ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ମୁମ୍ବାଇରେ ଆୟୋଜିତ ଏକ ସ୍ଵତନ୍ତ୍ର ଉତ୍ସବରେ ନୌସେନାର ଆଧୁନିକ ବୁଡାଜାହାଜ ଆଇଏନଏସ କଲବରୀକୁ ରାଷ୍ଟ୍ର ଲାଗି ସମର୍ପିତ କରିଛନ୍ତି ।
ଭାରତର ଜନସାଧାରଣଙ୍କୁ ଏହି ଅବସରରେ ଶୁଭକାମନା ଜଣାଇ ପ୍ରଧାନମନ୍ତ୍ରୀ ଆଇଏନଏସ କଲବରୀକୁ “ମେକ ଇନ ଇଣ୍ଡିଆ”ର ଏକ ପ୍ରମୁଖ ଉଦାହରଣ ବୋଲି ବର୍ଣ୍ଣନା କରିଥିଲେ । ଏହାର ନିର୍ମାଣରେ ସାମିଲ ଥିବା ସମସ୍ତଙ୍କୁ ପ୍ରଧାନମନ୍ତ୍ରୀ ପ୍ରଶଂସା କରିଥିଲେ । ଏହି ବୁଡାଜାହାଜ ଭାରତ ଏବଂ ଫ୍ରାନ୍ସ ମଧ୍ୟରେ ବୃଦ୍ଧି ପାଉଥିବା ସାମରିକ ଭାଗିଦାରୀତାର ଚମତ୍କାର ପ୍ରଦର୍ଶନ ବୋଲି ସେ ପ୍ରକାଶ କରିଥିଲେ । ସେ କହିଲେ ଯେ ଆଇଏନଏସ କଲବରୀ ଭାରତୀୟ ନୌସେନାକୁ ଅଧିକ ଶକ୍ତିଶାଳୀ କରିବ ।
ପ୍ରଧାନମନ୍ତ୍ରୀ କହିଲେ ଯେ ଏକବିଂଶ ଶତାବ୍ଦୀକୁ ଏସିଆର ଶତାବ୍ଦୀ ଭାବେ ଅଭିହିତ କରାଯାଇଛି । ସେ ପୁନଶ୍ଚ କହିଲେ ଯେ ଏକବିଂଶ ଶତାବ୍ଦୀରେ ବିକାଶର ପଥ ଭାରତୀୟ ମହାସାଗର ମଧ୍ୟଦେଇ ଯିବା ନିଶ୍ଚିତ । ସେଥିପାଇଁ ସରକାରଙ୍କ ନୀତି ନିର୍ଦ୍ଧାରଣରେ ଭାରତୀୟ ମହାସାଗରର ଏକ ସ୍ୱତନ୍ତ୍ର ସ୍ଥାନ ରହିଥିବାର ସେ କହିଥିଲେ ।
ପ୍ରଧାନମନ୍ତ୍ରୀ କହିଲେ ଯେ ଏହି ଭବିଷ୍ୟଦୃଷ୍ଟିକୁ ସାଗର(SAGAR) ସଂକ୍ଷିପ୍ତ ନାମାନୁସାରେ ବୁଝାଯାଇ ପାରିବ । ଏହାର ଅର୍ଥ ହେଲା ଏହି ଅଂଚଳରେ ସମସ୍ତଙ୍କ ପାଇଁ ସୁରକ୍ଷା ଏବଂ ପ୍ରଗତି ।
ପ୍ରଧାନମନ୍ତ୍ରୀ କହିଲେ ଯେ ଭାରତ ମହାସାଗରରେ ଏହାର ବୈଶ୍ୱିକ, ରଣନୈତିକ ଏବଂ ଅର୍ଥନୈତିକ ସ୍ୱାର୍ଥ ନେଇ ଭାରତ ସମ୍ପୂର୍ଣ୍ଣ ଭାବେ ସତର୍କ ରହିଛି । ଆଧୁନିକ ଏବଂ ବହୁବିଧ ସୁବିଧା ସମ୍ପନ୍ନ ଭାରତୀୟ ନୌସେନା ଏହି ଅଂଚଳରେ ଶାନ୍ତି ଏବଂ ସ୍ଥିରତା ବୃଦ୍ଧି ନିମନ୍ତେ କିପରି ଏକ ନେତୃତ୍ୱ ଭୂମିକା ଗ୍ରହଣ କରେ ସେ ସମ୍ବନ୍ଧରେ ସେ ସୂଚନା ପ୍ରଦାନ କରିଥିଲେ ।
ସେ କହିଥିଲେ ଯେ ଏହି ମହାସାଗରର ସ୍ୱାଭାବିକ ଶକ୍ତି ଆମ ଜାତୀୟ ବିକାଶ କ୍ଷେତ୍ରରେ ଅର୍ଥନୈତିକ ଶକ୍ତି ଯୋଗାଇଥାଏ । ସେଥିପାଇଁ ଭାରତ ସାମୁଦ୍ରିକ ସନ୍ତ୍ରାସବାଦ, ଜଳଦସ୍ୟୁ ଆକ୍ରମଣ, ଜାହାଜ ମାଧ୍ୟମରେ ମାଦକଦ୍ରବ୍ୟ(Drugs) କାରବାର ଆଦି ସମସ୍ୟା ମୁକାବିଲା କରିବାର ଆହ୍ୱାନ ସମ୍ବନ୍ଧରେ ସଚେତନ ରହିଛି । ଏହି ସମସ୍ୟା ଗୁଡ଼ିକୁ କେବଳ ଭାରତ ନୁହେଁ ବରଂ ଏହି ଅଂଚଳର ସମସ୍ତ ଦେଶମାନଙ୍କୁ ସମ୍ମୁଖୀନ ହେବାକୁ ପଡିବ । ଏହି ସବୁ ଆହ୍ୱାନର ମୁକାବିଲା ପାଇଁ ଭାରତ ଏକ ପ୍ରମୁଖ ଭୂମିକା ନିର୍ବାହ କରୁଥିବାର ସେ ପ୍ରକାଶ କରିଥିଲେ ।
ସେ କହିଲେ ଯେ ସମଗ୍ର ବିଶ୍ୱ ଏକ ପରିବାର ଏବଂ ଏହାର ବୈଶ୍ୱିକ ଦାୟିତ୍ୱବୋଧ ନିର୍ବାହ କରିବା ନେଇ ଭାରତ ବିଶ୍ୱାସ କରେ । ସମସ୍ୟା କାଳରେ ଭାରତ ଏହାର ଅଂଶୀଦାର ଦେଶମାନଙ୍କ ପାଖରେ ପ୍ରଥମ ଉତ୍ତରଦାୟୀ ଦେଶର ଭୂମିକା ଗ୍ରହଣ କରିଥିବା ସେ ପ୍ରକାଶ କରିଥିଲେ । ସେ କହିଲେ ଯେ ଭାରତୀୟ କୂଟନୀତି ଏବଂ ସୁରକ୍ଷା କ୍ଷେତ୍ରରେ ମାନବୀୟ ଭାବର ପ୍ରଦର୍ଶନ ଆମର ସ୍ୱତନ୍ତ୍ରତା । ସେ କହିଲେ ଯେ ମାନବୀୟତା ପାଇଁ ଶକ୍ତିଶାଳୀ ଓ ସମର୍ଥ ଭାରତକୁ ଏକ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିବାକୁ ପଡିବ । ସେ କହିଲେ ଯେ ଶାନ୍ତି ଓ ସ୍ଥିରତା ପଥରେ ବିଶ୍ୱବ୍ୟାପୀ ଦେଶସମୂହ ଭାରତ ସହିତ ପାଦ ମିଳାଇ ଚାଲିବାକୁ ଆଗ୍ରହୀ ।
ପ୍ରଧାନମନ୍ତ୍ରୀ କହିଲେ ଯେ ଗତ ତିନି ବର୍ଷ ଧରି ପ୍ରତିରକ୍ଷା ଏବଂ ସୁରକ୍ଷା ସମ୍ବନ୍ଧିତ ପରିବେଶ ପରିବର୍ତ୍ତିତ ହେବାରେ ଲାଗିଛି । ସେ କହିଲେ ଯେ ଆଇଏନଏସ କଲବରୀ ନିର୍ମାଣ ସମୟରେ ଯେଉଁ ଦକ୍ଷତା ଏବଂ କୌଶଳର ଆହରଣ କରାଯାଇଛି ତାହା ଭାରତ ପାଇଁ ଏକ ସମ୍ପଦ ।
ପ୍ରଧାନମନ୍ତ୍ରୀ କହିଲେ ଯେ “ଏକ ପାହ୍ୟା ଏକ ପେନସନ” କ୍ଷେତ୍ର ନେଇ ରହିଥିବା ଦୀର୍ଘ ଦିନର ବିଳମ୍ବକୁ ସରକାରଙ୍କ ସଂକଳ୍ପ ଫଳରେ ସମାଧାନ କରାଯାଇଛି ।
ପ୍ରଧାନମନ୍ତ୍ରୀ କହିଲେ ଯେ ସରକାରଙ୍କ ଦୃଢ ନୀତି ଏବଂ ସେନା ବାହିନୀର ସାହାସିକତା ଯୋଗୁଁ ଜାମ୍ମୁ-କାଶ୍ମୀରରେ ସନ୍ତ୍ରାସବାଦ ଏକ ଛାୟାଯୁଦ୍ଧ ଭଳି ରୂପ ନେବାରେ ଅସଫଳ ହୋଇଛି ।
ଦେଶର ସୁରକ୍ଷା ପାଇଁ ଜୀବନ ଉତ୍ସର୍ଗ କରିଥିବା ସମସ୍ତ ସେନାନୀଙ୍କୁ ପ୍ରଧାନମନ୍ତ୍ରୀ କୃତଜ୍ଞତା ଜ୍ଞାପନ କରିଥିଲେ ।
