ଜାପାନ-ଭାରତ ସାଂସଦ ମୈତ୍ରୀ ଲିଗର ଏକ ପ୍ରତିନିଧି ଦଳ ଆଜି ନୂଆଦିଲ୍ଳୀଠାରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କୁ ଭେଟିଛନ୍ତି ।
ମିଷ୍ଟର ହିରୋୟୁକି ହୋସଡାଙ୍କ ନେତୃତ୍ୱରେ ଯାଇଥିବା ଏହି ପ୍ରତିନିଧି ଦଳରେ ମିଷ୍ଟର କାଛୁୟା ୱାକାଡା, ମଶାହାରେ ନାକାଗାୱା, ମିଷ୍ଟର ନାୱକାଜୁ ତାକେମୋତ ଏବଂ ମିଷ୍ଟର ୟୁସିଆକି ୱାଡା ସାମିଲ ହୋଇଥିଲେ ।
ଏହି ପ୍ରତିନିଧି ଦଳ ଜାମ୍ମୁ-କାଶ୍ମୀରର ଉରିଠାରେ ସେପ୍ଟେମ୍ବର 18 ତାରିଖରେ ଘଟିଥିବା ସୀମାପାର ଆତଙ୍କବାଦ ଆକ୍ରମଣରେ ମୃତ ସୈନିକଙ୍କ ପ୍ରତି ଶୋକ ଓ ସମବେଦନା ପ୍ରକଟ କରିଥିଲେ ।
ଆତଙ୍କବାଦ ବିରୋଧରେ ଆନ୍ତର୍ଜାତିକ ସହଯୋଗ ଏବଂ ରାଷ୍ଟ୍ର ସମର୍ଥିତ ଆତଙ୍କବାଦକୁ ଏକଘରିକିଆ କରିବା ଲାଗି ବୈଶ୍ୱିକସ୍ତରରେ ସମ୍ମିଳିତ ପ୍ରୟାସ ପାଇଁ ପ୍ରଧାନମନ୍ତ୍ରୀଙ୍କ ଆହ୍ୱାନକୁ ଜାପାନ-ଭାରତ ସାଂସଦ ମୈତ୍ରୀ ଲିଗ୍ ସ୍ୱାଗତ ଓ ସମର୍ଥନ କରିଥିଲେ ।
ପ୍ରଧାନମନ୍ତ୍ରୀ 2014ରେ ତାଙ୍କର ସଫଳ ଜାପାନ ଗସ୍ତକୁ ଏହି ଅବସରରେ ସ୍ମରଣ କରିଥିଲେ । ସେ ଟୋକିଓଠାରେ ଜାପାନ-ଭାରତ ସାଂସଦ ମୈତ୍ରୀ ଲିଗର ସଦସ୍ୟମାନଙ୍କୁ ଭେଟି ଆଲୋଚନା କରିଥିବା ବିଷୟକୁ ମଧ୍ୟ ମନେ ପକାଇଥିଲେ । ଭବିଷ୍ୟତ ପାଇଁ ଏକ ସୁଦୃଢ଼ ଓ ବହୁମୂଖୀ ସହଭାଗୀତାର ପୁନାଦି ପ୍ରତିଷ୍ଠା କ୍ଷେତ୍ରରେ ଭାରତ-ଜାପାନର ମିଳିତ ଉଦ୍ୟମକୁ ପ୍ରଧାନମନ୍ତ୍ରୀ ଦୋହରାଇଥିଲେ ।
ଭାରତ ସହ ସମ୍ପର୍କକୁ ସୁଦୃଢ଼ କରିବା ଦିଗରେ ଜାପାନର ସବୁ ଦଳର ପୂର୍ଣ୍ଣ ସହମତି ରହିଛି । ବିଶେଷକରି ଉଚ୍ଚ ପ୍ରଯୁକ୍ତି କୌଶଳ କ୍ଷେତ୍ରରେ ସହଯୋଗ, ଦୃତଗାମୀ ରେଳ ସେବା ଆଦି କ୍ଷେତ୍ରରେ ଦ୍ୱିପାକ୍ଷିକ ଭାଗିଦାରୀତାକୁ ଜାପାନ-ଭାରତ ସାଂସଦ ମୈତ୍ରୀ ଲିଗ ସ୍ୱାଗତ କରିଛନ୍ତି ।
ଆମ ଦୁଇ ଦେଶର ସମ୍ବନ୍ଧକୁ ପ୍ରଗାଢ଼ କରିବା କ୍ଷେତ୍ରରେ ପ୍ରଧାନମନ୍ତ୍ରୀ ସିଞ୍ଜୋ ଆବେଙ୍କ 2015 ଭାରତ ଗସ୍ତ ଐତିହାସିକ ସମ୍ପର୍କର ଏକ ମାଇଲ ଖୁଣ୍ଟ ସାବ୍ୟସ୍ତ ହୋଇଛି ବୋଲି ପ୍ରଧାନମନ୍ତ୍ରୀ ସ୍ମରଣ କରିଥିଲେ । ନିକଟ ଭବିଷ୍ୟତରେ ସେ ତାଙ୍କର ଜାପାନ ଗସ୍ତକୁ ଆଗ୍ରହର ସହ ଅପେକ୍ଷା କରିଛନ୍ତି ବୋଲି ପ୍ରଧାନମନ୍ତ୍ରୀ କହିଥିଲେ ।
