ଆଜି ୟୁଟ୍ୟୁବ୍ ଫ୍ୟାନଫେଷ୍ଟ ଇଣ୍ଡିଆ 2023 ଅବସରରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ୟୁଟ୍ୟୁବର୍ କମ୍ୟୁନିଟିକୁ ସମ୍ବୋଧିତ କରିଛନ୍ତି। ସେ ୟୁଟ୍ୟୁବରେ ତାଙ୍କର 15 ବର୍ଷ ପୂରଣ କରିଥିଲେ ଏବଂ ଏହି ମାଧ୍ୟମର ସହାୟତାରେ ବିଶ୍ୱସ୍ତରୀୟ ପ୍ରଭାବ ସୃଷ୍ଟି କରିବାର ଅଭିଜ୍ଞତା ବାଣ୍ଟିଥିଲେ।
ୟୁଟ୍ୟୁବର୍ କମ୍ୟୁନିଟିକି ସମ୍ବୋଧିତ କରି ପ୍ରଧାନମନ୍ତ୍ରୀ ତାଙ୍କର 15 ବର୍ଷର ୟୁଟ୍ୟୁବ୍ ଯାତ୍ରା ସମାପ୍ତ କରି ଖୁସି ବ୍ୟକ୍ତ କରିଛନ୍ତି ଏବଂ କହିଛନ୍ତି ଯେ ସେ ଆଜି ସାଥୀ ୟୁଟ୍ୟୁବର୍ ଭାବରେ ଏଠାରେ ଉପସ୍ଥିତ ଅଛନ୍ତି। ପ୍ରଧାନମନ୍ତ୍ରୀ ଗୁରୁତ୍ୱାରୋପ କରି କହିଛନ୍ତି, “ମୁଁ ମଧ୍ୟ 15 ବର୍ଷ ଧରି ମୋର ୟୁଟ୍ୟୁବ୍ ଚ୍ୟାନେଲ ମାଧ୍ୟମରେ ମୁଁ ଦେଶ ତଥା ବିଶ୍ବ ସହିତ ମଧ୍ୟ ସଂଯୁକ୍ତ ହୋଇଛି। ମୋର ଭଲ ସଂଖ୍ୟାରେ ଗ୍ରାହକ ମଧ୍ୟ ଅଛନ୍ତି। ”
5,000 କ୍ରିଏଟର ଏବଂ ନୂତନ କ୍ରିଏଟରଙ୍କ ଏକ ବିଶାଳ କମ୍ୟୁନିଟିର ଉପସ୍ଥିତିକୁ ସ୍ୱୀକାର କରି ପ୍ରଧାନମନ୍ତ୍ରୀ ଖେଳ, ପ୍ରଯୁକ୍ତିବିଦ୍ୟା, ଖାଦ୍ୟ ବ୍ଲଗିଂ, ଭ୍ରମଣ ବ୍ଲଗର୍ ଏବଂ ଜୀବନଶୈଳୀକୁ ପ୍ରଭାବିତ କରୁଥିବା କ୍ରିଏଟରଙ୍କ ବିଷୟରେ ଉଲ୍ଲେଖ କରିଥିଲେ ।
କଣ୍ଟେଣ୍ଟ କ୍ରିଏଟରଙ୍କ ପ୍ରଭାବ ଭାରତର ଲୋକଙ୍କ ଉପରେ ନଜର ରଖି ପ୍ରଧାନମନ୍ତ୍ରୀ ଏହି ପ୍ରଭାବକୁ ଅଧିକ ପ୍ରଭାବଶାଳୀ କରିବାର ସୁଯୋଗ ଉପରେ ଆଲୋକପାତ କରି କହିଛନ୍ତି ଯେ ଆମେ ଏକାଠି ହୋଇ ଆମ ଦେଶର ଏକ ବିଶାଳ ଜନସଂଖ୍ୟା ଜୀବନରେ ପରିବର୍ତ୍ତନ ଆଣିପାରିବା। ସହଜରେ ଶିକ୍ଷାଦାନ କରି କୋଟି କୋଟି ଲୋକଙ୍କୁ ଗୁରୁତ୍ୱପୂର୍ଣ୍ଣ ବିଷୟ ବୁଝାଇବା ଦ୍ୱାରା ସେ ଆହୁରି ଅନେକ ବ୍ୟକ୍ତିଙ୍କୁ ସଶକ୍ତିକରଣ ଏବଂ ଶକ୍ତିଶାଳୀ କରିବା ବିଷୟରେ ଉଲ୍ଲେଖ କରିଥିଲେ। ସେ କହିଛନ୍ତି, “ଆମେ ସେମାନଙ୍କୁ ଆମ ସହିତ ସାମିଲ୍ କରିପାରିବା’’।
ତାଙ୍କ ୟୁଟ୍ୟୁବ ଚ୍ୟାନେଲରେ ହଜାର ହଜାର ଭିଡିଓ ଅଛି ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ କହିଛନ୍ତି ଯେ ଯେଉଁ ଭିଡିଓଗୁଡ଼ିକରେ ସେ ଆମ ଦେଶରେ ଲକ୍ଷ ଲକ୍ଷ ଛାତ୍ରଛାତ୍ରୀଙ୍କ ସହ ୟୁଟ୍ୟୁବ ମାଧ୍ୟମରେ ପରୀକ୍ଷା ଚାପ, ଆଶା ପରିଚାଳନା ଏବଂ ଉତ୍ପାଦକତା ଭଳି ବିଷୟ ଉପରେ କଥା ହୋଇଥିଲେ, ତାହା ତାଙ୍କ ପାଇଁ ସବୁଠାରୁ ସନ୍ତୋଷଜନକ ଅଟେ।
ଜନ ଆନ୍ଦୋଳନ ସହିତ ଜଡିତ ଥିବା ବିଷୟଗୁଡିକ ବିଷୟରେ କହିବାକୁ ଗଲେ ଯେଉଁଠାରେ ଲୋକଙ୍କ ଶକ୍ତି ସେମାନଙ୍କ ସଫଳତାର ଆଧାର ଅଟେ, ପ୍ରଧାନମନ୍ତ୍ରୀ ପ୍ରଥମେ ସ୍ବଚ୍ଛ ଭାରତ ବିଷୟରେ ଉଲ୍ଲେଖ କରିଥିଲେ ଯାହା ଗତ ନଅ ବର୍ଷ ମଧ୍ୟରେ ଏକ ବୃହତ ଅଭିଯାନରେ ପରିଣତ ହୋଇଥିଲା। “ପିଲାମାନେ ଏଥିରେ ଏକ ଭାବନାତ୍ମକ ଶକ୍ତି ଆଣିଥିଲେ। ସେଲିବ୍ରିଟିମାନେ ଏହାକୁ ଆଗକୁ ନେଇଥିଲେ, ଦେଶର କୋଣ ଅନୁକୋଣର ଲୋକମାନେ ଏହାକୁ ଏକ ମିଶନରେ ପରିଣତ କରିଥିଲେ ଏବଂ ଆପଣଙ୍କ ପରି ୟୁଟ୍ୟୁବର୍ସ ପରିଷ୍କାର ପରିଚ୍ଛନ୍ନତା ବିଷୟରେ ସଚେତନତା ସୃଷ୍ଟି କରିଥିଲେ’’ ବୋଲି ସେ କହିଛନ୍ତି। ସ୍ୱଚ୍ଛତା ଭାରତର ପରିଚୟ ନହେବା ପର୍ଯ୍ୟନ୍ତ ଏହି ଆନ୍ଦୋଳନକୁ ବନ୍ଦ ନକରିବାକୁ ପ୍ରଧାନମନ୍ତ୍ରୀ ଅନୁରୋଧ କରିଛନ୍ତି। ସେ କହିଛନ୍ତି ଯେ “ପ୍ରତ୍ୟେକଙ୍କ ପାଇଁ ସ୍ୱଚ୍ଛତା ଏକ ପ୍ରାଥମିକତା ହେବା ଆବଶ୍ୟକ”।
ଦ୍ୱିତୀୟରେ, ପ୍ରଧାନମନ୍ତ୍ରୀ ଡିଜିଟାଲ୍ ପେମେଣ୍ଟ ବିଷୟରେ ଉଲ୍ଲେଖ କରିଛନ୍ତି। ୟୁପିଏର ସଫଳତା ହେତୁ ବିଶ୍ବର ଡିଜିଟାଲ୍ ପେମେଣ୍ଟରେ ଭାରତର 46 ପ୍ରତିଶତ ଅଂଶ ରହିଛି ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ କମ୍ୟୁନିଟିକୁ ଅନୁରୋଧ କରିଛନ୍ତି ଯେ ଦେଶରେ ଅଧିକରୁ ଅଧିକ ଲୋକଙ୍କୁ ଡିଜିଟାଲ୍ ପେମେଣ୍ଟ ବ୍ୟବହାର କରିବାକୁ ପ୍ରେରଣା ଦେବା ସହିତ ନିଜର ଭିଡିଓ ମାଧ୍ୟମରେ ସରଳ ଭାଷାରେ ସେମାନଙ୍କୁ ଡିଜିଟାଲ୍ ପଇଠ କରିବା ଶିଖାନ୍ତୁ।
ତୃତୀୟତଃ, ପ୍ରଧାନମନ୍ତ୍ରୀ ଭୋକାଲ୍ ଫର୍ ଲୋକାଲ୍ ଉପରେ ଆଲୋକପାତ କରିଥିଲେ। ସେ କହିଛନ୍ତି ଯେ ଆମ ଦେଶରେ ଏତେଗୁଡ଼ିଏ ଉତ୍ପାଦ ସ୍ଥାନୀୟ ସ୍ତରରେ ନିର୍ମିତ ଏବଂ ସ୍ଥାନୀୟ କାରିଗରମାନଙ୍କ ଦକ୍ଷତା ଆଶ୍ଚର୍ଯ୍ୟଜନକ ଅଟେ। ୟୁଟ୍ୟୁବ୍ ଭିଡିଓ ମାଧ୍ୟମରେ ଏହି କାରିଗରମାନଙ୍କୁ ପ୍ରୋତ୍ସାହିତ କରିବାକୁ ଏବଂ ଭାରତର ସ୍ଥାନୀୟ ଉତ୍ପାଦକୁ ବିଶ୍ୱବ୍ୟାପୀ ପରିଚିତ କରିବାରେ ସାହାଯ୍ୟ କରିବାକୁ ସେ କମ୍ୟୁନିଟିକୁ କହିଥିଲେ।
ଏହି ଉତ୍ପାଦ ଗୁଡ଼ିକରେ ଆମ ମାଟିର ସୁଗନ୍ଧ ଏବଂ ଭାରତର ଶ୍ରମିକ ତଥା କାରିଗରମାନଙ୍କ କଠିନ ପରିଶ୍ରମ ସାମିଲ୍ ରହିଛି। ଏହି ଉତ୍ପାଦ କିଣିବା ପାଇଁ ଏକ ଭାବପ୍ରବଣ ଅନୁରୋଧ କରି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରି କହିଛନ୍ତି, “ଏହା ଖଦି ହେଉ, ହସ୍ତଶିଳ୍ପ ହେଉ, ହସ୍ତତନ୍ତ କିମ୍ବା ଅନ୍ୟ କିଛି। ଦେଶକୁ ଜାଗ୍ରତ କରିବା, ଏକ ଆନ୍ଦୋଳନ ଆରମ୍ଭ କରିବା। ”
ପ୍ରଧାନମନ୍ତ୍ରୀ ପ୍ରତ୍ୟେକ ଏପିସୋଡର ଶେଷରେ ଏକ ପ୍ରଶ୍ନ ରଖିବା ଏବଂ କିଛି କରିବା ପାଇଁ ଆକ୍ସନ୍ ପଏଣ୍ଟ ପ୍ରଦାନ କରିବାକୁ ମଧ୍ୟ ପରାମର୍ଶ ଦେଇଛନ୍ତି। “ଥରେ ଲୋକମାନେ ଏହି କାର୍ଯ୍ୟଗୁଡ଼ିକୁ କରିପାରିବେ ଏବଂ ଏହାକୁ ଆପଣଙ୍କ ସହ ସେୟାର କରିପାରିବେ | ଏହି ଉପାୟରେ ଆପଣଙ୍କର ଲୋକପ୍ରିୟତା ମଧ୍ୟ ବଢ଼ିବ ଏବଂ ଲୋକମାନେ କେବଳ ଶୁଣିବେ ନାହିଁ ବରଂ କିଛି କରିବା ସହିତ ମଧ୍ୟ ଜଡିତ ହେବେ ବୋଲି ସେ କହିଛନ୍ତି।’’
ପ୍ରଧାନମନ୍ତ୍ରୀ କମ୍ୟୁନିଟିକୁ ସମ୍ବୋଧିତ କରି ଖୁସି ବ୍ୟକ୍ତ କରିଛନ୍ତି ଏବଂ ପ୍ରତ୍ୟେକ ୟୁଟ୍ୟୁବର୍ ସେମାନଙ୍କର ଭିଡିଓ ଶେଷରେ ଯାହା କହି ତାଙ୍କର ଭିଡିଓକୁ ସମାପ୍ତ କରିଥାନ୍ତି ସେ ତାହା କହି ଏହାକୁ ଶେଷ କରିଛନ୍ତି। ସେ କହିଛନ୍ତି, “ମୋର ଚ୍ୟାନେଲକୁ ସବସ୍କ୍ରାଇବ କରନ୍ତୁ ଏବଂ ମୋର ସମସ୍ତ ଅପଡେଟ୍ ଗ୍ରହଣ କରିବାକୁ ବେଲ୍ ଆଇକନ୍ କୁ ଦବାନ୍ତୁ।”
