ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆସନ୍ତାକାଲି ଫେବୃଆରୀ 11, 2019 ତାରିଖରେ ଉତ୍ତରପ୍ରଦେଶର ବୃନ୍ଦାବନ ଗସ୍ତ କରିବେ ।
ବୃନ୍ଦାବନ ଚନ୍ଦ୍ରୋଦୟ ମନ୍ଦିରରେ ଅକ୍ଷୟ ପାତ୍ର ଫାଉଣ୍ଡେସନ ଦ୍ୱାରା ଆୟୋଜନ କରାଯାଉଥିବା 3ଶହ କୋଟିତମ ଭୋଜନ(Meal) ପ୍ରଦାନ ସକାଶେ ଏକ ଫଳକ ଉନ୍ମୋଚନ କରିବେ ।
ଏହାପରେ ପ୍ରଧାନମନ୍ତ୍ରୀ ବିଦ୍ୟାଳୟମାନଙ୍କର ଅବହେଳିତ ପିଲାମାନଙ୍କୁ 3ଶହ କୋଟିତମ ଭୋଜନ ପ୍ରଦାନ କରିବେ । ପରେ ଏହି ଅବସରରେ ସେ ଏକ ସମ୍ମିଳନୀକୁ ସମ୍ବୋଧିତ କରିବେ ।
ଶ୍ରୀ ମୋଦୀ ମଧ୍ୟ ଇସ୍କନର ଆଚାର୍ଯ୍ୟ ଶ୍ରୀଳ ପ୍ରଭୁପାଦଙ୍କ ବିଗ୍ରହରେ ପୁଷ୍ପାଞ୍ଜଳି ଅର୍ପଣ କରିବେ ।
ପ୍ରତିଷ୍ଠାନ ଦ୍ୱାରା 3ଶହ କୋଟିତମ ମିଲ ପ୍ରଦାନକୁ ସ୍ମରଣୀୟ କରିବା ଅବସରରେ ଏହି କାର୍ଯ୍ୟକ୍ରମର ଆୟୋଜନ କରାଯାଉଛି ।
ଭିତ୍ତିଭୂମି:
ଅକ୍ଷୟ ପାତ୍ର ମଧ୍ୟାହ୍ନ ଭୋଜନ ଯୋଜନାର ଏକ ପରିଚାଳନାକାରୀ ଭାଗୀଦାର ଭାବେ କାର୍ଯ୍ୟ କରେ ।
ଏହାର 19 ବର୍ଷର ଯାତ୍ରା ମଧ୍ୟରେ ଅକ୍ଷୟ ପାତ୍ର ପ୍ରତିଷ୍ଠାନ 12ଟି ରାଜ୍ୟର 14,702 ବିଦ୍ୟାଳୟର 16.6 ଲକ୍ଷ ଛାତ୍ରଛାତ୍ରୀଙ୍କୁ ମଧ୍ୟାହ୍ନ ଭୋଜନ ପ୍ରଦାନ କରିଛି । 2016ରେ ଭାରତର ତତ୍କାଳୀନ ରାଷ୍ଟ୍ରପତି ପ୍ରଣବ ମୂଖାର୍ଜୀଙ୍କ ଉପସ୍ଥିତିରେ ଅକ୍ଷୟ ପାତ୍ର 2ଶହ କୋଟି ମିଲ ପ୍ରଦାନ କରାଯିବା ନେଇ ଏକ ସ୍ମାରକୀ କାର୍ଯ୍ୟକ୍ରମ ପାଳନ କରିଥିଲା ।
ଲକ୍ଷ ଲକ୍ଷ ପିଲାମାନଙ୍କୁ ଗୁଣାତ୍ମକ, ସ୍ୱାସ୍ଥ୍ୟକର ତଥା ପୃଷ୍ଟିକର ଖାଦ୍ୟ ପ୍ରଦାନ କରିବା ନେଇ ଏହି ପ୍ରତିଷ୍ଠାନ ମାନବ ସମ୍ବଳ ବିକାଶ ମନ୍ତ୍ରଣାଳୟ (ଏମଏଚଆରଡି) ଏବଂ ରାଜ୍ୟ ସରକାରମାନଙ୍କ ସହ ମିଶି କାର୍ଯ୍ୟ କରିଥାଏ ।
ମଧ୍ୟାହ୍ନ ଭୋଜନ ଯୋଜନାକୁ ବିଶ୍ୱରେ ଏପରି ଧରଣର ଏକ ବୃହତ୍ କାର୍ଯ୍ୟକ୍ରମ ଭାବେ ଗ୍ରହଣ କରାଯାଇଥାଏ । ଏହି କାର୍ଯ୍ୟକ୍ରମର ଲକ୍ଷ୍ୟ ହେଉଛି ବିଦ୍ୟାଳୟମାନଙ୍କରେ ନାମଲେଖା, ଉପସ୍ଥିତି ତଥା ପାଠ ପଢ଼ା ଜାରି ରଖିବା ନେଇ ପ୍ରୋତ୍ସାହନ ଏବଂ 6-14 ବର୍ଷ ବୟସ ବର୍ଗର ପିଲାମାନଙ୍କ ସ୍ୱାସ୍ଥ୍ୟାବସ୍ଥାରେ ଉନ୍ନତି ଆଣିବା ।
ନୂଆଦିଲ୍ଲୀରେ ‘Self4Society’ ଆପର ଶୁଭାରମ୍ଭ କରିବା ଅବସରରେ 2018 ଅକ୍ଟୋବର 24ରେ ପ୍ରଧାନମନ୍ତ୍ରୀ ଅକ୍ଷୟ ପାତ୍ର ପ୍ରତିଷ୍ଠାନ ସମ୍ବନ୍ଧରେ ପ୍ରକାଶ କରିଥିଲେ । ସେ କହିଥିଲେ ଯେ, “ଅକ୍ଷୟ ପାତ୍ର ହେଉଛି ଏକ ସାମାଜିକ ଷ୍ଟାର୍ଟ-ଅପ, ଯାହାକି ସ୍କୁଲ ପିଲାମାନଙ୍କୁ ଖାଦ୍ୟ ପ୍ରଦାନ କରିବା ନେଇ ଏକ ଆନ୍ଦୋଳନରେ ପରିଣତ ହୋଇଛି ।”
