ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ಇಂದು ವಿಡಿಯೋ ಕಾನ್ಫರೆನ್ಸಿಂಗ್ ಮೂಲಕ ಬಿಹಾರದ ಮುಖ್ಯಮಂತ್ರಿ ಮಹಿಳಾ ರೋಜ್ಗಾರ್ ಯೋಜನೆಯ ಫಲಾನುಭವಿಗಳೊಂದಿಗೆ ಸಂವಾದ ನಡೆಸಿದರು.
ಬಿಹಾರದ ಪಶ್ಚಿಮ ಚಂಪಾರಣ್ ಜಿಲ್ಲೆಯ ಬುಡಕಟ್ಟು ಮಹಿಳಾ ಫಲಾನುಭವಿ ಶ್ರೀಮತಿ ರಂಜೀತಾ ಕಾಜಿ ಅವರು ತಮ್ಮ ಪ್ರದೇಶದಲ್ಲಿ ತಂದ ಪರಿವರ್ತನಾತ್ಮಕ ಬದಲಾವಣೆಗಳಿಗಾಗಿ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಮತ್ತು ಮುಖ್ಯಮಂತ್ರಿ ಶ್ರೀ ನಿತೀಶ್ ಕುಮಾರ್ ಅವರಿಗೆ ಹೃತ್ಪೂರ್ವಕ ಕೃತಜ್ಞತೆಗಳನ್ನು ಸಲ್ಲಿಸಿದರು. ಜೀವಿಕಾ ಸ್ವಸಹಾಯ ಗುಂಪಿನೊಂದಿಗೆ ಸಂಬಂಧ ಹೊಂದಿದ್ದ ಅವರು, ಒಂದು ಕಾಲದಲ್ಲಿ ಮೂಲಭೂತ ಮೂಲಸೌಕರ್ಯಗಳಿಂದ ವಂಚಿತವಾಗಿದ್ದ ತಮ್ಮ ಅರಣ್ಯ ಪ್ರದೇಶವು ಈಗ ರಸ್ತೆಗಳು, ವಿದ್ಯುತ್, ನೀರು, ನೈರ್ಮಲ್ಯ ಮತ್ತು ಶಿಕ್ಷಣದ ಪ್ರವೇಶವನ್ನು ಹೊಂದಿದೆ ಎಂದು ಎತ್ತಿ ತೋರಿಸಿದರು. ಸರ್ಕಾರಿ ಉದ್ಯೋಗಗಳು ಮತ್ತು ಪಂಚಾಯತ್ ರಾಜ್ ಸಂಸ್ಥೆಗಳಲ್ಲಿ ಮಹಿಳಾ ಪ್ರಾತಿನಿಧ್ಯವನ್ನು ಹೆಚ್ಚಿಸಿರುವ ಮೀಸಲಾತಿ ನಿಬಂಧನೆಗಳು ಸೇರಿದಂತೆ ಮಹಿಳೆಯರ ಮೇಲೆ ಗಮನ ಕೇಂದ್ರೀಕರಿಸಿದ ಉಪಕ್ರಮಗಳಿಗಾಗಿ ಅವರು ಮುಖ್ಯಮಂತ್ರಿಯವರಿಗೆ ಧನ್ಯವಾದಗಳನ್ನು ಅರ್ಪಿಸಿದರು. ಹುಡುಗಿಯರು ಶಾಲಾ ಸಮವಸ್ತ್ರದಲ್ಲಿ ಸೈಕಲ್ ಸವಾರಿ ಮಾಡುವಾಗ ಅನುಭವಿಸುವ ಹೆಮ್ಮೆಯತ್ತ ಅವರು ಗಮನ ಸೆಳೆದರು, ಸೈಕಲ್ ಮತ್ತು ಸಮವಸ್ತ್ರ ಯೋಜನೆಗಳನ್ನು ಶ್ಲಾಘಿಸಿದರು.
ಮಹಿಳೆಯರಿಗೆ ಕಡಿಮೆ ಬೆಲೆಯಲ್ಲಿ ಗ್ಯಾಸ್ ಸಿಲಿಂಡರ್ಗಳನ್ನು ಒದಗಿಸುವುದು, ಹೊಗೆ ತುಂಬಿದ ಅಡುಗೆಮನೆಗಳಿಂದ ಅವರನ್ನು ಮುಕ್ತಗೊಳಿಸುವುದು ಮತ್ತು ಅವರ ಆರೋಗ್ಯವನ್ನು ಸುಧಾರಿಸುವ ಉಜ್ವಲ ಯೋಜನೆಗಾಗಿ ರಂಜೀತಾ ಪ್ರಧಾನ ಮಂತ್ರಿಗಳನ್ನು ಶ್ಲಾಘಿಸಿದರು. ವಸತಿ ಯೋಜನೆಯ ಪ್ರಯೋಜನಗಳನ್ನು ಅವರು ಗುರುತಿಸಿದರು, ಅದರ ಅಡಿಯಲ್ಲಿ ಅವರು ಈಗ ಪಕ್ಕಾ ಮನೆಯಲ್ಲಿ ವಾಸಿಸುತ್ತಿದ್ದಾರೆ.
ಮುಖ್ಯಮಂತ್ರಿಯವರು ಇತ್ತೀಚೆಗೆ ಕೈಗೊಂಡ 125 ಯೂನಿಟ್ ಉಚಿತ ವಿದ್ಯುತ್ ಒದಗಿಸುವ ಮತ್ತು ಪಿಂಚಣಿಗಳನ್ನು ₹400 ರಿಂದ ₹1,100 ಕ್ಕೆ ಹೆಚ್ಚಿಸುವ ನಿರ್ಧಾರಕ್ಕೆ ಅವರು ಮೆಚ್ಚುಗೆ ವ್ಯಕ್ತಪಡಿಸಿದರು, ಇದು ಮಹಿಳೆಯರ ಆತ್ಮವಿಶ್ವಾಸವನ್ನು ಹೆಚ್ಚಿಸಿದೆ. ಮುಖ್ಯಮಂತ್ರಿ ಮಹಿಳಾ ರೋಜ್ಗಾರ್ ಯೋಜನೆಯಡಿಯಲ್ಲಿ, ಅವರು ಆರಂಭಿಕ ₹10,000 ವನ್ನು ಜೋಳ ಮತ್ತು ಬಾಜ್ರಾ ಕೃಷಿಗಾಗಿ ಪಂಪ್ ಸೆಟ್ ಖರೀದಿಸಲು ಮತ್ತು ನಂತರ ₹2 ಲಕ್ಷವನ್ನು ದೇಶೀಯ ಧಾನ್ಯಗಳನ್ನು ಉತ್ತೇಜಿಸುವ ಹಿಟ್ಟು ವ್ಯವಹಾರವನ್ನು ಪ್ರಾರಂಭಿಸಲು ಹೂಡಿಕೆ ಮಾಡಲು ಯೋಜಿಸಿದ್ದಾರೆ.
ಅಂತಹ ಬೆಂಬಲವು ಜೀವನೋಪಾಯವನ್ನು ಬಲಪಡಿಸುತ್ತದೆ ಮತ್ತು ಮಹಿಳೆಯರು ಲಖ್ಪತಿ ದೀದಿಗಳಾಗಲು ದಾರಿ ಮಾಡಿಕೊಡುತ್ತದೆ ಎಂದು ರಂಜೀತಾ ದೃಢಪಡಿಸಿದರು. ತಮ್ಮ ಪ್ರದೇಶದ ಮಹಿಳೆಯರು ನವರಾತ್ರಿಯ ಜೊತೆಗೆ ಮುಖ್ಯಮಂತ್ರಿ ಮಹಿಳಾ ರೋಜ್ಗಾರ್ ಯೋಜನೆಯನ್ನು ಹಬ್ಬವಾಗಿ ಆಚರಿಸುತ್ತಿದ್ದಾರೆ ಎಂದು ಅವರು ಹಂಚಿಕೊಂಡರು. ಪಶ್ಚಿಮ ಚಂಪಾರಣ್ನ ಎಲ್ಲಾ ದೀದಿಗಳ ಪರವಾಗಿ, ಅವರು ಇಬ್ಬರೂ ನಾಯಕರ ನಿರಂತರ ಬೆಂಬಲಕ್ಕಾಗಿ ತಮ್ಮ ಹೃತ್ಪೂರ್ವಕ ಧನ್ಯವಾದಗಳನ್ನು ಮತ್ತು ಆಳವಾದ ಕೃತಜ್ಞತೆಯನ್ನು ವ್ಯಕ್ತಪಡಿಸಿದರು.
ಭೋಜ್ಪುರ ಜಿಲ್ಲೆಯ ಮತ್ತೊಬ್ಬ ಫಲಾನುಭವಿ ಶ್ರೀಮತಿ ರೀತಾ ದೇವಿ, ಅರಾಹ್ನ ಎಲ್ಲಾ ಮಹಿಳೆಯರ ಪರವಾಗಿ ಪ್ರಧಾನ ಮಂತ್ರಿ ಶ್ರೀ ನರೇಂದ್ರ ಮೋದಿ ಮತ್ತು ಮುಖ್ಯಮಂತ್ರಿ ಶ್ರೀ ನಿತೀಶ್ ಕುಮಾರ್ ಅವರಿಗೆ ಹೃತ್ಪೂರ್ವಕ ಶುಭಾಶಯಗಳನ್ನು ಸಲ್ಲಿಸಿದರು. 2015 ರಲ್ಲಿ ಸ್ವಸಹಾಯ ಗುಂಪಿಗೆ ಸೇರಿ ಭಯ್ಯಾ ಪಹಲ್ ಉಪಕ್ರಮದಡಿಯಲ್ಲಿ ₹5,000 ಪಡೆದಾಗ ಪ್ರಾರಂಭವಾದ ತಮ್ಮ ಸಬಲೀಕರಣದ ಪ್ರಯಾಣವನ್ನು ಅವರು ಹಂಚಿಕೊಂಡರು. ಈ ಮೊತ್ತದಿಂದ, ಅವರು ನಾಲ್ಕು ಮೇಕೆಗಳನ್ನು ಖರೀದಿಸಿ ತಮ್ಮ ಜೀವನೋಪಾಯವನ್ನು ಪ್ರಾರಂಭಿಸಿದರು. ಮೇಕೆ ಸಾಕಣೆಯಿಂದ ಬಂದ ಆದಾಯವು 50 ಕೋಳಿಗಳನ್ನು ಖರೀದಿಸಲು ಮತ್ತು ಮೊಟ್ಟೆ ಮಾರಾಟ ಮಾಡುವ ವ್ಯವಹಾರವನ್ನು ಪ್ರಾರಂಭಿಸಲು ಅವಕಾಶ ಮಾಡಿಕೊಟ್ಟಿತು, ಪ್ರತಿ ಮೊಟ್ಟೆಗೆ ₹15 ಬೆಲೆ ನಿಗದಿಪಡಿಸಲಾಯಿತು. ಮರಿಗಳನ್ನು ಮಾಡಲು ಮೀನು ಕಂಟೈನರ್ ಮತ್ತು ಬೆಳಕಿನ ಮೂಲವನ್ನು ಬಳಸುವ ಮೂಲಕ ಅವರು ಹೊಸತನವನ್ನು ಕಂಡುಕೊಂಡರು, ಇದು ಅವರ ಕುಟುಂಬದ ಆರ್ಥಿಕ ಸ್ಥಿತಿಯನ್ನು ಗಮನಾರ್ಹವಾಗಿ ಸುಧಾರಿಸಿತು.
ರೀತಾ ದೇವಿ ಹೆಮ್ಮೆಯಿಂದ ಹೇಳಿಕೊಂಡಿದ್ದೇನೆಂದರೆ, ಅವರು ಈಗ ಲಖಪತಿ ದೀದಿ ಮತ್ತು ಡ್ರೋನ್ ದೀದಿ ಎರಡೂ ಆಗಿದ್ದಾರೆ, ಇದು ಅವರ ಬೆಳವಣಿಗೆ ಮತ್ತು ಅಭಿವೃದ್ಧಿಯನ್ನು ಪ್ರತಿಬಿಂಬಿಸುತ್ತದೆ. ಮುಖ್ಯಮಂತ್ರಿ ಮಹಿಳಾ ರೋಜ್ಗಾರ್ ಯೋಜನೆಯನ್ನು ಪ್ರಾರಂಭಿಸಿದ್ದಕ್ಕಾಗಿ ಅವರು ಪ್ರಧಾನಮಂತ್ರಿ ಮತ್ತು ಮುಖ್ಯಮಂತ್ರಿಗೆ ಧನ್ಯವಾದಗಳನ್ನು ಅರ್ಪಿಸಿದರು, ಇದು ಹಳ್ಳಿಗಳು ಮತ್ತು ಸ್ಥಳೀಯ ಪ್ರದೇಶಗಳಿಗೆ ಅಪಾರ ಸಂತೋಷ ಮತ್ತು ಚಟುವಟಿಕೆಯನ್ನು ತಂದಿದೆ. ಜಿಲ್ಲೆಯಾದ್ಯಂತ ಮಹಿಳೆಯರು ವಿವಿಧ ಉದ್ಯಮಗಳನ್ನು ಪ್ರಾರಂಭಿಸಿದ್ದಾರೆ - ಕೆಲವರು ದನ ಸಾಕಣೆ, ಮೇಕೆ ಸಾಕಣೆ ಮತ್ತು ಇತರರು ಬಳೆ ಅಂಗಡಿಗಳನ್ನು ನಡೆಸುತ್ತಿದ್ದಾರೆ. ಮೊದಲ ₹10,000 ಕಂತು ಪಡೆದ ನಂತರ, ಚಳಿಗಾಲದಲ್ಲಿ ಹೆಚ್ಚುತ್ತಿರುವ ಮೊಟ್ಟೆಗಳ ಬೇಡಿಕೆಯನ್ನು ಪೂರೈಸಲು 100 ಕೋಳಿಗಳನ್ನು ಖರೀದಿಸಿದೆ ಎಂದು ರೀತಾ ಹಂಚಿಕೊಂಡರು. ನಂತರದ ₹2 ಲಕ್ಷ ಬೆಂಬಲದೊಂದಿಗೆ, ಅವರು ತಮ್ಮದೇ ಆದ ಕೋಳಿ ಸಾಕಣೆ ಕೇಂದ್ರವನ್ನು ಸ್ಥಾಪಿಸಿದರು ಮತ್ತು ತಮ್ಮ ವ್ಯವಹಾರವನ್ನು ವಿಸ್ತರಿಸಲು ಯಂತ್ರೋಪಕರಣಗಳನ್ನು ಸ್ಥಾಪಿಸಿದರು.
ಪ್ರಧಾನ ಮಂತ್ರಿ ಆವಾಸ್ ಯೋಜನೆ ಸೇರಿದಂತೆ ಇತರ ಸರ್ಕಾರಿ ಯೋಜನೆಗಳ ಪ್ರಭಾವವನ್ನು ಅವರು ಒಪ್ಪಿಕೊಂಡರು, ಮಳೆಗಾಲದಲ್ಲಿ ಸೋರಿಕೆಯಾಗುವ ತಮ್ಮ ಮಣ್ಣಿನ ಮನೆಯನ್ನು ಪಕ್ಕಾ ಮನೆಯಾಗಿ ಬದಲಾಯಿಸಲಾಯಿತು. ಸ್ವಚ್ಛ ಭಾರತ ಮಿಷನ್ ಅಡಿಯಲ್ಲಿ ಶೌಚಾಲಯಗಳ ನಿರ್ಮಾಣದಿಂದ ಉಂಟಾದ ಪರಿವರ್ತನೆಯನ್ನು ಅವರು ಎತ್ತಿ ತೋರಿಸಿದರು, ಇದು ಮಹಿಳೆಯರು ಹೊಲಗಳಿಗೆ ಹೋಗುವ ಅಗತ್ಯವನ್ನು ನಿವಾರಿಸಿದೆ ಎಂದರು. ಈಗ ಪ್ರತಿ ಮನೆಗೂ ಶೌಚಾಲಯವಿದೆ ಎಂದು ಅವರು ಹೇಳಿದರು. ನಲ್-ಜಲ್ ಯೋಜನೆಯ ಆಗಮನದೊಂದಿಗೆ, ಗ್ರಾಮಸ್ಥರು ಈಗ ಶುದ್ಧ ಕುಡಿಯುವ ನೀರಿಗೆ ಪ್ರವೇಶವನ್ನು ಹೊಂದಿದ್ದಾರೆ, ಇದರ ಪರಿಣಾಮವಾಗಿ ಗಮನಾರ್ಹ ಆರೋಗ್ಯ ಸುಧಾರಣೆಗಳಾಗಿವೆ ಎಂದರು. .
ಉಜ್ವಲ ಯೋಜನೆಯಡಿಯಲ್ಲಿ ಅನಿಲ ಸಂಪರ್ಕವನ್ನು ಪಡೆದ ನಂತರ, ಹಾನಿಕಾರಕ ಹೊಗೆಯನ್ನು ಉತ್ಪಾದಿಸುವ ಸಾಂಪ್ರದಾಯಿಕ ಒಲೆಗಳ ಮೇಲೆ ತಾನು ಅಡುಗೆ ಮಾಡುವ ಸ್ಥಿತಿ ನಿವಾರಣೆಯಾಗಿದೆ ಎಂದು ರೀತಾ ದೇವಿ ಹಂಚಿಕೊಂಡರು. ಅನಿಲದಲ್ಲಿ ಸುರಕ್ಷಿತವಾಗಿ ಅಡುಗೆ ಮಾಡಲು ಸಾಧ್ಯವಾಗುತ್ತಿರುವುದಕ್ಕೆ ಅವರು ಸಂತೋಷ ವ್ಯಕ್ತಪಡಿಸಿದರು. ಯಾವುದೇ ವೆಚ್ಚವಿಲ್ಲದೆ ₹5 ಲಕ್ಷದವರೆಗೆ ಉಚಿತ ವೈದ್ಯಕೀಯ ಚಿಕಿತ್ಸೆಯನ್ನು ಒದಗಿಸುವ ಆಯುಷ್ಮಾನ್ ಭಾರತ್ ಆರೋಗ್ಯ ಕಾರ್ಡ್ ಅನ್ನು ಸಹ ಅವರು ಶ್ಲಾಘಿಸಿದರು. 125 ಯೂನಿಟ್ ಉಚಿತ ವಿದ್ಯುತ್ ಒದಗಿಸುವಿಕೆಯು ಒಂದು ಕಾಲದಲ್ಲಿ ಕತ್ತಲೆಯಾಗಿದ್ದ ಮನೆಗಳಿಗೆ ಬೆಳಕನ್ನು ತಂದಿದೆ, ಮಕ್ಕಳು ಚಿಂತೆಯಿಲ್ಲದೆ ಅಧ್ಯಯನ ಮಾಡಲು ಅನುವು ಮಾಡಿಕೊಡುತ್ತದೆ ಎಂಬುದರತ್ತ ಅವರು ಗಮನ ಸೆಳೆದರು.
ಸರ್ಕಾರಿ ಯೋಜನೆಗಳಿಂದ ಮಹಿಳೆಯರು ಪ್ರಯೋಜನ ಪಡೆದಾಗ, ಅವರ ಮಕ್ಕಳಿಗೂ ಪ್ರಯೋಜನವಾಗುತ್ತದೆ ಎಂದು ಅವರು ಒತ್ತಿ ಹೇಳಿದರು. ಹಿಂದೆ, ಮಹಿಳೆಯರು ಶಿಕ್ಷಣಕ್ಕಾಗಿ ದೂರ ಪ್ರಯಾಣಿಸಬೇಕಾಗಿತ್ತು, ಆದರೆ ಈಗ ಅವರ ಮಕ್ಕಳಿಗೆ ಶಾಲೆಗೆ ಹೋಗಲು ಸೈಕಲ್ ಮತ್ತು ಸಮವಸ್ತ್ರ ಸಿಗುತ್ತದೆ. ಎಂದ ರೀತಾ ಸ್ವತಃ ಸೈಕಲ್ ಮತ್ತು ಸಮವಸ್ತ್ರವನ್ನು ಪಡೆದಿದ್ದನ್ನು ನೆನಪಿಸಿಕೊಂಡರು, ಇದು ಅವರಿಗೆ ಹೆಮ್ಮೆಯಿಂದ ಶಾಲೆಗೆ ಹೋಗಲು ಅವಕಾಶ ಮಾಡಿಕೊಟ್ಟಿತು ಎಂದರು. ಸರ್ಕಾರಿ ಯೋಜನೆಗಳ ಎಲ್ಲಾ ಪ್ರಯೋಜನಗಳಿಗಾಗಿ ಅವರು ಇಬ್ಬರೂ ನಾಯಕರಿಗೆ ಹೃತ್ಪೂರ್ವಕವಾಗಿ ಧನ್ಯವಾದಗಳನ್ನು ಅರ್ಪಿಸಿದರು.
ಇದಕ್ಕೆ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ಹೃತ್ಪೂರ್ವಕವಾಗಿ ಪ್ರತಿಕ್ರಿಯಿಸಿದರು, ಯೋಜನೆಗಳನ್ನು ಪಟ್ಟಿ ಮಾಡುವಲ್ಲಿ ಮತ್ತು ಅವುಗಳ ಪರಿಣಾಮವನ್ನು ವಿವರಿಸುವಲ್ಲಿ ರೀತಾ ದೇವಿ ಅವರ ಸ್ಪಷ್ಟತೆ ಮತ್ತು ವೇಗವನ್ನು ಶ್ಲಾಘಿಸಿದರು. ಅವರು ತಮ್ಮ ಶೈಕ್ಷಣಿಕ ಹಿನ್ನೆಲೆಯ ಬಗ್ಗೆ ಕೇಳಿದಾಗ, ಜೀವಿಕಾ ಗುಂಪಿಗೆ ಸೇರಿದ ನಂತರವೇ ತಾನು ತನ್ನ ಅಧ್ಯಯನವನ್ನು ಪ್ರಾರಂಭಿಸಿದೆ ಎಂದು ರೀತಾ ಉತ್ತರಿಸಿದರು. ಅವರು ಮೊದಲು ಮೆಟ್ರಿಕ್ಯುಲೇಷನ್, ಇಂಟರ್ಮೀಡಿಯೇಟ್ ಅಥವಾ ಪದವಿ ಪೂರ್ಣಗೊಳಿಸಿರಲಿಲ್ಲ, ಆದರೆ ಈಗ ಗ್ರಾಮೀಣಾಭಿವೃದ್ಧಿಯಲ್ಲಿ ಎಂಎಗೆ ಸೇರಿಕೊಂಡಿದ್ದಾರೆ. ಜಿಲ್ಲೆಯ ಎಲ್ಲಾ ದೀದಿಗಳ ಪರವಾಗಿ ತಮ್ಮ ನಿರಂತರ ಕೃತಜ್ಞತೆ ಮತ್ತು ಆಶೀರ್ವಾದಗಳನ್ನು ವ್ಯಕ್ತಪಡಿಸುವ ಮೂಲಕ ಅವರು ತಮ್ಮ ಮಾತುಗಳನ್ನು ಮುಕ್ತಾಯಗೊಳಿಸಿದರು.
ಗಯಾ ಜಿಲ್ಲೆಯ ಬೋಧ್ ಗಯಾ ಬ್ಲಾಕ್ನ ಜಿಕಾಟಿಯಾ ಗ್ರಾಮದ ನಿವಾಸಿ ಮತ್ತು ಗುಲಾಬ್ ಜಿ ವಿಕಾಸ್ ಸ್ವಸಹಾಯ ಗುಂಪಿನ ಅಧ್ಯಕ್ಷೆ ನೂರ್ಜಹಾನ್ ಖಾಟೂನ್, ಜಿಲ್ಲೆಯ ಎಲ್ಲಾ ಮಹಿಳೆಯರ ಪರವಾಗಿ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಮತ್ತು ಮುಖ್ಯಮಂತ್ರಿ ಶ್ರೀ ನಿತೀಶ್ ಕುಮಾರ್ ಅವರಿಗೆ ಹೃತ್ಪೂರ್ವಕ ಶುಭಾಶಯಗಳನ್ನು ತಿಳಿಸಿದರು. ಮುಖ್ಯಮಂತ್ರಿ ಮಹಿಳಾ ರೋಜ್ಗಾರ್ ಯೋಜನೆಯಡಿ ಮಹಿಳೆಯರಿಗೆ ಮೊದಲ ಕಂತಿನಲ್ಲಿ ₹10,000 ನೀಡಲಾಗುತ್ತಿರುವ ಬಗ್ಗೆ ಅವರು ಅಪಾರ ಸಂತೋಷ ವ್ಯಕ್ತಪಡಿಸಿದರು, ಈ ಘೋಷಣೆಯು ಮನೆಗಳು ಮತ್ತು ಹಳ್ಳಿಗಳಲ್ಲಿ ಉತ್ಸಾಹ ಮತ್ತು ಚರ್ಚೆಯನ್ನು ಹುಟ್ಟುಹಾಕಿದೆ, ಮಹಿಳೆಯರು ತಮ್ಮ ಅಪೇಕ್ಷಿತ ಜೀವನೋಪಾಯವನ್ನು ರೂಪಿಸಿಕೊಳ್ಳಲು ಯೋಜನೆ ರೂಪಿಸುತ್ತಿದ್ದಾರೆ ಎಂದು ಹೇಳಿದರು.
₹10,000 ಬಳಸಿಕೊಂಡು ವಸ್ತುಗಳನ್ನು ಪ್ರದರ್ಶಿಸಲು ಮತ್ತು ಮಾರಾಟ ಮಾಡಲು ದೊಡ್ಡ ಕೌಂಟರ್ ನಿರ್ಮಿಸುವ ಮೂಲಕ ತನ್ನ ಅಸ್ತಿತ್ವದಲ್ಲಿರುವ ಟೈಲರಿಂಗ್ ಅಂಗಡಿಯನ್ನು ವಿಸ್ತರಿಸುವುದಾಗಿ ನೂರ್ಜಹಾನ್ ತಮ್ಮ ಯೋಜನೆಯನ್ನು ಹಂಚಿಕೊಂಡರು. ಈ ಹಿಂದೆ ಹಳ್ಳಿಯ ಹೊರಗೆ ಕೆಲಸ ಮಾಡುತ್ತಿದ್ದ ನುರಿತ ಟೈಲರ್ ಆಗಿದ್ದ ಅವರು ಮತ್ತು ಅವರ ಪತಿ ಈಗ ಜಂಟಿಯಾಗಿ ಅಂಗಡಿಯನ್ನು ನಡೆಸುತ್ತಿದ್ದಾರೆ ಮತ್ತು ಈಗಾಗಲೇ ಹತ್ತು ಜನರಿಗೆ ಉದ್ಯೋಗ ಒದಗಿಸಿದ್ದಾರೆ. ₹2 ಲಕ್ಷ ಬೆಂಬಲವನ್ನು ಪಡೆದರೆ, ತಮ್ಮ ವ್ಯವಹಾರವನ್ನು ಮತ್ತಷ್ಟು ವಿಸ್ತರಿಸಲು, ಹೆಚ್ಚುವರಿ ಯಂತ್ರಗಳನ್ನು ಖರೀದಿಸಲು ಮತ್ತು ಇನ್ನೂ ಹತ್ತು ಜನರಿಗೆ ಉದ್ಯೋಗ ನೀಡಲು ಯೋಜಿಸಿರುವುದಾಗಿ ಅವರು ಹೇಳಿದರು.
ಮಹಿಳೆಯರ ಏಳಿಗೆಗಾಗಿ ಮುಖ್ಯಮಂತ್ರಿಯವರ ನಿರಂತರ ಪ್ರಯತ್ನಗಳನ್ನು ಅವರು ಶ್ಲಾಘಿಸಿದರು ಮತ್ತು 125 ಯೂನಿಟ್ಗಳವರೆಗೆ ಉಚಿತ ವಿದ್ಯುತ್ನ ಪರಿಣಾಮವನ್ನು ಎತ್ತಿ ತೋರಿಸಿದರು, ಇದು ತಮ್ಮ ಮನೆಯ ಬಿಲ್ ಅನ್ನು ಸಂಪೂರ್ಣವಾಗಿ ತೆಗೆದುಹಾಕಿದೆ. ಉಳಿತಾಯವನ್ನು ಈಗ ಅವರ ಮಕ್ಕಳ ಬೋಧನಾ ಶುಲ್ಕಕ್ಕೆ ಬಳಸಲಾಗುತ್ತದೆ. ಎಂದರು. ವೆಚ್ಚದ ಕಾರಣದಿಂದಾಗಿ ವಿದ್ಯುತ್ ಸಂಪರ್ಕ ಪಡೆಯುವುದನ್ನು ಕೈಬಿಟ್ಟಿದ್ದ ಬಡ ಮಹಿಳೆಯರು ಸಹ ಈಗ ಮನೆಗಳನ್ನು ಸಂಪೂರ್ಣವಾಗಿ ಬೆಳಗಿಸಿದ್ದಾರೆ , ಮಕ್ಕಳು ವಿದ್ಯುತ್ ಬಲ್ಬ್ಗಳ ಅಡಿಯಲ್ಲಿ ಅಧ್ಯಯನ ಮಾಡುವ ಅವಕಾಶ ಪಡೆದಿದ್ದಾರೆ ಎಂದು ನುಡಿದರು.
ಹಿಂದಿನ ಸವಾಲುಗಳನ್ನು ಪ್ರತಿಬಿಂಬಿಸಿದ ನೂರ್ಜಹಾನ್ ಸ್ವ-ಸಹಾಯ ಗುಂಪಿಗೆ ಸೇರುವ ಮೊದಲು, ಮಹಿಳೆಯರು ತಮ್ಮ ಮನೆಗಳಿಂದ ಹೊರಬರುತ್ತಿದ್ದುದು ವಿರಳವಾಗಿತ್ತು ಮತ್ತು ಕುಟುಂಬ ಸದಸ್ಯರಿಂದ ಪ್ರತಿರೋಧವನ್ನು ಎದುರಿಸುತ್ತಿದ್ದರು ಎಂಬುದನ್ನು ನೆನಪಿಸಿಕೊಂಡರು. ಕೆಲವರು ಕೌಟುಂಬಿಕ ಹಿಂಸಾಚಾರವನ್ನು ಸಹ ಸಹಿಸಿಕೊಳ್ಳಬೇಕಾಗಿತ್ತು. ಇಂದು, ಕುಟುಂಬಗಳು ಮಹಿಳೆಯರು ಹೊರಗೆ ಹೋಗಿ ಉತ್ಪಾದಕ ಕೆಲಸದಲ್ಲಿ ತೊಡಗಿಸಿಕೊಳ್ಳಲು ಪ್ರೋತ್ಸಾಹಿಸುತ್ತವೆ ಎಂದು ಅವರು ಹೇಳಿದರು. ಉದ್ಯೋಗ ಮತ್ತು ತರಬೇತಿ ಚಟುವಟಿಕೆಗಳಿಗಾಗಿ ಹೊರಗೆ ಹೋದಾಗ ತಮ್ಮ ಕುಟುಂಬವು ಅನುಭವಿಸುವ ಹೆಮ್ಮೆಯನ್ನು ಅವರು ಒತ್ತಿ ಹೇಳಿದರು ಮತ್ತು ಮಾಸ್ಟರ್ ಟೈಲರ್ ಆಗಿರುವ ತನ್ನ ಪತಿಯ ಸಹಾಯದಿಂದ ಇತರರಿಗೆ ತರಬೇತಿ ನೀಡುವ ಬಯಕೆಯನ್ನು ವ್ಯಕ್ತಪಡಿಸಿದರು.
ಅವರು ತಾವು ಮೊದಲು ತಮ್ಮ ಗಂಡನನ್ನು ತಮ್ಮ ಏಕೈಕ ಆಸ್ತಿ ಎಂದು ಪರಿಗಣಿಸಿದ್ದರು, ಆದರೆ ಈಗ ಅವರು ಹೆಮ್ಮೆಯಿಂದ ತನ್ನನ್ನು ಮನೆಯ "ಲಖಪತಿ" ಎಂದು ಕರೆಯುತ್ತಾರೆ ಎಂದು ಅವರು ಹಂಚಿಕೊಂಡರು. ಬಡತನ ಮತ್ತು ಹುಲ್ಲಿನ ಮನೆಯ ಸ್ಥಿತಿಯಿಂದ ಮೇಲೆ ಬಂದ ತಾವು ಈಗ ಚೆನ್ನಾಗಿ ನಿರ್ಮಿಸಲಾದ ಮನೆಯಲ್ಲಿ ವಾಸಿಸುತ್ತಿರುವುದಾಗಿ ಹೇಳಿದರು ಮತ್ತು ಗಯಾ ಜಿಲ್ಲೆಯ ಎಲ್ಲಾ ಮಹಿಳೆಯರ ಪರವಾಗಿ ಪ್ರಧಾನಮಂತ್ರಿ ಮತ್ತು ಮುಖ್ಯಮಂತ್ರಿಗಳಿಗೆ ಆಳವಾದ ಕೃತಜ್ಞತೆಯನ್ನು ವ್ಯಕ್ತಪಡಿಸಿದರು.
ಅವರ ಹೇಳಿಕೆಗಳಿಗೆ ಪ್ರತಿಕ್ರಿಯಿಸಿದ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ, ನೂರ್ಜಹಾನ್ ಖಾಟೂನ್ ಅವರ ಸ್ಪಷ್ಟತೆ ಮತ್ತು ಹೃತ್ಪೂರ್ವಕ ವಿವರಣೆಯನ್ನು ಶ್ಲಾಘಿಸಿದರು. ವಾರದಲ್ಲಿ ಒಂದು ದಿನ ವಿವಿಧ ಹಳ್ಳಿಗಳಿಗೆ ಭೇಟಿ ನೀಡಿ 50–100 ಮಹಿಳೆಯರನ್ನು ಒಟ್ಟುಗೂಡಿಸಿ ಅನುಭವಗಳನ್ನು ಹಂಚಿಕೊಳ್ಳುವಂತೆ ಅವರು ವಿನಂತಿಸಿದರು, ಅವರ ಕಥೆ ಇತರರಿಗೆ ಪ್ರಬಲ ಸ್ಫೂರ್ತಿಯಾಗುತ್ತದೆ ಎಂದು ಹೇಳಿದರು. ಅವರನ್ನು ಹೃತ್ಪೂರ್ವಕವಾಗಿ ಅಭಿನಂದಿಸಿದರು ಮತ್ತು ಅವರ ಕೊಡುಗೆಗೆ ಧನ್ಯವಾದ ಅರ್ಪಿಸಿದರು.
ಭವಾನಿಪುರ ನಿವಾಸಿ ಮತ್ತು ಮುಸ್ಕಾನ್ ಸ್ವಸಹಾಯ ಗುಂಪಿನ ಕಾರ್ಯದರ್ಶಿ ಶ್ರೀಮತಿ ಪುತುಲ್ ದೇವಿ, ಪೂರ್ಣಿಯಾ ಜಿಲ್ಲೆಯ ಜನರ ಪರವಾಗಿ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಮತ್ತು ಮುಖ್ಯಮಂತ್ರಿ ಶ್ರೀ ನಿತೀಶ್ ಕುಮಾರ್ ಅವರಿಗೆ ಹೃತ್ಪೂರ್ವಕ ಕೃತಜ್ಞತೆಗಳನ್ನು ವ್ಯಕ್ತಪಡಿಸಿದರು. ಮುಖ್ಯಮಂತ್ರಿಗಳ ಮಹಿಳಾ ಉದ್ಯೋಗ ಯೋಜನೆಯಡಿ ₹10,000 ಪಡೆದಿದ್ದಕ್ಕೆ ಅವರು ತಮ್ಮ ಸಂತೋಷವನ್ನು ಹಂಚಿಕೊಂಡರು, ಅವರು ಪ್ರಸ್ತುತ ಲಡ್ಡೂನಂತಹ ಸಿಹಿತಿಂಡಿಗಳನ್ನು ಮಾರಾಟ ಮಾಡುವ ಅಂಗಡಿಯನ್ನು ನಡೆಸುತ್ತಿದ್ದಾರೆ ಮತ್ತು ಈಗ ಟಿಕ್ರಿ, ಬಲುಶಾಹಿ, ಜಿಲೇಬಿ ಮತ್ತು ಬರ್ಫಿಯನ್ನು ಸೇರಿಸಿ ವಿಸ್ತರಿಸಲು ಯೋಜಿಸುತ್ತಿರುವುದಾಗಿ ಹೇಳಿದರು. ಕಷ್ಟಪಟ್ಟು ಕೆಲಸ ಮಾಡುವ ಮತ್ತು ₹2 ಲಕ್ಷ ಬೆಂಬಲಕ್ಕೆ ಅರ್ಹತೆ ಪಡೆಯುವ ತಮ್ಮ ದೃಢಸಂಕಲ್ಪವನ್ನು ದೃಢಪಡಿಸಿದರು, ಇದು ಅವರ ವ್ಯವಹಾರವನ್ನು ಹೆಚ್ಚಿಸಲು ಮತ್ತು ಹೆಚ್ಚುವರಿ ಸಿಬ್ಬಂದಿಯನ್ನು ನೇಮಿಸಿಕೊಳ್ಳಲು ಸಹಾಯ ಮಾಡುತ್ತದೆ.
ಹೊಸದಾಗಿ ಪ್ರಾರಂಭಿಸಲಾದ ಜೀವಿಕಾ ಬ್ಯಾಂಕಿನ ಪ್ರಯೋಜನಗಳನ್ನು ಪುತುಲ್ ದೇವಿ ಎತ್ತಿ ತೋರಿಸಿದರು, ಈ ಬ್ಯಾಂಕಿನ ಮೂಲಕ ಕಡಿಮೆ ಬಡ್ಡಿದರದ ಸಾಲಗಳನ್ನು ಪಡೆಯುವ ಮೂಲಕ ಅವರು ತಮ್ಮ ಆರ್ಥಿಕ ಸ್ಥಿತಿಯನ್ನು ಬಲಪಡಿಸಲು ಯೋಜಿಸಿದ್ದಾರೆ. ಸ್ಥಳೀಯ ಉದ್ಯಮವನ್ನು ಉತ್ತೇಜಿಸುವ ಪ್ರಧಾನಮಂತ್ರಿ ಯವರ ಕರೆಯ ಮೂಲಕ ರಾಷ್ಟ್ರದ ಬಲಕ್ಕೆ ಕೊಡುಗೆ ನೀಡುವುದಕ್ಕೆ ಅವರು ಹೆಮ್ಮೆ ವ್ಯಕ್ತಪಡಿಸಿದರು. ತಮ್ಮ ಅತ್ತೆಯ ಪಿಂಚಣಿಯನ್ನು ₹400 ರಿಂದ ₹1,100 ಕ್ಕೆ ಹೆಚ್ಚಿಸಿದ್ದಕ್ಕಾಗಿ ಮತ್ತು 125 ಯೂನಿಟ್ ಉಚಿತ ವಿದ್ಯುತ್ ಒದಗಿಸಿದ್ದಕ್ಕಾಗಿ ಅವರು ತಮ್ಮ ಸಂತೋಷವನ್ನು ಹಂಚಿಕೊಂಡರು, ಇದು ಹಣವನ್ನು ಉಳಿಸಲು ಮತ್ತು ತಮ್ಮ ಮಗುವಿನ ಶಿಕ್ಷಣದಲ್ಲಿ ಹೂಡಿಕೆ ಮಾಡಲು ಅನುವು ಮಾಡಿಕೊಡುತ್ತದೆ. ಪೂರ್ಣಿಯಾದ್ಯಂತ ಮನೆಗಳಿಗೆ ಸಂತೋಷ ಮತ್ತು ಸಮೃದ್ಧಿಯನ್ನು ತಂದ ಯೋಜನೆಗಳನ್ನು ಪರಿಚಯಿಸಿದ್ದಕ್ಕಾಗಿ ಅವರು ಇಬ್ಬರೂ ನಾಯಕರಿಗೆ ಧನ್ಯವಾದ ಅರ್ಪಿಸಿದರು.
ಅವರ ಹೇಳಿಕೆಗಳಿಗೆ ಪ್ರತಿಕ್ರಿಯಿಸಿದ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ತಮ್ಮ ವ್ಯವಹಾರವನ್ನು ಪ್ರಾರಂಭಿಸುವಾಗ ತಮ್ಮ ಕುಟುಂಬ ಅಥವಾ ಸಮುದಾಯದಿಂದ ಆರಂಭಿಕ ಸವಾಲುಗಳನ್ನು ಎದುರಿಸಿದ್ದೀರಾ ಎಂದು ಕೇಳಿದರು. ಅನೇಕ ಜನರು ತಮ್ಮ ಪ್ರಯತ್ನಗಳನ್ನು ಅಪಹಾಸ್ಯ ಮಾಡಿದರು, ಆದರೆ ತಾವು ದೃಢನಿಶ್ಚಯದಿಂದ ಇದ್ದುದಾಗಿ ಮತ್ತು ತಮ್ಮ ಸಣ್ಣ ಉದ್ಯಮವನ್ನು ಲಡ್ಡು ಮತ್ತು ಬಟಾಷಾದೊಂದಿಗೆ ಪ್ರಾರಂಭಿಸಿದ್ದಾಗಿ ಪುತುಲ್ ದೇವಿ ಉತ್ತರಿಸಿದರು. ಜೀವಿಕಾ ಸೇರಿದ ನಂತರ, ಅವರು ತಮ್ಮ ಮನೆಯನ್ನು ನಿರ್ಮಿಸಲು ಮತ್ತು ಕತಿಹಾರ್ನಲ್ಲಿ ಸರ್ಕಾರಿ ಪ್ರಾಯೋಜಿತ ಬಿ.ಟೆಕ್ ಪದವಿಯನ್ನು ಪಡೆಯುತ್ತಿರುವ ತಮ್ಮ ಮಗುವಿಗೆ ಶಿಕ್ಷಣ ನೀಡಲು ಸಾಲವನ್ನು ಪಡೆದಿದ್ದಾಗಿಯೂ ಹೇಳಿದರು.
ಅವರು ಜಿಲೇಬಿ ಬಗ್ಗೆ ಹೇಳಿದ್ದಕ್ಕೆ ಪ್ರಧಾನಮಂತ್ರಿ ಮೆಚ್ಚುಗೆ ವ್ಯಕ್ತಪಡಿಸಿ, ಆ ಸಿಹಿತಿಂಡಿ ಒಂದು ಕಾಲದಲ್ಲಿ ದೇಶದಲ್ಲಿ ರಾಜಕೀಯ ಚರ್ಚೆಯ ವಿಷಯವಾಗಿತ್ತು ಎಂದು ಹಾಸ್ಯಮಯವಾಗಿ ಹೇಳಿದರು. ಪ್ರಧಾನಮಂತ್ರಿ ಯವರು ಅವರನ್ನು ಹೃತ್ಪೂರ್ವಕವಾಗಿ ಅಭಿನಂದಿಸಿದರು ಮತ್ತು ಅವರ ಸ್ಪೂರ್ತಿದಾಯಕ ಕಥೆಗೆ ಧನ್ಯವಾದ ಅರ್ಪಿಸಿದರು.
