નિરમા યુનિવર્સિટીના NU TECH-’12 નું ઉદ્દધાટન કરતા મુખ્યમંત્રીશ્રી
કૃષિ અને ગ્રામવિકાસ માટે ગુજરાતની ફોરેન્સિક સાયન્સ યુનિવર્સિટીનો વિનિયોગ કરાશે
ગ્રામસમાજમાં સહજ સ્વીકૃત બને તેવી ટેકનોલોજી વિકસાવીએ
મુખ્યમંત્રીશ્રી નરેન્દ્રભાઇ મોદીએ નિરમા યુનિવર્સિટીમાં ટેકનો મેનેજમેન્ટ કાર્નિવલ-NUTECH-‘12નું ઉદ્દધાટન કરતાં ગ્રામવિકાસના ક્ષેત્રોમાં ટેકનોલોજીથી કૃષિ અને ગ્રામીણ સમસ્યાઓનું સમાધાન કરવા માટે રાજ્યની ફોરેન્સિક સાયન્સ યુનિવર્સિટીનું નેટવર્ક વિકસાવવાનો નિર્ધાર વ્યકત કર્યો હતો.
NUTECH’12 એ નિરમા યુનિવર્સિટીના ૧૩ જેટલા વિઘાર્થીમંડળોએ જ ટેકનોલોજી અને મેનેજમેન્ટનો સમન્વય કરીને, કાર્યરત કરેલ ઇન્સ્ટીટયુટ ઓફ ટેકનોલોજીના ઉપક્રમે ત્રણ દિવસ માટે પ્રોજેકટ કાર્નિવલનો પ્રારંભ ભારતમાં પ્રથમ આયામ છે. આ ટેકનો મેનેજમેન્ટનું વિષયવસ્તુ ગ્રામવિકાસ આધારિત છે.
મુખ્યમંત્રીશ્રીએ ફોરેન્સિક સાયન્સ યુનિવર્સિટી માત્ર ગૂના સંશોધન-પરીક્ષણના મર્યાદિત ક્ષેત્રમાં જ નહીં, પરંતુ ગામે-ગામ ખેડૂતો સુધી પહોંચે અને કિસાનોને ખેતીવાડી માટે જંતુનાશક દવાઓ, બિયારણ, ખાતર વગેરે માટેનું શુધ્ધતા અને ગુણવત્તાનું પરીક્ષણ ફોરેન્સિક સાયન્સના માધ્યમથી થાય તે દિશામાં ટેકનોલોજીનો વિનિયોગ કરવાની ભૂમિકા આપી હતી.
ગ્રામ સમાજમાં ટેકનોલોજીના સ્વીકાર અને ઉપયોગની કોઠાસૂઝ એક સ્વાભાવિક પ્રક્રિયા છે એના દ્રષ્ટાંતો આપી શ્રી નરેન્દ્રભાઇ મોદીએ જણાવ્યું કે ગરીબ, અભણ અને અર્ધશિક્ષિત નારીશકિત પણ ટેકનીકલ સંસાધનોનો રોજબરોજ રસોડામાં ઉપયોગ કરવાની સહજ સૂઝ ધરાવે છે. ભાગ્યેજ એવાં કોઇ ગામ હશે જ્યાં ટેકનોલોજીને કોઠાસૂઝથી સ્થાનિક પ્રશ્નોના ઉકેલ માટે સામાન્ય માનવી ઉપયોગમાં લેતો ના હોય!
ટેકનોલોજી દ્વારા ગ્રામજીવનમાં સામાજિક-આર્થિક અને શૈક્ષણિક ક્ષેત્રે ગુણાત્મક બદલાવ લાવવા માટેની ટેકનોલોજીની નવી શોધના બદલે તેના સંશોધન-સુધારા ઉપર યુવાશકિતને ધ્યાન કેન્દ્રીત કરવાનું આહ્્વાન આપતાં શ્રી નરેન્દ્રભાઇ મોદીએ જણાવ્યું કે ગ્રામીણ સમાજને સહજ સ્વીકૃત હોય એવી ટેકનોલોજીનો વિકાસ કરવો જોઇએ. ""સાયન્સ યુનિવર્સલ એન્ડ ટેકનોલોજી લોકલ'' એ મંત્ર આપતાં મુખ્યમંત્રીશ્રીએ ઇજનેરી વિઘાર્થીઓના પ્રોજેકટની સાફલ્યગાથાને બિરદાવી હતી.
મુખ્યમંત્રીશ્રીએ કુપોષણની પીડા અને માતા-બાળ મૃત્યુ દરની રાષ્ટ્રીય સમસ્યાના ઉકેલ માટે ટેકનોલોજીનો ઉપયોગ કરવા વિશે આહ્્વાન કર્યું હતું. તેમણે જણાવ્યું કે હિન્દુસ્તાન એ વિશ્વનો સૌથી યુવા દેશ છે, અને હવે યુવાનોને ડિગ્રીધારી નહીં પરંતુ હુન્નર-કૌશલ્ય માટે સામર્થ્યવાન બનાવીને જ સમસ્યાઓના ઉકેલની દિશામાં પ્રવૃત કરવાનો સમય પાકી ગયો છે.
સ્વામિ વિવેકાનંદની દોઢસોમી જ્યંતીનું વર્ષ ગુજરાત યુવાશકિત વર્ષ તરીકે ઉજવશે અને હુન્નર કૌશલ્યવર્ધન ઉપર ધ્યાન કેન્દ્રીત કરાશે એમ જણાવી આ સંદર્ભમાં મુખ્યમંત્રીશ્રીએ યુવાનોને સ્કીલ + વિલ + ઝીલ = વિન (SKILL + WILL + ZEAL=WIN) નો વિજય મંત્ર આપ્યો હતો.
આ પ્રસંગે નિરમા યુનિવર્સિટીના પ્રમુખ સ્થાપક ઉઘોગપતિશ્રી કરશનભાઇ પટેલ, ડિરેકટર જનરલ ડો. એન. વી. વસાણી, ઇન્સ્ટીટયુટ ઓફ ટેકનોલોજીના ડિરેકટર ડો. કે. કોટેચા, ડો. ડી. કે. કોઠારીએ NU TECH-12ના આયોજન અને ઉદ્ેશની ભૂમિકા આપી હતી.
મુખ્યમંત્રીશ્રીએ ઇજનેરી વિઘાર્થીઓએ તૈયાર કરેલા પ્રોજેકટનું નિરીક્ષણ કરી તેમને પ્રોત્સાહિત કર્યા હતા.
