ଆତ୍ମନିର୍ଭର ଭାରତ ନିର୍ମାଣ ଅଭିଯାନର ଅଂଶସ୍ୱରୂପ ଦେଶରେ ସେମିକଣ୍ଡକ୍ଟରର ବିକାଶ ସହିତ ଡିସ୍ପ୍ଲେ ଭଳି ବିଭିନ୍ନ ଇଲେକ୍ଟ୍ରୋନିକ୍ସ ସାମଗ୍ରୀର ଉତ୍ପାଦନ ବଢ଼ାଇ ଏଥିରେ ଆତ୍ମନିର୍ଭରଶୀଳ ହେବାକୁ ସରକାର ନିଷ୍ପତ୍ତି ନେଇଛନ୍ତି । ସେମିକଣ୍ଡକ୍ଟର ଓ ଅନ୍ୟାନ୍ୟ ଇଲେକ୍ଟ୍ରୋନିକ୍ସ ସାମଗ୍ରୀ ଉତ୍ପାଦନରେ ଭାରତକୁ ବିଶ୍ୱର ଉତ୍ପାଦନ ହବ୍ କରିବା ଲକ୍ଷ୍ୟରେ କେନ୍ଦ୍ର କ୍ୟାବିନେଟ ଏ ସଂକ୍ରାନ୍ତ ବିଭିନ୍ନ ପ୍ରସ୍ତାବକୁ ଅନୁମୋଦନ କରିଛି ।
କ୍ୟାବିନେଟର ଅନୁମୋଦିତ ପ୍ରସ୍ତାବ ଅନୁସାରେ ଏହି କ୍ଷେତ୍ରରେ ଉତ୍ପାଦନ ବୃଦ୍ଧି ପାଇଁ ସରକାର ୨,୩୦,୦୦୦ କୋଟି ଟଙ୍କାର ପ୍ରୋତ୍ସାହନ ରାଶି ସଂପୃକ୍ତ ଉତ୍ପାଦକଙ୍କୁ ଯୋଗାଇଦେବେ । ଏଥିପାଇଁ ୭୬,୦୦୦ କୋଟି ଟଙ୍କା ବା ପ୍ରାୟ ୧୦ ବିଲିୟନ ଡଲାର ଆମେରିକୀୟ ମୁଦ୍ରା ବ୍ୟୟ କରାଯାଇ ଆବଶ୍ୟକ ପରିବେଶ ସୃଷ୍ଟି କରାଯିବ । ସେମିକଣ୍ଡକ୍ଟରର ମାନ ବୃଦ୍ଧି ସହିତ ଏହାର ଉତ୍ପାଦନ ବଢ଼ାଇବା ପାଇଁ ଦେଶରେ ସେମିକଣ୍ଡକ୍ଟର ମିଶନ ଆରମ୍ଭ କରିବାକୁ କ୍ୟାବିନେଟର ଅନୁମୋଦନ ମିଳିଛି । ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କ୍ୟାବିନେଟ ବୈଠକରେ ଏହି ଗୁରୁତ୍ୱପୂର୍ଣ୍ଣ ନିଷ୍ପତ୍ତିମାନ ଗ୍ରହଣ କରାଯାଇଛି ।
ଏହି ପ୍ରସ୍ତାବ ଅନୁମୋଦନର ଲକ୍ଷ୍ୟ ହେଲା ଭାରତରେ ଉନ୍ନତମାନ ଅଧିକ କାଳ ତିଷ୍ଠୁଥିବା ସେମିକଣ୍ଡକ୍ଟର ତଥା ବିଭିନ୍ନ ପ୍ରକାରର ଡିସ୍ପ୍ଲେ ଓ ଇଲେକ୍ଟ୍ରୋନିକ୍ସ ସାମଗ୍ରୀ ଉତ୍ପାଦନ ବୃଦ୍ଧି କରି ଏହାକୁ ଏକ ଆନ୍ତର୍ଜାତିକ ହବ୍ରେ ପରିଣତ କରିବା । ଏଥିପାଇଁ ଉତ୍ତମ ଉତ୍ପାଦନ ପରିବେଶ ସୃଷ୍ଟି କରିବାକୁ ସରକାର ଉତ୍ପାଦକ ଓ ନିବେଶକମାନଙ୍କୁ ବିଶ୍ୱସ୍ତରୀୟ ପ୍ରୋତ୍ସାହନ ତଥା ସୁବିଧା ସୁଯୋଗ ଯୋଗାଇଦେବେ । ଏସବୁ ସାମଗ୍ରୀ ଉତ୍ପାଦନରେ ଆତ୍ମନିର୍ଭରଶୀଳ ହେବା ସହିତ ଆର୍ଥିକ ଦୃଷ୍ଟିରୁ ଦେଶକୁ ଏକ ଗୁରୁତ୍ୱପୂର୍ଣ୍ଣ ସ୍ଥିତି ପ୍ରଦାନ କରିବାକୁ ସରକାର ସେମିକଣ୍ଡକ୍ଟର ଅଭିଯାନ ମଧ୍ୟ ଆରମ୍ଭ କରିବେ । କେବଳ ଉତ୍ପାଦନ ନୁହେଁ ଏସବୁ ସାମଗ୍ରୀର ଡିଜାଇନ ମଧ୍ୟ ଭାରତରେ ତିଆରି କରାଯାଇ ନୂଆ ଯୁଗର ଆବଶ୍ୟକତାକୁ ପୂରଣ କରାଯିବ ।
ଉଦ୍ୟୋଗ ୪.୦ ଯୋଜନାରେ ସରକାର ଯେଉଁ ଡିଜିଟାଲ ଟ୍ରାନ୍ସଫରମେସନ ଲକ୍ଷ୍ୟ ରଖିଛନ୍ତି ସେହି ପର୍ଯ୍ୟାୟର ଶିଳ୍ପାୟନରେ ଉତ୍ତମମାନର ସେମିକଣ୍ଡକ୍ଟର ଓ ଆଧୁନିକ ଇଲେକଟ୍ରୋନିକ୍ସ ସାମଗ୍ରୀର ଗୁରୁତ୍ୱ ବହୁ ଅଧିକ । ସେମିକଣ୍ଟକ୍ଟର ଓ ଡିସ୍ପ୍ଲେ ସାମଗ୍ରୀର ନିର୍ମାଣ ଅତ୍ୟନ୍ତ ଜଟିଳ ତଥା ଏହା ଏକ ପ୍ରଯୁକ୍ତିସଘନ କ୍ଷେତ୍ର । ଏଥିପାଇଁ ବିପୁଳ ପୁଂଜିନିବେଶର ଆବଶ୍ୟକତା ରହିଥିବାବେଳେ ଉତ୍ପାଦନ ପାଇଁ ଅଧିକ ସମୟ ଲାଗିଥାଏ । ଏହି ଉଦ୍ୟୋଗରେ ମଧ୍ୟ କ୍ଷତିର ଆଶଙ୍କା ଅଧିକ । ଏହାକୁ ସାମଗ୍ରୀର ଟେକ୍ନୋଲୋଜି ଅତି ଶୀଘ୍ର ବଦଳୁଥିବାରୁ ସମୟ ସହିତ ତାଳ ଦେଇ ଆଗେଇବାକୁ ପଡିଥାଏ । ତେଣୁ ପୁଂଜିନିବେଶ କରିବାମାତ୍ରେ ଶୀଘ୍ର ଉତ୍ପାଦନ ଓ ଲାଭ ଏହି କ୍ଷେତ୍ରରୁ ମିଳିନଥାଏ । ସେଥିପାଇଁ ଏହି ଉଦ୍ଦେଶ୍ୟରେ ନିରନ୍ତର ପୁଂଜିନିବେଶର ଆବଶ୍ୟକତା ରହିଛି ।
ତଥାପି ସରକାର ଏହି ଉଦ୍ୟୋଗ ପାଇଁ ବିପୁଳ ପ୍ରୋତ୍ସାହନ ରାଶି ଓ ନିବେଶର ବ୍ୟବସ୍ଥା କରିଥିବାରୁ ଏହାର ଲକ୍ଷ୍ୟ ପୂରଣ ସହଜ ହେବ । ଏହା ବ୍ୟତୀତ ସରକାର ଏଥିପାଇଁ ମଧ୍ୟ ପୁଂଜି ଓ ପ୍ରଯୁକ୍ତି ସହାୟତା ଯୋଗାଇବେ । ଏସବୁ ପଦକ୍ଷେପ ଫଳରେ ଦେଶ ସେମିକଣ୍ଡକ୍ଟର, ଡିସ୍ପ୍ଲେ ଓ ଇଲେକଟ୍ରୋନିକ୍ସ ସାମଗ୍ରୀ ଉତ୍ପାଦନରେ ଆତ୍ମନିର୍ଭରଶୀଳ ହେବା ସହିତ ଭାରତ ଏହାର ଏକ ଆନ୍ତର୍ଜାତିକ ଉତ୍ପାଦନ ହବ୍ ପାଲଟିବ ବୋଲି ଆଶା କରାଯାଉଛି । ବୈଷୟିକ ସହଯୋଗ ପାଇଁ ମଧ୍ୟ ସରକାର ଆଗ୍ରହୀ କଂପାନୀ ସମୂହଙ୍କୁ ସୁବିଧା ଯୋଗାଇଦେବାକୁ ନିଷ୍ପତ୍ତି ନେଇଛନ୍ତି ।
ସିଲିକନ୍ ସେମିକଣ୍ଡକ୍ଟର ଫ୍ୟାବ୍ସ, ଡିସ୍ପ୍ଲେ ଫ୍ୟାବ୍ସ, କଂପାଉଣ୍ଡ ସେମିକଣ୍ଡକ୍ଟର/ସିଲିକନ ଫଟୋନିକ୍ସ/ସେନ୍ସର/ଏମ୍ଇଏମ୍ଏସ୍ ସେମିକଣ୍ଡକ୍ଟର ଫ୍ୟାବ୍ସ ଜି (ଏଟିଏମପି/ଓଏସଟି) ଏବଂ ସେମିକଣ୍ଡକ୍ଟର ଡିଜାଇନ୍ ଆଦି ତିଆରି କରୁଥିବା କଂପାନୀ ଏବଂ କନେସାଟିୟମଗୁଡ଼ିକୁ ସରକାର ଏ ଦିଗରେ ଆକର୍ଷଣୀୟ ପ୍ରୋତ୍ସାହନ ରାଶି ଯୋଗାଇବେ ।
ସରକାର ଏ କ୍ଷେତ୍ରରେ ଯେଉଁସବୁ ପ୍ରୋତ୍ସାହନ ଯୋଗାଇବେ ତାହା ନିମ୍ନରେ ପ୍ରଦାନ କରାଯାଇଛି ।
ସେମିକଣ୍ଡକ୍ଟର ଫ୍ୟାବ୍ସ ଓ ଡିସ୍ପ୍ଲେ ଫ୍ୟାବ୍ସ : ଏହି ଦୁଇ କ୍ଷେତ୍ରରେ ଭାରତରେ ଉଦ୍ୟୋଗ ସ୍ଥାପନ କଲେ ସଂପୃକ୍ତ ଉଦ୍ୟୋଗପତିଙ୍କୁ ପ୍ରକଳ୍ପ ମୂଲ୍ୟର ୫୦ ଟଙ୍କା ଯାଏ ଆର୍ଥିକ ସହାୟତା ଯୋଗାଇ ଦିଆଯିବ । ଯେଉଁ ଆବେଦନକାରୀଙ୍କ ପାଖରେ ଏଥିପାଇଁ ଟେକ୍ନୋଲୋଜି ଓ ସାମର୍ଥ୍ୟ ଥିବ ସେମାନଙ୍କୁ ଏ କ୍ଷେତ୍ରରେ ଅଗ୍ରାଧିକାର ପ୍ରଦାନ କରାଯିବ । ଭାରତ ସରକାର ଏଥିପାଇଁ ରାଜ୍ୟ ସରକାରଙ୍କ ସହ ନିବିଡ଼ ସଂପର୍କ ରଖି କାର୍ଯ୍ୟ କରିବେ । ଆଗ୍ରହୀ ଉଦ୍ୟୋକ୍ତାଙ୍କୁ ହାଇଟେକ୍ କ୍ଲଷ୍ଟରମାନ ସୃଷ୍ଟିକରି ଜମି, ଜଳ, ଉନ୍ନତମାନର ବିଜୁଳି, ଅନ୍ୟାନ୍ୟ ଆବଶ୍ୟକ ସାମଗ୍ରୀ, ଗବେଷଣା ସୁବିଧା ଓ ଅନ୍ୟାନ୍ୟ ଭିତ୍ତିଭୂମି ଯୋଗାଇ ଦିଆଯିବ । ପ୍ରତ୍ୟେକ ଯୋଗ୍ୟ ଆବେଦନକାରୀଙ୍କୁ ଦେଶରେ ଅତିକମରେ ଦୁଇଟି ଲେଖାଏଁ ସଂପୂର୍ଣ୍ଣ ନୂଆ ସେମିକଣ୍ଡକ୍ଟର ଓ ଡିସ୍ପ୍ଲେ ଫ୍ୟାବ୍ସ ନିର୍ମାଣ କରିବାକୁ ଅନୁମତି ଦିଆଯିବ ।
ସେମିକଣ୍ଡକ୍ଟର ଲ୍ୟାବ : କେନ୍ଦ୍ର କ୍ୟାବିନେଟର ନିଷ୍ପତ୍ତି ଅନୁସାରେ ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତି ମନ୍ତ୍ରଣାଳୟ ସେମିକଣ୍ଡକ୍ଟର ଲାବରେଟରୀର ଆଧୁନିକୀକରଣ ଓ ବ୍ୟାବସାୟୀକରଣ ପାଇଁ ପଦକ୍ଷେପ ଗ୍ରହଣ କରିବ । ଏହି କାର୍ଯ୍ୟରେ ଯୋଗ୍ୟ ଅଂଶୀଦାର ବାଛିବାକୁ ମଧ୍ୟ ମନ୍ତ୍ରଣାଳୟକୁ କ୍ଷମତା ପ୍ରଦାନ କରାଯାଇଛି ।
କଂପାଉଣ୍ଡ ସେମିକଣ୍ଡକ୍ଟର/ସିଲିକନ ଫଟୋନିକ୍ସ/ସେନ୍ସର ଫ୍ୟାବ୍ସ ଓ ସେମିକଣ୍ଡକ୍ଟର ଏଟିଏମ୍ପି/ଓଏସ୍ଏଟି ୟୁନିଟ୍ : ଏ କ୍ଷେତ୍ରରେ ସରକାରୀ ଅନୁମୋଦନ ପାଇଥିବା ୟୁନିଟ୍ ବା ଉଦ୍ୟୋଗଗୁଡ଼ିକୁ ସରକାର ପୁଂଜିଗତ ବ୍ୟୟ (କ୍ୟାପିଟାଲ ଏକ୍ସପେଣ୍ଡିଚର)ର ୩୦ ଶତାଂଶ ପର୍ଯ୍ୟନ୍ତ ଅର୍ଥ ପ୍ରୋତ୍ସାହନ ଆକାରରେ ଯୋଗାଇ ଦେବେ । ଏହି ଯୋଜନାରେ ଦେଶରେ ଅତିକମ୍ରେ ୧୫ଟି କମ୍ପାଉଣ୍ଡ ସେମିକଣ୍ଡକ୍ଟର ଓ ସେମିକଣ୍ଡକ୍ଟର ଫ୍ୟାବ୍ସଜି ୟୁନିଟ ସ୍ଥାନପ କରିବାକୁ ସରକାର ଲକ୍ଷ୍ୟ ରଖିଛନ୍ତି ।
ସେମିକଣ୍ଡକ୍ଟର ଡିଜାଇନ୍ କଂପାନୀ : ଡିଜାଇନ୍ ଭିତ୍ତିକ ପ୍ରୋତ୍ସାହନ (ଡିଏଲ୍ଆର) ଯୋଜନାରେ ସେମିକଣ୍ଡକ୍ଟର ଡିଜାଇନ କଂପାନୀଗୁଡ଼ିକୁ ଯଥାଯଥ ଖର୍ଚ୍ଚର ୫୦ ଶତାଂଶ ପର୍ଯ୍ୟନ୍ତ ଅର୍ଥ ସହାୟତା ମିଳିବ । ଏହାଛଡ଼ା ସାମଗ୍ରୀ ବିକି୍ର କ୍ଷେତ୍ରରେ ନିଟ୍ ବିକି୍ର ଉପରେ ପାଞ୍ଚବର୍ଷ ପର୍ଯ୍ୟନ୍ତ ୬ ରୁ ୪ ଶତାଂଶ ଯାଏ ପ୍ରୋତ୍ସାହନ ଅର୍ଥ ସରକାର ଯୋଗାଇଦେବେ । ଏ କ୍ଷେତ୍ରରେ ୧୦୦ଟି ଘରୋଇ କମ୍ପାନୀକୁ ଇଣ୍ଟିଗ୍ରେଟେଡ୍ ସର୍କିଟ୍, ଚିପ୍ସେଟସ, ଏସ୍ଓସିଏସ୍ ଓ ଅନ୍ୟାନ୍ୟ ସେମିକଣ୍ଡକ୍ଟର କ୍ଷେତ୍ରରେ ସହାୟତା ଯୋଗାଇ ଦିଆଯିବ । ଆସନ୍ତା ପାଞ୍ଚବର୍ଷ ମଧ୍ୟରେ ଯେଉଁ ୨୦ଟି ଏଭଳି କଂପାନୀ ୧୫୮୦ କୋଟି ଟଙ୍କାରୁ ଅଧିକ କାରବାର କରିବେ ସେମାନଙ୍କ ପାଇଁ ମଧ୍ୟ ପ୍ରଡକ୍ଟ ଡିଜାଇନରେ ପ୍ରୋତ୍ସାହନ ଯୋଗାଣର ବ୍ୟବସ୍ଥା ହୋଇଛି ।
ଇଣ୍ଡିଆ ସେମିକଣ୍ଡକ୍ଟର ମିଶନ : ସେମିକଣ୍ଡକ୍ଟର ଓ ଡିସ୍ପ୍ଲେ ଆଦି ଇଲେକ୍ଟ୍ରୋନିକ୍ସ ସାମଗ୍ରୀ ଉତ୍ପାଦନ ପାଇଁ ଦେଶରେ ଏକ ଉପଯୁକ୍ତ ପରିବେଶ ସୃଷ୍ଟି କରିବା ପାଇଁ ସ୍ୱତନ୍ତ୍ର ଭାବେ ଇଣ୍ଡିଆ ସେମିକଣ୍ଡକ୍ଟର ମିଶନ (ଆଇଏସ୍ଏମ୍) ଗଠନ କରାଯିବ । ସଂପୃକ୍ତ କ୍ଷେତ୍ରର ବିଶ୍ୱସ୍ତରୀୟ ବିଶେଷଜ୍ଞ ଓ ଉଦ୍ୟୋଗସମୂହ ଏହାର ନେତୃତ୍ୱ ନେବେ । ଏହି ମିଶନ ଏ କ୍ଷେତ୍ରରେ ନୋଡାଲ ଏଜେନ୍ସି ଭାବେ କାମ କରିବ ।
ସେମିକଣ୍ଡକ୍ଟର ଓ ଇଲେକ୍ଟ୍ରୋନିକ କ୍ଷେତ୍ରପାଇଁ ବିତ୍ତୀୟ ସହାୟତା ବ୍ୟବସ୍ଥା : ଏହି ଦୁଇ କ୍ଷେତ୍ରପାଇଁ ସରକାର ଆର୍ଥôକ ସହାୟତା ଓ ସମର୍ଥନ ଯୋଗାଇ ଦେବାକୁ ନିଷ୍ପତ୍ତି ନେଇଛନ୍ତି । ଏହି ଉଦ୍ୟୋଗ ପାଇଁ ୭୬ ହଜାର କୋଟି ଟଙ୍କାର ବ୍ୟୟ ବରାଦ କରାଯାଇଛି ଯାହାର ପରିମାଣ ଆମେରିକୀୟ ମୁଦ୍ରାରେ ୧୦ ବିଲିୟନ ଡଲାର । ଯୋଗାଣ ବ୍ୟବସ୍ଥାର ପ୍ରତ୍ୟେକ ଅଂଶ ନିମନ୍ତେ ସରକାର ଆର୍ଥିକ ସମର୍ଥନ ଯୋଗାଇ ଦେବାକୁ ଘୋଷଣା କରିଛନ୍ତି । ଏଥିରେ ଇଲେକ୍ଟ୍ରୋନିକ୍ସ କମ୍ପୋନେଣ୍ଟ, ସବ୍ଆସେମ୍ବ୍ଲି ଓ ଫିନିସଗୁଡ୍ସ ଅନ୍ତର୍ଭୁକ୍ତ । ବୃହତ୍ ଇଲେକଟ୍ରୋନିକ୍ସ ଉଦ୍ୟୋଗ ପାଇଁ ପିଏଲ୍ଆର ଯୋଜନାରେ ୫୫,୩୯୨ କୋଟି ଟଙ୍କାର ପ୍ରୋତ୍ସାହନ ରାଶି ଯୋଗାଣର ବ୍ୟବସ୍ଥା କରାଯାଇଛି । ଏସିସି ବ୍ୟାଟେରୀ, ଅଟୋ କଂପୋନେଟ୍, ଟେଲିକମ୍ ଓ ନେଟ୍ୱାର୍କିଂ ସାମଗ୍ରୀ, ସୋଲାର ପିଭି ମଡ୍ୟୁଲ୍ସ ଓ ଅନ୍ୟାନ୍ୟ ଇଲେକ୍ଟ୍ରୋନିକ୍ସ ସାମଗ୍ରୀ କ୍ଷେତ୍ରରେ ୯୮ ହଜାର କୋଟି ଟଙ୍କାର ପ୍ରୋତ୍ସାହନ ରାଶି ପିଏଲ୍ଆର ଯୋଜନାରେ ଯୋଗାଇ ଦେବାର ବ୍ୟବସ୍ଥା ହୋଇଛି ।
ଭାରତ ସରକାର ମୋଟାମୋଟି ଭାବେ ଦେଶରେ ଇଲେକ୍ଟ୍ରୋନିକ୍ସ ଓ ସେମିକଣ୍ଡକ୍ଟର ଉଦ୍ୟୋଗର ବିକାଶ ପାଇଁ ୨୩୦,୦୦୦ କୋଟି ଟଙ୍କାର ସହାୟତା ରାଶି ଯୋଗାଇଦେବାକୁ ବ୍ୟବସ୍ଥା କରିଛନ୍ତି ।
ବର୍ତ୍ତମାନର ବିଶ୍ୱ ଓ ଆଞ୍ଚଳିକ ରାଜନୀତି ପରିପ୍ରେକ୍ଷୀରେ ଦେଶର ସୂଚନା ଭିତ୍ତିଭୂମିର ସ୍ୱାଧୀନତା ଓ ଆତ୍ମନିର୍ଭରଶୀଳତା ବିଶେଷ ଗୁରୁତ୍ୱ ରଖେ । ଏଥିପାଇଁ ସେମିକଣ୍ଡକ୍ଟର, ଚିପ୍ସ ଓ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଇଲେକ୍ଟ୍ରୋନିକ୍ସ ସାମଗ୍ରୀର ଗୁରୁତ୍ୱ ଅଧିକ । ଏ କ୍ଷେତ୍ରରେ ଦେଶ ଆତ୍ମନିର୍ଭରଶୀଳ ହେବା ସହିତ ବ୍ୟାପକ ନିଯୁକ୍ତି ସୁଯୋଗ ସୃଷ୍ଟି କରିବାକୁ ଆଗ୍ରହୀ । ଭାରତକୁ ଏସବୁ ସାମଗ୍ରୀର ଏକ ବୈଶ୍ୱିକ ହବରେ ପରିଣତ କରି ସରକାର ଏହାର ଆର୍ଥିକ ଲାଭ ଉଠାଇବାକୁ ଚାହୁଛନ୍ତି । ଏହା ମଧ୍ୟ ଦେଶର ଅର୍ଥନୀତିର ବିଭିନ୍ନ କ୍ଷେତ୍ରକୁ ପ୍ରୋତ୍ସାହିତ କରିବ। ଭାରତ ମଧ୍ୟ ଆନ୍ତର୍ଜାତିକ ଯୋଗାଣ ବ୍ୟବସ୍ଥାରେ ସାମିଲ ହୋଇ ଏ କ୍ଷେତ୍ରରେ ଏକ ନିର୍ଣ୍ଣାୟକ ଭୂମିକା ନେବ ।
୨୦୨୫ ସୁଦ୍ଧା ଏକ ଟ୍ରିଲିୟନ୍ ଡିଜିଟାଲ ଅର୍ଥନୀତି ସହିତ ଦେଶର ଅର୍ଥନୀତିକୁ ୫ ଟ୍ରିଲିୟନ୍ ଡଲାରରେ ପହଞ୍ଚାଇବାକୁ ଭାରତ ସରକାର ଯେଉଁ ଲକ୍ଷ୍ୟ ରଖିଛନ୍ତି ତାହାକୁ ଏହା ପୂରଣ କରିବାରେ ବିଶେଷ ସହାୟକ ହେବ ।
