନଙ୍କଠାରୁ କ୍ଷମା ଚାହୁଁଛି ।
ଲେହକୁ ଅବଶିଷ୍ଟ ଭାରତ ସହ ସଂଯୋଗ କରୁଥିବା ଜୋଜିଲା ସୁଡ଼ଙ୍ଗ ହେଉ, ବାନ୍ଦୀପୋରାର କୃଷ୍ଣଗଙ୍ଗା ପ୍ରକଳ୍ପ ହେଉ କିମ୍ବା ପୁଣି କିସ୍ତୱାଡ଼ରେ ଚେନାବ ନଦୀ ଉପରେ ନିର୍ମିତ ଜଳବିଦ୍ୟୁତ ପ୍ରକଳ୍ପ, ଜାମ୍ମୁ-କାଶ୍ମୀରର ଜଳ ଧାରା ଆଗାମୀ ସମୟରେ ଏଠାକାର ବିକାଶଧାରାକୁ ତ୍ୱରାନ୍ୱିତ କରିବ ।
ଗୋଟିଏ ହାଇଡ୍ରୋପାୱାର ପ୍ରକଳ୍ପ ରାଷ୍ଟ୍ରକୁ ସମର୍ପିତ କରିବା ଏବଂ ଅନ୍ୟଟିର ଶିଳାନ୍ୟାସ କରିବା, ଆଜିର ଏହି ଦିନ ଅଦ୍ଭୂତ ଏବଂ ସ୍ମରଣୀୟ ଦିନ ହୋଇପାରିଛି । କିଛି ସମୟ ପୂର୍ବରୁ ମୋତେ ଜାମ୍ମୁ ଲାଗି ଭିତ୍ତିଭୂମି ସହ ଜଡ଼ିତ ଥିବା 4ଟି ବଡ଼ ପ୍ରକଳ୍ପର ଶିଳାନ୍ୟାସ ଏବଂ ଲୋକାର୍ପଣ କରିବାର ସୁଯୋଗ ମିଳିଛି । ଏଥିମଧ୍ୟରୁ ଦୁଇଟି ମାତା ବୈଷ୍ଣୋଦେବୀଙ୍କୁ ସମର୍ପିତ । ଏଠାରେ ଏବେ ପାକଲ ଦୁଲ ପ୍ରକଳ୍ପର ମଧ୍ୟ ଶିଳାନ୍ୟାସ କରାଗଲା । ଏହା କେତେ ଲାଭକାରୀ ହେବ, ତାହାର ଅନୁମାନ ଆପଣ ଏଥିରେ ଲଗାଇପାରିବେ ଯେ ଯେତେ ବିଦ୍ୟୁତ ଆଜି ଜାମ୍ମୁ-କାଶ୍ମୀରରେ ଉତ୍ପାଦିତ ହେଉଛି ତା’ର ଏକ ତୃତୀୟାଂଶ ଏହି ବିଦ୍ୟୁତ ପ୍ରକଳ୍ପରୁ ହୋଇପାରିବ ।
ଏହି ପ୍ରକଳ୍ପ ପ୍ରଧାନମନ୍ତ୍ରୀ ବିକାଶ କାର୍ଯ୍ୟକ୍ରମ ଅଧୀନରେ ତିଆରି କରାଯାଉଛି । ଏକ ହଜାର ମେଗାୱାଟର ଏହି ପ୍ରକଳ୍ପ ଦ୍ରୁତ ଗତିରେ ଆଗକୁ ବଢ଼ାଇବା ଲାଗି ସମ୍ପୂର୍ଣ୍ଣ ପ୍ରସ୍ତୁତ । 8 ହଜାର କୋଟି ଟଙ୍କାର ଏହି ପ୍ରକଳ୍ପ ଏଠାରେ ନିଯୁକ୍ତିର ଅନେକ ସୁଯୋଗ ସୃଷ୍ଟି କରିବ । ପାଖାପାଖି ଅଢ଼େଇ ହଜାର ଲୋକଙ୍କୁ ସିଧାସଳଖ ନିଯୁକ୍ତି ମିଳିବ । ଏହାବ୍ୟତୀତ ଏଠାରେ କେହି ପରିବା ଚାଷୀ, କ୍ଷୀର ବିକାଳି ଥିବେ, ଆଉ ପ୍ରତ୍ୟେକ ପ୍ରକାର କାମ କରୁଥିବା ଲୋକମାନଙ୍କୁ ନୂଆ ସୁଯୋଗ, ନୂଆ ଲାଭର ସୁଯୋଗ ଜୁଟିବ ।
ସାଥୀଗଣ, ଆମ ସରକାର ଦେଶର ବିକାଶକୁ ନେଇ ଏକ ନୂଆ ଆଭିମୁଖ୍ୟ ସହିତ କାମ କରୁଛି । ଏହି ଆଭିମୁଖ୍ୟ ହେଉଛି ଆଇସୋଲେସନ ଟୁ ଇଂଟିଗ୍ରେସନ, ଅର୍ଥାତ୍ ଦେଶର ଯେଉଁ ଅଂଚଳ, କୌଣସି କାରଣରୁ ବିଚ୍ଛିନ୍ନ ହୋଇ ରହିଛି, ବିକାଶର ଆଲୋକ ଯେଉଁଠି ପହଁଚି ପାରିନାହିଁ, ସେଗୁଡ଼ିକୁ ପ୍ରାଥମିକତା ଦିଆଯାଉଛି । ଏବଂ ଏହି କାରଣରୁ ତାହା ଉତ୍ତର-ପୂର୍ବାଂଚଳ ହେଉ କିମ୍ବା ଜାମ୍ମୁ କାଶ୍ମୀର, ଆମର ପ୍ରୟାସ ରହିଛି ଯେ ଯେତେ ଅଧିକ ହୋଇପାରିବ ଯଦି ସେଠାରେ ପହଁଚି ହେବ ମୁଁ ନିଜେ ପହଁଚିଯିବା ଲାଗି ପ୍ରୟାସ କରିଥାଏ । ମୁଁ ଖୁସି ଅଛି । ପୂର୍ବରୁ କୌଣସି ପ୍ରଧାନମନ୍ତ୍ରୀଙ୍କୁ ଏପରି ସୁଯୋଗ ମିଳିଥିଲା କି ନାହିଁ ମୁଁ ଜାଣେ ନାହିଁ । ରାଜନୈତିକ କାମ ବ୍ୟତୀତ ବୋଧହୁଏ ଏକ ଡଜନରୁ ଅଧିକ ଥର ଜାମ୍ମୁ-କାଶ୍ମୀର ଆସିଛି ପ୍ରଧାନମନ୍ତ୍ରୀ ରୂପରେ । ପୂର୍ବରୁ ତ’ ଛାଡ଼ ଆପଣମାନେ ମୋତେ ଅନେକ ଦିନ ପାଖରେ ରଖିଛନ୍ତି, ମୋର ଲାଳନ-ପାଳନ କରିଛନ୍ତି ଆପଣମାନେ ।
ସଂଯୋଗୀକରଣଠାରୁ ବିକାଶ ସୂତ୍ରରେ ଆମେ କାମ କରୁଛୁ । ଯୋଗାଯୋଗ ସଡ଼କ ଜରିଆରେ ହେଉ କିମ୍ବା ହୃଦୟରେ, କୌଣସି ସ୍ତରରେ କିଛି ଊଣା ରହିଯାଉନାହିଁ । ଜାମ୍ମୁ-କାଶ୍ମୀର ବିକାଶ ଲାଗି ସେହି ପ୍ରତ୍ୟେକ ପଦକ୍ଷେପ ନିଆଯାଉଛି ଯାହା ଏ ରାଜ୍ୟକୁ ନୂତନ ଭାରତର ଉଦିତ ସୂର୍ଯ୍ୟରେ ପରିଣତ କରିବାର ସାମର୍ଥ୍ୟ ରଖିଛି । ଟିକିଏ ଭାରତର ସେହି ମାନଚିତ୍ରର ପରିକଳ୍ପନା କରନ୍ତୁ, ଯେତେବେଳେ ଦେଶର ମୁକୁଟ ହୀରା ମୁକୁଟ ଭଳି ଚମକିବ ଏବଂ ଏହି ଚମକ ଅନ୍ୟ ଦେଶକୁ ବିକାଶର ମାର୍ଗଦର୍ଶନ କରିବ ।
ଭାଇ ଓ ଭଉଣୀମାନେ, ଏବଂ ଏହି ମିଶନ ସହିତ କେନ୍ଦ୍ର ସରକାର ରାଜ୍ୟ ସରକାରଙ୍କ ସହିତ ମିଶି ଆମେ କାମକୁ ଆଗେଇ ନେଉଛୁ, ଭୂମିରେ କାର୍ଯ୍ୟକାରୀ କରୁଛୁ । କିଛି ସମୟ ପୂର୍ବରୁ ଜାମ୍ମୁ ସହରକୁ ଜାମ୍ ମୁକ୍ତ କରିବା ଲାଗି, ଏଠାକାର ଟ୍ରାଫିକ ସମସ୍ୟା ସମାଧାନ କରିବା ଲାଗି ରିଙ୍ଗରୋଡର ଶିଳାନ୍ୟାସ କରାଗଲା । ପରବର୍ତ୍ତୀ ତିନି ବର୍ଷରେ ଏହି ରିଙ୍ଗ ରୋଡକୁ ସମ୍ପୂର୍ଣ୍ଣ କରିବା ଲାଗି ପ୍ରୟାସ କରାଯିବ । ଯେତେବେଳେ ଏହି ରିଙ୍ଗ ରୋଡ ନିର୍ମିତ ହୋଇଯିବ ତ’ ଆପଣମାନେ ସମସ୍ତ ଜାମ୍ମୁବାସୀ ଏବଂ ଏଠାକୁ ଆସୁଥିବା ଲକ୍ଷାଧିକ ପର୍ଯ୍ୟଟକଙ୍କ ପାଇଁ ଏହା ବହୁତ ସୁବିଧା ହେବ ।
ଆହୁରି ଆପଣମାନେ ଦେଖନ୍ତୁ ଯେଉଁ ଲୋକମାନେ ବିକାଶ ଡିଜାଇନକୁ ବୁଝିଥାନ୍ତି, ଏହା ପାଖାପାଖି 50 କିଲୋମିଟରରୁ ଅଧିକ ଲମ୍ବ ରିଙ୍ଗରୋଡ, ଏହା ଏକ ନୂଆ ଜାମ୍ମୁର ନିର୍ମାଣ କରିବ । ଏହାର ଦୁଇ ପାଶ୍ୱର୍ରେ ଏକ ନୂଆ ଜାମ୍ମୁ ନିର୍ମାଣ ହେବ । ଅର୍ଥାତ କିପରି ଏହି ସମ୍ପ୍ରସାରଣ ହେବ, କିପରି ବିକାଶ ହେବ, ମୁଁ ଭଲଭାବେ ତାହା ଦେଖିପାରୁଛି । ଏଥିରେ ଜାମ୍ମୁ ସହର ଭିତରେ ଏବଂ ଏହାର ଆଖପାଖରେ ହେଉଥିବା ଟ୍ରାଫିକ ଭିଡ ତ’ ନିଶ୍ଚିତ ଭାବେ କମ ହେବ । କେବଳ ସେତିକି ନୁହେଁ ଏହି ରିଙ୍ଗରୋଡ ପୁଞ୍ଝ, ରାଜୌରୀ, ନୌସେରା ଏବଂ ଅଖନୁର କ୍ଷେତ୍ରର ସୀମାବର୍ତ୍ତୀ ଏବଂ ସାମରିକ କ୍ଷେତ୍ରରେ ମଧ୍ୟ ଭାରୀ ମେସିନ ଓ ସରଞ୍ଜାମ ନେଇଯାଉଥିବା ସେନା ବାହୀନର ପରିବହନକୁ ମଧ୍ୟ ସହଜ କରିଦେବ ।
ସାଥୀଗଣ, ଆପଣଙ୍କ ଏହି ଜାମ୍ମୁ ସହର ସ୍ମାର୍ଟ ସିଟି ମିଶନ ଅଧୀନରେ ଚୟନ କରାଯାଇଛି । ଏଠାରେ ଟ୍ରାଫିକଠାରୁ ଆରମ୍ଭ କରି ଜଳ ନିଷ୍କାସନ ପର୍ଯ୍ୟନ୍ତ, ସ୍ମାର୍ଟ ବ୍ୟବସ୍ଥା ପ୍ରସ୍ତୁତ ହେଉଛି । ରାଜ୍ୟ ସରକାର ଏହି କାର୍ଯ୍ୟରେ ନିୟୋଜିତ ଅଛନ୍ତି । କେନ୍ଦ୍ରରୁ ମଧ୍ୟ ଏହି କାମ ପାଇଁ ଟଙ୍କା ମଞ୍ଜୁର କରାଯାଇସାରିଛି ।
ଭାଇ ଓ ଭଉଣୀମାନେ ବିକାଶ ଲାଗି ଆମର ସମ୍ପୂର୍ଣ୍ଣ ଲକ୍ଷ୍ୟ ଭିତ୍ତିଭୂମି ଉପରେ ରହିଛି- ରାଜପଥ ହେଉ, ରେଳପଥ ହେଉ, ଜଳପଥ ହେଉ, ଆଇୱେ ହେଉ କିମ୍ବା ସଡ଼କ ପଥ, ଏ ସମସ୍ତ ଏକବିଂଶ ଶତାବ୍ଦୀର ଆବଶ୍ୟକତା । ସରକାରଙ୍କ ଚିନ୍ତାଧାରା ସ୍ପଷ୍ଟ, ଯଦି 130 କୋଟି ଦେଶବାସୀଙ୍କ ଜୀବନସ୍ତରରେ ଉନ୍ନତି ଆଣିବାର ଅଛି ତା’ହେଲେ ଏହାକୁ ପ୍ରଥମେ ସରଳ ଏବଂ ସୁଗମ କରିବାକୁ ହେବ । ଅନ୍ୟ ଅର୍ଥରେ ଏହାକୁ ସ୍ମାର୍ଟ ବ୍ୟବସ୍ଥାର ନାମ ମଧ୍ୟ ଆପଣ ଦେଇପାରିବବେ । ଏହି ବିଚାରର ପରିଣାମ ସ୍ୱରୂପ ଆଜି ଭାରତମାଳା ପ୍ରକଳ୍ପ ଅନ୍ତର୍ଗତ ସାରା ଦେଶରେ ଜାତୀୟ ରାଜପଥର ଜାଲ ଖୁବ୍ ଦ୍ରୁତଗତିରେ ସମ୍ପ୍ରସାରିତ ହେଉଛି ।
ଜାମ୍ମୁ କାଶ୍ମୀର ହେଉ, ପଶ୍ଚିମବଙ୍ଗ ହେଉ କିମ୍ବା ପୁଣି ଉତ୍ତର-ପୂର୍ବ, ଦେଶକୁ ହାଇୱେର ଶୃଙ୍ଖଳାରେ ବାନ୍ଧିବା ଲାଗି ଏହି ପ୍ରକଳ୍ପ ଉଦ୍ଦିଷ୍ଟ । ଚଳିତ ବର୍ଷର ବଜେଟରେ ଏହି ଯୋଜନା ଅନ୍ତର୍ଗତ ନିର୍ମାଣ ହେବାକୁ ଥିବା 35 ହଜାର କିଲୋମିଟର ସଡ଼କ ପାଇଁ 5 ହଜାର କୋଟି ଟଙ୍କାରୁ ଅଧିକ ବ୍ୟବସ୍ଥା କରାଯାଇଛି । ଜାମ୍ମୁ-କାଶ୍ମୀରରେ ମଧ୍ୟ ଏହି ଯୋଜନା ଅନ୍ତର୍ଗତ ପାଖାପାଖି 2700 କୋଟି ଟଙ୍କା ଖର୍ଚ୍ଚ କରାଯିବ ।
ଭାଇ ଓ ଭଉଣୀମାନେ, ଜାମ୍ମୁ କାଶ୍ମୀରରେ, ଏଠାରେ ମଧ୍ୟ ରାଜପଥର ଅନେକ ପ୍ରକଳ୍ପ କାର୍ଯ୍ୟ ଚାଲୁଅଛି । ଜାମ୍ମୁକୁ ଶ୍ରୀନଗର ଏବଂ ଦେଶର ଅନ୍ୟ ଭାଗ ସହିତ ଯୋଡ଼ୁଥିବା ଏକ ହଜାର କୋଟି ଟଙ୍କାର ଅନେକ ପ୍ରକଳ୍ପ ସମ୍ପୂର୍ଣ୍ଣ ହୋଇସାରିଛି, ଆହୁରି କିଛି ଏପରି ପ୍ରକଳ୍ପ ଅଛି ଯାହାର କାମ ଖୁବ ଦ୍ରୁତଗତିରେ ଚାଲିଛି । ଜାମ୍ମୁ-ପୁଞ୍ଚ, ଉଦ୍ଧମପୁର-ରାମବନ, ରାମବନ-ବନିହାଲ, ଶ୍ରୀନଗର-ବନିହାଲ ଏବଂ କାଜିଗୁଣ୍ଡ-ବନିହାଲ ଭଳି ଅନେକ ରାଜପଥ ପ୍ରକଳ୍ପ, ଆଜି ସେ ଦିଗରେ କାର୍ଯ୍ୟ ଚାଲିଛି ଏବଂ ଯାହା ଆଗାମୀ ଦିନରେ ଏହି କ୍ଷେତ୍ର ଲାଗି ଜୀବନରେଖା ଭାବେ କାର୍ଯ୍ୟ କରିବ । ପାଖାପାଖି 15 ହଜାର କୋଟି ଟଙ୍କା ଏହି ସଡ଼କ ଉପରେ ଖର୍ଚ୍ଚ କରାଯିବାର ଅଛି । ଏହାବ୍ୟତୀତ ଗ୍ରାମଗୁଡ଼ିକୁ ପ୍ରଧାନମନ୍ତ୍ରୀ ଗ୍ରାମୀଣ ସଡ଼କ ଯୋଜନା ଦ୍ୱାରା ଯୋଡ଼ା ଯାଉଅଛି । ଗତ ଦୁଇ ବର୍ଷରେ ପାଖାପାଖି ଏକ ଲକ୍ଷ କିଲୋମିଟର ଗ୍ରାମୀଣ ସଡ଼କ ଏହି ଯୋଜନା ଅନ୍ତର୍ଗତ ନିର୍ମାଣ କରାଯାଇସାରିଛି । ଜାମ୍ମୁ-କାଶ୍ମୀର ଗ୍ରାମରେ ମଧ୍ୟ ଗତ ଦୁଇ ବର୍ଷ ମଧ୍ୟରେ ସାଢ଼େ ତିନି ହଜାର କିଲୋମିଟରରୁ ଅଧିକ ସଡ଼କ ନିର୍ମାଣ କରାଯାଇଛି ।
ସାଥୀଗଣ, ଜାମ୍ମୁ-କାଶ୍ମୀର ଲାଗି ପର୍ଯ୍ୟଟକଙ୍କ ଆଗମନ ଏକ ବହୁତ ବଡ଼ ଆୟ ତଥା ରୋଜଗାରର ସ୍ରୋତ । ବିଶେଷକରି ଏଠାରେ ଆସ୍ଥା ସହ ଜଡ଼ିତ ବଡ଼ ବଡ଼ ସ୍ଥାନ ରହିଛି । ବାବା ବର୍ଫାନୀ ହୁଅନ୍ତୁ କିମ୍ବା ପୁଣି ମାତା ରାଣୀଙ୍କ ଦରବାର, ଦେଶବିଦେଶରୁ ଲକ୍ଷାଧିକ ଶ୍ରଦ୍ଧାଳୁ ଏଠାକୁ ଆସିଥାନ୍ତି । ଆସ୍ଥା ସହ ଓତଃପ୍ରୋତ ଭାବେ ଶ୍ରଦ୍ଧାଳୁଙ୍କୁ ସୁବିଧା ମିଳୁ ଏବଂ ଏଠାକାର ଜନସାଧାରଣଙ୍କ ପାଇଁ ଆୟର ସୁଯୋଗ ସୃଷ୍ଟି ହେଉ, ସରକାର ଏଥିପାଇଁ ଅନେକ ପ୍ରୟାସ କରୁଛନ୍ତି ।
ଆଜି କଟରାରେ ମାତାଙ୍କ ଦରବାର ପର୍ଯ୍ୟନ୍ତ ରେଳ ପହଁଚିସାରିଛି । ପ୍ରଧାନମନ୍ତ୍ରୀ ହେବାର ତୁରନ୍ତ ପରେ ମୋତେ ଏହି ରେଳ ମାର୍ଗର ଲୋକାର୍ପଣ କରିବାର ସୁଯୋଗ ମିଳିଥିଲା । ଏହି ରେଳମାର୍ଗରୁ ମାତାଙ୍କ ଭକ୍ତମାନଙ୍କୁ ଅନେକ ସୁବିଧା ହୋଇଛି । ଆମେ ଏଠାରେ ହିଁ ସୀମିତ ରହିବାକୁ ଚାହୁଁନାହୁଁ । ଏହି କାରଣରୁ ଆଜି ଦୁଇଟି ବଡ଼ ପ୍ରକଳ୍ପର ଉଦଘାଟନ କରାଯାଇଛି । ଗୋଟିଏ ମାତା ବୈଷ୍ଣୋଦେବୀଙ୍କ ଦର୍ଶନ ପାଇଁ ବୈକଳ୍ପିକ ମାର୍ଗ ଅଟେ ତ’ ଅନ୍ୟଟି ମାତାଙ୍କ ଦ୍ୱାର ପର୍ଯ୍ୟନ୍ତ ସାମଗ୍ରୀ ପହଁଚାଇବା ଲାଗି ରୋପୱେ ।
ସାଥୀଗଣ, ମାତାଙ୍କ ଦର୍ଶନ ଲାଗି ଏବେ ଶ୍ରଦ୍ଧାଳୁମାନେ ତାରାକୋଟା ମାର୍ଗରେ ମଧ୍ୟ ଯାଇପାରିବେ । କାଟ୍ରା ଏବଂ ଅର୍ଦ୍ଧକୁୱାଁରୀ ମଧ୍ୟରେ ପାଦରେ ଚାଲିଚାଲି ଯାଉଥିବା ଶ୍ରଦ୍ଧାଳୁଙ୍କ ପାଇଁ ଏହା ବିକଳ୍ପ ପାଦଚଲା ମାର୍ଗ । ଏହାଦ୍ୱାରା ଭିଡ଼ରୁ ମଧ୍ୟ ଆଶ୍ୱସ୍ତି ମିଳିବ । ଆହୁରି ମୋତେ କୁହାଯାଇଛି ଯେ ଏହି ମାର୍ଗକୁ ଦେଢ଼ କିଲୋମିଟର ଲିଙ୍କ ରୋଡ ଦ୍ୱାରା ବର୍ତ୍ତମାନର ପାଦଚଲା ମାର୍ଗ ସହିତ ମଧ୍ୟ ଯୋଡ଼ାଯିବ । ଯାହାଦ୍ୱାରା ପାଦରେ ଚାଲି ଯାଉଥିବା ଯାତ୍ରୀ ମନ୍ଦିର ପର୍ଯ୍ୟନ୍ତ ଯାତ୍ରା କରିବା ଲାଗି ଉଭୟ ଉପଲବ୍ଧ ମାର୍ଗ ମଧ୍ୟରୁ କୌଣସି ଗୋଟିଏ ଚୟନ କରିପାରିବେ । ମାତାରାଣୀଙ୍କ ଭକ୍ତଙ୍କ ଲାଗି ଏହା ସମ୍ପୂର୍ଣ୍ଣ ଭାବେ ସୁଖଦ ଏବଂ ସୁରକ୍ଷିତ ମାର୍ଗ ଅଟେ । ଯେଉଁଠି ସେମାନଙ୍କ ସବୁ ସୁବିଧା ପ୍ରତି ଧ୍ୟାନ ରଖାଯାଇଛି ।
ସାଥୀଗଣ, ବିକଳ୍ପ ମାର୍ଗ ବ୍ୟତୀତ ମାତାଙ୍କ ଦ୍ଵାର ପର୍ଯ୍ୟନ୍ତ ମେଟେରିଆଲ ରୋପୱେର ଉଦଘାଟନ କରିବାର ଆଜି ମୋତେ ସୌଭାଗ୍ୟ ମିଳିଛି । ଏହି ମେଟେରିଆଲ ରୋପୱେ ଜରିଆରେ ସାମଗ୍ରୀ ପରିବହନ ଆହୁରି ଅଧିକ ସହଜ ହେବ । ଶ୍ରୀ ମାତା ବୈଷ୍ଣୋଦେବୀ ମନ୍ଦିର ବୋର୍ଡ ଏହି ଅଭିନବ ସୁବିଧାର ଅଧିକରୁ ଅଧିକ ଉପଯୋଗ କରି ଯାତ୍ରୀଙ୍କ ଲାଗି ସହଜରେ ଖାଦ୍ୟପେୟ ସୁବିଧା ଉପଲବ୍ଧ କରାଇପାରିବ । ମନ୍ଦିର ପାଖରେ ବର୍ଜବସ୍ତୁ ପରିଚାଳନା ଲାଗି ମଧ୍ୟ ଏହି ରୋପୱେରୁ ବଡ଼ ସୁବିଧା ମିଳିପାରିବ । କାଟ୍ରାଠାରୁ ମନ୍ଦିର ପର୍ଯ୍ୟନ୍ତ ସାମଗ୍ରୀ ପରିବହନ ହେବ ଏବଂ ସେଠାରୁ ବର୍ଜ୍ୟବସ୍ତୁ ଅଣାଯିବ ।
ସାଥୀଗଣ, ମେଟେରିଆଲ ରୋପୱେ ଢାଂଚାରେ ଯାତ୍ରୀଙ୍କ ଲାଗି ମଧ୍ୟ ଏପରି ସୁବିଧା ବିକଶିତ କରାଯାଉଛି । 60 କୋଟି ଟଙ୍କା ବ୍ୟୟ ନିର୍ମାଣ କରାଯାଉଥିବା ଭବନ ଭୈରୋଁ ଘାଟି ପର୍ଯ୍ୟନ୍ତ ଶୀଘ୍ର ସମ୍ପୂର୍ଣ୍ଣ ହେବାର ଅଛି । ଏହି ରୋପୱେର କ୍ଷମତା ଘଣ୍ଟା ପ୍ରତି 800 ଲୋକଙ୍କୁ ନେଇଯିବା ଭଳି । ଏହାଦ୍ୱାରା ବୟସ୍କ ଏବଂ ଦିବ୍ୟାଙ୍ଗ ଶ୍ରଦ୍ଧାଳୁଙ୍କ ପାଇଁ ବହୁତ ସହାୟତା ମିଳିପାରିବ । ଯେତେବେଳେ ଏହି ରୋପୱେ ସମ୍ପୂର୍ଣ୍ଣ ଭାବେ କାମ କରିବା ଆରମ୍ଭ କରିଦେବ, ଥରକେ, ତିନି ମିନିଟ ଭିତରେ 40-45 ବ୍ୟକ୍ତିଙ୍କୁ ନେଇଯାଇପାରିବ । ଏହି ରୋପୱେ ସିଷ୍ଟମରେ ଦିଲ୍ଲୀ ମେଟ୍ରୋ ଢାଂଚାରେ ସ୍ଵୟଂକ୍ରିୟ ଟିକେଟିଂ ସିଷ୍ଟମ ମଧ୍ୟ ରହିବ । ଶ୍ରଦ୍ଧାଳୁଙ୍କୁ ସୁବିଧା ଦେବା ଲାଗି ମନ୍ଦିର ବୋର୍ଡ ଯେପରି ଭାବେ କାମ କରୁଛି ସେଥିପାଇଁ ମୁଁ ଏହାର ଅଧ୍ୟକ୍ଷ ଏବଂ ତାଙ୍କର ସମ୍ପୂର୍ଣ୍ଣ ଟିମକୁ ହୃଦୟରୁ ଅଭିନନ୍ଦନ ଜଣାଉଛି ।
ଭାଇ ଓ ଭଉଣୀମାନେ, ଜାମ୍ମୁ-କାଶ୍ମୀରରେ ଭିତ୍ତିଭୂମି ନିର୍ମାଣ ହେବା ଦ୍ୱରା ପର୍ଯ୍ୟଟକ ବୃଦ୍ଧି ପାଇବ ଏବଂ ପର୍ଯ୍ୟଟନରେ ରୋଜଗାର ବଢ଼ିବ । କିନ୍ତୁ ରୋଜଗାର ଲାଗି ଶିକ୍ଷା ଏବଂ ଦକ୍ଷତା ବିକାଶର ଭୂମିକା ଗୁରୁତ୍ୱପୂର୍ଣ୍ଣ । କେନ୍ଦ୍ର ସରକାର ରାଜ୍ୟ ଶିକ୍ଷା ସହ ଜଡ଼ିତ ସଂସ୍ଥାଗୁଡ଼ିକୁ ମଞ୍ଜୁରି ଦେଇଛନ୍ତି । ଜାମ୍ମୁରେ ପ୍ରତିଷ୍ଠା ହେବାକୁ ଥିବା ଆଇଆଇଏମ ହେଉ କିମ୍ବା ପୁଣି ଆଇଆଇଟି ହେଉ, ଏହି ସଂସ୍ଥାନ ରାଜ୍ୟ ଲାଗି ମାଇଲଖୁଂଟ ସାବ୍ୟସ୍ତ ହେବ । ଏହାବ୍ୟତୀତ ଜାମ୍ମୁ-କାଶ୍ମୀରର 16 ହଜାରରୁ ଅଧିକ ଛାତ୍ରଛାତ୍ରୀଙ୍କୁ ଦେଶର ପ୍ରତିଷ୍ଠିତ ବିଶ୍ୱବିଦ୍ୟାଳୟ ଏବଂ କଲେଜରେ ପଢ଼ିବା ଲାଗି ବୃତ୍ତି ଦିଆଯାଇଛି ।
ଭାଇ ଓ ଭଉଣୀମାନେ, ମହିଳା ସଶକ୍ତିକରଣ ସରକାରଙ୍କ ପ୍ରାଥମିକତା । ଗତ ଚାରି ବର୍ଷରେ ଏପରି ଅନେକ ଯୋଜନା ଆରମ୍ଭ କରାଯାଇଛି ଯାହାଦ୍ୱାରା ମହିଳାମାନଙ୍କୁ ଆର୍ଥିକ ଏବଂ ସାମାଜିକ ଶକ୍ତି ମିଳିଛି । ପ୍ରଧାନମନ୍ତ୍ରୀ ମୁଦ୍ରା ଯୋଜନା ଅଧୀନରେ ସାରା ଦେଶରେ ପାଖାପାଖି ସାଢ଼େ 9 କୋଟି ମହିଳା ଉଦ୍ୟୋଗୀ ଛୋଟ ଛୋଟ ବ୍ୟବସାୟ ଲାଗି ବିନା ଗ୍ୟାରେଂଟିରେ ଋଣ ପାଇଛନ୍ତି । ଏଥିରେ ଜାମ୍ମୁ-କାଶ୍ମୀରର 50 ଲକ୍ଷରୁ ଅଧିକ ମହିଳା ମଧ୍ୟ ସାମିଲ ଅଛନ୍ତି ।
ସେହିପରି ଉଜ୍ଜ୍ୱଳା ଯୋଜନାରେ ସରକାର ଦେଶର ଗରିବ ମହିଳାମାନଙ୍କୁ ଏବଂ ଭଉଣୀମାନଙ୍କୁ ଧୂଆଁମୁକ୍ତ ରୋଷେଇ ସୁବିଧା ପ୍ରଦାନ ଲାଗି ପ୍ରୟାସ କରୁଛନ୍ତି । କ୍ଲିନ କୁକିଂ-ବିଶେଷ କରି ଗ୍ରାମର ମା’ଭଉଣୀମାନେ, ତଫସିଲଭୁକ୍ତ ଜାତି ହୁଅନ୍ତୁ, ବଂଚିତ ହୁଅନ୍ତୁ, ପଛୁଆବର୍ଗର ହୁଅନ୍ତୁ, ଏପରି ସବୁ ସମାଜରୁ ଆସୁଥିବା ମା’-ଭଉଣୀଙ୍କ ପାଇଁ ଏହି ଯୋଜନା ଅତ୍ୟନ୍ତ ଉପକାର ସିଦ୍ଧ ହେଉଛି । ସାରା ଦେଶରେ ଯେଉଁଠି ପାଖାପାଖି 4 କୋଟି ମାଗଣା ଏଲପିଜି ସଂଯୋଗ ଦିଆଯାଇଛି, ସେହିପରି ଜାମ୍ମୁ-କାଶ୍ମୀରରେ ମଧ୍ୟ ସାଢ଼େ 4 ଲକ୍ଷରୁ ଅଧିକ ମା’-ଭଉଣୀଙ୍କ ରୋଷେଇଶାଳ ପର୍ଯ୍ୟନ୍ତ ମଧ୍ୟ ଉଜ୍ଜ୍ୱଳା ପହଁଚିପାରିଛି ।
ସାଥୀଗଣ, ସ୍ୱଚ୍ଛ ଭାରତ ଅଭିଯାନ ଅନ୍ତର୍ଗତ ସାରା ଦେଶକୁ ଖୋଲା ମଳମୁକ୍ତ କରିବା ଲାଗି ଅଭିଯାନ ଆରମ୍ଭ କରାଯାଇଛି । ଏହା କେବଳ ସ୍ୱଚ୍ଛତା ସହ ଜଡ଼ିତ ପ୍ରସଙ୍ଗ ନୁହେଁ ବରଂ ଏହା ମହିଳାଙ୍କ ସମ୍ମାନର ବିଷୟ ମଧ୍ୟ । ଜାମ୍ମୁ-କାଶ୍ମୀରର ମା’-ଭଉଣୀମାନେ ଏହି ଅଭିଯାନକୁ ନେଇ କେତେ ସଚେତନ, ଏହାର ଏକ ପ୍ରମାଣ ନିକଟରେ ଦେଶ ଏବଂ ଦୁନିଆ ଦେଖିଛି । ମୁଁ ନିଜେ ଗଣମାଧ୍ୟମରେ ଉଦ୍ଧମପୁରର 87 ବର୍ଷ ବୟସ୍କା ମହିଳାଙ୍କ ସାହସକୁ ଦେଖିଲି । ଏହି ମା’ ଏତେ ଅଧିକ ବୟସରେ ନିଜେ ଗୋଟିଏ ଗୋଟିଏ ଇଟା ଯୋଡ଼ି ଶୌଚାଳୟ ନିର୍ମାଣରେ ଜଡ଼ିତ ଥିଲେ । କାହାର ସାହାଯ୍ୟ ଏବଂ ସହାୟତା ବିନା, କେବଳ ଗୋଟିଏ ଝୁଙ୍କ ଯେ, ସ୍ୱଚ୍ଛତା ଅଭିଯାନ ସହ ଯୋଡ଼ି ହେବା ।
ସାଥୀଗଣ, ଏପରି ପ୍ରୟାସ ଯେତେବେଳେ କରାଯାଏ ସାହସ ଏବଂ ଉତ୍ସାହ ଅନେକ ଗୁଣ ବଢ଼ିଯାଇଥାଏ । କେଉଁଠି 5 ବର୍ଷର ବାଳିକା ଏହି ଅଭିଯାନ ସହ ଯୋଡ଼ି ହେଉଛନ୍ତି ତ’ ଆଉ କେଉଁଠି 87 ବର୍ଷର ମାତାମାନେ ଯୋଡ଼ି ହେଉଛନ୍ତି । ଏହାର ଅନୁମାନ କରାଯାଇପାରେ ଯେ ସ୍ୱଚ୍ଛତା ଏବଂ ସମ୍ମାନର ଭାବନା କେତେ ଗଭୀର । ଏହି କାରଣରୁ ବର୍ତ୍ତମାନ ପର୍ଯ୍ୟନ୍ତ ଗ୍ରାମୀଣ ସ୍ୱଚ୍ଛତାର ପରିଧି 80 ପ୍ରତିଶତରୁ ଅଧିକ ହୋଇପାରିଛି । ଜାମ୍ମୁ-କାଶ୍ମୀରରେ ମଧ୍ୟ ଏହି ଯୋଜନା ଅନ୍ତର୍ଗତ ପାଖାପାଖି ସାଢ଼େ 8 ଲକ୍ଷ ଘରେ ଶୌଚାଳୟ ନିର୍ମାଣ କରାଯାଇଛି ।
ସାଥୀଗଣ, ମହିଳାମାନଙ୍କ ଆର୍ଥିକ ଏବଂ ସାମାଜିକ ସଶକ୍ତିକରଣ ସେପର୍ଯ୍ୟନ୍ତ ଅଧୁରା ରହିଥିବ ଯେପର୍ଯ୍ୟନ୍ତ ଦକ୍ଷତା ବିକାଶ ପ୍ରତି ଧ୍ୟାନ ଦିଆଯିବ ନାହିଁ । ଏହି କାରଣରୁ ଜାମ୍ମୁ-କାଶ୍ମୀର ମହିଳାମାନଙ୍କ ଦକ୍ଷତା ବିକାଶ ଲାଗି ମଧ୍ୟ ଅନେକ ପ୍ରକାର ପ୍ରୟାସ କରାଯାଉଛି । ପାଖାପାଖି 5 ହଜାର ମହିଳାଙ୍କୁ ହସ୍ତତନ୍ତ, ସିଲେଇ, କୃଷି ଏବଂ ତତସମ୍ବନ୍ଧୀୟ ବ୍ୟବସାୟ ଲାଗି ପ୍ରଶିକ୍ଷଣ ଦିଆଯାଇଛି ।
ଭାଇ ଓ ଭଉଣୀମାନେ, ଦୁଇ ବର୍ଷ ପୂବେ ଯେତେବେଳେ ମୁଁ ଏଠାକୁ ଆସିଥିଲେ ସେତେବେଳେ ମୁଁ ଏଠାକାର ନବଯୁବକମାନଙ୍କୁ, ଆପଣମାନଙ୍କୁ ସମସ୍ତଙ୍କୁ ନିବେଦନ କରିଥିଲି ଯେ ସରକାର ଯେଉଁ ଯୋଜନା ଆରମ୍ଭ କରିଛନ୍ତି ତା’ର ଫାଇଦା ଉଠାନ୍ତୁ । ଆଜି ମୁଁ ଏହା କହି ଗର୍ବ ଅନୁଭବ କରୁଛି ଯେ ଏଠାକାର ନବଯୁବକମାନେ ଏସବୁ ଯୋଜନାର ଲାଭ ଉଠାଇଛନ୍ତି ।
ପ୍ରଧାନମନ୍ତ୍ରୀ ଜନଧନ ଯୋଜନା ଅନ୍ତର୍ଗତ ରାଜ୍ୟରେ ପାଖାପାଖି 20 ଲକ୍ଷ ଲୋକଙ୍କର ବ୍ୟାଙ୍କ ଏକାଉଣ୍ଟ ଖୋଲଯାଇଛି । ଏହି ଏକାଉଣ୍ଟରେ ଆଜିର ତାରିଖରେ ପାଖାପାଖି 800 କୋଟି ଟଙ୍କା ଜମା ହୋଇଛି, ମୁଁ କେବଳ ଜାମ୍ମୁ-କାଶ୍ମୀର କଥା କହୁଛି । ଅଣସଂଗଠିତ କ୍ଷେତ୍ରରେ କାମ କରୁଥିବା ଯେଉଁ ମୋର ଶ୍ରମିକ ଭାଇ-ଭଉଣୀ ଅଛନ୍ତି ସେମାନଙ୍କ ପାଇଁ କରାଯାଇଥିବା ଅଟଳ ପେନସନ ଯୋଜନାରେ ଏଠାକାର 40 ହଜାରରୁ ଅଧିକ ଲୋକ ଯୋଡ଼ି ହୋଇଛନ୍ତି । କମ ପ୍ରିମିୟମର ଦୁଇଟି ଜୀବନ ବୀମା ଯୋଜନା ଯାହାକୁ ସରକାର ଚଳାଉଛନ୍ତି, ସେଥିରେ ରାଜ୍ୟର ପାଖାପାଖି 9 ଲକ୍ଷ ଲୋକ ଯୋଡ଼ି ହୋଇଛନ୍ତି । ଏହି ଯୋଜନା ମାଧ୍ୟମରେ ପାଖାପାଖି ତିନି କୋଟି ଟଙ୍କାର ଦାବି ଅର୍ଥ ମଧ୍ୟ ଦିଆଯାଇଛି ।
ସାଥୀଗଣ, ଏଠାକାର ନବଯୁବକମାନେ ସେନାରେ ଭର୍ତ୍ତି ହେବା ଲାଗି ସବୁବେଳେ ଆଗରେ ରହିଥା’ନ୍ତି । ପରମ୍ପରା ମୁତାବକ ସୁରକ୍ଷାବାହିନୀରେ ଏହି ରାଜ୍ୟର ନବଯୁବକମାନଙ୍କୁ ଅନେକ ସୁଯୋଗ ଉପଲବ୍ଧ କରାଯାଉଛି । ସ୍ଥଳସେନା, କେନ୍ଦ୍ରୀୟ ସଶସ୍ତ୍ର ବାହିନୀ, ପୋଲିସ ବାହିନୀ, ଭାରତୀୟ ରିଜର୍ଭ ବାଟାଲିୟନ ଦ୍ୱାରା ଚଳାଯାଉଥିବା ସ୍ୱତନ୍ତ୍ର ନିଯୁକ୍ତି ମେଳାରେ 20 ହଜାରରୁ ଅଧିକ ଚାକିରି ଦିଆଯାଇଛି ।
ସାଥୀଗଣ, ଏହା ଡୋଗ୍ରାମାନଙ୍କ ଭୂମି, ବୀରମାନଙ୍କ ଭୂମି । ଏଠାରେ ସୌର୍ଯ୍ୟ ମଧ୍ୟ ରହିଛି, ସଂଯମ ମଧ୍ୟ ରହିଛି, ତ’ ଏଠାରେ ମଧୁର ସଂଗୀତ ମଧ୍ୟ ରହିଛି । ଏଠାରେ ବାସୁମତୀର କ୍ଷେତରୁ ଆସୁଥିବା ବାସ୍ନା ମଧ୍ୟ ରହିଛି, ତ’ ଆଧୁନିକ କାଲିର କାରଖାନାର ସମ୍ଭାବନାର ମୂଳଦୁଆ ମଧ୍ୟ ପଡ଼ିଛି । ଆମର ସଂକଳ୍ପ ମଧ୍ୟ ମଜଭୁତ ଏବଂ ରାସ୍ତା ମଧ୍ୟ ସଠିକ ।
ମୋର ତିଳେ ମାତ୍ର ସନ୍ଦେହ ନାହିଁ ଯେ ମା’ ବୈଷ୍ଣୋଦେବୀଙ୍କ ଆଶୀର୍ବାଦରୁ, ଏବଂ ଆପଣ ସମସ୍ତଙ୍କର ପରିଶ୍ରମରୁ ଏହି ରାଜ୍ୟ ବିକାଶର ନୂତନ ଉଚ୍ଚତାକୁ ଛୁଇଁବ ଏବଂ ସିଦ୍ଧି ପ୍ରାପ୍ତ କରି ରହିବ ।
ଧନ୍ୟବାଦ!
