ହାଇଦ୍ରାବାଦର ସର୍ଦ୍ଦାର ବଲ୍ଲଭଭାଇ ପଟେଲ ଜାତୀୟ ପୁଲିସ ଏକାଡେମୀଠାରେ ଅନୁଷ୍ଠିତ ପୁଲିସ ଡ଼ିଜି/ଆଇଜିଙ୍କ ସମ୍ମିଳନୀକୁ ପ୍ରଧାନମନ୍ତ୍ରୀ ସମ୍ବୋଧିତ କରିଛନ୍ତି । ଏହି ଅବସରରେ ନିଜର ବକ୍ତବ୍ୟ ରଖି ପ୍ରଧାନମନ୍ତ୍ରୀ କହିଛନ୍ତି, ଆଜି ହେଉଛି ନଭେମ୍ବର ୨୬ । ଆଜିର ଦିନରେ ମୁମ୍ବାଇଠାରେ ଭୟଙ୍କର ସନ୍ତ୍ରାସବାଦ ଆକ୍ରମଣ ଘଟିଥିଲା । ପୁଲିସ ସାହସର ସହିତ ସନ୍ତ୍ରାସବାଦର ମୁକାବିଲା କରିଥିଲା । ସେ ମଧ୍ୟ ଶହୀଦ ହୋଇଥିବା ୩୩,୦୦୦ ପୁଲିସଙ୍କ ସମ୍ବନ୍ଧରେ ସ୍ମରଣ କରିଥିଲେ । ପ୍ରଧାନମନ୍ତ୍ରୀ କହିଥିଲେ ଯେ, ଏହି ବାର୍ଷିକ ଅଧିବେଶନର ସଂଚାଳନ ପୁର୍ବ ଅପେକ୍ଷା ଏବେ ଭିନ୍ନ ଭାବେ ରୂପାନ୍ତରିତ ହୋଇଯାଇଛି । ଅନୁଭବ ବାଣ୍ଟିବାର ଏକ ଭିତ୍ତିଭୂମିରେ ଏହା ପରିଣତ ହୋଇଛି । ଏହାଫଳରେ ଯୋଜନା ନିର୍ମାଣ ନିମନ୍ତେ ଅନେକ ଉପାଦାନ ଏଠାରୁ ମିଳିପାରୁଛି ।
ପ୍ରଧାନମନ୍ତ୍ରୀ କାର୍ଯ୍ୟକାରୀ ହୋଇପାରିଲା ଭଳି ବିଷୟଗୁଡ଼ିକରୁ ମିଳିଥିବା ଫଳାଫଳ ଉପରେ ଗୁରୁତ୍ୱ ପ୍ରଦାନ କରିଥିଲେ । ତାଲିମ ସମ୍ବନ୍ଧରେ ମତ ଦେଇ ପ୍ରଧାନମନ୍ତ୍ରୀ କହିଥିଲେ ଯେ ସମ୍ପ୍ରତି ସୂକ୍ଷ୍ମ କଳାର ବିକାଶ ଗୁରୁତ୍ଵପୂର୍ଣ୍ଣ ହୋଇପଡିଛି ଏବଂ ଏହା ତାଲିମ କାର୍ଯ୍ୟକ୍ରମର ଅଂଶବିଶେଷ ହେବା ଉଚିତ । ମଷିଷର ମନସ୍ତତ୍ତ୍ୱ ଓ ବ୍ୟବହାର ସମ୍ବନ୍ଧୀୟ ଦିଗ ତାଲିମର ଗୁରୁତ୍ୱପୂର୍ଣ୍ଣ ଅଂଶ ହେବା ଉଚିତ ।
ପ୍ରଧାନମନ୍ତ୍ରୀ କହିଥିଲେ ଯେ ନେତୃତ୍ୱ ଦକ୍ଷତା ଗୁରୁତ୍ୱପୂର୍ଣ୍ଣ ଏବଂ ପୁଲିସ କର୍ମଚାରୀଙ୍କ ମଧ୍ୟରେ ଏହାର ବିକାଶ କରିବା ବରିଷ୍ଠ ପଦାଧିକାରୀଙ୍କ ଦାୟିତ୍ୱ । ଆଇନ ଶୃଙ୍ଖଳା ବଜାୟ ରଖିବା ପାଇଁ ପାଦରେ ପହରା ଦେବା ଓ କନଷ୍ଟେବଲ୍ ସ୍ତରରେ ବାର୍ତ୍ତା ସେବା ବୃଦ୍ଧି କରିବା ନେଇ ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ । ପୁଲିସ ବାହିନୀରେ ସାମୂହିକ ତାଲିମ ମାଧ୍ୟମରେ ଗୁଣାତ୍ମକ ପରିବର୍ତ୍ତନ ଲାଗି ପ୍ରଧାନମନ୍ତ୍ରୀ ଆହ୍ୱାନ ଦେଇଥିଲେ । ପ୍ରଧାନମନ୍ତ୍ରୀ କହିଥିଲେ ଯେ ବୈଷୟିକ ଜ୍ଞାନ ଓ ମାନବିକତା ପୁଲିସ ବାହିନୀକୁ ଆଗକୁ ବଢ଼ାଇବା ପାଇଁ ଗୁରୁତ୍ୱପୂର୍ଣ୍ଣ ।
ପ୍ରଧାନମନ୍ତ୍ରୀ ‘ଇଣ୍ଡିଆନ ପୁଲିସ ଏଟ୍ ୟୋର କଲ’ ନାମକ ଏକ ଆପ୍ ର ଶୁଭାରମ୍ଭ କରିଥିଲେ । ସେ ମଧ୍ୟ ଇଂଟେଲିଜେନ୍ସ ବ୍ୟୁରୋ କ୍ଷେତ୍ରରେ ଉଲ୍ଲେଖନୀୟ ସେବା ପ୍ରଦାନ କରିଥିବା ପଦାଧିକାରୀମାନଙ୍କୁ ରାଷ୍ଟ୍ରପତି ପୁଲିସ ପଦକ ପ୍ରଦାନ କରିଥିଲେ ।
ପୂର୍ବରୁ ପ୍ରଧାନମନ୍ତ୍ରୀ ଜାତୀୟ ପୁଲିସ ଏକାଡେମୀରେ ଥିବା ସହୀଦ ସ୍ତମ୍ଭରେ ପୁଷ୍ପମାଲ୍ୟ ଅର୍ପଣ କରିଥିଲେ । ସେ ମଧ୍ୟ ସର୍ଦ୍ଦାର ବଲ୍ଲଭଭାଇ ପଟେଲଙ୍କ ପ୍ରତିମୂର୍ତ୍ତିରେ ପୁଷ୍ପଗୁଚ୍ଛ ପ୍ରଦାନ କରିବା ସହ ଏକ ଚାରା ରୋପଣ କରିଥିଲେ ।
