ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଏକାଦଶ ବ୍ରିକ୍ସ ଶିଖର ସମ୍ମିଳନୀ ପୂର୍ବରୁ ବ୍ରାସିଲିଆଠାରେ ନଭେମ୍ବର 13, 2019ରେ ଚୀନ ରାଷ୍ଟ୍ରପତି ମିଷ୍ଟର ସି ଜିନପିଙ୍ଗଙ୍କୁ ଭେଟିଛନ୍ତି ।
ଚେନ୍ନାଇଠାରେ ଦ୍ୱିତୀୟ ଅନୌପଚାରିକ ବୈଠକରେ ତାଙ୍କୁ ଆତିଥ୍ୟ ପ୍ରଦାନ କରିଥିବାରୁ ଚୀନ ରାଷ୍ଟ୍ରପତି ସି ଜିନପିଙ୍ଗ ପ୍ରଧାନମନ୍ତ୍ରୀଙ୍କୁ ପ୍ରଶଂସା କରିଥିଲେ ଏବଂ କହିଥିଲେ ଯେ ସେ ପ୍ରଧାନମନ୍ତ୍ରୀ ମୋଦୀ ଓ ଭାରତର ଜନସାଧାରଣଙ୍କ ଭବ୍ୟ ସ୍ୱାଗତକୁ କେବେ ବି ଭୁଲି ପାରିବେ ନାହିଁ । ସେ 2020ରେ ଚୀନରେ ଅନୁଷ୍ଠିତ ହେବାକୁ ଥିବା ତୃତୀୟ ଅନୌପଚାରିକ ଶିଖର ସମ୍ମିଳନୀ ପାଇଁ ପ୍ରଧାନମନ୍ତ୍ରୀ ମୋଦୀଙ୍କୁ ନିମନ୍ତ୍ରଣ କରିଥିଲେ । ଏଥିପାଇଁ ସ୍ଥାନ ଓ ତାରିଖ କୁଟନୈତିକ ମାଧ୍ୟମରେ ସ୍ଥିର କରାଯିବ ।
ଚୀନ ରାଷ୍ଟ୍ରପତି ଓ ପ୍ରଧାନମନ୍ତ୍ରୀ ମୋଦୀ ବ୍ୟବସାୟ ଓ ନିବେଶ ପ୍ରସଙ୍ଗରେ ସମ୍ପର୍କ ଜାରି ରଖିବାର ମହତ୍ୱ ଉପରେ ସହମତି ପ୍ରକାଶ କରିଥିଲେ । ସାଙ୍ଘାଇଠାରେ ଚୀନର ରପ୍ତାନୀ-ଆମଦାନୀ ପ୍ରଦର୍ଶନୀରେ ଭାରତର ଅଂଶଗ୍ରହଣ ଲାଗି ରାଷ୍ଟ୍ରପତି ସି ଜିନପିଙ୍ଗ ପ୍ରଧାନମନ୍ତ୍ରୀ ମୋଦୀଙ୍କୁ ଧନ୍ୟବାଦ ଦେଇଥିଲେ । ଦୁଇ ନେତା ବ୍ୟବସାୟ ଓ ଅର୍ଥବ୍ୟବସ୍ଥାକୁ ନେଇ ନୂତନ ଉଚ୍ଚସ୍ତରୀୟ ବ୍ୟବସ୍ଥା ଶୀଘ୍ର ବିକଶିତ କରିବା ନେଇ ସହମତି ପ୍ରକାଶ କରିଥିଲେ ।
ଆଗାମୀ ବର୍ଷ ଦୁଇ ଦେଶ ମଧ୍ୟରେ କୂଟନୈତିକ ସମ୍ପର୍କର 70ତମ ବାର୍ଷିକୀ ପାଳନର ପ୍ରସ୍ତୁତିକୁ ନେଇ ଉଭୟ ନେତା ସମୀକ୍ଷା କରିଥିଲେ । ଉଭୟ ନେତା କହିଲେ ଯେ ଏହାଦ୍ୱାରା ଜନସାଧାରଣଙ୍କ ମଧ୍ୟରେ ସମ୍ବନ୍ଧ ଆହୁରି ସୁଦୃଢ଼ ହେବ ।
ଦୁଇ ନେତା କହିଲେ ଯେ ସୀମା ସହ ଜଡିତ ବିଷୟରେ ସ୍ଵତନ୍ତ୍ର ପ୍ରତିନିଧିମାନଙ୍କ ଆଉ ଏକ ବୈଠକ ହେବ । ଉଭୟ ନେତା ସୀମା କ୍ଷେତ୍ରରେ ଶାନ୍ତି ଓ ସୁରକ୍ଷା ବଜାୟ ରଖିବାର ମହତ୍ୱ ଉପରେ ଗୁରୁତ୍ୱ ପ୍ରଦାନ କରିଥିଲେ ।
ରାଷ୍ଟ୍ରପତି ସି ଜିନପିଙ୍ଗ ଓ ପ୍ରଧାନମନ୍ତ୍ରୀ ମୋଦୀ ଡବ୍ଲୁଟିଓ, ବ୍ରିକ୍ସ ଓ ଆରସିଇପି ଭଳି ବହୁପକ୍ଷୀୟ ବିଷୟରେ ବିଚାର ଆଦାନ ପ୍ରଦାନ କରିଥିଲେ ।
Fruitful meeting between PM @narendramodi and President Xi Jinping on the sidelines on the BRICS Summit in Brazil. Trade and investment were among the key issues both leaders talked about. pic.twitter.com/y2rYqkzOe0
— PMO India (@PMOIndia) November 13, 2019
