প্রধান মন্ত্রী, শ্রী নরেন্দ্র মোদীনা ঙসি 77শুবা নীংতম নুমিৎকী থৌরমদা লাল কিলাগী লানবনদগী ৱা ঙাংলদুনা ভারতকী এক্সপোর্তশিং খোঙজেল য়াংনা হেনগৎলক্লি অমসুং মালেমনা ভারত অসি হৌজিক লেপ্পা লৈররোই হায়নরি হায়না ফোঙদোকখ্রে। মালেমগী রেতিং এজেন্সীশিংনা ভারতপু থাগৎনরি অমসুং কোরোনা মতুংগী অনৌবা ৱর্ল্দ ওর্দর অসিদা ভারত মচাশিংগী শক্তি অসি শকখঙলি হায়না মহাক্না ফোঙদোকখ্রে। গ্লোবেল সপ্লাই চেনশিংদা অপনবা থোকপা মতমদা ঐখোয়না মালেমদা মীওইবগী মথৌ তাবশিংদা মীৎয়েং চংলবা খক্তদা লম্বীশিং পুথোকপা ঙমগনি হায়বা উৎখি হায়না মহাক্না ফোঙদোকখ্রে। প্রধান মন্ত্রীনা হায়খি ঙসি ভারতনা গ্লোবেল সাউথকী ভোইস ওইরকখি অমসুং ভারতকী ইকনোমী অসিনা গ্লোবেল সপ্লাই চেনগী শরুক অমা ওইবা ঙমদুনা স্তেবিলিতী লৈহল্লি।
স্তার্তঅপশিংগী মতাংদা ৱা ঙাংলদুনা প্রধান মন্ত্রীনা হায়খি ভারতকী নহারোলনা লৈবাক অসিবু মালেমগী মকোক থংবা স্তার্তঅপ ইকোসিস্তেম অহুমগী মনুং চলহনখি। মহাক্না মখা তারদুনা হায় মালেমগী নহারোলনা ভারতকী নহারোলগী দিবেলপমেন্ত উবদা অঙকপা পোকখি, তৌবা ঙম্বা উবদা অঙকপা পোকখি। ঙসি মালেম অসি তেক্নোলোজী দ্রিবন ওইরে অমসুং ভারতনা তেক্নোলোজীগী লমদা লৈরিবা তেলেন্ত অসিনা মালেমদা ঐখোয়না মরু ওইবা থৌদাং অমা লৌবা ঙমহল্লগনি। প্রধান মন্ত্রীনা হায়খি চাউখৎপা লৈবাক অয়াম্বগী মালেমগী লুচিংবশিংনা দিজিতেল ইন্দিয়াগী মাইপাকপপু শকখঙখি অমসুং থৌশিলশিং অসিগী মরমদা হেন্না খঙবা পাম্লি।
