ନମସ୍ତେ-ସିଙ୍ଗାପୁର!
ଶୁଭ ସନ୍ଧ୍ୟା
ନୀ ହାଓ
ସଲାମତ ଦତାଙ୍ଗ
ୱଣକମ
ମନ୍ତ୍ରୀ ଈଶ୍ୱରନ
ବ୍ୟବସାୟୀ ମଣ୍ଡଳୀ,
ମୋର ସିଙ୍ଗାପୁରବାସୀ ବନ୍ଧୁଗଣ,
ସିଙ୍ଗାପୁରର ପ୍ରବାସୀ ଭାରତୀୟ ସଦସ୍ୟଗଣ
ସମସ୍ତଙ୍କୁ ନମସ୍କାର !
ଆଜି ଏହି ଚମତ୍କାର ସମାରୋହରେ, ଆମେ ଭାରତ ଏବଂ ସିଙ୍ଗାପୁର ମଧ୍ୟରେ ସମ୍ପର୍କର ଶକ୍ତିକୁ ଦେଖିପାରୁଛୁ । ଏହା ଆମ ଐତିହ୍ୟ; ଆମ ଲୋକ ଏବଂ ଆମ ସମୟର ଶ୍ରେଷ୍ଠ ଭାଗିଦାରୀ । ଏହା ଦୁଇଟି ସିଂହଙ୍କ କୃପା, ମହିମା ଏବଂ ଗର୍ଜନର ସମୟ । ସିଙ୍ଗାପୁର ଆସିବା ସବୁବେଳେ ଆନନ୍ଦଦାୟକ । ଏହି ସହର ସବୁବେଳେ ପ୍ରେରଣା ଯୋଗାଇଥାଏ । ସିଙ୍ଗାପୁର ହୁଏତ’ ଛୋଟ ଦ୍ୱୀପ ହୋଇପାରେ, କିନ୍ତୁ ଏହାର ଛାପ ସାରା ବିଶ୍ୱରେ ରହିଛି । ଏହି ମହାନ ଦେଶ ଆମକୁ ଶିକ୍ଷା ଦେଇଛି ଯେ ଉଚ୍ଚସ୍ତରର ଉପଲବ୍ଧୀ ହାସଲ କରିବା ଏବଂ ବିଶ୍ୱସ୍ତରରେ ଦୃଢ଼ତାର ସହ ସ୍ୱର ଉତ୍ତୋଳନ କରିବାରେ ସୀମାର ଆକାର ବାଧକ ସାଜିନଥାଏ ।
କିନ୍ତୁ, ସିଙ୍ଗାପୁରର ସଫଳତା ଏହାର ବହୁପକ୍ଷୀୟ ସଂସ୍କୃତିର ସୌହାର୍ଦ୍ଦ୍ୟ, ଏହାର ବିବିଧତାର ସମାରୋହ, ଯାହା ଏକ ଉକ୍ରୃଷ୍ଟ ଏବଂ ଅଭିନବ ସିଙ୍ଗାପୁରୀୟ ପରିଚୟ ମଧ୍ୟରେ ରହିଛି । ଏବଂ, ଏହି ଚମତ୍କାର ମିଶ୍ରଣରେ, ଏକ ପ୍ରାଚୀନ ଛାପ ରହିଛି, ସୁନ୍ଦର ଏବଂ ରଙ୍ଗୀନ ଯାହା ଭାରତ ଏବଂ ସିଙ୍ଗାପୁରକୁ ପରସ୍ପର ସହ ବାନ୍ଧିଛି ।
ବନ୍ଧୁଗଣ,
ଭାରତର ଶତାବ୍ଦୀ ବର୍ଷ ପୁରୁଣା ଦକ୍ଷିଣ ପୂର୍ବ ଏସିଆ ଗସ୍ତ ସିଙ୍ଗାପୁର ଦେଇ ଗତି କରୁଛି । ମାନବୀୟ ସମ୍ପର୍କ ଗଭୀର ଏବଂ ସ୍ଥାୟୀ । ଏହା ସିଙ୍ଗପୁରୀୟ ଭାରତୀୟଙ୍କ ମଧ୍ୟରେ ରହିଛି । ଏବଂ, ଏହି ସନ୍ଧ୍ୟା ଆପଣମାନଙ୍କ ଉପସ୍ଥିତି, ଆପଣଙ୍କ ଉତ୍ସାହ, ଆପଣମାନଙ୍କ ପ୍ରତିଭା ଏବଂ ଆପଣମାନଙ୍କ ଉପଲବ୍ଧୀରେ ଆଲୋକିତ ହୋଇଛି ।
ଆପଣମାନେ ଏଠାରେ ଇତିହାସର ପ୍ରଭାବ କିମ୍ବା ଜଗତୀକରଣର ସୁଯୋଗ ଦ୍ୱାରା ରହିପାରନ୍ତି; ଆପଣମାନଙ୍କ ପୂର୍ବଜମାନେ ଅନେକ ପିଢ଼ି ପୂର୍ବରୁ ଏଠାକୁ ଆସିଥାଇପାରନ୍ତି କିମ୍ବା ଆପଣ ଚଳିତ ଶତାବ୍ଦୀରେ ଏଠାକୁ ଆସିଥାଇପାରନ୍ତି, ଆପଣମାନଙ୍କ ମଧ୍ୟରୁ ପ୍ରତ୍ୟେକ ସିଙ୍ଗାପୁରର ଅଭିନବ ରଚନା ଏବଂ ଏହାର ପ୍ରଗତିର ଅଂଶବିଶେଷ ହୋଇପାରିଛନ୍ତି ।
ପ୍ରତିବଦଳରେ ସିଙ୍ଗାପୁର ଆପଣଙ୍କୁ, ଆପଣଙ୍କ ପ୍ରତିଭାକୁ ଏବଂ ଆପଣଙ୍କ କଠିନ ପରିଶ୍ରମକୁ ଆଲିଙ୍ଗନ କରିଛି । ଏଠାରେ ସିଙ୍ଗାପୁରରେ, ଆପଣ ଭାରତର ବିବିଧତାକୁ ପ୍ରତିନିଧିତ୍ୱ କରୁଛନ୍ତି । ଯଦି ଆପଣ ଭାରତର ସବୁ ପର୍ବପର୍ବାଣୀ ଗୋଟିଏ ସହରରେ ଦେଖିବାକୁ ଚାହୁଁଛନ୍ତି କିମ୍ବା ସପ୍ତାହବ୍ୟାପୀ ସେଗୁଡ଼ିକୁ ଉପଭୋଗ କରିବାକୁ ଚାହୁଁଛନ୍ତି, ତା’ହେଲେ ସିଙ୍ଗାପୁର ଆସନ୍ତୁ ।
ତାହା ମଧ୍ୟ ଏବେ ଭାରତୀୟ ଖାଦ୍ୟ କ୍ଷେତ୍ରରେ ସମ୍ପୂର୍ଣ୍ଣ ସତ୍ୟ! ମୋର ଠିକ ମନେ ଅଛି ଏଠାକାର ‘ଛୋଟ ଭାରତ’ରେ ପ୍ରଧାନମନ୍ତ୍ରୀ ଲି ମୋ ଲାଗି ଆୟୋଜନ କରିଥିବା ସାନ୍ଧ୍ୟ ଭୋଜନ ।
ତାମିଲ ଏଠାକାର ସରକାରୀ ଭାଷା । କିନ୍ତୁ, ଏହା ସିଙ୍ଗାପୁରର ଉତ୍ସାହର ପ୍ରମାଣ ଯେ ଏଠାକାର ସ୍କୁଲ ଛାତ୍ରଛାତ୍ରୀମାନେ 5ଟି ଭାରତୀୟ ଭାଷାରେ ଶିକ୍ଷା ଲାଭ କରିପାରୁଛନ୍ତି । ସହରରେ ଉତ୍କୃଷ୍ଟ ଭାରତୀୟ ସଂସ୍କୃତି ପ୍ରସ୍ଫୁଟିତ ହେଉଛି । ସିଙ୍ଗାପୁର ସରକାରଙ୍କ ସହଯୋଗରେ ପ୍ରତିଭାସମ୍ପନ୍ନ ପ୍ରବାସୀ ଭାରତୀୟଙ୍କ ଯୋଗୁ ଏହା ବହୁମତେ ସଫଳ ହୋଇପାରୁଛି ।
ଏଠାରେ ସିଙ୍ଗାପୁରରେ ଆପଣମାନେ ପାରମ୍ପରିକ ଭାରତୀୟ କ୍ରୀଡ଼ା ପୂର୍ଣ୍ଣ ପ୍ରତିଦ୍ୱନ୍ଦ୍ୱିତାର ସହ ଆୟୋଜନ କରୁଛନ୍ତି । ଏହାଆପଣଙ୍କ କିଶୋରାବସ୍ଥା କଥା ମନେ ପକାଇଦେଉଛି ଏବଂ ପିଲାମାନଙ୍କୁ ଖୋ ଖୋ ଏବଂ କବାଡି ସହ ଯୋଡ଼ି ହେବା ପାଇଁ ସମର୍ଥ କରୁଛି ।
ଏବଂ, 2017ରେ ଅନ୍ତର୍ଜାତୀୟ ଯୋଗ ଦିବସ ସହରର 70ଟି କେନ୍ଦ୍ରରେ ଆୟୋଜନ କରାଯାଇଥିଲା । ପ୍ରତି 10 କିଲୋମିଟର ମଧ୍ୟରେ ଗୋଟିଏ କେନ୍ଦ୍ର ନିର୍ମାଣ କରାଯାଇଥିଲା ।
ବିଶ୍ୱର ଅନ୍ୟ କୌଣସି ସହରରେ ଏତେ ଉତ୍ସାହର ସହିତ ଯୋଗ ଦିବସ ପାଳନ କରାଯାଇଥିଲା । ଶ୍ରୀରାମକୃଷ୍ଣ ମିଶନ ଏବଂ ଶ୍ରୀ ନାରାୟଣ ମିଶନ ଭଳି ଅନୁଷ୍ଠାନ ଏଠାରେ ଦଶନ୍ଧି ଧରି କାର୍ଯ୍ୟ କରି ଆସୁଛନ୍ତି । ସମାଜ ପ୍ରତି ସେମାନଙ୍କ ସେବା, ପ୍ରତ୍ୟେକ ବର୍ଗର ଲୋକଙ୍କୁ, ଭାରତ ଓ ସିଙ୍ଗାପୁରର ମୂଲ୍ୟବୋଧ ମୂଲ୍ୟବୋଧକୁ ପ୍ରତିଫଳିତ କରିଥାଏ ।
ସିଙ୍ଗାପୁର ଏବଂ ଏହି ଅଂଚଳକୁ ସେମାନଙ୍କ ଯାତ୍ରା କାଳରେ ସ୍ୱାମୀ ବିବେକାନନ୍ଦ ଏବଂ ବିଶ୍ୱ କବି ଗୁରୁଦେବ ରବୀନ୍ଦ୍ର ନାଥ ଟାଗୋର ଭାରତ ଏବଂ ପ୍ରାଚ୍ୟକୁ ଯୋଡ଼ୁଥିବା ସମ୍ପର୍କର ରଜ୍ଜୁ ସନ୍ଧାନ କରିପାରିଥିଲେ । ସିଙ୍ଗାପୁର ମାଟିରୁ ନେତାଜୀ ସୁଭାଷ ଚନ୍ଦ୍ର ବୋଷ ଭାରତର ସ୍ୱାଧୀନତା ପାଇଁ – ଦିଲ୍ଲୀ ଚଲୋ- ଆହ୍ୱାନ ଦେଇଥିଲେ ଯାହା ପ୍ରତ୍ୟେକ ଭାରତୀୟଙ୍କ ହୃଦୟରେ ସ୍ୱାଧୀନତାର ବହ୍ନି ଜାଳିଥିଲା ।
ଏହି ସ୍ଥାନରୁ କିଛି ଦୂରରେ ଥିବା ଉପକୂଳ କ୍ଲିଫର୍ଡ ପିରରେ ମହାତ୍ମା ଗାନ୍ଧୀଙ୍କ ଚିତାଭସ୍ମର କିଛି ଅଂଶ 1948ରେ ଏଠାରେ ଭସାଯାଇଥିଲା । ଏହି କାର୍ଯ୍ୟକ୍ରମରେ ସମାଜର ବିଭିନ୍ନ ବର୍ଗର ଲୋକମାନେ ଯୋଗ ଦେଇଥିଲେ । ଚିତାଭସ୍ମ ଭସାଯିବା ସମୟରେ ଏକ ବିମାନ ଗୋଲାପ ପାଖୁଡ଼ା ବୁଣିଥିଲା । ଲୋକମାନେ ସେହି ପାଣିକୁ ପାଦୁକ ଭଳି ପାଇଥିଲେ ।
ଆମ ଇତିହାସର ସେହି ସ୍ମରଣୀୟ ମୁହୂର୍ତ୍ତକୁ ମନେ ପକାଇବା ଲାଗି ଗୋଟିଏ ଦିନ ପରେ ମୁଁ କ୍ଲିଫଡ ପିଅର ଠାରେ ଏକ ଫଳକୁ ଉନ୍ମୋଚନ କରିବି । ଏହି ମୁହୂର୍ତ୍ତ ଯାହା ଆଜି ବି ମହାତ୍ମା ଗାନ୍ଧୀଙ୍କ ସାମଗ୍ରୀକ ଏବଂ ସର୍ବକାଳୀନ ମୂଲ୍ୟବୋଧକୁ ଆଲୋକପାତ କରିଥାଏ ।
ବନ୍ଧୁଗଣ,
ଅସାଧାରଣ ଐତିହ୍ୟ, ଆମ ମାନବୀୟ ସମ୍ପର୍କର ସମ୍ପତ୍ତି ଏବଂ ଆମ ସହଭାଗୀ ମୂଲ୍ୟବୋଧର ଦୃଢ଼ତାର ମୂଳଦୁଆ ଉପରେ ଭାରତ ଏବଂ ସିଙ୍ଗାପୁର ଆମ ସମୟର ସହଭାଗୀତା ଗଠନ କରୁଛନ୍ତି । ଏହା ଏକ ସମ୍ପର୍କ ଯାହା ରଣନୈତିକ ଭାଗିଦାରୀକୁ ମୁକାବିଲା କରୁଛି ।
ଯେତେବେଳେ ଭାରତ ବିଶ୍ୱ ଆଡ଼କୁ ଉନ୍ମୁଖ ହେଉଛି ଏବଂ ପୂର୍ବ ଆଡ଼କୁ ଚାହୁଁଛି, ସିଙ୍ଗାପୁର ଏକ ଭାଗିଦାର ଏବଂ ଭାରତ ଓ ଆସିଆନ ମଧ୍ୟରେ ଏକ ସେତୁ ହୋଇ ଛିଡ଼ା ହେଉଛି । ଭାରତ ଓ ସିଙ୍ଗାପୁର ମଧ୍ୟରେ ରାଜନୈତିକ ସମ୍ପର୍କ ଉଦାର ଏବଂ ନିବିଡ଼ । ସେଠାରେ କୌଣସି ପ୍ରତିଦ୍ୱନ୍ଦ୍ୱିତା କିମ୍ବା ଦାବି ଏବଂ ସନ୍ଦେହ ନାହିଁ ।
ଏହା ଏକ ମିଳିତ ସଂକଳ୍ପର ପ୍ରାକୃତିକ ଭାଗିଦାରୀ । ଆମର ପ୍ରତିରକ୍ଷା ସମ୍ପର୍କ ଉଭୟଙ୍କ ପାଇଁ ବେଶ ସୁଦୃଢ଼ । ମୋର ସେନା ବାହିନୀ ସିଙ୍ଗାପୁରର ସେନାବାହିନୀ ପ୍ରତି ଅତ୍ୟଧିକ ସମ୍ମାନ ଏବଂ ପ୍ରଶଂସା କରିଥାଏ । ଭାରତ ସିଙ୍ଗାପୁର ସହିତ ସବୁଠୁ ଲମ୍ବା ନୌସେନା ଅଭ୍ୟାସ କରିଥାଏ ।
ସେମାନେ ଏବେ ରୌପ୍ୟ ଜୟନ୍ତୀ ପାଳନ କରୁଛନ୍ତି । ଆମେ ଭାରତରେ ତାଲିମ ପାଇଁ ସିଙ୍ଗାପୁର ସ୍ଥଳ ସେନା ଏବଂ ବାୟୁସେନାକୁ ସଗର୍ବେ ସ୍ୱାଗତ କରୁଛୁ । ଆମର ଜାହାଜଗୁଡ଼ିକ ନିରନ୍ତର ଭାବେ ପରସ୍ପରର କ୍ଷେତ୍ରକୁ ଗସ୍ତ କରିଥାନ୍ତି ।
ଆମର ନୌସେନା ଜାହାଜରେ ଆପଣମାନଙ୍କ ମଧ୍ୟରୁ ଅଧିକାଂଶ ଥାଆନ୍ତି । ମୁଁ, ମଧ୍ୟ ସିଙ୍ଗାପୁର ନୌସେନା ଜାହାଜ ଏବଂ ଗୋଟିଏ ଦିନ ପରେ ଚାଙ୍ଗୀ ନୌସେନା ବେସଠାରେ ଥିବା ଭାରତୀୟ ନୌସେନାର ଜାହାଜ ପରିଦର୍ଶନ କରିବାକୁ ଆଗ୍ରହୀ ।
ଆଇନ ଆଧାରିତ ବ୍ୟବସ୍ଥା, ସବୁ ରାଷ୍ଟ୍ର ପାଇଁ ସାର୍ବଭୌମ ସମାନତା ଏବଂ ମୁକ୍ତ ଓ ଖୋଲା ବାଣିଜ୍ୟ ମାର୍ଗ ଏବଂ ବିନିମୟ ଲାଗି ଅନ୍ତର୍ଜାତୀୟ ମଞ୍ଚରେ ଆମେ ଏକା ସ୍ୱରରେ କଥା ହୋଇଥାଉ । ଆମ ସମ୍ପର୍କର ହୃତସ୍ପନ୍ଦନ ହେଉଛି ଅର୍ଥବ୍ୟବସ୍ଥା ।
ଭାରତର ବିଶ୍ୱ ସମ୍ପର୍କରେ ଆମର ଭାଗିଦାରୀ ପ୍ରଥମ ଧାଡ଼ିରେ ରହିଛି । ସିଙ୍ଗାପୁର ଭାରତ ପାଇଁ ଉଭ ନିବେଶର ଉତ୍ସ ଏବଂ ଲକ୍ଷ୍ୟସ୍ଥଳୀ । ସିଙ୍ଗାପୁର ପ୍ରଥମ ଦେଶ ଯାହା ସହିତ ଆମେ ବିସ୍ତୃତ ଅର୍ଥନୈତିକ ସହଯୋଗ ଚୁକ୍ତି ସ୍ୱାକ୍ଷର କରିଛୁ ।
ଉଭୟ ପକ୍ଷରୁ ପାଖାପାଖି 25ଟି ବିମାନ ପ୍ରତି ସପ୍ତାହରେ ସିଙ୍ଗାପୁରକୁ 16ଟି ଭାରତୀୟ ସହର ସହିତ ଯୋଡ଼ିତାଏ । ଏବଂ ଏହା ଆଗକୁ ବୃଦ୍ଧି ପାଇବାର ସମ୍ଭାବନା ମଧ୍ୟ ରହିଛି । ସିଙ୍ଗାପୁରକୁ ଭାରତରୁ ତୃତୀୟ ସର୍ବାଧିକ ପର୍ଯ୍ୟଟକ ଆସିଥାନ୍ତି ଏବଂ ଏହା ଦ୍ରୁତ ଗତିରେ ବୃଦ୍ଧି ପାଉଛି । ଆମର ଆଇଟି କମ୍ପାନୀଗୁଡ଼ିକ ସିଙ୍ଗାପୁରକୁ ସ୍ମାର୍ଟ ଏବଂ ପ୍ରତିଦ୍ୱନ୍ଦ୍ୱିତାମୂଳକ ରହିବାରେ ସହାୟକ ହେଉଛନ୍ତି ।
ଭାରତର ବିକାଶ ପ୍ରାଥମିକତା ମଧ୍ୟରେ ବହୁ କ୍ଷେତ୍ର : ସ୍ପାର୍ଟ ସିଟି, ଅର୍ବାନ ସଲ୍ୟୁସନ, ଆର୍ଥିକ କ୍ଷେତ୍ର, ଦକ୍ଷତା ବିକାଶ, ବନ୍ଦର, ଲଜିଷ୍ଟିକ୍ସ, ବିମାନ ଚଳାଚଳ, ଏବଂ ଶିଳ୍ପ ପାର୍କରେ ସିଙ୍ଗାପୁର ଏକ ଗୁରୁତ୍ୱପୂର୍ଣ୍ଣ ଭାଗିଦାର ।
ତେଣୁ ଭାରଗ ଏବଂ ସିଙ୍ଗାପୁର ପରସ୍ପରର ସମୃଦ୍ଧିରେ ଯୋଗଦାନ କରୁଛନ୍ତି । ଏବଂ ବର୍ତ୍ତମାନ ଆମେ ଏକ ଡିଜିଟାଲ ବିଶ୍ୱ ପାଇଁ ନୂଆ ଭାଗିଦାରୀ ଗଢ଼ୁଛୁ । ପ୍ରଧାନମନ୍ତ୍ରୀ ଲି ଏବଂ ମୁଁ ଏଇ ନିକଟରେ ପ୍ରଯୁକ୍ତି, ନବସୃଜନ ଏବଂ ଉଦ୍ୟୋଗୀତାର ଏକ ଚମକ୍ରାର ପ୍ରଦର୍ଶନୀ ପରିଭ୍ରମଣ କଲୁ । ଏହା ଭାରତ ଏବଂ ସିଙ୍ଗାପୁରର ଉଜ୍ଜ୍ୱଳ ଯୁବକମାନଙ୍କ ଦ୍ୱାରା ପ୍ରଦର୍ଶିତ ହୋଇଥିଲା ।
ଏମାନଙ୍କ ମଧ୍ୟରୁ ଅଧିକାଂଶ ଭାରତୀୟ ପ୍ରତିଭା ଯେଉଁମାନେ ସିଙ୍ଗାପୁରକୁ ସେମାନଙ୍କ ଘର ଭଳି ଆପଣେଇ ନେଇଛନ୍ତି । ଏମାନେ ଭାରତ, ସିଙ୍ଗାପୁର ଏବଂ ଆସିଆନ ସେତୁ ଭାବେ କାର୍ଯ୍ୟ କରୁଛନ୍ତି । କିଛି ସମୟ ଆଗରୁ ଆମେ ରୂପେ, ଭୀମ ଏବଂ ୟୁପିଆଇକୁ ଅନ୍ତର୍ଜାତୀୟ ସ୍ତରରେ ଶୁଭାରମ୍ଭ କରିଛୁ ।
ସିଙ୍ଗାପୁରରେ ଏହା ମିଳିତ ଭାବେ ଶୁଭାରମ୍ଭ ହେବା ସ୍ୱାଭାବିକ କଥା । ମିଳିତ ଭାବେ ଆମେ ମୋବାଇଲ ଏବଂ ଡିଜିଟାଲ ପ୍ରଯୁକ୍ତିର ଶକ୍ତିକୁ ପ୍ରଶାସନ ଏବଂ ସାମଗ୍ରୀକତା ଭାବେ ବ୍ୟବହାର କରିବୁ । ମିଳିତ ଭାବେ, ଆମେ ନୂଆ ସମୟର ମହାନ ଅର୍ଥନୈତିକ ଭାଗୀଦାର ନିର୍ମାଣ କରିପାରିବୁ ।
ସିଙ୍ଗାପୁର ନିଜ ପାଇଁ ଏକ ନୂତନ ଭବିଷ୍ୟତ ନିର୍ମାଣ କରୁଥିବାରୁ ଭାରତ ଏକ ନୂତନ ବିଶ୍ୱ ସମ୍ଭାବନାର ଦେଶ ଭାବେ ଉଭା ହେଉଛି । ବସ୍ତୁ ଓ ସେବା କର ଭଳି ଗଭୀର ମୌଳିକ ସଂସ୍କାରର ଗୋଟିଏ ବର୍ଷ ମଧ୍ୟରେ ଆମେ ବିଶ୍ୱର ଦ୍ରୁତ ଅଭିବୃଦ୍ଧିଶୀଳ ଅର୍ଥବ୍ୟବସ୍ଥା ହୋଇପାରିଛୁ ।
ଆମେ ମାର୍ଗରେ ରହିବାକୁ ଚାହୁଁଛୁ । ଆମ ଅର୍ଥବ୍ୟବସ୍ଥା ଆହୁରି ଅଧିକ ସ୍ଥିର ହୋଇଛି । ବିତ୍ତୀୟ ନିଅଣ୍ଟ ନିମ୍ନଗାମୀ ହୋଇଛି । ମୁଦ୍ରାସ୍ଫିତୀ ହାର ନିମ୍ନଗାମୀ ହୋଇଛି । ଚଳନ୍ତି ଖାତା ନିଅଣ୍ଟ ସ୍ୱାଭାବିକ ସ୍ଥିତିରେ ରହିଛି । ମୁଦ୍ରା ହାର ସ୍ଥିର ରହିଛି । ଏବଂ ବୈଦେଶିକ ବିନିମୟ ଭଣ୍ଡାର ରେକର୍ଡ ଉଚ୍ଚସ୍ତରରେ ପହଁଚିଛି ।
ଭାରତର ବର୍ତ୍ତମାନ ଦ୍ରୁତ ଗତିରେ ବଦଳି ଚାଲିଛି । ଏକ ନୂତନ ଭାରତ ଗଠନ ହେଉଛି । ଏବଂ ଏହା ପଛରେ ଅନେକ କାରଣ ରହିଛି । ପ୍ରଥମତଃ ଦ୍ରୁତ ଗତିରେ ଏବଂ ଉଚ୍ଚସ୍ତରରେ ଅର୍ଥନୈତିକ ସଂସ୍କାର ହୋଇଚାଲିଛି । ଗତ ଦୁଇ ବର୍ଷ ମଧ୍ୟରେ କେନ୍ଦ୍ର ଓ ରାଜ୍ୟ ସରକାରଙ୍କ ଦ୍ୱାରା ନିଆଯାଇଥିବା 10 ହଜାରରୁ ଊଦ୍ଧ୍ୱର୍ ପଦକ୍ଷେପ ଆମକୁ ବ୍ୟବସାୟିକ ସୁଗମତା ତାଲିକାରେ 42ଟି ସ୍ଥାନ ଉପରକୁ ଉଠିବାରେ ସହାୟକ ହୋଇଛି ।
14ଶହରୁ ଅଧିକ ପୁରୁଣା ଆଇନ ଉଚ୍ଛେଦ କରାଯାଇଛି । ଭାରତ ବିଶ୍ୱର ସବୁଠୁ ମୁକ୍ତ ଅର୍ଥବ୍ୟବସ୍ଥା ମଧ୍ୟରେ ପରିଗଣିତ ହେଉଛି । ବିଦେଶୀ ନିବେଶକମାନେ ପାଖାପାଖି ସବୁ କ୍ଷେତ୍ରରେ ନିବେଶ କରିପାରିବେ, 100% ପାଖାପାଖି ଇକୁ୍ୟଟି ହାସଲ କରିପାରିବେ । ପ୍ରକୃତରେ, ଭାରତରେ 90%ରୁ ଅଧିକ ନିବେଶ ଏହି ମାର୍ଗ ଦେଇ ହେଉଛି ।
ଦ୍ୱିତୀୟତଃ, ଟିକସ ବ୍ୟବସ୍ଥା ପରିବର୍ତ୍ତିତ ହୋଇଛି : ନିମ୍ନ ଟିକସ ଦର, ବର୍ଦ୍ଧିତ ସ୍ଥିରତା, ଦ୍ରୁତ ଟିକସ ବିବାଦ ସମାଧାନ ଏବଂ ବୈଦ୍ୟୁତିକ ଦାଖଲ ବ୍ୟବସ୍ଥା କାର୍ଯ୍ୟକାରୀ ହୋଇଛି । ବସ୍ତୁ ଓ ସେବା କର ସ୍ୱାଧୀନତା ପରବର୍ତ୍ତୀ ସମୟର ସବୁଠୁ ବଡ଼ ସଂସ୍କାର । ଏହା ଦେଶକୁ ଗୋଟିଏ ବଜାରରେ ପରିଣତ କରିଛି ଏବଂ ଟିକସ ଆଧାରକୁ ବଢ଼ାଇଛି ।
ଏହା ଏକ ସହଜ କାର୍ଯ୍ୟ ନଥିଲା । କିନ୍ତୁ, ଏହା ସଫଳତାପୂର୍ବକ ସମ୍ପାଦନ ହୋଇଥିଲା । ଏବଂ, ଏହା ନୂଆ ଅର୍ଥନୈତିକ ସୁଯୋଗ ସୃଷ୍ଟି କଲା । ଆମର ବ୍ୟକ୍ତିଗତ ଆୟକର ଆଧାର ପାଖାପାଖି 20 ମିଲିୟନକୁ ସମ୍ପ୍ରସାରିତ ହୋଇଛି ।
ତୃତୀୟତଃ, ଆମ ଭିତ୍ତିଭୂମି କ୍ଷେତ୍ର ରେକର୍ଡ ଦ୍ରୁତ ଗତିରେ ବୃଦ୍ଧି ପାଇଛି । ଗତବର୍ଷ, ଆମେ 10 ହଜାର କିଲୋମିଟର ଜାତୀୟ ରାଜପଥ ନିର୍ମାଣ କରିଛୁ । ଏହା ଦୈନିକ 27 କିଲୋମିଟର ଗତିରେ ନିର୍ମାଣ ହୋଇଛି । ଏହି ଗତି ଗତ କିଛିବର୍ଷ ତୁଳନାରେ ଦୁଇ ଗୁଣା ବୃଦ୍ଧି ପାଇଛି ।
ରେଳ ଲାଇନ ନିର୍ମାଣର ଗତି ମଧ୍ୟ ଦୁଇଗୁଣା ହୋଇଛି । ବିଭିନ୍ନ ସହରରେ ମେଟ୍ରୋ ରେଳ ନିର୍ମାଣ ହୋଇଛି, 7ଟି ଦ୍ରୁତ ରେଳ ପ୍ରକଳ୍ପ, ସମର୍ପିତ ମାଲ କରିଡର ଏବଂ 400 ରେଳ ଷ୍ଟେସନର ଆଧୁନିକୀକରଣର ରେଳ ପ୍ରକଳ୍ପକୁ ରୂପାନ୍ତରିତ କରିଛି ।
ଅନ୍ୟ ପ୍ରକଳ୍ପ ମଧ୍ୟରେ ରହିଛି 10ଟି ଗ୍ରୀନ ଫିଲ୍ଡ ବିମାନ ବନ୍ଦର; 5ଟି ବୃହତ ବନ୍ଦର; 111 ନଦୀକୁ ଜାତୀୟ ଜଳ ପଥ ଭାବେ ମାନ୍ୟତା; ଏବଂ 30ରୁ ଉର୍ଦ୍ଧ୍ଵ ଲଜିଷ୍ଟିକ୍ସ ପାର୍କ ନିର୍ମାଣ କରାଯାଇଛି । ମାତ୍ର ତିନି ବର୍ଷରେ ଆମେ 80 ହଜାର ମେଗାୱାଟ ଶକ୍ତି ଯୋଗ କରିପାରିଛୁ ।
ଏବଂ ନବୀକରଣଯୋଗ୍ୟ ଶକ୍ତି କ୍ଷେତ୍ରରେ, ଆମେ ଷଷ୍ଠ ବୃହତ ବିଦ୍ୟୁତଶକ୍ତି ଉତ୍ପାଦକ ହୋଇପାରିଛୁ । ଏହା ସବୁଜ ଏବଂ ନିରନ୍ତର ଭବିଷ୍ୟତ ଦିଗରେ ଆମର ପ୍ରତିବଦ୍ଧତା । ଖୁବ, ସହଜରେ ବିଶ୍ୱର ସର୍ବବୃହତ ଭିତ୍ତିଭୂମି କାହାଣୀ ଭାରତରେ ରୂପ ନେଉଛି ।
ଚତୁର୍ଥତଃ, ଆମର ବିନିର୍ମାଣ କ୍ଷେତ୍ର ପୁନଃସକ୍ରିୟ ହୋଇଛି । ଗତ ତିନି ବର୍ଷ ମଧ୍ୟରେ ଏଫଡିଆଇ ପରିମାଣ ଅଧିକ ମାତ୍ରାରେ ବୃଦ୍ଧି ପାଇଛି । ଏହା 2013-14ରେ 36 ବିଲିୟନ ଆମେରିକୀୟ ଡଲାର ଥିବା ବେଳେ 2016-17ରେ ଏହା 60 ବିଲିୟନ ଆମେରିକୀୟ ଡଲାରରେ ପହଁଚିଛି । ଅଣୁ, କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ କ୍ଷେତ୍ରକୁ ବିଶେଷ ଗୁରୁତ୍ୱ ଦିଆଯାଇଛି ।
ଆମେ ସେକ୍ଟର ଆଧାରିତ ଆଧୁନିକୀକରଣ ଏବଂ ଉତ୍ପଦକତା କାର୍ଯ୍ୟକ୍ରମ, କର୍ପୋରେଟ ଟିକସ ହାରରେ ହ୍ରାସ, ଏବଂ ଟିକସ ଲାଭକୁ ଆହୁରି ଆକର୍ଷଣୀୟ ଏବଂ ସହଜ କରିଛୁ । ଭାରତୀୟ ଷ୍ଟାର୍ଟଅପ୍ କ୍ଷେତ୍ର ପ୍ରସ୍ଫୁଟିତ ହେଉଛି ଏବଂ ବର୍ତ୍ତମାନ ଏହା ବିଶ୍ୱର ତୃତୀୟ ସ୍ଥାନରେ ପହଁଚିଛି ।
ମୋର ପ୍ରିୟ ଯୋଜନା, ନିଶ୍ଚିତ ଭାବେ ମୁଦ୍ରା ଯୋଜନା ଗରିବ ଏବଂ ବଂଚିତମାନଙ୍କୁ ଋଣ ଯୋଗାଇ ଦେଉଛି । ଗତ ତିନି ବର୍ଷ ଧରି 128 ମିଲିୟନ ଋଣ, ଯାହାର ମୂଲ୍ୟ ପାଖାପାଖି 128 ବିଲିୟନ ଆମେରିକୀୟ ଡଲାର ହେବ, ଯୋଗାଇ ଦିଆଯାଇଛି – ଏହାର 74% ମହିଳାମାନଙ୍କୁ ଦିଆଯାଇଛି; ହଁ ମହିଳାମାନଙ୍କୁ 74%!
ପଞ୍ଚମତଃ, ଆମେ ଦୃଢ଼ ଭାବେ ଆର୍ଥିକ ଅନ୍ତର୍ଭୂକ୍ତୀକରଣ ଉପରେ ଗୁରୁତ୍ୱାରୋପ କରୁଛୁ । ଗତ ତିନି ବର୍ଷ ମଧ୍ୟରେ ଆମେ 316 ମିଲିୟନ ବ୍ୟାଙ୍କ ଏକାଉଣ୍ଟ ସେମାନଙ୍କ ପାଇଁ ଖୋଲିଛୁ ଯେଉଁମାନଙ୍କର ପୂର୍ବର ବ୍ୟାଙ୍କ ଏକାଉଣ୍ଟ ନଥିଲା । ବର୍ତ୍ତମାନ, 99% ଭାରତୀୟ ପରିବାର ନିକଟରେ ବ୍ୟାଙ୍କ ଏକାଉଣ୍ଟ ରହିଛି ।
ଏହା ପ୍ରତ୍ୟେକ ଭାରତୀୟଙ୍କ ପାଇଁ ସମ୍ମାନ ଏବଂ ପରିଚୟର ଏକ ନୂତନ ଉତ୍ସ । ଏହା ଆର୍ଥିକ ଅନ୍ତର୍ଭୂକ୍ତୀକରଣ ଏବଂ ସଶକ୍ତିକରଣର ଏକ ଅବିଶ୍ୱସନୀୟ କାହାଣୀ । 12 ବିଲିୟନ ଆମେରିକୀୟ ଡଲାର ଏସବୁ ଏକାଉଣ୍ଟରେ ଜମା ହୋଇଛି ।
ସରକାର ସିଧାସଳଖ ହିତାଧିକାରୀଙ୍କ ନିକଟକୁ 50 ବିଲିୟନ ଆମେରିକୀୟ ଡଲାର ହସ୍ତାନ୍ତର କରି ସେମାନଙ୍କୁ ଲାଭାନ୍ୱିତ କରିଛନ୍ତି । ସେମାନଙ୍କ ପାଇଁ ଶସ୍ତା ଭତା ଏବଂ ବୀମା ଉପଲବ୍ଧ ହୋଇପାରିଛି- ଯାହା ପୂର୍ବରୁ ଏକ ସ୍ୱପ୍ନ ଥିଲା ।
ଷଷ୍ଠରେ ଡିଜିଟାଲ ଆନ୍ଦୋଳନ ସାରା ଭାରତରେ ପ୍ରବାହିତ ହେଉଛି । ସମସ୍ତ ପାଇଁ ବାୟୋମେଟ୍ରିକ, ସମସ୍ତଙ୍କ ପକେଟରେ ମୋବାଇଲ ଫୋନ ଏବଂ ପ୍ରତ୍ୟେକଙ୍କର ବ୍ୟାଙ୍କ ଏକାଉଣ୍ଟ, ପ୍ରତ୍ୟେକ ଭାରତୀୟଙ୍କ ଜୀବନରେ ପରିବର୍ତ୍ତନ ଆଣିପାରୁଛି ।
ଏବଂ ଏହା ମଧ୍ୟ ଭାରତରେ ସବୁକିଛି : ପ୍ରଶାସନ, ଜନସେବା, ଗରିବଙ୍କୁ ଲାଭ ପ୍ରଦାନ, ବ୍ୟାଙ୍କି ଓ ପେନସନ ବ୍ୟବସ୍ଥାକୁ ଗରିବଙ୍କ ନିକଟରେ ପହଁଚାଇବା ଆଦିକୁ ପରିବର୍ତ୍ତନ କରୁଛି । ଉଦାହରଣ ସ୍ୱରୂପ, ଡିଜିଟାଲ କାରବାର ଦ୍ରୁତ ଗତିରେ ବୃଦ୍ଧି ପାଉଛି ।
2017ରେ, କେବଳ ୟୁପିଆଇ ଆଧାରିତ କାରବାର 7 ହଜାର ପ୍ରତିଶତ ବୃଦ୍ଧି ପାଇଛି । ଜାନୁଆରୀରେ ଡିଜିଟାଲ କାରବାର 2 ଟ୍ରିଲିୟନ ଆମେରିକୀୟ ଡଲାରରେ ପହଁଚିଥିଲା । ଆମେ 20 ଲକ୍ଷ 50 ହଜାର ଗ୍ରାମ ପଞ୍ଚାୟତରେ ବ୍ରଡବ୍ୟାଣ୍ଡ ସଂଯୋଗ ସ୍ଥାପନ ପାଇଁ କାର୍ଯ୍ୟ କରୁଛୁ ଏବଂ ଆମେ ସେସବୁ ଗ୍ରାମ ପରିଷଦରେ ଜନ ସେବା କେନ୍ଦ୍ର ପ୍ରତିଷ୍ଠା କରୁଛୁ ।
ଏହା ବହୁ ଡିଜିଟାଲ ସେବା ଏବଂ ହଜାର ହଜାର ଗ୍ରାମୀଣ ନିଯୁକ୍ତି ସୁଯୋଗ ସୃଷ୍ଟି କରୁଛି । ଅଟଳ ନବସୃଜନ ମିଶନ ଅଧୀନରେ ଆମେ 100ଟି ଉଦ୍ଭାବନ କେନ୍ଦ୍ର ଏବଂ 24 ହଜାର ଗବେଷଣାଗାର ସାରା ଦେଶରେ ସ୍ଥାପନ କରୁଛୁ ଯାହାଦ୍ୱାରା ଆମର ପିଲାମାନେ ଉଦ୍ଭାବନକାରୀ ଏବଂ ନିଯୁକ୍ତିଦାତା ହୋଇପାରିବେ ।
ସପ୍ତମରେ, ଆସନ୍ତା ଦୁଇ ଦଶନ୍ଧୀ ମଧ୍ୟରେ ଭାରତ ସର୍ବବୃହତ ସହରୀକରଣ ଦେଖିବାକୁ ମିଳିବ । ଏହା ଏକ ଆହ୍ୱାନ, ବରଂ ଏହା ଏକ ବୃହତ ଦାୟିତ୍ୱ ଏବଂ ସୁଯୋଗ ।
ଆମେ 100ଟି ସ୍ପାର୍ଟ ସହର ଏବଂ 115ଟି ଅଭିଳଷିତ ଜିଲ୍ଲାରକୁ ବିକାଶର ନୂତନ କେନ୍ଦ୍ର ଭାବେ ପରିଣତ କରିବା ଦିଗରେ କାର୍ଯ୍ୟ କରୁଛୁ ।
ଗଣ ପରିବହନ, ବର୍ଜ୍ୟବସ୍ତୁ ପରିଚାଳନା, ପ୍ରଦୂଷଣ ନିୟନ୍ତ୍ରଣ, ନିରନ୍ତର ବାସସ୍ଥାନ ଏବଂ ସୁଲଭ ଆବାସ ଆମ ପାଇଁ ପ୍ରାଥମିକ କାର୍ଯ୍ୟକ୍ରମ ।
ଅଷ୍ଟମରେ, ଆମେ ଦକ୍ଷତା ବିକାଶ କ୍ଷେତ୍ରରେ ନିବେଶ କରୁଛୁ ଏବଂ ଆମର 800 ମିଲିୟନ ଯୁବକଯୁବତୀମାନଙ୍କୁ ସମ୍ମାନ ଏବଂ ନିଯୁକ୍ତିର ଜୀବନ ପ୍ରଦାନ କରିବା ଲାଗି ଉଚ୍ଚ ଶିକ୍ଷାର ମାନ ବୃଦ୍ଧି କରୁଛୁ । ଏବଂ, ଏହି ଆର୍ଥିକ ବର୍ଷରେ, ଆମେ ଏକ 15 ବିଲିୟନ ଆମେରିକୀୟ ଡଲାର କାର୍ଯ୍ୟକ୍ରମ ଶୁଭାରମ୍ଭ କରିଛୁ, ଆମର ଉଚ୍ଚଶିକ୍ଷା ବ୍ୟବସ୍ଥାକୁ ଆହୁରି ସୁଦୃଢ଼ କରିବା ଉଦ୍ଦେଶ୍ୟରେ ।
ନବମରେ, କୃଷି କ୍ଷେତ୍ରକୁ ଆମେ ସର୍ବାଧିକ ପ୍ରାଥମିକତ ଦେଉଛୁ, ଯାହା ସବୁ ବିପ୍ଳବ ପରଠାରୁ ଦେଖିବାକୁ ମିଳିନଥିଲା । ଆମେ ସ୍ୱାଧୀନତାର 75 ବର୍ଷ ପୂର୍ତ୍ତି ଏବଂ ‘ନୂତନ ଭାରତ’ ଗଠନ ବେଳକୁ 2022ରେ କୃଷକଙ୍କ ଆୟ ଦ୍ୱିଗୁଣିତ କରିବା ଲାଗି ଲକ୍ଷ୍ୟ ରଖିଛୁ ।
ଏଥିପାଇଁ, ଆମେ ପ୍ରଯୁକ୍ତି, ରିମୋଟ ସେନ୍ସିଂ, ଇଂଟରନେଟ, ଡିଜିଟାଲ ଆର୍ଥିକ ବ୍ୟବସ୍ଥା, ସଫ୍ଟ ଋଣ, ବୀମା, ମୃର୍ତ୍ତିକା ସ୍ୱାସ୍ଥ୍ୟ ଉନ୍ନତି, ଜଳସେଚନ, ମୂଲ୍ୟ ଏବଂ ଯୋଗାଯୋଗର ଉପଯୋଗ କରୁଛୁ ।
ଦଶମରେ, 2022 ସୁଦ୍ଧା ଆମେ ଚାହୁଁଛୁ ପ୍ରତ୍ୟେକ ନାଗରିକ ପାଇଁ ଯାହା ମୁଁ କୁହେଁ “ଜୀବନ ଧାରଣର ସୁଗମତା” । ଏହାର ଅର୍ଥ, ଉଦାହରଣସ୍ୱରୂପ, 50 ନିୟୁତ ନୂଆ ଆବାସ ଯାହାଦ୍ୱାରା ପ୍ରତ୍ୟେକଙ୍କ ମୁଣ୍ଡ ଉପରେ ଛାତ ।
ଗତ ମାସରେ, ଆମେ ଏକ ମାଇଲଖୁଂଟ ହାସଲ କରିଛୁ । ଆମର 6 ଲକ୍ଷ ଗ୍ରାମ ମଧ୍ୟରୁ ପ୍ରତ୍ୟେକ ଗ୍ରାମ ଏକ ବିଦ୍ୟୁତ ଗ୍ରୀଡ ସହ ସଂଯୁକ୍ତ ହୋଇଛି ।
ଜାତୀୟ ସ୍ୱାସ୍ଥ୍ୟ ବୀମା ଯୋଜନା, ଆୟୁଷ୍ମାନ ଭାରତ ଯୋଜନା ଆମେ ଏଥର ଶୁଭାରମ୍ଭ କରିଛୁ । ଏହା 100 ମିଲିୟନ ପରିବାର ବା 500 ଭାରତୀୟଙ୍କୁ ବାର୍ଷିକ 8 ହଜାର ଆମେରିକୀୟ ଡଲାର ବୀମା କବଚ ପ୍ରଦାନ କରିବ । ଏହା ସହଜରେ ବିଶ୍ୱର ସର୍ବବୃହତ ସ୍ୱାସ୍ଥ୍ୟସେବା ଯୋଜନା ।
ଜୀବନ ଧାରଣର ମାନ ସ୍ୱଚ୍ଛ ଏବଂ ନିରନ୍ତର ବିକାଶ ସହ ଜଡ଼ିତ । ଏହା ଆମର ପ୍ରମୁଖ ଲକ୍ଷ୍ୟ ମଧ୍ୟରୁ ଅନ୍ୟତମ । ଏହା ଆମ ପରମ୍ପରାରେ ରହିଛି ଏବଂ ପୃଥିବୀର ଭବିଷ୍ୟତ ପାଇଁ ଆମେ ଏଥିପ୍ରତି ପ୍ରତିବଦ୍ଧ । ଏବଂ, ଏହା ଭାରତର ସାଧାରଣ ନୀତି ଏବଂ ଅର୍ଥନୈତିକ ବିକଳ୍ପର ପ୍ରତ୍ୟେକ ଦିଗକୁ ଛୁଇଁଛି ।
ଏଥିରେ ଆମ ସ୍ୱଚ୍ଛ ଭାରତ, ସ୍ୱଚ୍ଛ ନଦୀ, ସ୍ୱଚ୍ଛ ବାୟୁ ଏବଂ ସ୍ୱଚ୍ଛ ସହର ଅଭିଯାନ ରହିଛି । ଏବଂ, ଏ ସମସ୍ତ ପରିବର୍ତ୍ତନ କେବଳ ଗୋଟିଏ ଏବଂ ଏକମାତ୍ର କାରଣ : ଆମର ଲୋକମାନଙ୍କ ପାଇଁ କାର୍ଯ୍ୟକାରୀ ହେଉଛି । 125କୋଟି ଲୋକଙ୍କ ଦେଶ, ଯେଉଁଠି 65%ରୁ ଅଧିକ ଲୋକଙ୍କ ବୟସ 35 ବର୍ଷରୁ କମ ପରିବର୍ତ୍ତନ ପାଇଁ ଆଗ୍ରହୀ ଏବଂ ନୂତନ ଭାରତ ହାସଲ ଲାଗି ଆଗେଇ ଚାଲିଛି । ଏହା ମଧ୍ୟ ପ୍ରଶାସନ ଏବଂ ନୀତିରେ ପରିବର୍ତ୍ତନକୁ ଆଗେଇ ନେଉଛି ।
ବନ୍ଧୁଗଣ,
ଭାରତରେ ହେଉଥିବା ଅର୍ଥନୈତିକ ସଂସ୍କାର ଗତି ଏବଂ ଦିଗରେ ଏକ ସମ୍ପୂର୍ଣ୍ଣ ସ୍ପଷ୍ଟତା ଏବଂ ଆତ୍ମବିଶ୍ୱାସ ରହିଛି । ଆମେ ଏହାକୁ ଭାରତରେ ବ୍ୟବସାୟ ପାଇଁ ଅଧିକ ସହଜ ଏବଂ ସୁଗମ କରିବୁ । ଆମେ ଏକ ମୁକ୍ତ, ସ୍ଥିର ଏବଂ ସ୍ୱଚ୍ଛ ଅନ୍ତର୍ଜାତୀୟ ବାଣିଜ୍ୟ ବ୍ୟବସ୍ଥା ପାଇଁ କାର୍ଯ୍ୟ କରିବୁ । ଏବଂ, ପ୍ରାଚ୍ୟ ସହ ଆମର ସମ୍ପର୍କ ଦୃଢ଼ ହେବ ଏବଂ ଅର୍ଥବ୍ୟବସ୍ଥା ଆମ ଏକ୍ଟ ଇଷ୍ଟ ପଲିସିର ଅଭିନ୍ନ ଅଙ୍ଗ ହେବ ।
ଆମେ ଏକ ବିସ୍ତୃତ ଭାବେ ସ୍ୱଚ୍ଛ, ସନ୍ତୁଳିତ ଚୁକ୍ତି ଚାହୁଁଛୁ, ଯାହା ସବୁ ଦେଶକୁ ବାଣିଜ୍ୟ ଏବଂ ନିବେଶର ପ୍ରବାହରେ ଉର୍ଦ୍ଧ୍ଵକୁ ରଖିବ । ଆମେ ନିକଟରେ ଭାରତ-ସିଙ୍ଗାପୁର ବିସ୍ତୃତ ଅର୍ଥନୈତିକ ସହଯୋଗ ସମୀକ୍ଷା ସମ୍ପାଦନ କରିଛୁ ଏବଂ ଆମେ ଏହାକୁ ଆହୁରି ଉନ୍ନତିକରଣ କରିବା ଲାଗି କାର୍ଯ୍ୟ କରିବୁ ।
କ୍ଷେତ୍ରୀୟ ବିସ୍ତୃତ ଅର୍ଥନୈତିକ ଭାଗିଦାରୀର ଆଗୁଆ ସମ୍ପାଦନ ପାଇଁ ଆମେ ସମସ୍ତଙ୍କ ସହିତ, ବିଶେଷ ଭାବେ ଆସିଆନ ସହ କାର୍ଯ୍ୟ କରିବୁ । ଆସିଆନ ଏବଂ ବ୍ୟାପକ ପ୍ରାଚ୍ୟ ପାଇଁ ସିଙ୍ଗାପୁର ଏକ ମାର୍ଗ ହୋଇ ରହିବ । ଚଳିତ ବର୍ଷ ସିଙ୍ଗାପୁରର ଅଧ୍ୟକ୍ଷତାରେ ଆସିଆନ ସହ ଭାରତର ସମ୍ପର୍କ ଆହୁରି ଉର୍ଦ୍ଧ୍ଵକୁ ଏବଂ ଦୂରକୁ ଆଗେଇବ ।
ବନ୍ଧୁଗଣ,
ଶେଷରେ ସିଙ୍ଗାପୁର ପାଇଁ ଭାରତ ବ୍ୟତୀତ ଆଉ ଭଲ ସୁଯୋଗ ନାହିଁ । ଭାରତ ଏବଂ ସିଙ୍ଗାପୁର ଭଳି ଏତେ ସାଧାରଣ ସମାନତା ଏବଂ ଏତେ ଅଧିକ ସମ୍ଭାବନା ଖୁବ କମ ଦେଶରେ ରହିଛି । ଆମର ସମାଜରେ ଆମେ ପରସ୍ପରର ପ୍ରତିଫଳନ ଦେଖିଥାଉ ଏବଂ ଆମ ଅଂଚଳ ପାଇଁ ସମାନ ଭବିଷ୍ୟତ ଆଶା କରିଥାଉ ।
ଆଇନର ଶାସନ ଆଧାରରେ ଏକ ବିଶ୍ୱ ଆମେ ଚାହୁଁଛୁ ଏବଂ ଯାହା ମୁକ୍ତ ସମୁଦ୍ର ଏବଂ ସ୍ଥିର ବାଣିଜ୍ୟ ବ୍ୟବସ୍ଥା ଦ୍ୱାରା ଯୋଡ଼ି ହୋଇଥିବ । ସର୍ବୋପରି ଆମ ପାଖରେ ବିଶ୍ୱର ସବୁଠୁ ପ୍ରତିଭାସମ୍ପନ୍ନ, ଉତ୍ସାହୀ ପେସାଦାର ଏବଂ ପ୍ରତିବଦ୍ଧ ପ୍ରବାସୀ ଭାରତୀୟ ଅଛନ୍ତି, ଯେଉଁମାନେ ନିଜକୁ ସିଙ୍ଗାପୁର ନାଗରିକ ଭାବେ ଗର୍ବ କରିଥାନ୍ତି, ଭାରତ ଏବଂ ସିଙ୍ଗାପୁର ମଧ୍ୟରେ ସେତୁ ଭାବେ କାର୍ଯ୍ୟ କରିବା ଲାଗି ପ୍ରସ୍ତୁତ ।
ଭବିଷ୍ୟତରେ ଅପାର ସମ୍ଭାବନା ରହିଛି । ଏହା ଆମ ପାଖରେ ରହିଛି । ଏହା ଆମ ଉପରେ ନିର୍ଭର କରେ ଯେ ଆମେ ପ୍ରଚୁର ଆକାଂକ୍ଷା ଏବଂ ସାହସର ସହିତ ଏହାକୁ ହାସଲ କରିବା ଲାଗି ପ୍ରସ୍ତୁତ ହେବ । ଆମେ ଉଚିତ ମାର୍ଗରେ ଅଛୁ ବୋଲି ଏହା ଆମକୁ କହୁଛି । ଦୁଇ ସିଂହ ନିଶ୍ଚିତ ଭାବେ ଭବିଷ୍ୟତ ଆଡ଼କୁ ଲମ୍ଫ ପ୍ରଦାନ କରିବେ ।
ଧନ୍ୟବାଦ ।
ବହୁତ ବହୁତ ଧନ୍ୟବାଦ ।
Indian diaspora in Singapore represents the diversity of India: PM pic.twitter.com/kGKePEFmgE
— PMO India (@PMOIndia) May 31, 2018
Relations between India & Singapore are among the warmest & closest: PM pic.twitter.com/ZTaDg2tLRz
— PMO India (@PMOIndia) May 31, 2018
A New India is taking shape: PM @narendramodi
— PMO India (@PMOIndia) May 31, 2018
Join Live: https://t.co/N1u7mzWjgy pic.twitter.com/EgyLxz0CUK
Rapid growth in the Infrastructure sector: PM pic.twitter.com/t4T2K1NEbU
— PMO India (@PMOIndia) May 31, 2018
Thriving entrepreneurship in India: PM pic.twitter.com/WQk61t9JHN
— PMO India (@PMOIndia) May 31, 2018
Financial Inclusion at an unprecedented scale and speed: PM pic.twitter.com/YI2Xes2Uq8
— PMO India (@PMOIndia) May 31, 2018
