ମହାମହିମ ମୋର ମିତ୍ର ରାଷ୍ଟ୍ରପତି ଇବ୍ରାହିମ ସୋଲିହ,
ମାଳଦୀପରେ ଆମର ବିଶିଷ୍ଟ ମିତ୍ର,
ସହଯୋଗୀ,
ନମସ୍କାର । ରାଷ୍ଟ୍ରପତି ସୋଲିହ, ଆପଣଙ୍କ ସହିତ ଜଡିତ ହେବାରେ ସବୁବେଳେ ଖୁସି ମିଳିଥାଏ । ଆପଣ ଓ ମାଳଦୀପର ଜନସାଧାରଣ ସବୁବେଳେ ଆମର ହୃଦୟ ଏବଂ ମସ୍ତିସ୍କରେ ରହିଥାନ୍ତି ।
ବିଗତ ଦିନରେ ପାଳନ କରାଯାଇଥିବା ଆପଣଙ୍କ କାର୍ଯ୍ୟକାଳର ପ୍ରଥମ ବାର୍ଷିକୀ ଅବସରରେ ମୁଁ ଆପଣଙ୍କୁ ଅଭିନନ୍ଦନ ଜଣାଉଛି । ମାଳଦୀପରେ ଏହି ବର୍ଷ ଗଣତନ୍ତ୍ର ତଥା ବିକାଶ ପାଇଁ ଚମତ୍କାର ବର୍ଷ ରହିଛି । ଭାରତ ଓ ମାଳଦୀପ ସମ୍ବନ୍ଧ ପାଇଁ ଏହି ବର୍ଷ ମହତ୍ୱପୂର୍ଣ୍ଣ ।
ମୋ ସରକାରଙ୍କ “ପ୍ରଥମେ ପଡୋଶୀ” ତଥା ଆପଣଙ୍କ ସରକାରଙ୍କ “ପ୍ରଥମେ ଭାରତ” ନୀତି ସମସ୍ତ କ୍ଷେତ୍ରରେ ଆମର ଦ୍ୱିପାକ୍ଷିକ ସହଯୋଗକୁ ମଜଭୁତ କରିଛି । ଆମର ନିଷ୍ପତ୍ତିକୁ ଲାଗୁ କରାଯିବା ଦ୍ୱାରା ମାଳଦୀପର ଅର୍ଥ ବ୍ୟବସ୍ଥା, ଆଧାରଭୂତ ସଂରଚନା ତଥା କ୍ଷମତା ସୃଜନର ବିକାଶକୁ ପ୍ରୋତ୍ସାହନ ମଳିଛି । ଏହା ମହତ୍ୱପୂର୍ଣ୍ଣ ଯେ ଏହି ପ୍ରଗତି ମାଳଦୀପର ପ୍ରାଥମିକତା ତଥା ଆବଶ୍ୟକତା କ୍ଷେତ୍ରରେ ହାସଲ କରାଯାଇଛି ।
ଆଜି “ମେଡ଼ ଇନ ଇଣ୍ଡିଆ” ଫାଷ୍ଟ ଇଣ୍ଟରସେପ୍ଟର କ୍ରାଫ୍ଟ ଅଧିକାରିକ ଭାବେ ଆପଣଙ୍କ ତଟରକ୍ଷକଙ୍କୁ ପ୍ରଦାନ କରାଯାଇଛି । ଏହି ଆଧୁନିକ ଜାହାଜର ନିର୍ମାଣ ଆମର ଗୃହ ରାଜ୍ୟ ଗୁଜୁରାଟରେ ଏଲଆଣ୍ଡଟି ଦ୍ୱାରା ନିର୍ମାଣ କରାଯାଇଛି । ଏହା ଫଳରେ ମାଳଦୀପର ସାମୁଦ୍ରିକ ସୁରକ୍ଷାକୁ ବୃଦ୍ଧି କରିବା ତଥା ଆପଣଙ୍କ ନୀଳ ଅର୍ଥବ୍ୟବସ୍ଥା ଏବଂ ପର୍ଯ୍ୟଟନକୁ ପ୍ରୋତ୍ସାହନ ପ୍ରଦାନ କରିବାରେ ସହାୟତା ମିଳିବ । ଏହା ପ୍ରକାଶ କରି ମୁଁ ଖୁସି ଯେ ଏହି ପର୍ଯ୍ୟବେକ୍ଷକ ଜାହାଜର ନାମ ‘କାମିୟାବ’ ରଖାଯାଇଛି, ଯାହାର ଅର୍ଥ ହେଉଛି ଧୀବେହୀ ଓ ହିନ୍ଦୀରେ ସଫଳତା ।
ମହାମହିମ,
ମୁଁ ଅଡ୍ଡୁର ବିକାଶ ପାଇଁ ଆପଣଙ୍କ ସରକାରଙ୍କ ଦ୍ୱାରା ପ୍ରଦାନ କରାଯାଉଥିବା ମହତ୍ୱକୁ ସ୍ମରଣ କରାଉଛି । ଦ୍ୱୀପର ଜନ ସମୁଦାୟଙ୍କ ଜୀବିକାକୁ ସମର୍ଥନ ପ୍ରଦାନ କରିବା ପାଇଁ ଉଚ୍ଚ ପ୍ରଭାବ ସମୁଦାୟ ବିକାଶ ପରିଯୋଜନା ମାଧ୍ୟମରେ ଭାଗିଦାରିତା କରିବାରେ ଭାରତ ଖୁସି ।
ବନ୍ଧୁଗଣ,
ଆମର ଦୁଇ ଦେଶ ମଧ୍ୟରେ ଘନିଷ୍ଠ ସମ୍ବନ୍ଧର ଏକ ମହତ୍ୱପୂର୍ଣ୍ଣ ପଦକ୍ଷେପ ହେଉଛି ଜନ ସାଧାରଣଙ୍କ ମଧ୍ୟରେ ସମ୍ପର୍କ । ମାଳଦୀପ ଆସୁଥିବା ଭାରତୀୟ ପର୍ଯ୍ୟଟକ ମାନଙ୍କ ସଂଖ୍ୟା ଦୁଇ ଗୁଣରୁ ମଧ୍ୟ ଅଧିକ ହୋଇଛି । ଭାରତ ପଞ୍ଚମରୁ ଦ୍ୱିତୀୟ ସ୍ଥାନରେ ପହଞ୍ଚିଛି । ଚଳିତ ସପ୍ତାହରେ ଦିଲ୍ଲୀ-ମୁମ୍ବାଇ ତଥା ବେଙ୍ଗାଲୁରୁ ସହିତ ସିଧାସଳଖ ଉଡାଣ ଆରମ୍ଭ ହୋଇଛି ।
ରୂପେ ପ୍ରଚଳନ ବ୍ୟବସ୍ଥା ଫଳରେ ମାଳଦୀପ ଯାତ୍ରା କରୁଥିବା ଭାରତୀୟ ମାନଙ୍କ ପାଇଁ ଅଧିକ ସହଜ ହେବ । ମୁଁ ଖୁସି ଯେ ବ୍ୟାଙ୍କ ଅଫ ମାଳଦୀପ ମାଧ୍ୟମରେ ଏହାର ଶୁଭାରମ୍ଭ କରାଯାଇଛି ।
ମହାମହିମ,
ଆମେ ଆଜି ମାଳଦୀପର ଜନସାଧାରଣଙ୍କୁ ଏଲଇଡି ଷ୍ଟ୍ରିଟ ଲାଇଟିଙ୍ଗ ସମର୍ପିତ କରିଛୁ । ମାଳଦୀପର ଜନସାଧାରଣଙ୍କ ପାଇଁ ପରିବେଶ ଅନୁକୂଳ ଆଲୋକର ଲାଭ ପହଞ୍ଚାଇବାରେ ଭାରତ ଆନନ୍ଦିତ । ମାଳଦୀପର ଜନସାଧାରଣ 80 ପ୍ରତିଶତ ଖର୍ଚ ସଞ୍ଚୟ କରିବେ ।
ମହାମହିମ,
ଆମେ ହୁଲହୁଲମାଲାରେ ଏକ କ୍ୟାନସର ହସପିଟାଲ ତଥା ଏକ କ୍ରିକେଟ ଷ୍ଟାଡ଼ିୟମ ନିର୍ମାଣ କରିବାର କାର୍ଯ୍ୟ ମଧ୍ୟ କରୁଛି ।
ମୋତେ କୁହାଯାଇଛି କି 34ଟି ଦ୍ୱୀପରେ ଜଳ ଏବଂ ସ୍ୱଚ୍ଛତା ପରିଯୋଜନା ତଥା ଅଡ୍ଡୁରେ ଉଦ୍ଧାର କାର୍ଯ୍ୟ ଶୀଘ୍ର ପ୍ରାରମ୍ଭ ହେବ ।
ଆଗାମୀ ବର୍ଷ ମାନଙ୍କରେ ଭାରତୀୟ ସହଯୋଗ ଅନ୍ତର୍ଗତ ପରିଯୋଜନା ମାଳଦୀପର ଜନସାଧାରଣଙ୍କ ପାଇଁ ଆହୁରି ଅଧିକ ଲାଭ ଆଣିବ । ଭାରତ ଏକ ଘନିଷ୍ଠ ମିତ୍ର ତଥା ସାମୁଦ୍ରିକ ପଡୋଶୀ ଭାବେ ଗଣତନ୍ତ୍ର ଓ ବିକାଶ ପାଇଁ ମାଳଦୀପ ସହିତ ଭାଗିଦାରିତା ଜାରି ରଖିବା ପାଇଁ ସଂକଳ୍ପବଦ୍ଧ । ଆମେ ହିନ୍ଦ ମହାସାଗର କ୍ଷେତ୍ରରେ ଶାନ୍ତି ଓ ପାରସ୍ପରିକ ସୁରକ୍ଷା ପାଇଁ ଆମର ସହଯୋଗ ମଧ୍ୟ ବୃଦ୍ଧି କରିବୁ ।
ମହାମହିମ,
ମୁଁ ଦିଲ୍ଲୀରେ ଆପଣଙ୍କୁ ଭେଟିବା ପାଇଁ ଆଶା କରୁଛି । ମୁଁ ଶାନ୍ତି ଓ ସମୃଦ୍ଧି ପାଇଁ ମାଳଦୀପର ମିତ୍ର ଜନସାଧାରଣଙ୍କୁ ହାର୍ଦ୍ଦିକ ଶୁଭକାମନା ଜଣାଉଛି ।
ଅନେକ-ଅନେକ ଧନ୍ୟବାଦ ।
