મંત્રીમંડળે ફાસ્ટ ટ્રેક વિશેષ અદાલતો માટે કેન્દ્ર સરકાર દ્વારા પ્રાયોજિત યોજનાને વધુ ત્રણ વર્ષ માટે ચાલુ રાખવાની મંજૂરી આપી
November 29th, 03:53 pm
મહિલાઓ અને બાળકોની સુરક્ષા અને સલામતી સુનિશ્ચિત કરવાની દિશામાં સરકારની અવિરત અગ્રતા 'બેટી બચાઓ, બેટી પઢાઓ' કાર્યક્રમ જેવી અનેક પહેલો દ્વારા સ્પષ્ટ થાય છે. બાળકીઓ અને મહિલાઓ પર દુષ્કર્મની ઘટનાઓએ દેશ પર ઉંડી અસર કરી છે. આ પ્રકારની ઘટનાઓની વારંવારની અને અપરાધીઓની લાંબી સુનાવણીને કારણે એક સમર્પિત અદાલતી પ્રણાલીની સ્થાપના કરવી જરૂરી બની હતી, જે ટ્રાયલને ઝડપી બનાવવા અને જાતીય ગુનાઓનો ભોગ બનેલા લોકોને તાત્કાલિક રાહત પૂરી પાડવા માટે સક્ષમ હોય. આના પરિણામે, કેન્દ્ર સરકારે ધ ક્રિમિનલ લો (એમેન્ડમેન્ટ) એક્ટ, 2018 બનાવ્યો હતો, જેમાં દુષ્કર્મના ગુનેગારોને મૃત્યુદંડ સહિત કડક સજાનો સમાવેશ થાય છે, જે ફાસ્ટ ટ્રેક સ્પેશિયલ કોર્ટ્સ (એફટીએસસી)ની રચના તરફ દોરી જાય છે.